1956: Sérée Informale

 L'Assembliée d'Jèrriais

Sérée Informale.

 

Eune sérée informale et amicale, en honneur dé cèrtains membres et ammins ervénus dé pays lointains eut lieu Vendrédi au sé lé 10 d'Août, au Café Marina, à l'Etacq.

 

Tribut au Juge F. V. Le Feuvre.

 

Au tout c'menchment d'la sérée, lé Président, lé Sieur Chs. Billot, dit qué ch'tait la preunmié fais que j'nos étions rêunis dépis la mort dé not' Président d'Honneur, lé Juge F. V. Le Feuvre, et dans tchiq' mots bein chouaîsis, i' payit un tribut à not' grand ammin qui s'intérêssit tréjous dans l'progrès dé not' Assembliée. I' d'mandit à toute la compagnie dé sé l'ver pour eune minute en silence à la mémouaire du Juge F. V. Le Feuvre.

 

Discours et divertissements.

 

Lé Président offrit la beinv'nue à touos les visiteurs, et ensuite j'eûmes lé pliaisi d'entendre Mme Eunice Haynes, dé Vancouver, qui nos fît un charmant discours, en finissant par eune ercitation en pliat Jèrriais.

 

Le Sieur Ph. de Veulle (Sécrétaire dé la Société des Jèrriais à Londres), suivit, en disant comment qu'ch'est important et nécessaire dé faire des efforts pour préserver not' langue Jèrriaise. I' nos donnit des exemplyes ouaiqu'en certains pays dé l'Europe, n'ou r'trouve qué l'ancien patouais existe occouo et qué les paysans sont hardi fièrs dé l'pâsler.

 

Lé Cap'taine Rodney Perchard (du Canada) nos adressit tchiq'mots en Jèrriais, en nos souhaitant tout succès et en disant qué ch'tait un pliaisi pour l'i dé s'ertrouver parmi nous.

 

Lé Sieur Ph. Ahier, B. ès Sc., nos montrit des p'tites tchuriôsités, ou antitchités, présèrvées dépis longtemps - des objets qué vraîment n'ou n'vait pon au jour d'anniet et remplyis d'intérêt.

 

Eune p'tite poësie, écrite par lé Sieur P. W. Luce, dé Vancouver, et intitulée “Un mot des Exilés à l'Assembliée d'Jèrriais,” fut lieu par la Sécrétaire.

 

Ensuite, j'eûmes lé pliaisi d'erchéver not' ammin, lé Sieur Geo. Le Feuvre (dé l'Amérique). I' nos pâslit auve sa manière facile et pliaisante dé s'n affection pour not' Assembliée, et nos dit comment qu'i' suit tréjous les rapports dé nos rêunions dans la gâzette, et comment qu'il est content d'ermèrtchi qué j'faisons des progrès, et que not' Assembliée est si vivante.

 

Des raffraîchissements et du café fûtent sèrvis et lé Comité Dramatique nos présentit des chansons Jèrriaises avec erfrains populaires. Pus tard, n'ou chantit touos ensemblyes “Not Bouan Vier Temps,” en finissant à 10.30 heures, par “La Reine.”

 

1956