1952: Les Bieautées d'Jèrri dans la Lantèrne Magique!

 L'Assembliée d'Jèrriais

Les Bieautées d'Jèrri dans la Lantèrne Magique!

 

Nou dit qu'l'appétit veint en mangeant - et tch'i' faut êt' p'tits d'vant qu'êt' grands. Eh bein, nouos rêunions mensuelles ont prouvé la sagesse dé ches vièrs ditons-là! Châque rêunion a 'té milleuthe qué la dreine, et l'nombre dé nouos membres a monté à pus qu'chent!

 

Auve les cheins êlus à l'assembliée dans la Salle d'Agritchultuthe Vendrédi au sé, le 30 dé Mai 1952, j'en avons chent-deux ach't'heu! Les nouvieaux membres sont: Mmes Edith Laurens, Lydie Laurens, Mavis de la Haye, Anna Steel et Bertha Enders, Mlle Eunice Billot, Moussieu et Madame George Henry Le Rossignol, Stanley John Le Rossignol, J. E. Quérée et Frank R. Le Brun (dé Gambie, en Afrique). J'avons l'plaisi, étout, d'annoncer deux nouvieaux membres jûnieurs, les jannes Edward et Kenneth Syvret, dé Léoville, à St. Ou.

 

Lé Sénateu Hedley Le Riche Edwards présidit l'assembliée, et l'y-avait à bein près eune septantaine dé membres présents.

 

Vièrs Mots.

 

Eune pétite compétition pour traduithe des expressions Angliaiches en Jerriais, comme la cheinne tchi fut si populaithe à la rêunion de mais d'Avri, nous ramémouaithit des vièrs mots qu'nou n'ouait pon fort aujourd'hui - comme, par exempl'ye: un “oyi” pour eune faute. Les marchands dé j'vaux l'savaient bein, chu mot-là, et les fermièrs tch'en acataient étout. Combein d'fais qu'nou ouïyait: “Il a un oyi, chu j'va-là - i' mord!” Un aut' mot du temps passé, “offustchi,” singnifie un ombrage dévant la veue d'tchiquechose qué nou r'garde. Les feunmeurs n'eutent pon d'peine à nouos dithe qu'eune “autchie” est le nuage dé feunmée tchi dêhalle de la bouoche du bouan'homme tch'est en train d'feunmer eune bouanne pipée dé p'teun!

 

4th November: launch of Native Tongues, celebrating new Jèrriais names for seaweeds found along Jersey’s shores

 4th November: launch of Native Tongues, celebrating new Jèrriais names for seaweeds found along Jersey’s shores

Join us to celebrate the launch of Native Tongues, a collaborative project that is part of ArtHouse Jersey's long-term, socially engaged project Abundant Futures. Native Tongues is by artist and researcher Kaajal Modi, with multilingual children, native Jèrriais speakers, and the wider community.

In 2024, six young learners of Jèrriais explored the connections between language, migration, climate, and belonging through poetry, foraging, storytelling, and conversation. Together, they created new Jèrriais names for seaweeds found along Jersey’s shores - eight of which have now been officially recognised by the Académie du Jèrriais and added to the Jèrriais dictionary.

1968: I' faut consèrver la Langue Jèrriaise!

 I' faut consèrver la Langue Jèrriaise!

 

Gaspé,

à La Côte, au Cannada.

 

Lé 18 dé mai, 1968.

 

Moussieu l'Rédacteu,

 

“Tchi bayayas, man bouan homme!”, j'disais à man fréthe Percy l'aut' jour en lî racontant l'histouaithe d'eune dispute entre homme et femme tch'étaient nouos vaîsîns quand j'tais mousse à La Forge à St. Ouën. Percy, ne à Percé à La Côte (ch'est pour ch'la tch'i' fut nommé d'mème), peut paler l'Français-Cannadgien et i' comprend l'Jèrriais gentiment bein mais y'a sans doute des mots tch'i' n'a janmais ouï.

 

“Bayayas?”, i' m'dit. “Né v'la un drôle dé mot. Tch'est qu'ch'la veurt dithe?”

 

“Eh bein,” j'li dis, “V'la tchi veurt dithe du brit. Quand eune pèrsonne pâle à tue-tête, ou' fait du brit qu'nou peut appeler du bayayas. Et quand deux femmes tchi sont naturellement badlagoules lus mettent à bagouler, et qu'ieune êprouve à prendre l'au-d'ssus d'l'autre en convèrsâtion, i' hauchissent lus vouaix toutes les deux, et nou peut dithe qué ch'est un vraie bayayas!”

 

1967: Tchiques vièrs mots Jèrriais

 Tchiques vièrs mots Jèrriais

 

Fort Lauderdale, Florida,

U.S.A.

 

Lé 9 dézembre, 1967.

 

Moussieu l'Rédacteu,

 

“Tch'est qu'ch'est qu'un abot?” man fréthe Percy mé d'mandit l'aut' jour.

 

“Bon!”, j'lî dis. “Où'est qu'tu'as ouï chu mot-là, té?”

 

“Mais ch'tait té-mème tchi l'fit sèrvi quand j'tions siez t'n anmîn Jèrriais au Cannada l'aut' jour!” i' m'dit.

 

“Véthe dgia, ma fîngre!”, j'lî dis, “Tu'as raison. San mousse en avait iun, un abot, gros comme eune rouôlette dé fi, sus lé p'tit dé, et j'li dis, “Tu'as trop d'abot pour eune faillie p'tite cope au dé, man garçon! La cope sé r'fétha pus vite si tu flianques l'abot dans l'âtre, et li donnes d'l'air!” Et quand i' m'dit qué ch'tait pour êtantchi l'sang tch'i' y'avait mins l'abot, j'li dis qu'un tchias dé p'tun ou eune ithangnie valaient mus!”

 

1980: Av'-ous l'esprit présent?

 Av'-ous l'esprit présent?

 

Fort Lauderdale,

Florida, USA.

 

Lé 9 févri, 1980.

 

Moussieu l'Rédacteu,

 

Ch'est r'mèrquabl'ye dans combein d'circonstances dé la vie qué nou fait sèrvi l'mot “esprit”. La preunmié fais qué j'm'èrsouveins d'l'aver ouï 'tait quand j'tais tout mousse à l'Êcole du Dînmanche à l'Églyise dé St. George et qu' Moussieu Pépîn nouos dît qué La Sainte Trinneté 'tait “Le Père, le Fils et le Saint Esprit”, trais Pèrsonnes, mais, comme nouos l'dit lé Sŷmbole dé St. Athanase à la page quarante-chînq dé La Litourgie, “La Divinité du Père, du Fils et du Saint Esprit n'est qu'une: leur Gloire est égale, et leur Majesté co-éternelle.”

 

J'n'avais pon 'té bein des fais auve Papa dans la forge dévant r'ouï l'mot. Mait' John Wesley L'Boutilyi, en convèrsâtion auve Papa, lî dît tch'il avait l'esprit trantchil. Quand vînt la séthée au pid du feu, jé d'mandis à Papa tch'est qu' ch'la voulait dithe.

 

1981: Un vrai trésor

 Un vrai trésor

 

Fort Lauderdale,

Florida, U.S.A.

 

Lé 17 dé janvyi, 1981.

 

Moussieu l'Rédacteu,

 

Lé deuxième nunmétho des “Chroniques du Don Balleine”, tchi veint d'arriver, est un vrai trésor. Lé rédacteu d'ches “Chroniques” dait aver mîns un tas d'temps à compôser, êcrithe et rédigi lé mangnifique nombre dé difféthentes articl'yes tchi sont d'dans. S'i' y'a d'vouos lecteurs tchi n'l'ont pon veu, i' dév'thaient lus dêpechi d'en acater iun.

 

Y'a eune articl'ye, par exempl'ye, entouôrre l'humour Jèrriaise, êcrite par Moussieu Ph'lippe Maugi de Veulle, tch'est un vrai ché-d'oeuvre. Janmais j'n'éthais pensé tch'i' y'avait tant d'humour auve liaîson à tant d'occâsions dans la vie, et il a fallu un moussieu d'la capacité extraordinnaithe du Sieur de Veulle pour vouos arrangi ch'la comme i' faut et en faithe eune articl'ye si întérêssante qué nou-s-est oblyigis d'la liéthe dépis “A” jusqu'à “Z” sans arrêter eune fais c'menchis, et pis la r'liéthe acouo eune fais!

 

1976: Choses et autres...

 Choses et autres...

 

Le Ménage ès Feuvres,

St. Ouën.

 

Lé 12 dé juin, 1976.

 

Moussieu l'Rédacteu,

 

Ieune des preunmié choses qué j'fais en arrivant en Jèrri est d'èrgarder les gâzettes du mais ou deux dé d'vant, car lé “Weekly” est un mais, tchiquefais chînq ou siex s'maines, en c'mîn d'Jèrri en Améthique et les nouvelles sont vielles par lé temps qu' j'ai ieu la chance dé les liéthe.

 

Ch'est întérêssant d'vaie tch'est tch'i' s'pâsse dans siex s'maines dans eune île si p'tite comme la nouotre. I' m'sembl'ye qué vèrs la fîn d'l'année pâssée, lé Député Ph'lippe de Veulle nouos dit qué l'temps 'tait arrivé tch'i' y'avait assez d'maiethons bâties et “projetées” pour la populâtion d'chu temps-là. Eh bein, i' faut qu' la population aie grandi hardi d'pis, car L's Êtats sont tréjous d'mandés d'en autoriser acouo pus. Et j'criyais qu' la tchestchion d'bâti dans l'Mathais à Bieaumont, à St. Pièrre, avait ieu tant d'opposition qu' oulle avait 'té abandonnée. Mais nannîn, j'vai tch'i' y'en a acouo pâlement. Mais chein tchi m'fait pester est d'vaie qu'la gâzette însiste d'appeler l'Mathais "Goose Green"! Tchi dgiâtre d'îndividu tch'a înventé ch't âffreux mênom là?

 

1976: Sav'ous l'Jèrriais?

 Sav'ous l'Jèrriais?

 

Le Ménage ès Feuvres,

St. Ouën.

 

Lé 7 d'août, 1976.

 

Moussieu l'Rédacteu,

 

“Tant pus qué l'temps va, tant pus j'ouai des mots tchi s'entr'èrsembl'yent quand j'sis auve té dans la forge.” j'disais à Papa eune séthée auprès l'thée. “À matîn, Mait' Abraham Le Ruez, nouot' vaîthîn, té disait qué sa bouanne femme 'tait à êtchuther tchiquechose quand i' s'en est v'nu atout sa junment pour êt' féthée. Moussieu Lucas, d'La Ville Bagot, t'a dit tch'il avait veu un êtchutheu dans la bouaîs'sie auprès d'siez li. Mait' Jean Lesbithé t'a dit tch'i' y'a longtemps qué l'Colonel Le Brun est Êtchuyer. Mess Le Boutilyi, John Wesley, t'a dit qu' san fréthe Ph'lippe est fanmeux à êtchusonner, et pis tu li'as dit qu' man Papa Giffard a fait un êtchusson d'Jèrri et tch'il est sus la muthâle dans l'gardîn d'la prison en ville. Mess Le Cornu, Françot, t'a dit qu' la chaleu l' êtchoeuthe. Mait' Fred de Caen t'a dit tch'il a des vis tchi n'valent rein viyant qué l's êtchuelles sont usées. Tch'est qu' tout chenn'na veurt dithe?”

 

1976: Filliéthes et crianches

 Filliéthes et crianches

 

Le Ménage ès Feuvres,

St. Ouën.

 

Lé 24 de juilet, 1976.

 

Moussieu l'Rédacteu,

 

“I' y'a tant d'mots tchi s'entr'èrsembl'yent,” j'disais à Papa eune séthée quand j'tions assis au pid du feu auprès l'thée, “que je n'sai pon d'en par où'est qu'j'en sis. J'tais dans la forge à matîn quand y'avait trais j'vaux a féther et qu'lus propriêtaithes 'taient touos là à bavarder, Mess Le Veslet a pâlé d'san filieu. Mess Le Cornu, Jean, d'North West View, a pâlé d'la filyie à sa Manman, et Mait' Jean Carcaud à pâle dé Mademouaiselle Caroline Ricard tch'est sa fil'ye, mais jé n'sai pon tch'est qu' touos l's aut' veulent dithe.”

 

“Eh bein,” s'fît Papa, “au mains tu as eune bouanne mémouaithe. J'éthais à aver un clèrcot à mett' tout bas dans un livre si j'avais a r'ténîn tout chein qu' nou ouait dans la forge dans l'couothant d'un jour.  Mais i' m'sembl'ye qué j'm'èrsouveins qué Mess Le Veslet, Ph'lippe nouos dit qu' san filieu, lé fis d'san fréthe Pièrre, est bein au-fait viyant tch'i' tcheint d'san parrain. V'la tchi veurt dithe qué l'garçon à Maît' Pièrre Le Veslet fut présenté au baptême dans l'églyise par sén oncl'ye Ph'lippe Le Veslet.

 

L'êfant présente au baptême est appelé lé filieu et l'homme tchi l'a présente est app'lé san parrain. Sans doute, l'êfant a eune marraine étout, et il est san filieu étout. Dans la Litourgie d'l'Églyise il est ordonné tch'i' faut aver deux parrains et eune marraine pour un garçon, et un parrain et deux marraines pour eune fil'ye. Tu trouvethas ch't ordannance là dans l'Ordre du Baptême des enfant dans l'Églyise dans la Litourgie.”

 

1976: Mailles et mailloch'chie!

 Mailles et mailloch'chie!

 

San Antonio, Texas,

U.S.A.

 

Lé 31 dé janvyi, 1976.

 

Moussieu l'Rédacteu,

 

“Papa,” j'lî dis eune séthée, “y'a tant d'mots tchi s'entre r'sembl'yent qué jé n'sai janmais s'i' veulent dithe la mème chose. À matîn dans la forge, Mess Le Veslet t'a dit tch'i' n'avait ni sou ni maille ni rein tchi vaille et tch'i' n'pouvait pon t'payi pour graie san trépid, et i' t'a d'mandé si tu lé f'thais à crédit. Et tu li'as dit d'l'apporter à la forge et qu' tu lî graiethais pour rein. Et pis Mess Maugi, Laïesse, t'a dit qu' san papa soulait maillasser du jambon. Et Mess Hubert t'a dit qu' iun d'ses clios est couvèrt dé maillettes. Et la bouannefemme Missis Tourté, tch'a apporté sa houette à sèrclier pour y mettre un neu manche, t'a dit qu' oulle est rendue par aver ieu à maillochi tant. Eh bein, tch'est tch'est la difféthence, entre maille, maillasser, maillettes et maillochi?”

 

1976: Des vièrs mots Jèrriais

 Des vièrs mots Jèrriais

 

Fallbrook, California,

U.S.A.

 

Lé 6 d'mar, 1976.

 

Moussieu l'Rédacteu,

 

En général, lé temps si caud ichîn en Californie qué nou peut travailli dans les clios sans rein sus l'corps sauf eune courte pathe dé braies et souliers. Mais aniet i' tchait d'la plyie, et pis ch'n'est pon eune achie - ch'est eune avèrse! Ch'est don un bouan jour rester par dédans et faithe dé l'êcrituthe. Dans des temps j'veins enn'yé d'êcrithe, et quand ch'est d'mème j'm'abuse à êtudier l'fanmeux Dictionnaithe Jèrriais-Français du Docteu Fraînque Le Maistre, et j'y trouve tant d'choses întéressantes qué j'ai mème d'la peine à l'mett' dé côté quand veint l'heuthe des r'pas.

 

Tant pus qué j'l'êtudis, chu bouan dictionnaithe, chef-d'oeuvre dé s'n auteur, tant pus j'sis pèrsuadé qu' ma connaîssance dé nouot' belle langue n'est pon bein profonde, et j'sis êmèrvilyi d'vaie des chents mots qu' nou n'ouait pus en convèrsâtion mais tchi m'rapellent les jours dé y'a eune huiptantaine d'années quand nou les ouiyait touos les jours. Par exempl'ye, lé mot “pliutchîn”. Y'a eune chînquantaine d'années qué jé n'l'ai pon ouï. Pourtant, i' m'sembl'ye acouo ouï Manman dithe à Papa, quand j'tais mousse à La Forge ès Landes, à St. Ouën: “Né t'en va pas à l'églyise dé mème. Ta câsaque a du pliutchîn d'ssus. Vein-t'en 'chîn qué j'té brînge!”

 

1975: Tchi nez!

 Tchi nez!

 

Fort Lauderdale, Florida,

U.S.A.

 

Lé 6 d'dézembre, 1975.

 

Moussieu l'Rédacteu,

 

“Papa”, j'lî dis eune séthée quand j'tais mousse et qué j'tions assis au pid du feu, “quand Mess Le Cornu, Darrique, t'a dit dans la forge à matîn qu' ch'est Moussieu John Ricard Le Montais tch'est nouot' nouvieau Député, tu li'as dit qu' ch'est eune bouanne chose pour la pâraisse car il a l'nez dans l'mitan d'sa fache. Est-ch' tchi y'en a tchi n'l'ont pon, dans l'mitan d'lus fache?”

 

“Eh bein, man garçon,” i' m'dit, en ritonnant, “quand j'tais naviguant, j'ai tchiquefais veu d's hommes tch'avaient l'nez apliati viyant tch'il' 'taient batilieurs et tch'il' avaient r'chu des co-d'poings d'ssus, et j'en ai mème veu tch'avaient l'nez crotchi viyant tchi l'avaient ieu rompu par accident. Mais en général nou peut dithe tch'il est dans l'mitan d'la fache des gens.”

 

Quand j'dis ch'la au sujet d'Moussieu L'Montais, v'la tchi veurt dithe tch'il est un homme tchi n'est pas bête et tchi sait bein comment s'y prendre. Nou fait souvent sèrvi l'mention du nez pour exprînmer tchiquechose tchi n'a rêellement rein à faithe à s'en êgard. Par exempl'ye, quand eune pèrsonne trébuque par sus tchique objet dans l'bel, nou dit qu' 'Ou s'en est allée l'nez d'vant'. Et j'crai bein qu' tu n't'en r'souveins pon, mais quand tu'étais tout pétit, ta Manman té pâssait san dé sus l'front et l'nez en disant 'Lé poux, la puche, lé nez tchi trébuque!' pour t'abûser, et v'la tchi t'faisait rithe à hahas.

 

1977: Corps et beins

 Corps et beins

 

Fort Lauderdale, Florida,

USA.

 

Lé 9 d'avri, 1977.

 

Moussieu l'Rédacteu,

 

Nouot' admithabl'ye langue Jèrriaise est vraînment la pus expressive au Monde. Pranez, par exempl'ye lé mot “corps”. Av'-ous janmais pensé au nombre d'expressions dans la vie d' touos les jours qué nou peut faithe sèrvi chu mot-là pour exprînmer tchiquechose tchi s'pâssé ordinnaithement?

 

Si eune pèrsonne est un mio hors dé l'ordinnaithe dans sa condite, nou dit: “Tchi drôle dé corps!” Quand un janne homme né montre p't-êt' pon autant d'sagesse comme, i' dév'thait, nou dit: “Bah! Ch'n'est qu'un janne corps!” Mais si l'même janne homme continnue à faithe des bêtises, ou tch'il est si farceux tch'il embête tout l'monde ou qu' sa condite dêpliait à ses vaisins, nou dit: “Il a l'dgiabl'ye dans l'corps!” Mais d'un homme tch'a mauvaise chance, ou tch'est en faillie santé ou en embarras, nou dit: “Ch'est un pouôrre corps!”

 

D'un homme tchi travâle dû et sans arrêt, ou tch'est achéthinné à sa tâche, nou dit: “Quand i' s'y met, ch'est un corps pèrdu!” Nou dit, étout: “I' s'y met à tigue dé corps!” Quand un homme a tellement travailli tch'i' n'en peut pus, nou dit: “Il est temps tch'i' s'arrête, i' pathait corps-battu!” Et quand eune pèrsonne est tréjous mouvementée et n'peut rester trantchil'ye deux minnutes, nou dit: “Ch'est un corps sans r'pos!” Si eune pèrsonne a 'té sans mangi pour eune volée, nou dit: “Ou n'a rein dans l'corps!” Mais s'oulle a mangi trop, ou mangi d'tchi qu' oulle a d'la peine à digéther nou dit: “Oulle a ma dans l'corps!”

 

1965: La Langue Jèrriaise

 La Langue Jèrriaise

 

Trenton, Michigan,

U.S.A.

 

Le 16 d'octobre, 1965.

 

Moussieu l'Rédacteu,

 

I' m'sembl'ye qué j'sis dans un aut' monde dépis qué j'sis r'vénu en Améthique! Ch'n'est pon qu'les gens pathaîssent fort difféthents, ouaithe qué jé n'vai pon tant d'bachouards atout des drôles d'habits et des longs qu'veux et des barbes d'bichot comme y'en a eune racachie en Jèrri, et ch'n'est pon qu'la nourrituthe est hardi difféthente ni n'tout sénon qué j'bail'lais tchiquechose pour eune bouanne bollée d'soupe dé caboche faite en Jèrri! J'avais d'la peine à penser tch'est qué ch'tait tchi m'pathaîssait drôle, et pis l'affaithe m'est v'nue à l'idée tout d'un coup : Ch'est qu'en Jèrri jé n'ouïyais qu'du Jèrriais à l'entou d'mé à L'Êta, et ichin jé n'ouäi qué d'l'Angliaichîn'nie d'Améthique!

 

V'la tch'i' m'fait reunminer, et i' m'veint à l'idée qué ch'n'est pon naturel pour un Jèrriais d'aver à pâler l'Angliais ou l'Français à longdieu d'jour. Quant à mé, j'ai bieau pâler l'Angliais ichîn, mais j'pense tréjous en Jèrriais! Oulle est si expressive, nouot' vielle langue! Tchi pliaîsi qué j'manqu'thais quand j'sis en Jèrri si jé n'pouvais pon pâler à des bouans vièrs gris-ventres comme Moussieu L'Brun d'La Caroline, Moussieu Fraînque Hâcou, l'bouanhomme Ph'lippe Gallienne, les Sieurs John Clifford Malzard, Edwin Vibert, Fraînque Hamon, Edmund Vibert, la tante Vîne (Elvina) Hamon et san frèthe, lé Député Fraînque Le Feuvre, etc.

 

1977: Tout bas

Tout bas

 

Le Ménage ès Feuvres,

St. Ouën.

 

Lé 23 d'juilet, 1977.

 

Moussieu l'Rédacteu,

 

Dans ieune dé mes dreines lettres j'vouos pâlais du mot “haut” et du grand nombre d'expressions en Jèrriais dans tchi qu' nou l'faîsait sèrvi. Eh bein, lé mot “bas” est fait sèrvi dans un tas d'expressions étout. Par exempl'ye, quand j'tais mousse, nou disait qué j'tais “bas-d'âge”. La même chose pour un êfant tch'avait pèrdu ses péthe et méthe et tch'était souos tutelle. Nou peut dithe tch'il 'tait “bas-d'âge” étout.

 

Les gens faîsaient hardi d'cidre lé temps pâssé, et quand la barrique 'tait quâsi viède, i' disaient: “Lé cidre est bas.” Et quand l'temps 'tait sombre, i' disaient: “Lé temps est bas.” Au mais d'novembre, par exempl'ye, quand les nuages sont rappréchis d'la tèrre, les anciens disaient: “Ch'est les bas temps.”

 

1974: Des vièrs mots Jèrriais

 Des vièrs mots Jèrriais

 

Ottawa, Ontario,

Cannada.

 

Lé 18 dé mai, 1974.

 

Moussieu l'Rédacteu,

 

“Tch'est tch'est la difféthence entre 'Houichebat' et 'Houichepote'”? jé d'mandis à Papa eune séthée quand j'tais mousse et qué j'tions au pid du feu auprès l'thée. “J'ai ouï ches deux mots là dans la forge à matîn.”

 

“Bon!”, s'fît Papa, “jé n'mé r'souveins pon dé l's aver ouïs!”

 

“Nan,” j'lî dis, “tu'étais d'houors à féther eune reue contre lé d'vant d'la forge quand Mess Powell, Ph'lippe, est v'nu dans la forge atout sa junment pour êt' féthée, et il a dit à P'pèe tch'il avait 'té à houichebat la séthée dé d'vant. Et pis il a dit, étout, qu'san garçon Ph'lippe est êcaloppé à ch't heu, et tch'i' faut aut' chose qué d'la houichepote pour lé nouôrri ches jours.”

 

“Eh bein,” m'dît Papa, “houichebat est l'nom qu' nou donne à un passe-temps qué j'n'aime pon et qu' j'espéthe vaie abandonné au pus vite.  Aller à houichebat veurt dithe prendre un bâton et eune lanterne quand i fait néthe niet, et aller trouver d'la bouais'sie l'long d'la route ou dans les clios où'est qu' les ouaîsieaux lus juquent pour la niet. L'idée est d'les surprendre soudainement atout la lueu d'la lantèrne pour les êblioui et l's abattre à coups d'bâton d'vant tch'i' piêssent s'envoler.”

 

1974: Au pid du feu

 Au pid du feu

 

Fort Lauderdale, Florida,

U.S.A.

 

Lé 23 d'févri, 1974.

 

Moussieu l'Rédacteu,

 

“À l'Êcole du Dînmanche,” j'dîsais à Papa eune séthée quand j'tais mousse, “Moussieu Pépîn nouos dit la s'maine pâssé qué des gens tchi n'sont pon Chrêtchiens sont des païens.

 

“Ch'est bein vrai,” m'dît Papa. “Les païens n'craient ni à Dgi ni à dgiâbl'ye!”

 

“Eh bein,”, j'lî dis, “ch'est ch'là qu'Moussieu Pépîn nouos dit étout. Mais quand j'tais dans la forge auve té à matîn, l'homme tch'a apporté s'n hèrche pour êt' èrgraie t'a dit tch'i' l'avait endommagie sus eune païenne justément souos tèrre dans l'mitan d'san clios. V'la tchi veurt-i' dithe tch'i' y'a des païens entèrrés dans les clios?”

 

“J'pense qué tu'as méprîns l'mot 'païenne' pour lé mot 'payenne' tchi s'prononce à bein près la mème chose,” Papa m'dit. “Eune payenne, tchiquefais appelée eune 'payanne' étout, est un rotchi arrondi et apliani par lé frottement et l'labouothage dé la tèrre quand il est souos la surface, et par lé temps et la plyie quand i' s'montre en d'ssus du nivé d'la tèrre d'un clios. Dans des temps, quand les fèrmièrs sont à touonner i' sentent des payennes souos tèrre, et si la tchéthue est ladgie pour eune bouanne aventeu, les fièrs sont tchiquefais endommagis viyant tch'il' en grattent lé haut d'ieune en pâssant par dessus.”

 

“J'criyais qué ch'tait des greunes, tchi faîsaient des d'gâts ès fièrs dé tchéthues,” j'dîs à Papa.

 

1974: À l'entou d'l'âtre

 À l'entou d'l'âtre

 

San Antonio, Texas,

U.S.A.

 

Lé 26 d'janvyi, 1974.

 

Moussieu l'Rédacteu,

 

“Tch'est qu' ch'est qu' eune Dgibolle”, jé d'mandis à Papa eune séthée auprès l'thée quand j'tais mousse et qué j'tions à l'entou d'l'âtre.

 

“Tch'est tch'i' t'fait d'mander ch'là?”, Papa m'dit.

 

“Eh bein,” j'lîs dis, “quand j'tais auve té dans la forge à matîn, il est v'nu un homme tchi t'a dit 'J'ai eune dgibolle tchi m'empêche dé marchi bein liain. Ch'est pour ch'là qué j'sis v'nu dans man quèrre'.”

 

“Eh bein, man garçon,” Papa m'dit, “lé mot dgibolle veurt dithe eune gambe, et nou n'ouait qué l's anciens l'faithe sèrvi à ch't heu. Mais j'sis bein aise dé vaie qu' tu prends avis à des mots d'mème, car nou n'peut janmais en saver d'trop. Nouot' langue Jèrriaise est si riche qué y'a souvent pus d'un mot tchi veurt dithe la mème chose. Par exempl'ye, jé n'sai pon si tu'as r'mèrtchi l'hèrnais à Moussieu Fraînque Hacou d'l'Éta tch'est v'nu l'am'ner à la forge à matîn pour aver les reues féthées. Chu hèrnais-là a eune manniéthe dé p'tite porte en driéthe tchi s'appelle un Hutchet ou Vitchet. Eh bein, chutte pétite porte-là est tchiquefais appelée par d'aut' noms étout. Y'en a tchi t'dithont qu' ch'est un Trappetot. Si tu'étais à St. Cliément, tu ouithais probabliément des gens l'appeler un Clyichet, un Tchichet, ou mème Quichet. Oulle est appelée d'mème étout à Grouville, et dans l'Est ch'est un Dgichet.

 

1972: Vieillèche s'atchitte!

 Vieillèche s'atchitte!

 

San Antonio, Texas,

U.S.A.

 

Lé 15 dé janvyi, 1972.

 

Moussieu l'Rédacteu,

 

À ch't heu qué j'vieillis, ch'est seux qu' un tas d'mes anmîns en Jèrri disent qué jé c'menche à aver l's os mos! Eh bein, il' ont raison, mais i' n'peuvent pon dithe qué j'n'ai pon fait d'vièrs os, car ma vielle poutchie d'os dêpassent la huiptantaine. En mème temps i' faut avouer qué j'n'ai pus l'estouflia d'man janne temps! En pâlant d'os, v'la tchi m'ramémouaithe qué quand j'tions mousses, man fréthe Frainque et mé, Papa nouos dîsait - en pâlant des malfaiteurs dé chu temps-là - “S'ous alliez faithe un 'té dro, j'vouos fich'chais l's os dans eune pouque!” Et si nou s'pliaingnait qu' un restant d'lard ou d'viande n'était qué d's os, i' nouos disait : “Eh bein, ch'est l's os tchi portent la bête au clios!”

 

Y'avait toutes sortes d'os, étout, l'temps pâssé. Par exempl'ye, l's os d'la tèrre - voulant dithe les tchiques pièrres qué nou trouve en labouothant la tèrre dans les clios. L's anciens nouos dîsaient tch'i' fallait les laissi là car il' aîdgaient à garder la tèrre ouvèrte. Et pis, les baleines dé cor qué les femmes mettaient entre la c'mînse et l'cor pour les garder draites 'taient, en êffet, d's os, ouaithe tch'i' fûssent barbe ou dent d'baleine.

 

1972: Acouo des rares mots

 Acouo des rares mots

 

Le Ménage ès Feuvres,

St. Ouën.

 

Lé 21 d'octobre, 1972.

 

Moussieu l'Rédacteu,

 

Un vièr diton nouos dit qu' nou n'est janmais trop vyi pour apprendre, et un aut' nouos dit qu' chein qu' nou-s-apprend janne nou n'oublyie pon vyi. Ch'est bein vrai. Un tas d'pèrsonnes mé dîsent qué ch'est merveilleux qué j'n'ai pon oublié man Jèrriais viyant qu' j'ai vêtchu la grand' partie d'ma vie en Améthique, mais i' n'y'a pon d'mystéthe là-d'dans - ch'est viyant qué j'l'ai apprîns janne. Ch'tait la seule langue qué j'connaîssais quand jé c'menchis à aller à l'êcole à l'âge dé sept ans, et j'pense tréjous en Jèrriais.

 

“Ou d'vez la connaître à fond, la langue Jèrriaise,” un moussieu m'dîsait l'aut' jour.

 

“Nou-fait,” j'lî dis, “j'crai tch'i' n'y'a qu'un homme vivant tchi peut r'cliàmer ch't honneu-là : Ch'est l'académicien Frainque Le Maistre, et i' partage chutte bouanne connaissance-là auve touos nous dans san fanmeux dictionnaithe Jèrriais-Français. Mais jé n'sis pon trop vyi pour apprendre. J'l'apprends acouo touos les jours, car quand j'ai un p'tit moment d'laîsi, j'l'ouvre et j'sis êmèrvilyi d'y dêcouvri un tas d'mots qué jé n'connaîssais pon, bein des piéches qué j'avais oublié, et un tas qué j'n'avais janmais ouï!”