1953: La triste nouvelle

 La triste nouvelle.

Réflections au Portinfé.

 

Moussieu l'Editeu,

 

Quand la Merrienne entendit l'autre matin la triste nouvelle de la mort de la vieille Reine, j'pensais qu'ou s'n'allait s'mettre à plieuthé. “Nous a d'la peine à craithe, Ph'lip,” ou dit, “qu'ou s'en est alleé à la fin, chutte chièthe dame. Quant à mé, j'éspethais tout l'temps qu'ou s'sait ocquo là pour le jour de la Coronâtion.”

 

“Eh bein, Merrienne,” j'l'y dit, “je n'sais pas. Bein mûs ach'teu, à ma veue, qu'à la fin du mais d'Mai, ou au qu'mench'ment d'Juin. Et, après tout, ma vieille, san temps tait v'nu comme notre temps dait v'nin étout, à té et mé. Quand nous arrive à l'âge de huiptante-chinq nou n'peut pas s'pliaindre si la fin veint.”

 

“C'est vrai assez,” ou dit, avec un soupi, “mais quand nous a aimé et réspecté une personne toute sa vie ch'est un choc d'entendre qu'oulle est horte, et qu'nou n'la vêrra pas. Il est vrai que nous n'l'avons veue qu'une fais, quand ou vint avec le Rouai en vingt-yunne, mais nous a tréjous veu ses portraits dans les gâzettes Angliaises, et y sembliait qu'nou n'pouvait pas craithe qu'ou dispathaitrait d'la scène tchique jour. Ch'est comme une monûment qu'nous a tréjous veu, et tch'a dispathu dans une niet.”

 

1975: Les changements sont en mode

 Les changements sont en mode

 

Fort Lauderdale, Florida,

U.S.A.

 

Lé 15 dé mar, 1975.

 

Moussieu l'Rédacteu,

 

La gâzette du six d'févri, arrivée chutte sémaine, nouos annonce qué ch'est l'Député Binnington tch'est l'nouvieau Sénateu. Félicitâtions! À m'n idée i' n'y a pon grand difféthence entre les fonctions d'Sénateu et d'Député, sénon qu' la gestion du Sénateu est d'pus longue duthée. J'pense bein qu' ch'est pour ch'là qu' les gens tch'ont l'ambition d'êt' Membres d's Êtats aspithent à chu titre-la.

 

Eune chose qué j'ai r'mèrtchi en êtudiant l'analyse des vouaix à St. Ouën est qu' les deux candidats tch'ont des noms Angliais (et Irlandais?) eûdrent pus d'vouaix qué l'candidat tch'a un nom Jèrriais. V'la tchi montre les changements qué l'pâssage du temps apporte. J'm'èrsouveins du temps qu'un candidat auve un nom autrément qu' Jèrriais n'éthait pon ieu pus qu' deux-s'trais vouaix dans eune élection à St. Ouën. Quant à mé, j'espéthé qué Moussieu Riley, Seigneu d'La Trinneté, êprouvetha acouo eune fais. Il a fait d'mangnifique travas comme Député, et j'l'ai tréjous admithé d'pis tch'i' fut maûdit par l'Union des Travailleurs à l'aérodrôme pour aver aîdgi à dêchêrgi la cartchaison d'un avion quand il' 'taient en grêve.

 

Les temps ont changi

 Les temps ont changi

 

Trenton,

Michigan, USA.

 

Lé 12 d'avri, 1980.

 

Moussieu l'Rédacteu,

 

J'veins d'èrchéver deux gâzettes dé Jèrri en même temps, les cheinnes du sept et du quatorze dé févri, et la preunmié chose qué j'vai en ouvrant la cheine du quatorze est l'annonce du décès d'Moussieu l'ex-Député Walter John Simon, du Vau d'La Mathe à St. Pièrre. I' n'y'avait qu' siex ans d'âge entre li et mé. J'sis bein avolé dans ma huiptante-neuvième! J'offre mes sîncéthes condoléances à Madanme Simon et à ses êfants.

 

Lé Sieur Walter Simon 'tait un moussieu d'belle présence. Il 'tait av'nant et charmant et respecté par tout l'monde. Et comme touos les vièrs Jèrriais, il 'tait hospitalyi. Hélas! Chutte vielle race dé Jèrriais dispathaît à grands pas. Si ma mémouaithe (vielle comme les rues à ch't heu!) né m'joue pon d'farces, i' m'sembl'ye qué san p'pèe fut Député d'St. Pièrre étout. J'lé connaîssais tout à fait bein car i' v'nait consulter l'Connêtabl'ye Francis Vibert Le Feuvre (pus tard Juré-Justicier) au sujet d's affaithes dé pâraisse quand j'tais Ségrétaithe du Connêtabl'ye y'a eune septantaine d'années. Ch'est en tchi lé Sieur Walter t'nait d'san p'pée pour aver sèrvi sa pâraisse auve distînction pour bein d's années.

 

1980: La tâche continnue

 La tâche continnue

 

Trenton,

Michigan, USA.

 

Lé 5 d'avri, 1980.

 

Moussieu l'Rédacteu,

 

Dans au pays monarchist, quand lé Rouai meuthe nou dit: “Lé Rouai est mort - vive lé Rouai!”, eune mannièthe dé dithe qué ouaithe que l'vièr chef dé la monarchie n'est pus, ou n'est rêellement pon morte viyant qu' ou continnue souos un nouvieau chef, généralement héréditaithe.

 

Eh bein, l'année 1977 vit la mort d'un trésor dé la littéthatuthe Jèrriaise - lé Bulletîn d'Quart d'An d'l'Assembliée d'Jèrriaise. Heutheusement, grâce au Don Balleine, lé trésor continnue à vivre souos l'nom dé “Les Chroniques du Don Balleine”, et l'fait qué l'rédacteu des “Chroniques” est l'même comme lé chein tchi fît l'Bulletîn d'Quart d'An d'L'Assembliée d'Jèrriais un mangnifique succès promet qué ches “Chroniques” s'en vont êt' aussi populaithes comme les Bulletîns parmi les savants d'Nouormandie, et tch'i' s'en vont en fîn d'compte sé trouver dans lus biblyiothèques et dans les cheinnes d'la Nouormandie, mais d'bein d'aut' pays à l'êtrangi.

 

I' faut du couothage et d'l'ênèrgie pour entréprendre la responsabilité dé produithe un tel travas avau l's années, et i' faut saluer lé rédacteu, l'Docteu Fraînque Le Maistre, OBE, et l'honorer pour bein vouler continnuer à donner san temps et san talent à eune tâche si împortante pour la consèrvâtion d'nouot' fanmeuse vielle langue Jèrriaise, tchi fut la raîson d'être dé L'Assembliée d'Jèrriais quand ou fut fondée en 1951.

 

1980: Des nouvelles dé Jèrri

 Des nouvelles dé Jèrri

 

Fort Lauderdale,

Florida, USA.

 

Lé 19 dé janvyi, 1980.

 

Moussieu l'Rédacteu,

 

J'sis chanceux, chutte sémaine. J'ai r'chu la gâzette dé Jèrri du 22 d'novembre dé l'année pâssée, et j'l'ai lieue tout l'travèrs sans arrêter quand l'porteux d'lettres l'a apportée.

 

J'ai grand r'gret d'vaie l'décès du Sieur Snowdon Amy dans chutte gâzette. J'savais bein tch'il 'tait malade, mais jé n'savais pon tch'i' n'tait pus du rang des vivants, et j'prends ch't' occâsion pour faithe part dé mes grands r'grets et condoléances à Mesdanmes La Maistre, Vautchi et Holley, ses soeurs, et à ses êfants et sa fanmil'ye. Un charmant moussieu si janmais y'en a ieu iun, l'Sieur Snowdon, doux d'caractethe, tréjous riant et av'nant et tréjous prêt à rendre sèrvice et faithe un pliaîsi. I' n'méthitait pon d's'en aller si janne, et l'vièr diton qu' ch'est les bouans tchi s'en vont m'est v'nu à l'idée en liêsant les décès dans la gâzette.

 

1976: À La Côte

À La Côte

 

Trenton, Michigan,

U.S.A.

 

Lé 29 dé mai, 1976.

 

Moussieu l'Rédacteu,

 

J'veins d'èrchéver eune lettre dé Mdme. Françoise Le Guédard Turcotte tchi d'meuthe à Ste. Foy, près d'la belle et grande cité dé Tchubec, au Cannada. La lettre, env'yée au Ménage ès Feuvres en Jèrri l' 19 dé mar, veint dé m'trouver ichîn justément d'vant qué j'm'en r'âge dans l'Île.

 

Dans sa lettre, Mdme. Turcotte mé dit qu' oulle 'tait d's'appointée, mème attristée, d'n'aver pon veu l'nom d'san p'pèe, John Le Guédard, mentionnée dans l'chapitre entouôrre les Jèrriais à La Côte dans man livre “Jèrri Jadis.”

 

Eh bein, bouannes gens, j'en ai r'gret. Et ch'est bein seux tch'i' y'en a bein d'autres tch'étaient, comme lé Sieur Le Guédard, dîngnes dé mention, tchi n'sont pon r'cordés dans man livre. I' faut m'pardonner pon vêtchu à La Côte mé-mème, mes r'cits au sujet des cheins tch'ont vêtchu, travailli et pâssé au r'pos étérnel là, sont l'rêsultat dé chein qu' j'ai peu apprendre en convèrsâtion auve les habitants actuels dé La Côte, et en liêsant souangneusement les noms Jèrriais sus les tombieaux dans les chînm'tchiéthes des églyises Anglyicannes lé long d'La Côte. Et, chose assez drôle, j'n'avais janmais ouï l'nom du Sieur Le Guédard mentionné, ni veu sus autchun tombé, quand j'êcrivis “Jèrri Jadis”. Et pis, étout, i' s'pouôrrait qu' j'ai veu des noms d'pèrsonnes sus des tombieaux qué j'n'éthais pon r'connu comme “natif de Jersey” viyant tch'i' n'avaient pon des vrais noms Jèrriais et qué jé l's éthais supposés êt' Français-Cannadgiens.

 

1976: Lé temps s'pâsse!

 Lé temps s'pâsse!

 

Fort Lauderdale, Florida,

U.S.A.

 

Lé 17 dé janvyi, 1976.

 

Moussieu l'Rédacteu,

 

Eune lettre èrchue dreinement d'Jèrri mé donne la triste nouvelle du décès d'eune anmie d'St. Brélade, Madanme Margaret (“Maggie”) Benest, née L'Boutilyi, d'La Sergenté à La Mouaie. Eune charmante danme si janmais y'en a ieu ieune, et j'profite dé ch't' opporteunité pour présenter mes condoléances à ses deux filles et lus fanmil'yes, et à sa soeu, Mdlle. Kathleen Marté L'Boutilyi.

 

I' s'en vont à grands pas, les vièrs anmîns. Quand jé d'meuthais à La Mouaie siez mes parrain et marraine d'Aubert, j'prannais lé “train” dé là touos les jours pour aller en ville où'est qué j'tais dans l'office à Moussieu Charles William Binet, Êcrivain. Madanme Walter Benest et san p'pèe, lé Juge John Edward Le Boutilyi, 'taient mes compangnons dé viage dans l'train, Madanme Benest (Mdlle. Le Boutilyi dans chu temps-là) en c'mîn pour lé “Jersey Ladies' College”, et l'Juge en c'mîn pour la Cour Rouoyale, L's Êtats et ses conmités. Si ma mémouaithe né m'trompe pon, i' m'sembl'ye qué touos les conmités d'La Chambre Législative 'taient présidés par les Juges dans l'temps.

 

1975: Choses et autres

 Choses et autres

 

Trenton, Michigan,

U.S.A.

 

Lé 26 d'avri, 1975.

 

Moussieu l'Rédacteu,

 

M'èrvélà dans l'Êtat d'Michigan. Ch'est comme si j'tais dans un aut' monde. Dans la ville dé Fort Lauderdale, à vîngt-deux milles dé Miami, en Floride, la tempéthatuthe 'tait dans les huiptante à nénante dégrés Fahrenheit touos les jours. Ichîn, en Michigan, ch'est eune affaithe dé quarante dégrés, pus ou mains, et ouaithe qué ch'n'est rêellement pon fraid, la difféthence est assez pour donner l'împression, v'nant des chaleurs, tch'i' fait fraid!

 

Deux gâzettes dé Jèrri m'attendaient ichîn, les cheinnes du six et treize dé mar, et la preunmié chose qué j'ai fait en arrivant 'tais d'les liéthe tout l'travèrs. Dans l's annonces des décès, j'ai veu l'trépas d'un vièr anmîn, lé Sieur Francis Andrew L'Mèrquand d'Gros Nez, à l'âge dé huiptante-siex ans, et j'veurs faithe mes condoléances à Mdle. Eva, sa soeu. Ch'est seux qu' ou s'en va s'trouver seule et qu' ou s'en va l'mantchi hardi. Lé Sieur Fraînque Le Mèrquand 'tait un charmant vièr Landîn, consèrvateur et Jèrriais dans l'âme, et nou peut dithe qué né v'la acouo un mio d'Jèrri dispathu. Un aut' anmîn - et vaîsîn - dispathu dreinement est l'Sieur Arthur (“Artie”) Vibert, des Palliéthes, iun des bouans corps dé la vie, tréjous riant et prêt à faithe un pliaîsi, et j'fais mes condoléances à sa danme étout. “Artie” Vibert avait 'té à La Côte dans san janne temps pour les Robîns, et il avait eune bouanne mémouaithe pour s'èrsouv'nîn des garçons tch'étaient là en mème temps qu' li. Il 'tait hardi întérêssi à saver tch'est tch'en 'tait dév'nu, d'ieux, auve lé pâssage du temps, et La Côte 'tait souvent l'sujet d'convèrsâtion quand j'lé rencontrais. I' s'en vont à grands pas, les vièrs Landîns. Y'en a tréjous tchi manquent quand j'arrive en Jèrri. Et j'vai tréjous pus d'noms Jèrriais parmi les décès dans la gâzette qué parmi les naîssances.

 

1975: En mémouaithe...

 En mémouaithe...

 

Le Ménage ès Feuvres,

St. Ouën.

 

Lé 19 de juillet, 1975.

 

Moussieu l'Rédacteu,

 

Ch'est vrai qu'la vie n'est pon tout roses, et tch'i' n'y'a pon d'roses sans pitchets. La tragédie tch'a accâblié la bouanne vielle fanmil'ye Gavey d'St. Ouën en est la preuve. Lé décès accidentel d'un raide bouan garçon et d'sa femme, faûchis dans la flieur dé l'âge, a 'té lamenté par tout l'monde, et l'fait qué l'Églyise dé St. Jean n'tait pon grande assez pour assiéthe toutes les pèrsonnes tch'étaient au sèrvice d'entèrrement est un mangnifique têmouangnage dé la sŷmpathie qué les gens des deux pâraisses dé St. Jean et d'St. Ouën ont montré pour lé Sieur Douard Gavey et sa danme.

 

Mais ch'n'est pon l'âge tchi compte quand l'Bouan Dgieu fait l'appel. Sans doute, nou s'y attend pûtôt quand oulle est avanchie, l'âge, et nou vait les vièrs Jèrriais s'en aller à grands pas. J'pense bein qu' ch'est aussi naturel dé mouothi comme d'êt' né, et ch'est nouot' destîn à tous. Mais nou peut dithe qué quand l's anciens dispathaîssent ch'est des mios d'Jèrri tchi s'en vont, car il' ont connu la vie paisibl'ye du temps pâssé. Malheutheusement, un tas d's anciens n'laissent pon d'fis à les rempliaichi. S'il' en laîssent et tch'i' sont mathiés, la chance est qu' lus d'scendants n'apprandront pon à pâler la langue Jèrriaise, et ou finnitha par dispathaître étout en Jèrri, mais ou vivra dans un tas des bibliothèques à l'êtrangi tch'ont acaté l'Dictionnaithe Jèrriais-Français du Docteu Fraînque Le Maistre, un chef-d'oeuvre dé preunmié ordre.

 

1977: Dans la gâzette

 Dans la gâzette

 

Fort Lauderdale, Florida,

USA.

 

Lé 16 d'avri, 1977.

 

Moussieu l'Rédacteu,

 

Né v'chîn la fîn d'ma dreine sémaine dans la chaleu d'La Floride. Il est temps qué j'm'en r'âge dans l'nord vaie mes fréthes et ma soeu d'vant m'en aller pâsser l'êté en Jèrri. Ch'est comme si nou s'en allait dans un aut' monde quand nou tchitte La Floride, auve sén hèrbe vèrte, ses flieurs et ses palmes, ses bouais auve lus vèrtes fielles, et tout l'monde en habits d'êté, et pis qu' auprès eune affaithe dé tchînze chents milles en avion nou s'trouve dans un pays où'est qu' les bouais sont acouo sans fielles et qu' l'hèrbe est breune et pathaît morte. Et ch'est seux tch'i' y'a acouo d'la né sus la tèrre à des bords, et tch'i' s'en va faller mett' eune grand' câsaque dé temps en temps. Jé v'nons d'aver des tourbillons, ouragans et “tornades” dans l's êtats du nord et du nord-vouêt. Ch'est d's êvènements tchi soulaient s'pâsser en Floride et dans l's aut' êtats du sud, comme Louisianne, Mississippi et Georgia, mais, comme j'l'ai mentionné d'vant, l'clyînmat pathaît changi un mio à la fais touos l's ans, et mème La Floride a pèrdu un tas d'sa chaleu ch't hivé.

 

Lé porteux d'lettres né m'a pon oublié chutte sémaine. I' m'a apporté deux gâzettes dé Jèrri, les cheinnes du 24 dé févri et du 3 d'mar. Ch'est dans chette-là qué j'ai veu la triste nouvelle du décès d'un aut' vièr anmîn, lé Sieur Henry Prouings Le Ruez, dé “Homestead” à St. Pièrre. Un charmant viér solide Jèrriais d'preunmié trempe, întègre, doux d'caractéthe et aimé par tout l'monde tch'avait l'bonheu dé l'connaître. J'ai connu san p'pèe, lé Sieur Thomas Le Ruez d'Ste. Mathie, Prédicateur Wesleyen dé grande èrnommée et Connêtabl'ye d'sa pâraisse. Il 'tait iun des clients à Moussieu Charles William Binet, Êcrivain, quand j'tais dans s'n office, et nou-s-aimait tréjous aver la visite de Maît' Thomas Le Ruez au sanm'di quand i' v'nait en ville. San fis Henry, dîngne successeur dé san p'pèe, a 'té iun des pillièrs du Méthodisme Wesleyen étout, et nou peut dithe qu' auve san décès un aut' mio d'Jèrri a dispathu à tout janmais. J'fais part dé man profonde r'gret et d'mes condoléances à Madanme Veuve Le Ruez et sa fanmil'ye.

 

1977: Dans la gâzette

 Dans la gâzette

 

Fort Lauderdale, Florida,

USA.

 

Lé 26 d'févri, 1977.

 

Moussieu l'Rédacteu,

 

Lé porteux d'lettres m'a 'té bouan chutte sémaine. I' m'a apporté deux gâzettes dé Jèrri, les cheinnes des six et treize dé janvyi. Comme les Jèrriais font tréjous en ouvrant la gâzette, j'ai r'gardé les décès, et ch'est auve èrgret qué j'vai qu' un aut' anmin d'vièr temps, Hedley George Luce, Êcrivain, n'est pus, et j'fais part dé man r'gret et d'mes condoléances à Madanme Luce. Et eune lettre d'un anmin à St. Ouën m'apprend la nouvelle qu' un aut' anmin, Philip Poch, Êcrivain étout, a pâssé l'pas. J'tions touos les trais clèrcots en mème temps dans La Rue ès Trais Pigeons, et j'ai eune idée qué ches deux-là sont les dreins tch'étaient là en mème temps qu' mé et qué mé v'la tout seu d'ma sorte. Lé Sieur Poch, un charmant corps tréjous prêt à faithe un pliaîsi, fut fait Franc-machon dans la lege La Césarée justément d'vant mé en 1919, et mé v'la don lé preunmyi en tête dé la liste des Franc-machons d'la loge. Ch'tait l'Avocat John Fleury L'Cornu tchi m'proposit, et si ma mémouaithe né m'trompe pon, ch'tait l'Sieur Frank Salmon Godfray tch'était Vénérable Maître.

 

En pâlant d'La Rue ès Trais Pigeons, i' m'veint à l'idée qu' les trais pigeons tchi li donnîdrent san nom multipliyîdrent bein pus vite qué les deux-s'trais Avocats d'lus temps, mais qu' à la fîn l's Avocats sont en train dé l's attraper et qué l's autorités ont décidé dé dêtruithe assez d'pigeons pour balanchi l's affaithes et êgailli l'nombre d'Avocats et d'pigeons. J'crai bein qu' ch'est à cause dé chu problème là qué l'pouorre moussieu tchi voulait sauver la vie d'ches bieaux ouaîsieux n'a pon rêussi!

 

1977

 1977

 

San Antonio, Texas,

USA.

 

Lé jour dé l'An, 1977.

 

Moussieu l'Rédacteu,

 

Nouos v'la arrivés au preunmié jour dé mil neu chent septante-sept, et j'espéthe qué chu Jour dé l'An s'en va êt' lé c'menchemént dé trais chent souoxante-chîn bouans jours touos vous en Jèrri. Et j'lé souhaite étout à tous m's anmîns n'împorte dans tchi partie du monde tch'i' s'trouvent. J'mé r'souveins du temps qué quand nou souhaitait eune bouanne année à un anmîn i' rêponnait tchiquefais, en riant, “Véthe, man vyi, eune bouanne année d'canard!" Y'avait d'l'extension au but dé ch't' expression-là tchi n'tait pon d'ûsage parmi les pus raffinés, mais j'm'en vais vouos laîssi la d'vinner ou la trouver dans l'dictionnaithe! I' faut aver vêtchu dans l'pâssé pour saver les vielles expressions. I' n'taient pon tréjous d'la sorte qué nou faîsait sérvi à l'Êcole du Dînmanche ou en compangnie des danmes et des d'mouaîselles, mais nou savait garder sa pliaiche dans les vièrs temps et nou s'comportait accordamment en lus présence.

 

1973: Grands anmîns

 Grands anmîns

 

San Antonio, Texas,

U.S.A.

 

Lé 29 dézembre, 1973.

 

Moussieu l'Rédacteu,

 

Ieune des choses les pus précieuses dans la vie est l'privilège d'aver d'bouans anmîns, et v'la tchi fait grand pliaîsi d'vaie tchiquechose întérêssant à lus êgard dans la gâzette, prîncipalment quand nou-s-est s'pathés d'ieux par des grand' distances.

 

J'veins d'èrchéver des “coupures” (“newspaper clippings” en Angliais) d'la gâzette dé Jèrri, et des gâzettes dé Nouormandie, tchi donnent eune description dé la cérémonie d' “investiture” du Docteu Frank Le Maistre auve l's însingnes et appartenances dé san Doctorat, à l'Univèrsité d'Caën. Quand j'tchittis Jèrri pour m'en r'vénîn en Améthique, j'avais grand r'gret dé n'pouver pon rester en Europe assez longtemps pour êt' présent à chutte cérémonie, car rein n'ma janmais fait pus d'pliaîsi qué d'ouï qu' un anmîn du calibre dé Frank Le Maistre avait ieu ch't honneu-là.

 

J'lus s'sai r'connaîssant, au Docteu et Madanme Le Maistre, jusqu'à la fîn d'mes jours, pour lus bouanté et hospitalité envèrs mé-mème et les membres d'ma fanmile tch'ont visité Jèrri. Mais ch'n'est pon seulement à cause dé ch'là qué j'sis content d'vaie l'travas littéthaithe du Docteu êt' rêcompensé par l'Univèrsité d'Caën - l'univèrsité tchi dait nouos pâsser l'pus près du tchoeu viyant qué j'sommes Nouormands d'race - mais étout viyant qué j'sai p't-êt' mus qu' autchun, à part de sa fanmile, combein tchi l'méthite, et combein d'nyits tch'i' n'a pon dormi fort car il en pâssait la maîntchi à faithe lé dictionnaithe tch'était l'ambition d'sa vie. Il est vraînment l'grand maitre dé la langue Jèrriaise, et d'vant li “Je m'arrête et m'incline!” comme disait m'n anmîn Edwin John (“Jock”) Luce, dé mémouaithe respectée, et j'lé félicite acouo eune fais.

 

1973: La gâzette èrveint!

 La gâzette èrveint!

 

Ottawa, Ontario,

Canada.

 

Lé 19 dé mai, 1973.

 

Moussieu l'Rédacteu,

 

M'èrvéla au Cannada à visiter ma soeur Emily et man fréthe Sydney et sa femme et lus êfants et p tits-êfants. Ch'est tréjous un pliaisi pour mé d'èrvaie les vièrs anmîns, étout, tchi travaillaient à côté d'mé dans l's offices du gouvèrnément d'la Dominnion en 1919-1921 dévant m'n aller travailli et d'meuther dans l's Êtats-Unis. Malheutheusement, i' n'y en a pon un tas d'ches-là tchi sont du rang des vivants à ch't heu. Lus nombre rap'tiche touos l's ans. J'ai d'la peine à réaliser qu' y'avait chînquante-trais ans l'mais d'novembre pâssé d'pis m'n arrivée à Ottawa en 1919. Comme lé temps s'pâsse! Et acouo, quand nou-s-y pense, chînquante ans n'est rein dans la veue d'L'Êtèrnel - comme lé Psalmiste David Lî dit dans l'quatrième vèrset du nénantchième Psaume : “Mille ans sont devant Tes yeux comme le jour d'hier qui est passé, et comme une veille en la nuit!”

 

Jé v'nais d'èrchéver la gâzette du chînq d'avri quand j'm'en vîns à Ottawa y'a deux-s'trais jours. Ou n'pouvez pon vouos înmaginner l'pliaisi d'la r'vaie arriver auprès aver 'té sans pour un mais et sans saver tch'est tch'i' s'pâssait en Jèrri. La dreine èrchue d'vant chette-là 'tait du preunmyi d'mar, ch'est en tchi i' dait y'en aver acouo ieune à v'nîn dépis qu' la grève né duthit qu' trais s'maines. Quantchi tch'i' s'en vont êt' abolies, les grèves, en faveur dé l'arbitrâtion? L'publyi est tréjous l'pèrdant car ch'est li tch'en est tréjous à la dupe.

 

1974: Au haut d'l'êtchelle

 Au haut d'l'êtchelle

 

Fort Lauderdale, Florida,

U.S.A.

 

Lé 6 d'avri, 1974.

 

Moussieu l'Rédacteu,

 

Eune lettre d'un anmîn en Jèrri m'annonce lé décès d'un aut' Jèrriais distîndgi - Messire Daniel Cabot - et j'fais part dé mes condoléances à sa danme, qué j'ai ieu l'pliaîsi d'connaître pour bein d's années. J'dis un “autre” Jèrriais distîndgi car i' n'y a pon longtemps qué j'viyais l'décès d'Lord Coutanche dans la gâzette, et y'a eune sémaine la gâzette, et y'a eune sémaine la gâzette du 7 févri m'annonçait l'décès du Général Messire Frank Messervy. V'la tchi m'ramémouaithe qué quand j'èrvîns en Jèrri en 1946, l'année qué j'm'èrtithis d'affaithes, lé Général Neville Godfray Hind m'învitit à pâsser eune séthée siez li à Longueville et tch'i' m'montrit un tas d'portraits prîns à la dgèrre en Êgypte dans tchi tch'il' 'taient prîns ensembl'ye sus l'camp d'batâle d'Alamein li (l'Général Hind) et l'Général Messervy auve lé Feld-Maréchal Lord Wavell.

 

J'viyais dans la gâzette tch'i' visitit Jèrri y'a eune vîngtaine d'années, l'Général Messervy, et tch'i' rencontrit d'la pathenté à la Trinneté. J'pense bein qu' Alfred George Messervy, Êtchuyer, d'Brabant, Trésôryi des împots quand j'tais dans “Hill Street”, 'tait iun d'ses pathents. J'allais souvent à Brabant pour eune gamme dé “tennis” dans chu temps-là. La dreine fais qué j'm'èrsouveins d'aver veu l'patriarche d'la fanmile, lé Juge Alfred Messervy, 'tait à Carteret, en Nouormandie, où'est qué jé v'nais d'faithe eune touannée en “bicyclette” par Bricquebec, Les Pieux, St. Vaast, etc., auve l'Avocat Edmund Toulmin Nicolle. En r'vénant, j'arrivînmes là en mème temps qué l'Juge et j'dinînmes ensembl'ye en attendant pour lé baté tchi nouos ramenit à Gouôrray.

 

1972: Choses et autres...

 Choses et autres...

 

San Antonio, Texas,

U.S.A.

 

Lé 8 janvyi, 1972.

 

Moussieu l'Rédacteu,

 

La s'maine pâssée j'vouos disais qu' j'avais r'chu la gâzette dé Jèrri du 4 novembre. Eh bein, chutte sémaine la cheinne du onze novembre est v'nue et j'ai ieu l'pliaîsi d'liéthe des nouvelles dé Jèrri deux s'maines dé siette! Ouaithe tch'i' sont quâsi deux mais en r'tard, ch'est quand mème un pliaîsi. Mais ch'n'est janmais pliaîsant d'vaie les noms des gens qu' nou-s-a connus dans la colonne des décès, et y'en a tréjous tchitch'uns. Chutte fais y'en avait deux qu' j'avais connu dans ma jannèche, Madanme Jean J'valyi, née Selous, et Madanme Nicholson, née Rhona L'Mèrquand, aut'fais d'La Baie d'St. Brélade.

 

Quand jé d'meuthais à La Forge à St. Ouën, j'allais souvent à la boutique siez Mait' Fraînque Selous, lé p'pèe à Madanme J'valyi, et j'admithais ses deux belles pétites filles. Quand jé d'meuthais à La Mouaie à St. Brélade, lé p'pèe à Madanme Nicholson 'tait l'propriêtaithe dé Haute Place, la maison dans tchi jé d'meuthais, et j'viyais souvent les D'mouaîselles Eunice et Rhona L'Mèrquand et lus pus janne soeu tchi fut Madanme Shepard pus tard. Mes condoléances à Moussieu J'valyi et Madanme West. J'ai r'gret d'êt' si tard à l's ouffri, mais ch'est la faute du temps tch'i' prend pour les gâzettes à v'nîn ichîn.

 

J'vai qu' j'avons eune bouanne opposition dans L's Êtats dans la pèrsonne du Sénateu John Le Mèrquand. Sans en saver assez entouore lé problème des architectes entanmé par lé Sénateu à la séance du deux d'novembre pour aver eune opinnion personelle pour ou contre, j'peux dithe qué l'mêtchi d'architecte est iu des milyeurs ichîn en Améthique pour faithe des sou. N'împorte tchi sorte d'bâtisse tch'i' dessinnent, i' sont seux d'êt' payis, et les louais tchi forchent l'approbâtion d's autorités meunicipaux dévant la construction, exigent un plian prépathé par un architecte. I' font des sou comme des êcales en dessinnant les plians pour nouos êcoles, car i' sont autorisés à chèrgi un pourcentage du couôtement entchi d'l'êcole, et naturellement i' produisent un plian tchi s'en va couôter l'pus d'sou. I' mettent du marbre ichîn et là en d'dans ioù qu' du pliâtre ordinnaithe couôt'tait bein mains, et il' embellissent un tas d'choses inutilement pour augmenter l'prix d'l'entchi. Quant ès architectes Jèrriais, j'avoue qué l'seul à tchi j'ai janmais ieu affaithe est Moussieu L'Sueux, et j'l'ai trouvé bein raisonnabl'ye et un vraie moussieu.

 

1968: Les nouvelles dé Jèrri sont tréjous les beinv'nues!

 Les nouvelles dé Jèrri sont tréjous les beinv'nues!

 

San Antonio, Texas,

U.S.A.

 

Lé 9 dé mar, 1968.

 

Moussieu l'Rédacteu,

 

J'veins d'èrchéver la gâzette du preunmyi d'févri. Les cheinnes du 28 dézembre et du 25 janvyi sont acouo à v'nîn! À ch't heu qué l's Êtats s'en vont s'enchèrgi d'la Grand' Poste, j'espéthe tch'i' s'en vont env'yer tchitchun à apprendre à la nôtre en Améthique à m'apporter la gâzette dé Jèrri à m'suthe à la pliaiche d'À Dgi-l'Adèrt! Dans l'entrétemps, i' faut espéther qué l's Êtats ont décidé la miyeu chose pour l'Île. Si ch'tait nouos législateurs à Washington tch'en éthaient décidé, j'en éthais mes doutes!

 

Comme d'amors, ch'est un pliaisi d'liéthe les nouvelles dé Jèrri, et acouo pus quand nou n'vait pon l'décès d'pathents et anmîns d'dans. Y'en a iun, chutte fais - un décès - tchi m'ramémouaithe man janne temps, lé chein du Cap'taine Leyghton Richardson. J'tions du mème âge. J'm'érsouveins d'li et d'sa physionomie en 1906 comme si ch'tait à ch't heu! Il 'tait blond et mince, et pas bein haut.

 

1967: Dans m'n opinion….

 Dans m'n opinion….

 

 Fort Lauderdale, Florida

U.S.A.

 

Lé 15 d'avri, 1967.

 

Moussieu l'Rédacteu,

 

  J'veins d'erchéver la gâzette du deux d'mar, et en liêsant ma lettre du onze dé févri, 1967, tch'est d'dans, j'ai dêcouvèrt eune mêprînse dé deux chents ans vèrs la fîn d'la lettre. Ch'est seux qu'les Sieurs Fraînque Le Maistre et Max Lucas lus en sont appèrchus, et qué s'il' avaient ieu l'temps i' m'éthaient env'yé eune lettre à mé l'dithe! En pâlant d'la tan'nie d'la fanmile Le Cras à l'Êta, j'dis qu'oulle est mentionée dans les r'gistres d'St Ouën en date du 17 juin, 1905. Lé neuf dévthait êt' un sept! La mention est en date du 17 juin mil sept chent chînq (1705). J'ai souvent ouï qu'les chiffres né mentent pon, mais né v'la un exempl'ye tchi prouve lé contraithe! Jé n'sai pon comment qué j'vîns à faithe eune mêprînse dé même. J'tais absolûment sobre quand j'l'êcrivis, pourtant! Enfîn, i' faut s'consoler l'esprit à la pensée qué l'homme tchi n's'est janmais trompé n'a janmais êprouvé à faithe grand' chose!

 

1968: À forche d'chèrchi nou trouve!

 À forche d'chèrchi nou trouve!

 

Trenton, Michigan,

U.S.A.

 

Lé 30 novembre, 1968.

 

Moussieu l'Rédacteu,

 

À ch't heu qu'j'ai r'prîns m'n haleine dépis man viage dé Jèrri et m'n arrivée en Améthique, j'ai ieu l'temps dé r'garder un tas d' “Jersey Weekly Posts” atchumulées ichîn d'pis qué j'm'en allis en Jèrri au c'menchement d'l'êté. En liêsant la cheinne du 21 dé juîn, j'vis la lettre du Sieur Frank Vallois d'Vancouver au Cannada. Quand i' vouos dit qu'ses oncl'yes Charles et Ph'lippe allîdrent en prison auve man p'pèe en 1891 pour aver r'fûsé d'marchi dans La Grand' R'vue, viyant qu'la pliaiche d'honneu n'fut pon accordée, comme dé drouait, au bataillon du Ouëst, j'vais qué j'n'en 'tais pon bein liain hors d'la vaie quand j'avais l'idée tch'il 'tait p't êt' pathenté ès deux fréthes Vallois tchi d'vaient sans doute êt' d's anmîns d'man p'pèe!

 

Jé n'pouorrais pon dithe au Sieur Vallois tch'est tch'était l'nom du janne homme tch'i' vit dans l'office à Moussieu Francis Vibert Le Feuvre (pus tard Connêtabl'ye et Juré-Justicier) à St. Pièrre, quand il allit faithe d's arrangements pour l'entèrrement d'sa m'mèe en 1906. Lé Sieur Le Feuvre et san fréthe Philip John, Connêtabl'ye d'St. Ouën (les deux fréthes 'taient Connêtabl'yes d'lus pâraisses vaîsinnes en mème temps), 'taient associés dans l'conmèrce d'encanteurs et d'entrépreneurs d'entèrrements souos l'nom dé “Le Feuvre Frères” et l'Sieur Francis Vibert Le Feuvre avait eune office dans sa grand' boutique appelée Western Stores, et eune autre dans l'but d'sa maîson d'fèrme appelée La Fosse tout près d'La Salle Parouaîssiale.  Ch'tait sans doute dans ieune ou l'autre qué l'Sieur Vallois allit l'vaie. Jé n'sai pon tch'est tch'était san clèrc dans chu temps-là, ni à tchi qué l'Cèrtificat du Collège des Précepteurs appartenait. Ch'tait pus tard qué l'Sieur Le Feuvre fut êlu Connêtabl'ye d'St. Pièrre, et j'fus san ségrétaithe dé pâraisse duthant la grand' partie d'sa gestion. Il avait vendu sa boutique par chu temps-là.

 

1968: Auprès chu temps-ichîn il en veindra d'autre!

Auprès chu temps-ichîn il en veindra d'autre!

 

San Antonio, Texas,

U.S.A.

 

Lé 6 d'janvyi, 1968.

 

Moussieu l'Rédacteu,

 

À ch't heu qu'Noué et La Nouvelle Année sont d'l'histouaithe du temps-passé, nou-s-a l'temps d'èrfliéchi un mio et d'èrprendre la vie pus trantchil'ment. Les jannes ont ieu l'pliaîsi d'vaie Papa Noué ichîn en Améthique, et si les couôteunmes dé mes p'tits jours sont acouo les mèmes pour les mousses en Jèrri, il' éthont ieu l'pliaîsi d'trouver des présents dans lus cauches pendues à côté d'l'âtre pour qué l'Papa Noué pûsse les vaie en d'valant par la cheunm'née! En Améthique, les présents sont généralement trop grands et trop nombreux pour mett' dans des cauches, et l'âtre n'est pon souvent veue dans les maisons tchi sont cauffées par un p'tit cârré fourné à l'huile ou à gaz dans la cave; ch'est-en-tchi les mousses n'ont pon la mème crianche en ch'tchi concèrne la cauche. I' craient qué l'Papa Noué veint pûtôt par la f'nêtre ou la grand' porte qué par la cheunm'née!

 

L'passage du temps vouos fait r'fliéchi en pensant ès changements dans la vie et dans les couôteunmes. Et nou pense à l'av'nîn étout. Et nou peut sé d'mander tch'est l'pus important - lé jour d'hièr, lé jour-d'aniet ou d'main? Eh bein, d'main n'veindra p't êt' pon pour un tas; ch'est-en-tchi nou n'peut pon trop bein apprécier sa valeu. Lé jour d'aniet est auve nous pour lé moment, mais i' s'en va à si grands pas tch'il a dispathu d'vant qu'nou-s-a peut l'êvaluer! V'la don tchi nouos laîsse les êvènements d'hièr à reunminner, et à m'suthe qué nou s'vieillis ch'est “hièr” tchi nouos laîsse la pus grande împression dans l'esprit, car i' n'est pon bein liain dans l'passé, mais l's êvènements d'hièr atchumulés avau l's années ont créé la mémouaithe du temps jadis! Est-che tch'i' n'vouos sembl'ye pon qué ché n'tait qu'hièr qu'ou' 'tiez acouo à l'êcole, et qué ché n'tait qu'hièr qu'ou-s-aviez l'ambition d'tchitter l'êcole pour aller en travas et c'menchi à gangni vouot' vie comme un homme?