1931: Deustrais d'nos amins d'la campagne se trouvithent ensemblye

Deustrais d'nos amins d'la campagne se trouvithent ensemblye dans not'e bureau avant hier et distchutaient entre ieux les dernié nouvelles.

 

Opprès aver êpuisé la tchestion d'la maladie dans les tomates, la manque de main-d'oeuvre pour en souognie comme i' faut, opprès aver ênumethé toute une liste de fermiers qu'avaient perdu d'la maintchi d'lus pliante, êgalement par la maladie, la conversation touâni sus la tchestion du Doryphore, ch'est-à-dithe le “Colorado Beetle,” qui pathaît-i' est à faithe ses ravages dans certaines parties de la France et qui m'niche d'affecter sérieusement les intéthêts des fermiers qui spétchulent sus la patate, comme font nos vaisins dans la région de St. Malo.

 

1959: Une femme pour Jure-Justicier

 Une femme pour Jure-Justicier.

Pourtchi pas? d'mande le Portinfé.

 

Moussieu l'Editeu,

 

Ch'est avec grand pliaisi que j'peux vos dithe agniet que ma bordeuse est pliantée. Man fils, le Bram, 'tait v'nu la s'maine pâssée pour la prépathé, et hier le v'là tch'arrive avec sa bêque à sept heuthes du matin. Quand j'eûmes dêjeuné, nos v'là hors pour qu'menchi la djobbe. Le Bram faisait l'rang, pliantait, et m'aidgait à méttre le gouâino, et quand vint chinq heuthes de l'arlevée ch'tait tout fini. Y faut que j'vos diche, Moussieu, que man fils est yun des forts gâs d'la pâraisse, tch'y peut fouï ses siéz pérques dans san jour sans s'dêrangi. Quand j'rentrîmes, la Merrienne nos donnit un raide bouon r'pâs, et après, quand l'Bram mint san chapé pour s'en r'allé siez-l'y, ou l'y donnit une poutchie d'mérveilles et du chocolat pour la dgaingue de mousses. Pûs tard, assise aupi d'san feu, ou s'mint à pâslé d'l'êléction pour Juré-Justicier.

 

“J'ai grand r'grét,” ou qu'menchi, “que man couôsin l'Ernest Le Cornu n'a pas voulu prendre. Un bouan vier nom Jêrriais, et un grand fort balloque tch'éthait pathu hardi bein dans sa rouoge robe. Ch'tait justement l'homme tch'y nos fallait.”

 

1931: D'pis qu'un homme de louai m'avait asseuthé

 D'pis qu'un homme de louai m'avait asseuthé que l'Sieur Caouain était responsable de me maintenir ainsi que les p'tits caouains, car il yen a une poussinée, j'étais décidée à n'pus d'autre écrithe pouor la gazette.

 

Ch'est que viyous avec un oisé couomme ly, piercheux à en gagni l'prumi prix, il y avait tréjous tchique extchuse pouor que j'fasse son travas ou bein sinon ce s'rait perdre sa job à l'office.

 

Mais je couonnais mon oisé et couomme il a de grandes idées et qui s'crait tchique chose chaque fais qu'il a tchique extchuse pouor ne pon faithe son travas j'n'ai qu'à ly dithe que si les herpins manquent pouor ly se s'ra une visite à la p'tite Cour et que s'il n'garde pon à ly, les siens du Glouster Hotel ly trouveront du travas.

 

1951: Ocquo les Senateurs

 Ocquo les Senateurs.

Merrienne fait san plian.

 

Moussieu l'Editeu,

 

Ch'est avec un certain dêpié que j'vos annonce agniet que j'ai abandonné l'idée de m'mettre sûs les rangs pour Sénateur.

 

La Merrienne me dit tout net et cârré l'autre sé que si je t'nais bon ou s'en îthait en Djérnési ouèsque oulle a une soeu, et réstethait là siez mais, ou pûs. Ach'teu, Moussieu, je n'voudrais pas m'dêfaithe d'une femme tch'y peut prépathé d's'ormers et rôti un poulet comme le fait la bouonnefemme, ch'estentchi je n's'y pas candidat.

 

Ach'teu hier au sé, la Merrienne, tch'est hardi intérêssie dans chutte êléction, m'dit comme chonna: “Ph'lip, ne v'la l'jour qu'arrive, et y faudra allé voté. Combain qu'y'a d'candidats?”

 

1958: Ph'lip et Merrienne

 Ph'lip et Merrienne

 

Moussieu l'Editeu,

 

“Eh bein, man Ph'lip, ils ont trouvé un Connêtablye à Saint-Hélier. Tchèsque tu'en crais du r'sultat?”

 

“Je m'grattit la tête. Chein qu'j'en crais, Merrienne, ch'est que l's'êlécteurs de la Ville dév'thait avé grand honte. La grande mâjorité n'dêshallites pas, et pourtant le poste de Connêtablye de Saint-Hélier est yun des pûs importants d'l'Ile. Y'a une chose Merrienne; je fut bein êtonné d'la mâjorité de pûs d'quatre chents, car même dans la matinée nous avait ouï que n'y'éthait pas grand' difféthence d'un bord ou d'l'autre.”

 

“Sans doute,” ou dit, “le r'sultat fut un choc pour le Député Hettich.”

 

1958: Le grand show

 Le grand show.

Ph'lip raconte à la Merrienne

 

Moussieu l'Editeu,

 

Je sommes ocquo en vie, la Merrienne et mé, mais j'vos asseuthe que la niet passée je n'tais pas trop seux par bordée qu'notre vieille maison pouôrrait s't'nin d'but, car y v'nait des pouffes de vent tchi la châtchaient jusqu'ès fondâtions. Heureûsement, dans l'temps qu'ou fut bâtie, nou bâtissait pas pour un jour, comme ach'teu, mais pour des générâtions.

 

Hier matin, j'eut la chance d'un pâssage, et, malgré l's'objéctions d'la bouonnefemme, j'm'en fut au grand show d'bêtes en Ville, et, si j'avais yeu l'avis de m'en r'venin d'bouonne heuthe, j'ne s'sais pas r'venu trempé, et agniet j'n'éthais pas une suée d'fraid, tchi n'amende pas quand la Merrienne, m'entendant êtérnué, m'dit, une doûzaine de fais, que si j'l'avais êcoutée, etcétra, etcétra.

 

1958: D'la tristesse au Portinfé

 D'la tristesse au Portinfé.

Mais tout va bein ach'teu.

 

Moussieu l'Editeu,

 

Grande dêtresse au Portinfé! Minsèthe partout! La Merrienne et mé au m'séspé! Vraiement, je n'sais pas tchèsqu'y s'en va s'arrivé! Quatre vrégies d'patates à dêfouï et autchun aide! Des poules tchi crèvent de la pépie! Des vaques tchi n'donnent pas d'lait, des patates à trente-quatre chelins et la vieille catte à la Merrienne dans l'solyi avec bétôt une doûzaine de p'tits! Tchi faithe, Moussieu?

 

Hier matin, j'nos en fûmes au clios, la Merrienne et mé, pour vais si y'avait moyen d'en dêfouï tchiques pèrques, mais, Moussieu, l'affaithe finit mal. Au but d'une dem'ieuthe j'n'en pouvais pûs, et ma pouôre bouonnefemme, tch'avait tachi d'êterré, tait ocquo pièthe. J'rentrîmes dans la tchuîsine, et mé j'm'assis dans ma grand'tchaise, tandis qu'la Merrienne, se pliaignant d'ma dans les g'nors, dans l'dos, dans les reins et dans je n'sais pon tchi, s'êtrav'lit tout san long sûs l'sofa. Je réfliétchit que j'en avais cliérgi en tout pûs d'une démié-perque, que les patates 'taient ocquo sûs la têrre, et que j'éthions fait bein mûs d'n'y touchi pas. Et, entre nous, Moussieu, s'ou voulait par chance une bouonne frouque, y'en a yunne ichin qu'ou pouvez avé pour rain.

 

1951: Vaques et Senateurs

 Vaques et Senateurs.

Merrienne veur savé.

 

Moussieu l'Editeu,

 

Ch'est avec grand pliaisi que j'vos annonce que la Merrienne m'a donné pérmission d'allé au grand show en ville, mècredi tchi veint. Je crai qu'oulle est v'nue à vais que pour une bouonne chrêtienne ou n'fut pas trop charitablye envers mé la s'maine passée.

 

Pour continué. Hier je recontrit sûs le qu'min man biau-fils, le Bram, et sachant tch'il tait à touos les shows d'pâraisse, j'l'y d'mandit tchi vaque tch'y s'n'allait gâgni l'championnat en ville.

 

A qu'menchi, y faut que j'vos diche que l'Bram, quand y mathyit notre Jane print une drôle de hardelle, et l'appréhandais hardi que l'affaithe touôn'nait mal. Mais, au contraithe, oulle à touôné raide ben, car Le Bram fait comme y veur, sort quand y veur, et r'veint quand y veur. Et la Jane fait exactement la même chose. Si rentre pour dîné et trouve que n'y'a rain d'prêt, y s'en pâsse, et quand ou veur tchiques sous pour un neu chapé ou une neuve pathe de souliers et tch'y dit tch'y n'en a pas, ou fouôille dans ses pouchettes quand y dort et tout est ben. Ch'est un système que l'Bram r'quémande à touos les nouviaux mathiés. “Quand nou fait d'même,” y dit, “n'y'a jamais d'brit.”

 

1951: La Merrienne y'a r'pensé

 La Merrienne y'a r'pensé.

de nouvelles conditions.

 

Moussieu l'Editeu,

 

Ou vos r'souveindrez que la s'maine pâssée la Merrienne, tch' est si intérêssie dans la politique ach'teu qu'ou m'rêvillye mème dans l'mitan d'la niet pour me d'mandé tchique bête de tchéstchon, avait décidé que s'ou votait pour quatre des candidates et mé pour l'autre maintchi n'y'éthait pas d'jalousie, et touos les huit mêssieux s'saient satisfaits.

 

Mais, malheutheusement, ou vint à y r'pensé, et quand vint Dîmanche matin la v'là tch'y qu'menche à voulé distchuté la situâtion.

 

J'objectit prompt'ment. “Merrienne,” j'l'y dit sévèthement, “mange ta beurre et oublie l'êlection pour agniet. Tu dév'thais savé qu'ch'est Dîmanche, et qu'nou n'pâsle pas la politique le Jour du Sabbat. D'main au matin j'pouôrrons p't'être distchuté l'affaithe un mio, mais pas agniet. Laisse-mé en r'pos, j't'en prie, pour vingt-quatre heuthes.”

 

1951: Une députâtion au Portinfé

 Une députâtion au Portinfé

Ph'lip pour Sénateur.

 

Moussieu l'Editeu,

 

“Grand doux!” s'fit la Merrienne, mettant la gâzette sûs ses g'nors, “tchi tâs d'mêssieux tch'y veulent être Sénateurs. Tu m'as dit tchi n'y'a que quatre vacances, et lûs l'papi y'a sept candidats d'nommés.”

 

“Vèthe,” j'l'y dit, “et d'main y'en étha p't'être un huitième.”

 

“Bon! et tchèsque ch'est?”

 

“Ch'est tan bouonhomme,” j'l'y dit. “Nou m'a sufflié à l'outhélle qu'une députâtion s'en va v'nin ichin d'main au sé pour me d'mandé d'prendre. Et j's'y à considéthé tchi raiponse que j'dait lûs donné.”

 

1951: À Saint-Louothans Mêcredi

 À Saint-Louothans Mêcredi.

Merrienne est déterminée.

 

Moussieu l'Editeu,

 

Ch'tait Jeudi au sé qu'la Merrienne se fit après l'tais. “Eh ben, man Ph'lip, ne v'là l's'êlections bétôt toutes finies, et ch'est p't'être tant mûs.”

 

“Sûs un sens, vèthe,” j'l'y dit, “mais avec chonna j'ai grand dêpié qu'Saint-Ou a laissi l'occâsion passé si trantchillement. Après tout ch'n'est qu'une fais par trais ans, et nou dév'thait avé drouait a un mio d'fun.”

 

“Sans doute,” ou dit, “mais au mains la pâraisse à trouvé un bouon candidat. Y ne s'sa pas dans l's'Etats pour dithe 'même opinion', le Mâjeur.”

 

1951: Ocquo l's'Etats.

 Ocquo l's'Etats.

 Merrienne veur des Vieillards.

 

Moussieu l'Editeu,

 

J'tais à lièthe la gâzette l'autre sé quand j'vit tchiquechose tchi m'fit rithe, et la Merrienne, toute tchuthieuse comme de couôtume, voulut savé tchèsqu'y m'amusait.

 

“Ch'est l's'Etats,” j'l'y dit. “Ne v'la un Moussieu tch'a propôsé qu'à l'av'nin un homme tch'y voudra être Sénateur ou Connêtablye ou Député étha à dêcliathé s'n'âge.”

 

“Et ont-y adopté chonna?”

 

“Nânin,” j'l'y dit, “mais y'a yeu une assez longue distchusion. A la fin ils ont dêmontre un mio d'bouon-sens et y'a yeu une mâjorité contre.”

 

1958: Merrienne change d'idée

 Merrienne change d'idée.

Mais Ph'lip n'est pas trop seux.

 

Moussieu l'Editeu,

 

La Merrienne me surprint hardi, hier au sé, quand, ayant liut la gâzette, ou me d'mandit soudainement tchèsqu'était la miyeu vaque que j'avais veu ès shows. “Il est vrai,” ou dit, “que j'n'avais pas voulu t'êcouté quand tu'éthais voulu m'raconté plusieurs séthées tchèsque tu'avais veu, mais je s'y v'nue à y r'pensé, car, après tout, dans l'temps pâssé j'allais tréjous ôv té au show des Trais Pâraisses, et j'n'ai pas r'oublié l'jour que la Belle au Portinfé gâgnit la coupe, et mé, bein ordguilleuse de la r'chevé des mains du Président. Ch'est pourtchi, Ph'lip dis-mé chein que j'te d'mande.”

 

“Eh bein, Merrienne,” j'l'y dit, “j's'y ben content que tu'ès r'venue à tes bouonsens, et j'm'en vais faithe de man mûs.”

 

“Bon,” ou s'fit, “ach'teu, tchèsqu'est la miyeu vaque à tan goût?”

 

1951: Une touonée

 Une touonée.

Ph'lip a grand peux.

 

Le Portinfé,

Jeudi au sé.

 

Moussieu l'Editeu,

 

Ch'est avec appréhension que j'vos ecris assêse, car, après qu'j'avais dit nânin chent fais, j'me s'y accordé de transporté la Merrienne demain dans châque pâraisse de l'île pour vais comment que l's'affaithes vont. J'n'ai pas bésoin d'vos dithe que chen qu'oulle à dans sa vieille tête ch'est chutte fameuse êléction pour Sénateur.

 

Je sommes pour allé, nos deux, à la salle pârouessiale ichin à Saint-Ou pour l'ouvértuthe, épis nos v'la hors à faithe le tout d'île dans man vier quêrre tchi n'a pas dêshallé de souos la tchérquethie d'pis la preemie Bataille de Flieurs après la libéthâtion.

 

Ch'tait la dérnièthe idée qu'j'éthais jamais yeu, et quand la Merrienne m'annoncit hier au sé qu'oulle avait décidé de faithe la touônée je m'mint à rithe.

 

1958: Ph'lip va ès shows

 Ph'lip va ès shows.

Et Merrienne se boude.

 

Au Portinfé,

Jeudi au sé.

 

Moussieu l'Editeu,

 

Je s'y r'venu ch't'arlevée du show ès bêtes à Saint-Brelade en temps pour bèthe le tais. J'éthais voulu en pâslé à la Merrienne, mais après la distchussion que j'eûmes Lundi matin, ou n'a pas voulu entendre un mot des shows et j'n'avons pas yeu grand'convérsation. Et un mot, Moussieu, la bouonnefemme est boudée, et sûs en sens ch'n'est pas une mauvaise chose, car y'a pûs d'paix dans la maison. J'l'ai veue d'même bein des fais et ou se r'fait tréjous. Ch'est comme le ma-au-tchoeu, une maladie tchi n'tue pas.

 

Pour vos dithe. Après que j'avions dêjeuné Lundi, je fis la r'mérque que j'éspethais que l'temps s'comportethait l'préchain jour. Ou me d'mandit, tchèsque j'avais idée d'faithe et ch'ne s'sait pas une mauvaise chose si j'me méttais à peindre la porte de l'êtablye et à prépathé tchiques têtchaiges pour les vaques. “Il est grand temps,” ou s'fit, “car y'en a tréjous yunne ou deux à-banon, et même hier la vieille nèthe et blianche 'tait dans l'gardin parmi les caboches.”

 

1951: La grande victouaithe

 La grande victouaithe.

Merrienne va en Ville.

 

Moussieu l'Editeu,

 

Eh ben, la bataille est finie, et y'a quatre candidats tch'y sont contents et quatre tch'y n'y sont pas.

 

J'avais idée d'allé m'couochi d'bouonne heuthe Vendredi au sé, car j'me trouvais ben fatidgi après une forte s'maine a chérchi des vouaix, mais la Merrienne ne voulit pas en ouï pâslé.

 

“Tan pèthe n'éthait pas tait au liét dans les viers temps, après une êléction,” ou m'dit, “ni l'mein ni-n'tou. Pûs d'une fais j'ai ouï mémée gronné parsque Pépée n'tait pas r'venu en temps pour traithe les vaques. Mais quand, une heuthe ou deux pûs tard, ou qu'menchait, y l'y dîsait de s'taithe, car sa pouôre tête tait prête à cratchi. Sans doute, ch'tait l'éxcitâtion.”

 

1958: Ph'lip fait Merrienne mârri

 Ph'lip fait Merrienne mârri.

Mais après tout va bein.

 

Moussieu l'Editeu,

 

Lundi matin je r'chut une léttre de ma banque me dîsant que l'gérant voulait m'vais aussi vite que possiblye. J'la montrit à la Merrienne, et ou m'dit que je f'thais mûs de prendre la bus le préchain matin, et d'allé à la banque pour savé tchèsqu'y voulais. “De tchi tu'as peux?” ou d'mandit. “Y n'te tuôthant pas, man pouôre Ph'lip. Veur-tu que j'y'aille, mé, à ta pliéche?”

 

Moussieu, j'fut bein près de dithe oui, mais j'vint à pensé tout-d'suite que la Merrienne pouôrrait s'mârri une fais à la banque et après avé entendu chein qu'le gérant avait à dithe, et si chonna s'arrivait ou tait capablye d'en dithe bein trop long et d'agravé la situâtion, ch'est pourtchi j'l'y dit que j'tait mé et pas l'yi qu'la banque voulait vais, et donc Mardi matin j'm'en fut, et ma fé, je n'men r'dêshallit pas mal. Tout ch'que j'ai à faithe d'ichin à Nouë ch'est de n'dépensé pas deux sous quand yun pouôrrait faithe, et de m'fié sûs mes brécolis, tchi s'en veinnent à tic-de-corps pour mettre tchiques hérpins dans ma pouchétte bétôt.

 

1952: La vacance

 La vacance.

Le Candidat Tchi Faut.

 

Moussieu l'Editeu,

 

“Eh bein,” la Merrienne se fit, “ch'tait vrai donc chen qu'nous avait ouï. Le Sénateur Carson à donné sa démission.”

 

“Vèthe,” j'l'y dit, “et j'en ai grand r'gret, car ch'est un homme tch'éthait peut faithe de bouon travas dans l's'Etats et ailleurs. Je n'criyaimes djèthe, Merrienne, quand j'nos en fûmes chu jour-là à la Salle Pâraouaissiale voté pour l'y, que chonna s'arriv'thait.”

 

“Damme, nan!” ou dit. “Quand vint l'sé et que j'fûmes bèthe à sa santé dans Halkett Place, j'tais pûs contente que si tchitchun m'avait donné une neuve robe de souaie. Mais enfin, ch'est l'y tch'y sait, et sans doute y n'a pas abandonné l'affaithe sans bouonne raison. Mais, ach'teu, Ph'lip, y faut en trouvé un nouvé et n'y'a pas d'temps à perdre si je n'voulons pas vais tchique Colonel ou je n'sais pas tchi dans l's'Etats comme Sénateur. Ch'est tout bein bouon d'en faithe des Jurés-Justiciers, car, de nos jours chais mêssieux n'servent à rain, mais...”

 

1952: Après l'show

 Après l'show.

Merrienne est têtoigne.

 

Moussieu l'Editeu,

 

Quand je r'vint du grand show d'la Ville Mêcredi au sé, j'avais dans l'idée, en b'vant l'tais, de dithe à la Merrienne tout ch'que j'avais veu, mais j'avais à peine qu'menchi qu'ou m'arrêtit.

 

“R'garde, Ph'lip,” ou s'fit. “Toutes les fais qu'tu vas à un show d'bêtes ch'est tréjous la même histouaithe des mêprinses que les Juges ont fait, d'la miyeu vaque sûs l'têrrain tchi n'a pas même tait r'gardée, d'une tchéthoigne tch'a fait l'preumié prix, et d'une bricole tch'éthait tait mûs à l'êtablye. J'en s'y engniée. Pâslons d'la politique; ch'est bein pûs intérêssant qu'des g'niches r'nouv'lées ou des boeux d'un an.”

 

“Che s'sa comme tu voudras, Merrienne,” j'l'y dit, pas trop content, comme ou pouvez craithe, “mais n'oublie pas qu'une bordée, ichin à Saint-Ou, une êléction fut décidée par une vaque et un bichot.”

 

“Ocquo de tan gniolin!” ou s'fit.

 

1952: Une fameuse êlection

 Une fameuse êlection.

Hourra pour Maillard!

 

Moussieu l'Editeu,

 

Comme ou pouvez l'craithe, dans notre vaisiné, d'pis Lundi au sé, nou n'a pâslé que d'la fameuse êlection. Hourra pour Hedley Maillard!

 

Quant à la Merrienne, ou veur ocquo savé pourtchi que l'Sieur Rumfitt print pour Sénateur, viyant tch'il tait dêjà dans l's'Etats comme Député, et tchi n'tait pas tchéstchon de l'fichi à la porte. Comme ou s'faisait: “ch'est une chose que je n'comprends pas. Crai-tu, Ph'lip, que ch'tait l'ambition tchi l'poussait?”

 

“Eh bein, Merrienne,” j'l'y dit à la fin, “je n'crai pas tch'il éthait print s'il avait tait laissi tou seu, mais y'a un certain grand moussieu tch'a tout-plien d'ambition étout, même un mio trop, tch'y l'y mint dans la tête, que s'y prenait n'y'éthait pas d'oppôsition. Et ch'est bein seux, qu'y n'criyaient pas, autchun des deux, qu'autchun campagnard éthait l'toupé de s'mettre sûs les rangs contre un Député d'la Ville.  Et, entre nous, Merrienne, y fallait un mio d'couothage pour entreprendre une patheille djobbe.”