1959: L'Assembliée d'Jèrriais

 L'Assembliée d'Jèrriais

Rêunion Mensuelle du Mais d'Avri.

 

D'vant c'menchi l's'affaithes pour la séthée, l'Président payit un tribut à not' preumié Président d'l'Assembliée et après iun des Présidents d'Honneu, le Juge H. Le Riche Edwards. Nous avait liut les tristes nouvelles dé san décès pus euthe dans la s'maine, et l'Sieur Billot dit comment qu' Moussieu Edwards avait tréjous fait san possiblye pour l'Assembliée et bieau qu'il avait 'té malade pour tchique temps, il avait tréjous gardé intéthêt dans l's'affaithes qui s'passaient. Les membres lus l'vitent eune minute en silence à sa mémouaithe.

 

Duthant l'couothant d's'affaithes, qui fudrent gardés courtes, i'y eu deux nouvieaux membres d'êlus.

 

Annonces.

 

Lé Président annoncit la préchaine rêunion pour lé 29 dé Mai, au Châté d'Mont Orgeuil, à 8 heuthes du sé, et l'Service Annuel à la Chapelle Méthodiste dé Sion, lé 28 dé Juin, à 3 heuthes d'l'arlevée. Auprès chenn-chin, l'Sieur Billot mînt l's'affaithes dans les mains du Sieur G. Le Masurier, Président du Conmité Dramatique.

 

Divèrtissements.

 

La preumièthe chose 'tait un débat: “Tchi vaut mus, être né contents ou intélligents?”

 

1959: La bordee d'nièr beurre

 L'Assembliée d'Jèrriais

La bordee d'nièr beurre

 

Pour la preunmié fais dépis qu'L'Assembliée a 'tait fondée, lé Conmité Exétchutif, sous la présidence du Sieur H. M. Gibaut, ont arrangi eune Séthée d'Nièr Beurre.

 

Mais ch'n'est pon seul'ment d'la séthée qu'faut penser! ch'ait l's arrangements et immenses prépathatifs, qu'i'y avait à faithe dévant. Preunmiéth'ment, fallait trouver les pommes, lé cidre, etc., et, bein important, eune pliaiche grande assez et conv'nablye pour acc'moder lé grand nombre de membres qui 'taient touos si prêts à aidgi à faithe lé travas, et auprès de jouaindre dans l'révillon et amusement. Ch'fut eune grande entréprinse, mais auprès qu'les preunmiéthes diffitchultées fûdrent surmontées, l'affaithe marchi comme sus roulette!

 

Comme ch'n'allait être eune occasion unique dans l's annales de L'Assembliée, i' fut décidé dé prendre un “film” pour l'aver comme un r'cord pour lé temps à v'nin. Les preunmièrs portraits fûdrent prins à la tchil'lie d'pommes à la fin d'octobre, siez l'Chentn'yi Henry Le Feuvre; auprès i'y n eut d'autres de prins quand l'cidre fut fait siez l'Sieur Le Cornu, à St. Louothains étout.

 

1959: Rapport dé la rêunion du mais d'Août

 L'Assembliée d'Jèrriais

Rapport dé la rêunion du mais d'Août.

 

La rêunion mensuelle eut lieu Vendrédi, l' 21 d'Août, dans la Salle Parouaîssiale dé St. Louothains, et i'y avait passant 50 membres présents.

 

Les rapports des trais dreins mais fûdrent lius, et i' fûdrent acceptés à l'unanimité, et eune nouvelle membre fut êlue. (La raison qu'i'y avait trais rapports 'tait viyant qué au mains d'Juin ch'fut l'Service Annuel et au mais d'Juillet, i'y eut l'Excursion).

 

Le Président fit tchiques annonces et auprès, mînt l'restant d'la séthée dans les mains du Conmité Dramatique, auve lé Sieur G. Le Masurier en cherge.

 

1959: L'Assembliée d'Jèrriais

 L'Assembliée d'Jèrriais

 

La rêunion mensuelle eut lieu Vendrédi l'27 d'Févri dans la Salle d'Agritchultuthe, St. Hélyi, quand à bein près 80 membres lus y rêunîtent. Lé Président, l'Sieur C. P. Billot, d'mandit ès membres dé lus l'ver pour eune minute en silence en mémouaithe d'un autre décédé, l'Sieur J. C. Coutanche.

 

Suivit l's affaithes pour la séthée, et 5 nouvieaux membres fûdrent êlus.

 

Discours.

 

J'feunmes favorisés chutte séthée-là d'aver l'jane Ted Syvret à nos donner un discours entouor san viage en Améthique l'année passée. I'c'menchit par nos montrer sus la carte des Etats-Unis, la route qu'il avait fait, et en même temps nos explyitchit les difféthentes tchultuthes, etc. des pliaiches à m'suthe qu'il allait. I'nos dit étout comment que quand il attèrrit i' fut êtonné d'vaie un si p'tit Aerodrome à compather au nôtre. I'dit étout qué tous lî faithaient tant la bein-v'nue qu'i' s'trouvit à s'n aise parmi les gens tout d'suite.

 

1958: L'Assembliée d'Jèrriais

 L'Assembliée d'Jèrriais

 

Appréchant dé 80 membres lus rêunitent Vendredi l'30 dé Mai dans les bieaux gardins du Magni d'Rozé qué l'Cap'taine et Mme. Bolitho avaient ieu la compliaisance d'ouvri pour ieux à vaie et admither. Ch'est presque împossiblye dé faithe à comprendre à personne qui n'les ont pas veus, combein bieaux qué les bouaix flieuthis dé tant d'couleures, les lîs et l's autres belles flieurs alentou du vivyi pathaissent. Ch'tait damage qué l'temps n'fusse pon pus bé, mais bieau qui tchiyait d'la plyie ch'tait eune séthée qué nou n'oubliêtha pas bein vite.

 

Pour c'menchi l's affaithes dé la séthée, lé Président, l'Sieur Chas. Billot èrmèrcyit l'Cap'taine et Mme. Bolitho pour lus învitation et Mme. Bolitho réponnit et fit la beinv'nue à tous. Quand la plyie vînt pus raide j'nos mînnes dans la Chapelle du Mangni et l'Sieur Ph. Ahier, B. ès S., nos fit un bein întérêssant discours entouor les rentes qué les t'nants d'vaient au Mangni et explyitchi comment qu'les difféthents Fiefs avaient ieu lus noms. Auprès chu bouan discours les gens dêhallîtent et l's uns prîntent couothage d'aller avau l'c'mîn qui mène jusqu'au rèservoir en d'sus du Moulin dé la Perrelle à la Mathe Ste. Catherine. Grâce au Sieur George Le Masurier qu'est ségrétaithe des t'nants, nou put ménagi lé c'mîn qui 'tait hardi mouoilli par taques. Chu moussieu-'chin avait prîns la peine dé mettre des pouques et à des bords des tôles et des plianches pour qué nou pusse gabather sans aves les pids mouollis. I' méthitait touos les r'mèrciements qui li fûtent accordés par lé Président pûs tard.

 

1958: Rêunion en Plien Air.

 L'Assembliée d'Jèrriais

Rêunion en Plien Air.

 

J'tions favorisés sus pus d'un sens pour la Rêunion Mensuelle du 29 d'Août - d'aver eune si belle séthée - et d'pouver aller sus ieune des belles anciennes fèrmes dé Jèrri. (Les Hêtres, St. Pierre).

 

Lé Président, lé Sieur Chs. P. Billot 'tait en chèrge et l's affaithes furent copés d'court pour profiter du jour. I'y eut trais membres juniours et chinq autres membres d'êlus.

 

1958: L'Assembliée d'Jèrriais

 L'Assembliée d'Jèrriais

 

La rêunion mensuelle eut lieu Vendrédi au sé, l'18 d'Avri dans la Salle Publique dé St. Martin. Y'avait une chentaine dé membres présents et i' taient assis à des p'tites tablyes dans la salle bein cauffée et qu'avait té décorée auve des belles flieurs du r'nouvé, par les damnes du Conmité Dramatique.

 

Auprès qué l'rapport du mais d'Mars fut liu et approuvé, la ségrétaithe dit comment qu'tous avaient dêpiet d'oui qué Mme. Députée Green 'tait malade, et ou liut la lettre qu'ou li' avait êcrit li sou'aitant un rêtablyissement compliet et la rêponse èrchue dé Mme. Green.

 

Auprès qué neuf nouvieaux membres fûtent êlus, lé Président dit qué l'restant d'la séthée, 'tait dans la mains du Conmité Dramatique.

 

1958: L'Assembliée d'Jèrriais

 L'Assembliée d'Jèrriais

 

La dreine rêunion pour ch't année eut lieu Vendredi l' 12 dé Décembre dans la Salle Parouaîssiale dé St. Brelade. Lé temps n'tait pon bein encouothageant, mais à bein près 120 membres lus y rêunitent quand même. Et ch'est seux qu'i' fûdrent tous contents d'y être v'nus, car ch'fut eune raide bouanne séthée d'Noué. La salle 'tait bien caoffée et décorée auve un bouaix et toutes sortes dé décorations d'Noué. Les danmes du Conmité Dramatique avaient bein travailli l'arlévée!

 

1958: L'Assembliée d'Jèrriais

 L'Assembliée d'Jèrriais

 

Passant chent membres se rêunîtent dans la Salle d'Agritchultuthe, St. Hélyi, pour la rêunion mensuelle du 28 dé Novembre.

 

Les affaithes pour la séthée fûrent bein courtes, et auprès qu'lé rapport du mais d'Octobre fut liu et approuvé quatre nouvieaux membres fûrent êlus.

 

Lé Président annoncit qué à cause dé tant d'activités d'vant Nouë, la date pour la préchaine rêunion mensuelle es'sa dans la gâzette, mais qu'en tous cas chés-'sa, “Eune Séthée d'Nouë,” arrangie par lé Conmité Dramatique.

 

Divertissements.

 

Comme divertissements pour la séthée, j'avions à c'menchi, eune démi'heuthe dé tchestchions qué l'Chent'nyi J. W. Le Breton avait prépathé. Les gens fûrent divisés en deux lots et i' fallait qu'les siens à gauche fussent pus rêvilyis, car i'gangnidrent par deux points, mais l'Sieur Le Breton en pôsit tchiques-eunes qué les gens n'pouvaient pon rêpondre en tout.

 

Auprès chennechin, j'avions des r'citations par les jannes qu'avaient prîns part à l'Eisteddfod et i'fidrent tous hardi bein. Né v'chin lus noms: Gerald Le Ruez, Ruth Amy, Ann Richard, Jean Le Maistre, Enid Le Brun, Patricia Thérin et un dialogue par Margaret de Gruchy et Kenneth Vibert.

 

Pour fini la séthée, Mme. F. Perrier et Mlle K. Le Boutiller nos avaient arrangi “Un mio d'Mystéthe,” quand quatre membres, Mesdames L. Renouf et V. Gibaut et les Messieux F. Hacquoil et R. Cabot lus assiévêtent à la tablye auve lus ièrs couverts et en pôsant des tchestchions ès gens assis l'avant ieux, fallait dêcouvri lus nom. Ch'tait vraiement amusant!

 

Un coup chennechin fini, lé Président èrmèrcyit tous qu'avaient prîns part sus autchun sens, car ch'est ches braves gens'chin qu'aiguent hardi à garder nos séthées en allant.

 

1958

1958: Rapport dé la Rêunion Générale Annuelle, 1958

 Rapport dé la Rêunion Générale Annuelle, 1958.

 

La Rêunion Générale Annuelle eut lieu, Vendrédi l'26 d'Septembre, dans la Salle d'Agritchultuthe, St. Hélyi, et i'y'avait eune s'ptantaine dé membres présents.

 

D'vant c'menchi l's affaithes dé la séthée, lé Président payit un tribut à un membre décédé, et d'mandit ès gens d'lus l'ver eune minute en silence à sa mémouaithe.

 

Lé rapport dé la dreine Rêunion fut liu et approuvé. Lé Trésôryi avait un rapport financyi tch'avait té examiné par les auditeurs; et y'avait eune bouanne balanche en faveur dé l'Assembliée.

 

1952: L'Assembliée d'Jèrriais

 L'Assembliée d'Jèrriais.

 

La rêunion mensuelle étha lieu VENDRÉDI tchi veint, lé 28 dé Mar 1952, à 8 heuthes au sé, dans la Salle d'Agritchultuthe, Numétho 3 rue Mulcaster, St. Hélyi. L'activité pour la séthée es'sa: “Avous des Tchestchions?” Touos les membres sont invités à d'mander des tchestchions, - autcheune tchestchion, - sus autcheun sujet, - ieune à la fais. V'la tch'aigu'tha hardi s'ou' avez la bonté dé l's'êcrithe sus un mio d'papi. Lé Président f'tha d'san mus, auve les cheins nommés pour lî-aidgi, pour les rêpondre. S'ou' n'avez pas l'temps dé l's'êcrithe ou' pouvez les d'mander quand-mème. V'nez, bouann'gens, nouos donner un coup dmain à consèrver not' belle vielle langue!

1952: La Sociêté Pour Consèrver l'Jèrriais

 La Sociêté Pour Consèrver l'Jèrriais.

 

L'Assembliée mensuelle étha lieu Vendrédi tchi veint, le 29 dé Févri, a 8 heuthes au sé, dans la Salle d'Agritchultuthe, numétho 3 rue Mulcaster, St. Hélyi. Lé nom d'la Sociêté s'en va êt' chouaisi, et eune distchussion étha lieu sus l'sujet: “Qué les femmes dev'thaient rempliaichi l's'hommes dans l's'Etats au pus vite possibl'ye.” Touos les membres sont învités à prendre eune part active dans la distchussion pour et contre, et un vote es'sa prîns a la fin pour décider les gangnants. Touos sont les beinv'nus.

 

1952

 

 

1952: La S'maine Victor Hugo

 L'Assembliée D'Jèrriais.

La S'maine Victor Hugo.

 

I' s'adonnit bein qu'la rêunion mensuelle du mais d'Juîn eut lieu l'Vendredi (27 dé Juîn) d'la s'maine des célébrations du chent'naithe du séjour dé Victor Hugo en Jèrri, car lé Docteu A. L. Carré, du Collège Victoria, nouos fit un bieau discours sus l'célèbre êcrivain.

 

Moussieu Carré a eune maniéthe si charmante dé d'vîser, et san sujet 'tait si bein prépathé et si intérêssant, tch'i' fît les membres présents èr'vivre dans l'temps qu'Victor Hugo marchait nouos c'mîns et allait s'assiethe sus l'Rotchi Besnard. A la fîn du discours nou-s avait mème l'împression d'l'aver connu!

 

1952: Les Bieautées d'Jèrri dans la Lantèrne Magique!

 L'Assembliée d'Jèrriais

Les Bieautées d'Jèrri dans la Lantèrne Magique!

 

Nou dit qu'l'appétit veint en mangeant - et tch'i' faut êt' p'tits d'vant qu'êt' grands. Eh bein, nouos rêunions mensuelles ont prouvé la sagesse dé ches vièrs ditons-là! Châque rêunion a 'té milleuthe qué la dreine, et l'nombre dé nouos membres a monté à pus qu'chent!

 

Auve les cheins êlus à l'assembliée dans la Salle d'Agritchultuthe Vendrédi au sé, le 30 dé Mai 1952, j'en avons chent-deux ach't'heu! Les nouvieaux membres sont: Mmes Edith Laurens, Lydie Laurens, Mavis de la Haye, Anna Steel et Bertha Enders, Mlle Eunice Billot, Moussieu et Madame George Henry Le Rossignol, Stanley John Le Rossignol, J. E. Quérée et Frank R. Le Brun (dé Gambie, en Afrique). J'avons l'plaisi, étout, d'annoncer deux nouvieaux membres jûnieurs, les jannes Edward et Kenneth Syvret, dé Léoville, à St. Ou.

 

Lé Sénateu Hedley Le Riche Edwards présidit l'assembliée, et l'y-avait à bein près eune septantaine dé membres présents.

 

Vièrs Mots.

 

Eune pétite compétition pour traduithe des expressions Angliaiches en Jerriais, comme la cheinne tchi fut si populaithe à la rêunion de mais d'Avri, nous ramémouaithit des vièrs mots qu'nou n'ouait pon fort aujourd'hui - comme, par exempl'ye: un “oyi” pour eune faute. Les marchands dé j'vaux l'savaient bein, chu mot-là, et les fermièrs tch'en acataient étout. Combein d'fais qu'nou ouïyait: “Il a un oyi, chu j'va-là - i' mord!” Un aut' mot du temps passé, “offustchi,” singnifie un ombrage dévant la veue d'tchiquechose qué nou r'garde. Les feunmeurs n'eutent pon d'peine à nouos dithe qu'eune “autchie” est le nuage dé feunmée tchi dêhalle de la bouoche du bouan'homme tch'est en train d'feunmer eune bouanne pipée dé p'teun!

 

1952: Rêunion Mensuelle

 L'Assembliée D'Jèrriais.

Rêunion Mensuelle.

 

La rêunion mensuelle eut lieu Vendrédi au sé, lé 29 d'Août 1952, à 8 heuthes, dans la Salle d'Agritchultuthe en ville, souos la présidence du Sénateu Hedley Le Riche Edwards. L'y-avait eune huip'tantaine dé membres présents.

 

La Sociêté Jèrriaise à Londres.

 

Moussieu Philip M. De Veulle, Ségrétaithe distîndgi dé la Sociêté Jèrriaise à Londres, tchi s'adonnait êt' en Jèrri et tch'avait fait l'honneu à l'Assembliée d'et' présent à la rêunion, fut présenté ès membres par lé Président Edwards, et i' fut învité à lus d'viser au sujet d'sa Sociêté. Moussieu De Veulle fut r'chu à bras ou'èrts, et présentit les compl'yîments d'la Sociêté d'Londres à l'Assembliée.

 

En bouan Jèrriais, i' c'menchit à raconter l'histouaithe d'un p'tit c'mench'ment tch'est ach't'heu' eune grande association d'Jèrriais f'nés partout l'monde. L'y-a un tas d'pèrsonnes d'împortance en Angliétèrre et à l'êtrangi, d'origine ou d'pathenté Jèrriaise, parmi ses membres.

 

1952: L'Assembliée d'Jèrriais

 L'Assembliée d'Jèrriais.

 

La quatrième assembliée mensuelle eut lieu vendredi lé 25 d'avri dans la Salle d'Agritchultuthe à St. Hélyi souos la présidence du Sénateu Hedley Le Riche Edwards. Y'avait eune bouonne souaixantaine dé membres présents. Lé rapport dé l'assembliée du mais d'mar fut liu par la Ségrétaithe Assistante et, suivant la proposition dé Moussieu F. J. Hacquoil s'gondée par Maît' Frank Trachy, lé rapport fut approuvé et adopté à l'unanimité. Eune lettre êcrite par lé Président à Maît' Frank R. Le Brun, membre au Gambia, et la rêponse fûtent liues à la rêunion. Eune lettre d'èrmèrcyîments à Moussieu A. G. Harrison, Editeu Gérant dé l' “Evening Post”, pouor s'n offre génétheuse d'aîdgi autant tch'i' pouorra à l'Assembliée au sujet d'not' langue et sa charmante rêponse fûtent liues ès membres. Lé Trésôryi étant absent d'l'Ile n'y'avait pon d'comptes à passer.

 

Les membres fûtent învités à prendre part dans eune pétite compétition prépathée par Maît' Fraînque Le Maistre et d'mandés d'trouver l'êtchivalent en Jèrriais. Si nou juge par l'enthousiasme apporté à chu sujet-là, ch'tait bein êvident qu'les membres 'taient hardi întérêssis et s'mîndrent en travas d'bouon tchoeu, et ch'tait vrainment un pliaîsi à vaie. Quand vînt l'moment dé corrigi lus êfforts plusieurs membres tchestchionnîtent l'întèrprétation et donnîtent des singnifications supplémentaithes.

 

1952: L'Assembliée d'Jèrriais

 L'Assembliée d'Jèrriais.

Rêunion mensuelle

 

La rêunion mensuelle eut lieu Vendrédi au sé, lé 17 d'Octobre, 1952, à 8 heuthes, dans la Salle d'Agritchultuthe à St. Helyi, souos la présidence du Sénateu Hedley Le Riche Edwards. L'y-avait eune septantaine dé membres présents.

 

Nouvieaux Comités.

 

Les membres suivants fûtent êlus ès nouvieaux comités:- Comité Dramatique: Mmes Marie Trachy, Amelia L. Perchard et Eileen Le Sueur, Mlle Emma Syvret, Florence M. Hacquoil et Emily Blampied, et Me. Du Tot. Comité d'Rédaction et Publ'yications:- Mme Kathleen Le Maistre, Mlle Florence M. Hacquoil et Mêssieux Frank Le Maistre, George W. Bertram et G. F. Le Feuvre. Comité Philologique:- Mêssieux Philip Ahier, B. ès Sc., et Frank Le Maistre, et Mlle F. M. Hacquoil. Comité Social:- Mmes Lilian A. Benest et F. Perrier, Mlles May Orange et Kathleen M. Le Boutillier, et Mêssieux Thomas A. Moignard, John Wesley Le Breton, George Le Couteur et Frank Trachy.

 

Chaque Comité est autorisé d'ajouoter à san nombre, et touos les Comités respectifs sont enchèrgis d'chouaisi un Président et un Ségrétaithe.

 

1957: Portraits en Ciné

 L'Assembliée d'Jèrriais

Rêunion Mensuelle.

 

La rêunion mensuelle eut lieu Vendrédi au sé, lé 31 dé Mai, à 8 heures, dans la Salle dé l'Eglyse dé la Ville (Church House). I' s'y trouvit eune huiptantaine dé membres et ammins, mais la saison d'patates en empêchit d'autres d'êt' présents. J'eûmes lé grand pliaisi d'aver auve nous Mme Ph. de Veulle, dé Londres.

 

Portraits en Ciné.

 

Après l's affaires dé l'Assembliée et l'êlection dé nouvieaux membres, lé Sieur G. W. Bertram nos divertit auve des portraits en Ciné.

 

Au c'menchement, i' nos montrit la côte dé Jèrri, en faisant l'tou' d'l'île en baté. Et pis, en Dgèrnésy et d'biaux portraits d'Hèrme, en couleur. Nou's trouvit ès Ecréhos, parmi les rotchièrs et l's ouaiseaux, et, pus tard, j'fûmes ès Minquièrs. Lé Président, qui s'y r'connaît parfaitement, nos donnit toutes les explyications nécessaires.

 

1957: Rêunion Mensuelle

 L'Assembliée d'Jèrriais

Rêunion Mensuelle.

 

La dernière rêunion mensuelle eut lieu en pliein air, lé 19 dé Juilet et ch'fut pour touos les 150 membres présents eune occasion dé grand pliaisi et dé jouaie. Lé lieu chouaisi fut la maison du Président (Holmdale, St. Martin), et j'fûmes grâcieusement erchus par lé Sieur Chs. Billot et sa charmante dame, Mme Lilian Billot, qui nos fîtent la beinv'nue en arrivant.

 

La rêunion eut lieu en d'vant d'la maison et le Sieur Chs. Billot explyitchit comment qué les membres du Comité Dramatique l'i'avaient d'mandé la pèrmission dé faire usage dé ses clios pour l'organisation dé lus sérée.

 

Divèrtissements.

 

Ch'est qu'ch'en fut eune sérée extraordinaire!

 

Ses mystères, des d'vinâilles, des courses après des objéts muchis dans les vallettes, chèrchant les directions écrites sus papi, souos les bouais; dans des creux d'lapins; souos des pièrres; drière des choutchets; à travers les brèques, crouaîsant l'cané; grimpant les fossés; chèrchant pour instructions parmi les cannibottes et dans les creux d'un géant d'bouais mort pour lé sécret à la fin d'la touânée.

 

1957: L'Assembliée d'Jèrriais

 L'Assembliée d'Jèrriais

Rêunion Mensuelle.

 

La rêunion mensuelle eut lieu Vendrédi au sé, lé 26 d'Avri, dans la Salle dé Grove Place, souos la présidence du Sieur Chas. Billot. Ch'fut fut un change dé locale, et i's'y trouvit à peu près 150 membres.

 

Après l's affaires dé la rêunion et l'êlection dé nouvieaux membres, lé Président ermèrcyit les autorités pour nos aver prêté lus Salle, et l'Comité Dramatique prins chèrge dé la sérée. Ch'fut dans la forme d'un concert, bein arrangi et organisé, avec Mme E Le Sueur au piano.

 

Lé Sieur John Kennedy, O.B.E.

 

Comme visiteur intérêssi, j'eûmes un Moussieu dé Londres, lé Sieur John Kennedy, O.B.E. (Directeur dé la Société des danses et des vieilles chansons folkloriques d'Angliétêrre), qui voulait faire des r'cords dé chansons et ercitations en Jèrriais.

 

Lé Concert.

 

Lé programme 'tait bein varié et nou c'menchit par eune farce (écrite par Mme Amelia Perchard), - “Mait' Joe.” N'ou's entendit du bouan Jèrriais et l's artistes fûtent bein appliaudis pour lus animation. I'y eut des scènes rîsiblyes, bein erprésentées et hardi pliaisantes.

 

Comme chansons, i'y eut “L'expédition,” par G. R. Le Masurier; “En Bouaîte,” par J. Richard et G. Perchard. Eune aut' bouanne chanson “Tch'est qui s'sa, ès sa,” par Mme L. Le Quesne. Deux jeunes membres, Helen Perchard et Ruth Amy, habillyies comme anciennes femmes et toutes courbées, chantîtent “Nos Minzères.” I fûtent bein appliaudies. Eune aut' chanson populaire, “Les Policemans,” par G. R. Le Masurier et G. Perchard, suivit. Et pour ervénir à des évènements locales et bein à propos, deux chansons: “J'lus s'rons fidèles,” et “La Visite dé la Reine.”

 

Comme èrcitations, Mme Alice Blampied en donnit deux: “En chèrche d'un homme,” et “Mémouaire d'aut'fais.” Deux dialogues bein amusants pour varier; “L'accord,” par W. H. de la Mare et G. R. Le Masurier, et “Sus l'heure du dîner à l'école,” par deux membres junieurs, Jean Le Maistre et Kenneth Vibert. Et pour fini, eune aut' farce, - “En Vacances,” avec toutes sortes dé malheurs et d'embarrâs dévant l'départ, mais tout finit bein.