1955: Ph'lip a une nouvelle djobbe

 Ph'lip a une nouvelle djobbe.

El n'en Crait pas Grandchose.

 

Moussieu l'Editeu,

 

La longue achie que j'eûmes Mardi passé a fait grand bein, sansdoute, mais pour mé ch'a tait une minsèthe, et tout à cause de la Merrienne et ses fichues fleurs, sans pâslé d'lédgumes.

 

Une fais la têrre dans san gardin mouoillie, les saccétines liemaches l'envahites et s'mintes à avalé tout ch'que y'avait d'miyeu. La Merrienne tait prèsque au m'séspé, mais Mêcredi oulle eut une idée. Après l'tais la v'là tch'y s'en va dans l'êtablye avec chein tchi s'pâsse pour du bran d'nos jours, et oulle en met une p'tite poignie ichin et là dans l'gardin.

 

Mé je n'disais rain, et quand dans les deux heuthes du matin ou m'rêvillye, j'l'y d'mande tout'd-suite ouèsque oulle à ma, car avec la bouonnefemme nou n'sait jamais si ch'n'est pas sa pouôre tête ou ses pouôres gambes ou s'en estomac tchi n'se comporte pas, ch'est tchique autre chose, mais d'pîs que j'sommes mathiés, et y'a longtemps d'chonna, Moussieu, autchune maladie n'a attatchi sa langue, tchi fonctionne mûs qu'jamais ach'teu qu'ou qu'menche à vieillyi.

 

Mais chutte fais ch'n'tait pas chonna. Y fallait me l'vé, souos la tchérquethie, et allé dans l'gardin bein vite pour happé les limaches. “Mets-les dans un boutchet,” ou dit, “et fiche-lu une bouonne dôse de caux. V'la tchi lûs apprendra à v'nin mangi mes pensées et mes pais.”

 

J'èthais bein voulu ardgumenté, Moussieu, mais ch'tait inutile, et don j'fit comme oulle avait ordonné, et au but d'une dém'ieuthe j'put me r'méttre au liet, après l'avé asseûthé qu'une bouonne chinquantaine de limaches avait dit à bétôt à lûs pathens, mais ch'n'tait pas fini, car le préchain sé, s'fut la même boutique et vraiment je 'sais pas combain longtemps qu'chonna s'en va continué. Tant pûs qu'j'en massacre de chais inférnales limaches, tant pûs il en veint. Si y'a parmi yeux d's'Enregistreurs de Naissances, les pouôres balloques n'ont pas grand r'pos.

 

Pâslant d'autre chose, la Merrienne me d'mandit hier si y'avait des candidats pour le poste de Juré-Justicier, ach'teu qu' Moussieu l'Mâsuthi avait résigni.

 

“Je n'sais pas,” j'l'y dit, “mais nou ouitha yun d'chais jours. Pour dithe vrai, le [publyi] n'en cheint pas d'compte de chais éléctions pour Juré, d'nos jours, et nou n'trouve pas d'bouons Jêrriais préts à s'mettre sus les rangs.”

 

“Souos les circonstances ch'n'est pas êtonnant,” ou dit, “mais sans doute y s'trouva tchique colonel ou mâjeur Angliais tch'y n'a rain à faithe et tch'y crait tch'y pathaitra bein en rouoge. Hélas! ouèsque notre pouôre Jêrry s'en va?”

 

Epis, Moussieu, oulle a ouï étout de ch't' expôsition et vente de bêtes à Springfield à la fin d'Septembre. “Tchèsqua eut l'idée d'chonna,” on me d'mandit, “si près des shows du mais d'Octobre? Est-che la Sociêté tch'a décidé d'faithe une êpreuve tchi m'pathait assez drôle.”

 

“Nânin,” j'l'y dit, “ch'est des partchuliers tchi'y craient tchi veindra d's'ach'teurs d'Angliétèrre, et quant à mé j'lûs sonhaite tout succès, car ch'est bein seux qu'j'avons trop d'bêtes en Jêrri: J's'y prèsque à même d'entré ma g'niche plienne, mais la guédalle ne montre pas grand signe de piéchot. Enfin, ou pouôrrait p't'être lûs faithe.”

 

“J'en doute,” dit Merrienne, “car nou m'dit tch'y n'veulent que tchique chose de bouon. Fais chein qu't'éthais deu faithe y'a longtemps, et envyié-la ès abattoirs.”

 

Ph'lip

1955