1952: Les Bieautées d'Jèrri dans la Lantèrne Magique!

 L'Assembliée d'Jèrriais

Les Bieautées d'Jèrri dans la Lantèrne Magique!

 

Nou dit qu'l'appétit veint en mangeant - et tch'i' faut êt' p'tits d'vant qu'êt' grands. Eh bein, nouos rêunions mensuelles ont prouvé la sagesse dé ches vièrs ditons-là! Châque rêunion a 'té milleuthe qué la dreine, et l'nombre dé nouos membres a monté à pus qu'chent!

 

Auve les cheins êlus à l'assembliée dans la Salle d'Agritchultuthe Vendrédi au sé, le 30 dé Mai 1952, j'en avons chent-deux ach't'heu! Les nouvieaux membres sont: Mmes Edith Laurens, Lydie Laurens, Mavis de la Haye, Anna Steel et Bertha Enders, Mlle Eunice Billot, Moussieu et Madame George Henry Le Rossignol, Stanley John Le Rossignol, J. E. Quérée et Frank R. Le Brun (dé Gambie, en Afrique). J'avons l'plaisi, étout, d'annoncer deux nouvieaux membres jûnieurs, les jannes Edward et Kenneth Syvret, dé Léoville, à St. Ou.

 

Lé Sénateu Hedley Le Riche Edwards présidit l'assembliée, et l'y-avait à bein près eune septantaine dé membres présents.

 

Vièrs Mots.

 

Eune pétite compétition pour traduithe des expressions Angliaiches en Jerriais, comme la cheinne tchi fut si populaithe à la rêunion de mais d'Avri, nous ramémouaithit des vièrs mots qu'nou n'ouait pon fort aujourd'hui - comme, par exempl'ye: un “oyi” pour eune faute. Les marchands dé j'vaux l'savaient bein, chu mot-là, et les fermièrs tch'en acataient étout. Combein d'fais qu'nou ouïyait: “Il a un oyi, chu j'va-là - i' mord!” Un aut' mot du temps passé, “offustchi,” singnifie un ombrage dévant la veue d'tchiquechose qué nou r'garde. Les feunmeurs n'eutent pon d'peine à nouos dithe qu'eune “autchie” est le nuage dé feunmée tchi dêhalle de la bouoche du bouan'homme tch'est en train d'feunmer eune bouanne pipée dé p'teun!

 

1982: All'-ous ès baînis?

 All'-ous ès baînis?

 

Trenton,

Michigan, USA.

 

Lé 10 d'juillet, 1982.

 

Moussieu l'Rédacteu,

 

Ieune des bouannes choses de la vie d'touos les jours quand j'tais mousse à St. Ouën y'a quâsi nénante ans 'tait qué nou trouvait san pliaîsi dans l's alentours sans aver à aller bein liain d'siez sé, comme, par exempl'ye, aller ès baînis et ès v'licots. Et nou-s-en protitant en même temps, car né v'là deux bouâns fricots.

 

Nou soulait les fliêter au r'nouvé sustout, les baînis, d'vant tch'il' aient ouï l'coucou, comme disaient l's anciens. Y'en avait tout pliein dans l'rotchi à l'Êta, et i' fallait les dêcoller du rotchi atout un fliêteux, un oti tchi r'sembl'ye à un chîthé. Papa en faisait dans la forge, et un vièr chîthé d'tchèrpentchi faîsait un bouân fliêteux.

 

Lé baîni 'tait tellement partie d'la vie Jèrriaise dé chu temps-là tch'i' s'trouvait souvent dans l's expressions idiomatiques dé [...] exempl'ye, quand eune pèrsonne êprouvait à vouos faithe craithe qué la leune est faite dé fronmage, nou disait: “Ch'est d's accraithes, i' vouos f'thait aller ès baînis la mé haute!” Et quand eune dispute ou eune affaithe dé cour est finnie, nou dit: “Les baînis sont dans la pouque!”

 

1977: Bouan Mênage Duthe

Bouan Mênage Duthe

 

Mousieu l'Rédacteu,

 

Ouaithe tch'i' y'a un vièr diton tchi nouos dit tch'i' n'faut pon sauter la brecque dévant y v'nîn, y'a dêjà des membres d's Etats tchi veulent mett' lus pids dans les souliers au Sénateu Cyril Le Mèrquand, fanmeux gardgien d'nouos sou dans la Chambre Législative. Jé n'sis pon trop seux quantchi qu' la préchaine êlection pour Sénateu étha lieu, mais i' m'sembl'ye aver ouï tch'il a acouo un an, pus ou mains, à faithe. Et pourtchi s'èrtither à 75 ans s'i' s'trouve en bouanne santé? Un homme dé sa capacité tch'a m'né eune vie trantchil'ye et tch'est “sain dé corps et d'esprit”, comme dîsent les Ecrivains quand il' êcrivent vouot' testament, peut vivre aîsement jusqu'a chent ans, et j'espéthe lé vaie s'dêcliather candidat acouothe eune fais quand la préchaine êlection veindra sus l'tapis. Et si l's êlecteurs ont autcheune èrconnaissance pour ses mangnifiques sèrvices dans L's Etats avau l's années, i' vot'tont pour lî r'mett' pour eune aut'gestion.

 

1970: Crianches dé nouos vielles gens

 Crianches dé nouos vielles gens

 

Le Ménage ès Feuvres,

St. Ouën.

 

Lé 8 d'août, 1970.

 

Moussieu l'Rédacteu,

 

Eh bein, la plyie est v'nue chutte sémaine, et j'avons ieu du feu et d'l'ôrage étout! Y'a des gens tchi m'disent tch'i' n'peuvent pon dormi quand il en fait d'l'ôrage. Quant à mé, v'la tchi n'm'empêche pon d'aller dans l'rouoyaume des taupes. Deux-s'trais fais en m'rêvilyant dans la niet, j'viyais la chambre illeunminnée par des formidabl'yes êparts dé feu, et eune fais ou deux un fort coup d'ôrage mé fît penser qu' la foudre d'vait aver tchée pas bein liain du Ménage mais j'n'en vis autcheun têmouongnage lé matîn.

 

V'là tchi m'ramémouaithe que l's anciens criyaient qué ch'tait bouanne chance d'aver eune pièrre à foudre dans la maîson contre l'feu et contre la foudre à tchaie, et i' criyaient, étout, qu'un lief sus tchi qué la jombarbe crait est asseûthé contre la foudre. Eune aut' asseûthance contre la foudre 'tait d'plianter du seu tout près d'la maison, car ou n'tchait janmais sus chu bouais-là.

 

1969: Les pliantes méd'cinnales

 Les pliantes méd'cinnales

 

d'l'orvale

Le Ménage ès Feuvres,

St. Ouën.

 

Lé 11 d'octobre, 1969.

 

Moussieu l'Rédacteu,

 

Lé temps passé - et j'vouos pâle dé l'êpoque dévant la réformâtion dans l'églyise - au c'menchement d'la célébrâtion d'La Sainte Cène, lé minnistre soulait faithe l' “Aspèrsion” d'la congrégâtion en dîsant (ou chantant) “Arrosez moi, Seigneur, avec l'hysope, et je serai purifié. Lavez-moi et je deviendrai plus blanc que la neige. Ayez pitié de moi, Seigneur, selon votre grande miséricorde”. À m'n idée, ch'tait eune mangnifique mannièthe dé c'menchi chu sèrvice solonnel-là, et j'l'ai veu faithe, quand j'tais janne homme, dans nouot' églyise en Angliétèrre. V'la tch'i' m'ramémouaithe qué j'trouvis l'mot hysope dans l'fanmeux dictionnaithe Jèrriais quand j'tais à chèrfouolli d'dans pour tchique mot l'aut' sé. J'vis qué l'hysope 'tait eune pliante bein connue d'nouos anciens pour sa vèrtu méd'cinnale, eune vèrtu probabliément fondée sus les crianches et les couôteunmes réligieuses des vièrs temps, car i' n'faut pon oublier qué quand Notre Seigneu 'tait clioué sus La Crouaix, et tch'I' dit, tch'Il avait sé. St. Jean nouos dit, au vèrset 29 dé san chapitre 19: “Et il y avait là un vaisseau plein de vinaigre. Ils emplirent donc de vinaigre eune éponge, et ils mirent de l'hysope autour, et la Lui présentèrent à la bouche”.

 

1969: Acouo des mémouaithes du temps jadis!

 Acouo des mémouaithes du temps jadis!

 

Le Ménage ès Feuvres,

St. Ouën.

 

Le 14 juin, 1969.

 

Moussieu l'Rédacteu,

 

“Quand Mess Lé Boutilyi John Wesley a am'né san j'va pour êt' féthé,” j'disais à Papa eune séthée auprès l'thée quand j'tais mousse et que j'tions assis au pid du feu, “il a pâlé du rouoge chéva au couôsîn Cliément L'Cornu d'L'Êta. Tchi difféthence qué y'a entre un j'va et un chéva?”

 

“Eh bein,” Papa m'dît, “i' n'y en pon, d'difféthence. En pâlant, nou dit tout simpliément 'un j'va', mais quand ch'est eune affaithe dé la couleu d'un j'va, ch'est pus aîsi d'dithe 'un nièr chéva' ou 'un rouoge chéva' qué d'dithe un nièr ou un rouoge j'va. Pour un gris, ch'est pus aîsi d'dithe un gris j'va qu'un gris chéva. Êprouve-s-y, et tu vêrras!”

 

1980: Av'-ous l'esprit présent?

 Av'-ous l'esprit présent?

 

Fort Lauderdale,

Florida, USA.

 

Lé 9 févri, 1980.

 

Moussieu l'Rédacteu,

 

Ch'est r'mèrquabl'ye dans combein d'circonstances dé la vie qué nou fait sèrvi l'mot “esprit”. La preunmié fais qué j'm'èrsouveins d'l'aver ouï 'tait quand j'tais tout mousse à l'Êcole du Dînmanche à l'Églyise dé St. George et qu' Moussieu Pépîn nouos dît qué La Sainte Trinneté 'tait “Le Père, le Fils et le Saint Esprit”, trais Pèrsonnes, mais, comme nouos l'dit lé Sŷmbole dé St. Athanase à la page quarante-chînq dé La Litourgie, “La Divinité du Père, du Fils et du Saint Esprit n'est qu'une: leur Gloire est égale, et leur Majesté co-éternelle.”

 

J'n'avais pon 'té bein des fais auve Papa dans la forge dévant r'ouï l'mot. Mait' John Wesley L'Boutilyi, en convèrsâtion auve Papa, lî dît tch'il avait l'esprit trantchil. Quand vînt la séthée au pid du feu, jé d'mandis à Papa tch'est qu' ch'la voulait dithe.

 

1971: Crianches et ditons

 Crianches et ditons

  

Le Ménage ès Feuvres,

St. Ouën.

 

Lé 19 dé juîn, 1971.

 

Moussieu l'Rédacteu,

 

J'ai passé trais mais au Texas sans vaie eune goutte dé plyie, et les gens avaient fort à faithe pour garder l'hèrbe vèrte sus les p'loûses en d'vant d'lus maîsons. I' fallait êt' tréjous à arôser, et l'annonceux sus la télévision continnuait à dithe: “Pas d'sîngne dé plyie!”

 

V'là tch'i' m'faîsait penser au temps jadis - quand i' n'y avait pon d'radio ni d'télévision en Jèrri. Mais l's anciens n'avaient pon bésoin d'annonceurs ni d'âtivelles et d'machinnes pour lus dithe tchi sorte d'temps tch'était en v'nant. Les sîngnes 'taient là pour tout l'monde à vaie, et y'en avait à gogo. Par exempl'ye, n'en v'chîn tchitch'uns tch'étaient sîngnes dé plyie.

 

Quand un cor fait ma; quand nou-s-êtèrnue; quand les canards battent des ailes; quand les brébis bêlent, ou quand i' sautent et jouent d'eune manniéthe folâtre; quand les couochons portent du fain et d'la paille dans eune carre dé la cotte pour muchi; quand les boeufs s'liquent contre lus corps; quand la sie tchait souvent avaû la cheunm'née; quand nou ouait les raînottes; quand l's héthondes volent au ras d'tèrre; quand un cat s'lave driéthe l's ouothelles - et quand un cat mange dé l'hèrbe.

 

1974: En Améthique …

 En Améthique …

 

San Antonio, Texas,

U.S.A.

 

Lé 28 dézembre, 1974.

 

Moussieu l'Rédacteu,

 

Quand l'conmèrce en pèrd en Jèrri nou pouorrait dithe: “Lé conmèrce manque tout chu temps, i' n'y a pon d'dêssa”. La dreine gâzette dé Jèrri r'chue ichin 'tait la cheinne du sept novembre et jé n'sai pon s'i y'a un manque dé dêssa dans les boutiques à St. Hélyi, mais j'peux vouos dithe tch'i' y'en avait iun ichîn les dreins jours dévant Noué. Un tas d'monde qué nou viyait dans les boutiques dé marchandises n'acataient pon auve abandon comme dans l'pâssé. Nou viyait bein qu' la bourse 'tait mains plieine dé sou. Mais dans la boutique du grossyi i' n'pathait pon y'en aver ieu, du dêssa. I' faut penser qué si les gens sont à court dé sou en général, i' voulaient au mains faithe eune bouanne tabl'ye pour fêter Noué. Un vièr diton Jèrriais nouos dit: “À la St. Miché les pithots, et à Noué les picots!” Eh bein, j'les pliains bein dans les temps d'Noué ichîn, les picots, car y'en a des millions, engraîssis pour l'occâsion, tchi lus trouvent dans l'ventre des cheins tchi l's ont êlevés et admithés dans lus vivant.

 

Eune chose qué j'ai r'mèrtchi, étout, est tch'i' y'a ieu mains d'illeunminnâtions en d'vant des maîsons chu Noué. Les gens en général sont à êprouver à obéi la d'mande dé nouot' Président dé couoyer l'êlectricité autant qu' possibl'ye, mais ch'n'est pon aîsi pour l's Améthitchains d'nouos jours dé couoyer sus autcheune chose, car il' n'en ont janmais connu la nécessité comme nouos anciens l'ont connue en Jèrri et comme, sans doute les preunmié v'nus eûdrent à faithe en arrivant dans l'Nouvieau Monde et bâti lus maîsons auve les bouais abattus par ieux-mèmes, et vivre sus l'produit d'un mio d'tèrrain dêfrichi auve grand' peine et dù travas. Mais ch'la est oublié. Les jannes ont ieu la vie aîsie et si belle qué mème tch'il' en aient liut tchiquechose en êtudiant l'histouaithe du pays, i' n'ont janmais rêalisé ni apprécié les vissicitudes dé la vie pénibl'ye de lus anchêtres “pionniers”.

 

1975: Lé solé lit!

 Lé solé lit!

 

Le Ménage ès Feuvres,

St. Ouën.

 

Lé 28 dé juin, 1975.

 

Moussieu l'Redacteu,

 

Y'a tant d'pèrsonnes tchi m'ont félicité d'aver ieu l's idées dans la leune qué j'ai pensé qué ché s'sait p't-êt' eune bouanne idée dé dithe à m's anmîns tchi liêsent ches lettres qué ouaithe qué jé c'menche à r'doter, j'ai acouo assez d'avis d'restant pour saver qué jé n'sis pon “L'homme dé d'dans la leune!” Mais n'en v'la assez entouorre chutte belle Lantèrne des Cieux. I' y'a, étout, des ditons entouorre lé bieau solé tchi nouos donne la chaleu d'l'êté et la cliairté du jour. Av'ous janmais pensé tch'est qu' nou f'thait sans? Ché s'sait comme si nou s'sait dans des ténèbres pèrpétuelles!

 

Mais i' n'faut pon penser qué nou pouorrait mett' lé pid sus l'solé comme l's Améthitchains l'ont fait sus la leune. Mème les fannatiques dé l'Înde, tchi marchent lé travèrs d'eune pétite êtendue à feu, neues-pids, né pouorraient pon l'faithe - mème quand il est malade et qué s'n appathence maladive est sîngne dé plyie, car ch'est un fourné si âpre qué nou n'peut mème avouer qué s'n arsion est bénéficielle, chein tchi fit nouos anciens inventer l'diton qué l'solé est pour tout l'monde. Et sa lueu est telle qué jé n'pouvons pon nouos muchi autchun bord sus la tèrre dé la veue du Bouan Dgieu si j'avons 'té mêchants, car un aut' diton nouos dit qué “Lé Bouan Dgieu vait à l'ombre comme au solé!”

 

1977: Corps et beins

 Corps et beins

 

Fort Lauderdale, Florida,

USA.

 

Lé 9 d'avri, 1977.

 

Moussieu l'Rédacteu,

 

Nouot' admithabl'ye langue Jèrriaise est vraînment la pus expressive au Monde. Pranez, par exempl'ye lé mot “corps”. Av'-ous janmais pensé au nombre d'expressions dans la vie d' touos les jours qué nou peut faithe sèrvi chu mot-là pour exprînmer tchiquechose tchi s'pâssé ordinnaithement?

 

Si eune pèrsonne est un mio hors dé l'ordinnaithe dans sa condite, nou dit: “Tchi drôle dé corps!” Quand un janne homme né montre p't-êt' pon autant d'sagesse comme, i' dév'thait, nou dit: “Bah! Ch'n'est qu'un janne corps!” Mais si l'même janne homme continnue à faithe des bêtises, ou tch'il est si farceux tch'il embête tout l'monde ou qu' sa condite dêpliait à ses vaisins, nou dit: “Il a l'dgiabl'ye dans l'corps!” Mais d'un homme tch'a mauvaise chance, ou tch'est en faillie santé ou en embarras, nou dit: “Ch'est un pouôrre corps!”

 

D'un homme tchi travâle dû et sans arrêt, ou tch'est achéthinné à sa tâche, nou dit: “Quand i' s'y met, ch'est un corps pèrdu!” Nou dit, étout: “I' s'y met à tigue dé corps!” Quand un homme a tellement travailli tch'i' n'en peut pus, nou dit: “Il est temps tch'i' s'arrête, i' pathait corps-battu!” Et quand eune pèrsonne est tréjous mouvementée et n'peut rester trantchil'ye deux minnutes, nou dit: “Ch'est un corps sans r'pos!” Si eune pèrsonne a 'té sans mangi pour eune volée, nou dit: “Ou n'a rein dans l'corps!” Mais s'oulle a mangi trop, ou mangi d'tchi qu' oulle a d'la peine à digéther nou dit: “Oulle a ma dans l'corps!”

 

1980: Y'a bête - et bêtes!

 Y'a bête - et bêtes!

 

Le Ménage ès Feuvres,

St. Ouën.

 

Lé 2 d'août, 1980.

 

Moussieu l'Rédacteu,

 

“Tch'est qu' tu'aim'thais mus,” un anmîn m'dit eune fais quand j'tais mousse, “n'être pas si bête comme tu pathais, où n'pathaître pas si bête comme tu'es?” À c'menchi, v'là tchi m'sembliait êt' eune dévinnâle, mais i' n'mé prîns pon longtemps à vaie l'travèrs et j'lî donnis la rêponse, qué j'aim'thais mus pathaître pus bête qué jé n'sis, et ch'est acouo d'même au jour d'aniet.

 

Viyant l'run qué l'mot “bête” otchupe dans l'Dictionnaithe Jersiais-Français du Docteu Fraînque Le Maistre, i' m'est v'nu à l'idée qu' ch'est un mot, comme y'en a bein d'aut', sans doute, tch'est preuve qué nouot' vielle langue est ieune des pus expressives au monde. Par exempl'ye, nou dit d'un homme tch'est întelligent mais tch'a l'air pûtôt binnasse: “I' n'est pon si bête comme i' pathaît.” D'un homme tch'a 'té întelligent mais tch'est en chiques viyant tch'i' s'est appaûvri par baithe ou tchique aut' avârie, nou dit: “I' n'est pon si bête comme il est mal habilyi.”

 

1977: Tout bas

Tout bas

 

Le Ménage ès Feuvres,

St. Ouën.

 

Lé 23 d'juilet, 1977.

 

Moussieu l'Rédacteu,

 

Dans ieune dé mes dreines lettres j'vouos pâlais du mot “haut” et du grand nombre d'expressions en Jèrriais dans tchi qu' nou l'faîsait sèrvi. Eh bein, lé mot “bas” est fait sèrvi dans un tas d'expressions étout. Par exempl'ye, quand j'tais mousse, nou disait qué j'tais “bas-d'âge”. La même chose pour un êfant tch'avait pèrdu ses péthe et méthe et tch'était souos tutelle. Nou peut dithe tch'il 'tait “bas-d'âge” étout.

 

Les gens faîsaient hardi d'cidre lé temps pâssé, et quand la barrique 'tait quâsi viède, i' disaient: “Lé cidre est bas.” Et quand l'temps 'tait sombre, i' disaient: “Lé temps est bas.” Au mais d'novembre, par exempl'ye, quand les nuages sont rappréchis d'la tèrre, les anciens disaient: “Ch'est les bas temps.”

 

1977: Du bouan sang!

 Du bouan sang!

 

Trenton,

Michigan, USA.

 

Lé 26 d'Novembre, 1977.

 

Moussieu l'Rédacteu,

 

“Y'a-t-i' du sang dans des navets?” jé d'mandis à Papa eune séthée quand j'tions à l'entou d'l'âtre auprès l'thée.

 

“Mais nannîn!” i' m'dît. “I' n'y'a pon d'sang dans des navets. Tch'est tch'i' t'fait penser d'ité?”

 

“Eh bein,” j'lî dis, “quand Mess Lé Tourneur est v'nu à la forge à matîn pour aver san j'vá féthé, i' t'a dit qué sa tante Betté 'tait malade et tch'i n'savait pon tch'est qu' oulle avait, mais qu' à la vaie nou dithait qu' oulle a du sang d'navet.”

 

“Eh bein, man garçon,” i' m'dît, “ne v'la acouo eune preuve qué nouot' langue Jèrriaise est plieine dé mangnifiques expressions pour exprînmer tchiquechose. Quand Mess Lé Tourneur nouos dit qu' sa tante pathaît aver du sang d'navet, v'la tchi veurt dithe qu' oulle est pale, probabliément viyant qu' oulle est anémique – voulant dithe eune maladie d'pauvrété d'sang tchi blianchit l'teint d'la fache. Et j'lus du navet étant blianc, nou dit qu' eune pèrsonne souffrant d'chutte maladie-là a du sang d'navet. Sans doute, nou pouôrrait dithe, étout qu' oulle est pale comme eune chique, ou pale comme la mort.

 

1977: Av'ous bouanne veue?

 Av'ous bouanne veue?

 

Ottawa, Ontario,

Cannada.

 

Lé 7 dé mai, 1977.

 

Moussieu l'Rédacteu,

 

Quand j'vai les belles Maisons du Parlément ichîn à Ottawa, j'pense en mé-mème ès vielles expressions d'nouot' langue Jèrriaise tch'ont rapport à toutes occâsions. Par exempl'ye, en viyant la bieauté d'chutte belle capitale et pensant en mème temps à l'încèrtitude dé l'heuthe du trépas, j'pense à l'expression: “Y'a bein d's ièrs en tête tchi n'en vèrront pon la fête!”

 

Y'en a tant, d'ches expressions entouôrre les ièrs ou la veue, qu' nou pouôrrait quâsi en êcrithe un livre. Quand nou veurt dithe qu' un homme a ieu la chance dé mathier eune femme tch'est belle et bouanne en même temps, nou dit: “I' n'sé mînt pon d'vant sa veue quand i' chouaîsit eune belle femme!” Quand un janne homme est en train d'faithe la carre à eune janne fille, nou dit: “Il est à lî faithe des doux yeux!” Et quand eune fille a d's ièrs pétillants et rêvilyis, nou dit: “Oulle a d's ièrs comme des crapauds d'mielle!”

 

Quand eune janne fille a des bieaux grands ièrs fascinnants, nou dit: “Oulle a d's ièrs à la pèrdition dé s'n âme!” Mais quand eune pèrsonne a des p'tits ièrs, nou dit: “Oulle a d's ièrs, comme des pèrtus d'linnot!” Mais i' y'a plusieurs expressions au sujet dé p'tits ièrs. S'i' vaient hardi cliai, nou dit: “Oulle a d's ièrs rêvilyis comme les cheins d'un cat souos un grouaîsilyi!”, ou “Ses ièrs lî r'lîsent comme si ch'tait des vèrpeurs!”, ou “Oulle a d's ièrs dé cahouain!” Et quand eune pèrsonne a d's ièrs tchi pathaîssent lâssés nou dit: “Oulle a d's ièrs dé pîngouîn!”

 

1977: Tchi bieaux portraits!

 Tchi bieaux portraits!

 

Fallbrook, California,

USA.

 

Lé 22 d'janvyi, 1977.

 

Moussieu l'Rédacteu,

 

J'veins d'èrchever la gâzette du 18 dé novembre. V'la tchi m'fait grand pliaîsi d'aver des nouvelles dé man p'tit pays natal. Lé preunmié portrait qu' j'ai avisé est l'chein du Connétabl'ye Pithouet d'ma pâraisse dé St. Ouën, et j'lé félicite d'aver 'té chouaîsi pour présider l'Conmité Seurvilyant des Connétabl'yes dé l'île. San chouaix est bein à propos dépis tch'i' r'présente la pus grand' pâraisse dé l'île. J'tais bein content d'vaie, tout, l'portrait d'un aut' St. Ouënnais, tch'est janne mais tch'a dêjà gângni eune bouanne èrnommée pour li-mème, lé Sieur Brian Vibert. J'ai connu ses anchêtres dé y'a huiptante ans. Comme les mains, il' 'taient Louothièrs dans l'âme!

 

Dé vaie l'portrait du Connétabl'ye Pithouet a fait pliaisi étout à eune St. Ouënnaise, Madanme Sidney Triggs, née Eva Maugi Carré, siez tchi j'sis à pâsser eune partie d'l'hivé. J'arrivis à Los Angeles Dînmanche pâssé et l'Sieur Triggs vînt à ma rencontre à l'aérodrome dé chutte grand' ville des Anges. Ichîn, à Fallbrook, j'sommes à bein près à maîntchi c'mîn entre Los Angeles et San Diego. Tchi bieau pays! Et tchi bieau temps! J'voudrais nouver vouos env'yer un mio d'chutte chaleu d'Califournie pour raccourchi l'hivé en Jèrri.

 

1977: Aim'ous l'bran?

 Aim'ous l'bran?

 

San Antonio, Texas,

USA.

 

Lé 15 de janvyi, 1977.

 

Moussieu l'Rédacteu,

 

Cèrtains “techniciens diététiques” nouos disent, ichîn en Améthique, qué nou dév'thait mangi un tas d'bran auve les r'pas ordinnaithes pour asseûther l'controle natuthel des bésoins d'la natuthe. L's Améthitchains sont âpres à adopter toutes sortes d'idées d'mème, sustout quand i' sont continuellement les sujets d'annonces sus la télévision. Dans chu cas, j'ôse craithe qué les techniciens sont sus l'bouân c'mîn.

 

Les maîsons d'conmèrce tchi prépathent des “céréales” comme nouorrituthe sont à profiter d'chutte nouvelle théorie, et lus ventes des produits d'avoût tch'ont du bran comme base, comme des “Bran Flakes” et “Raisin Bran”, ont pus que r'doublié ches dreines années. I' faut espéther qu' ch'est eune bouanne chose pour tout l'monde. Pour un temps, les gens n'avaient pon fort dé fouai dans lus céréales comme nouorrituthe, viyant qu' cèrtains docteurs avaient dit tch'i' n'y'avait pon grand' valeu “nutritive” dédans et qué l'seul bénéfice qué nou pouvait s'attendre d'aver en les mangeant pour dêjeuner 'tait dans l'lait qu' nou faîsait sèrvi pour les tremper.

 

1978: Av'-ous bouan' yi?

 Av'-ous bouan' yi?

 

Trenton

Michigan, USA

Lé 2 d'dézembre 1978

 

Moussieu l'Rédacteu

 

Comme j'l'ai mentionné d'vant, j'ai tréjous pensé qué nouot' vielle langue Jèrriaise est la pus expressive au monde, et tant pus qué j'vieillis, tant pus qué j'en sis seux! Quand nou s'donne lé pliaîsi d'êtudier l'Dictionnaithe Jérriais-Français du Docteu Fraînque Le Maistre, nou-s-en vait la preuve. Y'a tant d'difféthentes manniéthes à dithe la même chose en Jèrriais qué ch'est absolument r'mèrquabl'ye.

 

Par exampl'ye, dépis qué nouos v'lo dêjá au mais d'dézembre, né v'la Noué tch'appréche, mais l'încèrtitude dé l'heuthe dé la mort, comme dîsent les Ecrivains quand il' êcrivent les dreins testaments d'lus clients, veurt dithe qué jé n'lé vèrront p't-et' pon tous, et v'là tch'est bein exprinmé dans l'diton tchi nouos dit, en pâlant d'Noué: “Y'a bein d's ièrs en tête tchi n'en vèrront pon la fête!” Et en pâlant d'eune pèrsonne qué nou sait tch'est si malade qu'ou n's'en va pon s'èrfaithe, à la pliaiche dé dithe:

 

“Quand ou s'sa morte” nou peut dithe “Quand oulle étha l's ièrs freunmés!”

 

1870s?: Dans man jeanne temps

Dans man jeanne temps nou n'payait qué deux sous la s'manne pour aller à l'êcole. Nou n'payait rein pour les feu, en hivé; car châque êfant apportait touos les lundi matins sa p'tite chouque à l'êcole. Au Vendredi B'nêt (Saint) les êfants apportaient lus p'tit lot d'flieu et un oeu à la maitresse, et pis ou lus faisait des fliottes. L'Assise dé la Veille, ou la prumiêre fais qué la veille sé t'nait, était lé prumi lundi oprés lé 1 mi dé S'tembre (ou chu jour ichin si s'adonnait lé lundi) et nou continuait à villyi jusqu'au Vendredi B'nêt (Saint), autché temps il 'tait jugi qué les jours étaient assez longs pour qué châtchun vîsse sans alumer d'voeue (sei ou matin) - coume chu diton ichin l'dit: "Au Vendredi B'nêt, i' faut enfoui ses crâssets". Nou fleurissait les veilles, ch'est à dire les pathais et les rouaies du run ouêque nou villiait, atou du blianc-bouais, des vèrges d'or et d'argent, d'l'hèrbe dé St. Jean, des coues d'ernard, des tourne-soleil, de la satinète, et des aspèrges en graine. Des rouaies i' pendait des cèrclles flieuris atou des flieurs artificièles faites dé drap ou dé papi d'couleu, qu'nou-s ap'lait des mainnagières, et sus l'aire nou-s êtendait du p'sais, dé l'êtrain, d'la feûgiêre, ou du g'nêt, sus tchi nou s'assiévait pour sé garder cauds, car nou n'avait pas d'feu. Nou faisait servi dans chu temps-là dé manniêres dé lampes qu'nou-s ap'lait des crâssets, et qu'nou croch'tait à un vilain (oeune p'tite bétêne dé bouais qu'était dent'lée) qu'nou pendait à ieune des rouaies.

 

Quand nou bouoillait l'hielle à La Rocque aut'fais

 Quand nou bouoillait l'hielle à La Rocque aut'fais

 

À la fîn du stembre, eune fais l'temps 'tait dév'nu trop rude pouor aller au baté, les pêtcheurs dé La Rocque aut'fais mettaient un jour à part pouor faithe dé l'hielle ou, comme nou disait, bouoilli l'hielle. Tout l'êté, d'pis l'èrnouvé, touos les pêtcheurs avaient mîns d'côté lé faie d'châque haû (ou tchian d'mé) tch'il' avaient prîns, et ofûche étout du faie d'autre tchians d'mé, etc. Quand don v'nait l'jour pouor dêhaler toute chutte pile dé faies pouôrris - lé jour dé l'hielle - faut d'mander s'i' y'en avait, d'l'odeu! Assez, comme dit la vielle expression, pouor înfecter les sept bélettes!