1956: Ph'lip et la saison.

 Ph'lip et la saison.

 

Moussieu l'Editeu,

 

Hier matin, quand j'fut vais ma bordeuse, dans l'gardin, j'm'apérchut que souos la muthaille, les patates qu'menchaient à pérchi. J'avais plianté un mio d'bouonne-heuthe là, comme de couôtume, mais l'année pâssée l's'ob'gélées avaient nétti l'bétchet trais fais d'siette, et je n'fis pas un sous d'sûs. Ch't'année j'vis en éspethance de tchiquechose de miyeu, car j'n'ai pas ocquo péyi la s'menche ou l'gouâino, et si je n'fais pas tchiques sous au qu'mench'ment d'la saison j'pouorrais m'trouvé en embarras.

 

Paslant d'la saison, y pathait qu'y'étha hardi d'changements. A qu'menchi l'férmyi pouôrra dêfoui quand y voudra, sans avé la pérmission d'yun d'chais Inspecteurs tch'y n'taient d'autchune utilité sinon pour embêté l'fermyi. Epis, nous entend étout qu'nou pouôrra patchi les patates dans l'clios, comme dans les viers temps. Mais, y faudra, sans doute tchique sorte d'inspéction sûs l'bridge ou sûs la cauchie, autrement toutes les pitchies s'trouv'thont dans les bathis, et y'étha hardi d'moyennes parmi les grôsses, sans pâslé des mottes de têrre et des vieilles patates à maintchi pouôrries.

 

J'comprends étout que chais trais charmants viers Jèrriais tch'y fallait allé vais après avé p'sé sûs l'bridge, ne s'sont pas là. Ch'est une chose à r'grétté car ch'tait trais bouons viers Jêrriais, tch'avaient tréjous un souôri pour la férmyi, et tch'y pathaissaient faithe lûs travas comme-y-faut. Sûs l'bridge, si j'peux craithe chein qu'nou m'a dit, nou n'vêrra pas l'gros Fred Buesné et ses collègues, car y n'y'étha rain pour yeux à faithe. Et Moussieu Godfray ne s'sa pas là, car il a tait forchi d'résigni. Y faudra un rempliéchant et nous éspethe que che s'sa l'Jack Bianchet, car il a tréjous fait san travas admithablyement, et est bein populaithe parmi les férmiers.

 

Pâslant d'autre chose, la Merrienne veur savé pourtchi qu'un Angliais a tait nommé Président du Comité des Biautés Natuthélles. Quand ou vit chonna sûs la gâzette ou me d'mandit tout-d'suite tchèsque chonna voulait dithe, et tchèsqu'il tait chu Moussieu.

 

“Quant à chein tch'il est, Merrienne,” j'l'y dit, “il est yun des Députés d'Saint-Sauveux, et un officyi d'la marine angliaise r'tithé. Ch'est un C'mandant, ch'est pourtchi ch'n'est pas d'la p'tite bièthe. Mais si tu veur savé pourtchi qu'nou l'a mint Président d'chu Comité, j'peux t'dithe tout net et cârré que ch'tait parsque n'y'avait pas un autre membre tch'y voulait la djobbe, chu Comité-là n'étant pas populaithe.”

 

“Et tchèsqu'il étha ov l'y?” ou d'mandit. “Y n'peut pas bein agi tout seu, ou peut-y?”

 

“Bein seux tch'y n'peut pas,” j'l'y dit, “mais n'te gène pas, y trouv'tha assez d'membres pour formé l'Comité, et j'ai dans l'idée que l'Sénateur Le Mérquand en s'sa yun.”

 

“Oh, si ch'est d'même,” ou s'fit, “chu C'mandant n'sais pas tchèsqu'y l'attend, mais y veindra à dêcouvri bétôt tchèsque chais qu'd'avé sûs san Comité un Jêrriais d'la vieille trempe, tch'y sais tchèsqu'y veur et tch'y n'a peux d'pérsonne. J'éthais creu, mé, Ph'lip, que dans les circonstances, le Jack Le Mérquand éthait tait l'nouviau Président car ch'tait l'y tch'avait tait la cause de la dêmission du Comité actuel.”

 

“Dans l'temps du Baillyi Vernon,” j'l'y dit, “il éthait tait forchi d'entreprendre la djobbe, mais ach'teu ch'n'est pas d'même. Avec chonna si notre Jack avait voulu être Président, il y s'sait v'nu sans autchune oppôsition, mais s'il est têtoigne, comme tous bouons Saint-Ouennais, y l'y n'manque pas d'l'intélligence, et y savait mûs que d'prendre une djobbe tchi y'éthait donné pûs gène que d'credit. Mais, comme té, j'crais bein tch'y n'vêrra pas tréjous les choses a travers les mêmes lunéttes comme le Président. Enfin, le temps ditha tout.

 

Ph'lip.

1956