1955: Rêunion Générale

 L'Assembliée d'Jèrriais

Rêunion Générale

 

La Rêunion Générale Annuelle eut lieu Vendrédi au sé lé 30 dé Septembre, 1955, à 8 heures, dans la Salle d'Agritchulture, St. Hélyi. La Salle 'tait bein remplyie d'membres.

 

Lé rapport dé la dèrnière rêunion générale fut liu, approuvé et adopté. Un état financyi montrit eune balanche en faveur dé l'Assembliée. Dévant c'mmenchi l'êlection d'Officièrs et d'Comités pour l'année 1955-56, lé Président fit la beinv'nue à Moussieu F. V. Le Feuvre, Président d'Honneur, qu'avait ieu la bouanté dé v'ner à la rêunion. I' dit étout comment que j'avions touos r'gret dé penser qué Moussieu H. Le Riche Edwards (not' aut' Président d'Honneur), 'tait ocouo malade et empêchi d'être auve nous.

 

La Sécrétaire liut eune lettre qu'avait 'té envyiée au Sénateu Edwards auve touos les bouans voeux dé l'Assembliée, li souhaitant bein millieure santé dans les jours à v'ner.

 

Moussieu Crill annoncyit qu'il avait décidé dé né pus r'prendre comme Président. Il avait terminé deux ans d'office et i' dit qu'il 'tait temps qu'il sait rempliaichi. En sé r'tirant, Mons. Crill ermèrcyit touos l's officièrs pour lus dévôtion et lus fidélité durant toute l'année.

 

Lé Trésôryi annoncit qu'i' voudrait être rempliaichi viyant qu'i'na pus l'temps qui l'i faudrait pour soigni l's affaires dé l'Assembliée. Ch'fut avec grand dépiet qué les membres acceptîtent sa décision.

 

Lé Sénateu Le Marinel, en tchinq mots, ermèrcyit lé Président, la Sécrétaire et l'Trésôryi, et Moussieu F. V. Le Feuvre lus offrit ses r'mèrciements étout.

 

L's Officièrs.

 

V'chin la liste d'Officièrs pour l'année tchi veint:-

 

Présidents d'Honneur: Lé Juge F. V. Le Feuvre et l'Sénateu H. Le Riche Edwards.

 

Président: Lé Sieur Chs. P. Billot.

 

Vice Présidents: Lé Connêtablye S. G. Crill et lé Sieur Frank Trachy. Mesdames K. Le Maistre et F. Perrier.

 

Trésôryi: Lé Sieur Raymond Baudains.

 

Sécrétaire: Mlle Lucille Picot.

 

Sécrétaire Assistante: Mme Amelia Perchard.

 

Auditeurs: Lé Sieur Ph. Le Ruez et lé Sieur R. Chs. Le Rossignol.

 

Membres du Comité: Messieux G. W. Bertram, E. Vibert, F.Le Maistre, W. du Tot, J. N. Richard, G. J. Perchard, P. Le Moignan, R. T. Cabot, lé Député H. Gibaut, J. W. Le Breton et Mesdames M. Trachy et P. Green (Député).

 

Nouvieaux Membres.

 

Les nouvieaux membres êlus sont:

 

Lé Député E. R. Le Cornu, lé Chentnyi H. Le Feuvre, lé Sieur Frank A. Turner, lé Sieur Walter Ph. Mourant, lé Sieur Harold Renouf, Mme Lucille Renouf et Mme Louisa Noel.

 

Divèrtissements

 

Lé Sieur Sarre ercitit “Ma Vielle Haulouoge”, par “Ch'la speut,” (John Lock), et i' donnit la vraie erprésentation d'la pièche I' fut hardi appliaudi. Ensuite i' y eut Vingt Tchestchions en Jèrriais, auve M. Jean Richard comme Maître des Tchestchions. Les membres chouaisis pour y rêpondre s'en dêhallitent dé lus mus et l'audience lus donnit l'encouoragement qui méritaient. Lé Président ermèrcyit Moussieu Sarre et l's autres membres pour nos aver divèrtis.

 

La préchaine Rêunion

 

La rêunion mensuelle éra lieu Vendrédi au sé, lé 21 d'Octobre, 1955, à 8 heures, dans la Salle d'Agritchulture, à St. Hélyi.

 

1.                   I'y éra, pour dgiex minutes, des mathématiques amusantes, par lé Sieur Ph. Ahier, B. ès S.

 

2.                   L'audience s'ra invitée à répondre à des tchestchions d'intérêt entouore Jèrri.

 

3.                   Lé Sieur G. W. Bertram s'en va donner un Ciné Film dé veues, montrant l'excursion à Granville et autres.

 

Lé Bulletin No. 12 s'ra en vente.

 

N.B. – Les souscriptions sont payables ach'teu. Lé Trésôryi espère les r'chéver toutes dévant Noué, 1955.