1958: Ph'lip et Merrienne

 Ph'lip et Merrienne

 

Moussieu l'Editeu,

 

La Merrienne avait 'tait longtemps à lièthe la gâzette. Quand, au but d'une heuthe, ou d'même, ou la mint bas, j'm'apérchut tout-d'suite qu'oulle avait liut tchiquechose qu'ou n'avait pas trop bein comprint.

 

“J'veins d'lièthe la léttre de man couôsin, le Ken Richardson,” ou qu'menchit, “et j'voudrais savé tchèsqu'il a dans l'idée. Des léttres, des réunions et je n'sais pon tchi. Dis-mé, si tu peux, tchèsqu'y veur? Mais j'pense bein que tu n'est pas pus savant qu'mé.”

 

“Si fait, ma vieille,” j'l'y dit, “car je comprends l'idée tch'il a dans sa tête. Y voudrait qu'les férmiers éthaient un mio d'aide des Etats d'l'Ile.”

 

“Continue,” ou s'fit.

 

1952: Ph'lip va a un dîné

 Ph'lip va a un dîné.

Et paie pour.

 

Moussieu l'Editeu,

 

J'ai une histouaithe à vos raconté. L'autre sé, ayant tait invité par un amin, tch'eut la bonté d'péyi pour man titchet, j'fut à un dîné. Je r'vint un mio tard dans un môteur, et la Merrienne, dans sa qu'minsole d'scendit pour m'aidgi à ramonté les d'grès. Ach'teu, n'allez pas craithe, Moussieu, que ch'tait chen qu'j'avais bu tch'avait empêchait mes gambes de fonctionné comme de couôtume, car, comme ou l'savez, j's'y un homme tempéthant. Sans doute ch'tait la sauce tchi fut servie ôv le paisson, car oulle avait un drôle de gout.

 

Je n'dormit pas trop bein, et quand vint l'matin j'avais grand ma à la tête. Je n'voulais pas me l'vé, et même quand la Merrienne m'apportit une tâsse de tais, j'eut bein d'la peine à m'dêshallé de souos les lincheurs. Ma pouôre tete battant comme si y'avait tchitchun à capuchi d'sûs avec un marté. Oh, j'vos asseuthe, Moussieu, que j'souffrais.

 

1956: Ph'lip est piethe que jamais

 Ph'lip est piethe que jamais.

Tchiques mots sus l'Election.

 

Moussieu l'Editeu,

 

J'vos avait dit la s'maine passée que j'avais attrapé ma dans l'dos parsque la Merrienne m'avait forchi de transporté ma pliante de l'êtablye à sous la tchérquethie, sa raison étant qu'les patates 'taient trop gérmées. La djobbe me print prèsque deux jours et j'pensais que ch'tait fini, mais malheutheusement nouffé.

 

Dîmanche au sé la bouonnefemme r'mértchit que l'temps avait touône fraid, et quand vint Lundi ou s'abriyit et s'en fut vais si la s'menche enhannait. En r'venant ou n'dit pas grandchose, mais dans l'mitan d'la niet, ou m'donnit un raide coup d'coude dans l'dos tchi m'revillyit tout-d'suite.

 

1955: L'affaithe du Soleil Levant

 L'affaithe du Soleil Levant.

Le Portinfé est surprint.

 

Moussieu l'Editeu,

 

“Eh bein,” s'fit la Merrienne, l'autre sé, “le pouôre Ph'lip Le Feuvre est hors. Nou savait tch'y n'avait pas tait bein pour assez longtemps, mais nou n's'attendait pas à chonna.  Pas mé, tréjous.”

 

“Ni mé ni-n'tout, Merrienne,” j'l'y dit, “mais ch'est d'même dans la vie. Ichin agniet et hors demain. Avec chonna, un homme de s'n'âge éthait deu vivre pûs longtemps.”

 

“Ch'tait un raide bouon corps, le Ph'lip Le Feuvre,” je continnuit, “mais il avait un d'faut.”

 

“J'en avons tous,” ou dit, “mais j'sais bein tchèsque tu veur dithe. Y tait p't'être un mio trop têtu. Pas êtonnant, sûs un sens, car la famille v'nait d'Saint-Ou.”

 

1955: Les licences

 Les licences.

Tchi droles de decisions!

 

Moussieu l'Editeu,

 

Hier au sé, la Merrienne et mé, j'tiomes à pâslé des dêcisions de l'Assemblyiée au sujet des licences. Ch'est l'Assemblyiée tchi s'appèle l'Assemblyiée Octroyante, et y nos semblye à touos les deux qué d'nos jours on n'sait pas trop bein tchèsqu'on fait.

 

“A qu'menchi,” comme je dit à la bouonnefemme, “n'y a pûs d'licence à chutte hotel à la Grève, tch'avait tait êtablyie dépis les viers temps, et chonnechin parsque y'avait des pliaintes contre l'homme tch'y tait là. N'y'avait rain contre sa femme, tch'éthait tait contente de continué, mais ou n'eut pas d'chance et agniet la porte est freummée.

 

“Si n'y'avait qu'chonna,” j' continuit, “y n'éthait p't'être pas grand chose à dithe, mais dans l'cas d'un hotel en ville, ouèsque l'homme est étout un mauvais sujet, la licence continue. Ch'est une chose que nou n'comprend pas.”

 

1982: Aux armes, Jèrriais d'race

 Aux armes, Jèrriais d'race

 

Trenton,

Michigan, USA.

 

Lé 24 d'avri, 1982.

 

Moussieu l'Rédacteu,

 

Si nouot' langue Jèrriaise mouothit dans la gâzette du preunmyi d'avri, ouelle à èrsuscité dans la cheinne du huit d'avri, tchi veint d'arriver. Mais, sans droute, oulle est bein liain d'êt' morte quandi qu' j'avons des pèrsonnes comme lé Docteu Fraînque Le Maistre, lé Juge Lucas, le “Jersey Evening Post” et Madanme Eileen Le Sueux à combattre ses enn'mîns. Et i' n'faut pon oublier Moussieu Ph'lîppe Maugi de Veulle et L'Don Balleine et L'Assembliée d'Jèrriais.

 

J'dév'thais mentionner La Société Jersiaise étout, mais j'crains qu' ou n'est pon hardi întérêssie [...] nouot'  langue, ouaithe qué j'sai bein qué Moussieu l'Député Bailli Crill, san Président et bouân Jèrriais, es'sait bein content dé supporter autchun mouoyen qu' La Société pouôrrait entréprendre pour la garder en vie. Ch'tait întérêssant d'vaie tch'i' d'mandit à l'assembliée annuelle générale combein des membres présents pouôrraient convèrser en Jèrriais. Probabliément pus qué quat' ou chînq, mais ch'est à bein près seux tch'i' y'en avait pus quand-même si y'avait des vièrs membres présents.

 

1962: Une rencontre à Sainte Mathie

 Une rencontre à Sainte Mathie

Y'étha-t-i' une élection à Saint Piêrre?

 

à Portinfé,

Saint Ou.

 

Moussieu l'Editeu,

 

Av-ous jamais veu autchune chose pûs drôle que les femmes?

 

Prenez, par exemplye, ma Merrienne. Quand i' faisait fraid oulle avait des r'frédeuses, et ou s'pliaignait l'long des jours, et dé niet je n'pouvais pas dormi. Mais à ch'teu ch'est la chaleu qu'est la cause du mâ. J'couoche tout chu temps dans la chambre à côté, et don j'peux dormi, mais Moussieu, entre nous, ch'n'est pas vivre.

 

À la fin, lé Peter Crill a 'té appointé Avocat-Général, mais i' n'a pas ocquo 'té assermenté, et ch'est la même chose, quand nous-y pense, avec lé Baillyi. Sûs un sens il est l'Baillyi, mais sûs un autre i' n'est pas. Avec chonna, y'a une chose tch'est certaine, et ch'est tchi faudra une élection partout l'Ile pour un Sénateur. La gâzette nomme deux candidats, lé Sieur Dupré, marchand d'paison, tch'est président du Tourisme, et l'Député Venables, tch'a 'té dans l's Etats bein d's années et a fait de raide bouon travas. Nous craithait que la pliupart des électeurs le supportéthaient, mais nou n'peut pas oublier que l'Député Dupré est certain du support des hôteliers. Tout dépend de l'attitude des campagnards, et i' faut admettre que jusque ichîn lé Député Venables n'a pas fait grand progrès parmi yeux. Contre chonna, nou sait que la mâsse des électeurs d'la Campagne détestent lé Tourisme, et voudraient vaie chais visiteurs tch'encombent la Ville pour trais ou quatre mais de l'année au fond d'la mé. Mais ch'est une chose d'être un électeur et une autre de s'faithe servi d'sa vouaix à une élection. Pour mé et, drôlement assez, pour la Merrienne, l'homme que j'voulons ch'est l'Député Venables, mais si la Campagne ne déhalle pas i' n'peut pas réussi.

 

1963: Merrienne et yun d'ses anchêtres

 Merrienne et yun d'ses anchêtres

Ph'lip et les grandes chaleurs

 

à Portinfe,

Saint Ou.

 

Jeudi au sé.

 

Moussieu l'Editeu,

 

J'crais hardi que ma lettre chutte sémaine s'en va vos desappointer, car i' n'sarrive, rein à Saint Ou chais jours, et le vrai est que tout est bein trop trantchille. Nou-s-avait ouï qu'un bouon citoyen et Principâ d'Pâraisse avait tchitté sa femme et sa fanmille et s'était êvade avec une drinette de djais-sept ans, mais i' pathait à ch'teu' que ch'n'est pas vrai. Ch'est dommage, sûs un sens, mais p't'être aussi bein sûs un autre.

 

La Merrienne, ayant entendu que j'allons aver ocquo un grand nombre dé visiteurs, a print des précautions pour s'asseuther que nos deux au mains, à Portinfé, éthont assez à mangi quand ou n'pouôrra pas aller en Ville, ch'est-à-dithe jusqu'à mié-septembre. Oulle a ordonné tout-plien de mangeaille, mais pour le béthe i' pathait que j'éthons à nos contenter avec d'la limonade, car si ch'est vrai chein qu'nou ly' dit, que l'êté tchi veint s'sa un êté de grandes chaleurs, ou n'crait pas que l'rhum, fraid ou caud, nos f'thait grand bein. Ou se r'souveint de chein qu'nou disait de yun d'ses anchêtres, tch'avait avalé tant d'rhum qu'un bouon jour, en satchant une allumette, i' print à feu, et tout ch'qui restit ch'tait yunne ou deux onches de chendres. Les docteurs de chais temps-là ditent tch'il avait crevé d'une combustion spontanée, mais j'ai d'la peine à craithe chonna. Si ch'tait la vraie raison, j'n'éthais pas à tchitté la pâraisse de Saint Ou pour trouver deus-trais vièrs riboteurs tch'éthaient deu être réduits en chendres y'a longtemps.

 

1960: L'union et les travailleurs

 L'union et les travailleurs

Ph'lip éffrite la Merrienne

 

à Portinfé,

Saint Ou.

 

Moussieu l'Editeu,

 

La Merrienne ne comprend pas tout-à-fait chein tchi s'est arrivé entre le Sieur Tarouilly, emplyié par le Comité des Egouts, et l'Union, tch'i' r'fûse dé joîndre. “Il est vrai,” ou dit, hier-au-sé, “qué par chein tch'a 'té dit dans l's Etats, il avait 'té membre dans l'temps pâssé, mais absolûment un homme a l'drouait dé changi d'opinion. S'i' n'veur pas r'joîndre, peux-tu m'dithe, Ph'lip, pourtchi tch'i' s'sait forchi?”

 

“Quant à changi-d'opinion,” j'li dis, “nou pouvait faithe comme nou voulait quand j'tais jeune. J'avais 'té engagi, ou prèsque engagi, au mains trais fais d'vant chu Dîmanche-au-sé là quand, ayant dit 'oui', tu m'fis entrer pour annoncer la nouvelle à tes pathens.”

 

1961: Merrienne va à Saint Louothains

 Merrienne va à Saint Louothains

Ph'lip et san rêve

 

à Portinfé,

Saint Ou.

 

Moussieu l'Editeu,

 

Eh bein, les deux êlections à Saint Louothains et Saint Mathie ont 'té décidées, et comme j'avais prédit, le perdant à Saint Louothains était l'Sieur Rémon, et à Sainte Mathie lé Sieur [...] J'éthais creu que l'Sieur Rémon éthait yeu pûs d'vouaix, mais par chein qu'nou m'a dit, chein tchi li fit grand tort et li perdit s'n êlection ch'tait san [...] lá séthée d'la nominâtions. I' s'faisait trop seux que l's [...] lé supportéthaient, et [...] à ch'teu j'pense bein tch'i' n'comprend pas pourtchi qu'i' n'fit [...] mûs. Comme ou l'savez, sans [...] i' faudra une autre êlection [...] pour un traisième Chantgni, et nou m'a dit que l'Sieur Rémon s'en va se r'mettre sûs les rangs, [...] m'n înformâtion est [...] y'étha d'l'oppôsition, et je n's'sais pas un mio surprint si [...] de chu traisième Chantgni [...] Emmanuel et pas Rémon, [...] chenna en p'tit d'temps, mais [...] gagi j'sais bein sûs tchi candidat que j'mett'rais mes sous, La Merrienne eut la chance [...] cherchie et rapportée de Saint Louothains, et quand ou [...] Moussieu, j'eus yunne des grandes  surprinses d'ma vie.

 

J'arrivis siez-mé une bouonne d'mie heuthe devant li, ayant print bouon soin de m'garder sôbre, ou quâsi. J'n'avais autchune doute que j'pouôrrais ramonter les d'grès pour mé couochi, et si la Merrienne n'avait pas print la clié d'l'armouaithe, i' s'peut que j'éthais avalé un p'tit lèrmin, car j'avais ocquo grand sé, mais comme j'étais à tachi d'dêcouvri tchique manièthe d'ouvri l'armouaithe, j'entendis l'brit d'un moteur dans l'bel. Tchiques minutes après, né v'là la Merrienne tch'i' s'présente dans la tchuisine, et j'vis tout-d'suite qu'oulle avait bu tchiquechose pûs fort que du tais. Ou marchait ocquo assez draite, mais san visage était rouoge, et j'avais d'la peine à comprendre chein qu'ou voulait dithe. Ou dit tchiquechose de ses nombreux couôsîns, qu'oulle avait embréchi l'Chantgni Louothains, et qu'oulle avait yeu yunne des belles séthées d'sa vie. Pour en fini, Moussieu, j'eus à li aidgi à ramonter les d'grès, et j'éthais méme voulu la deshabillyi, mais quand j'eus hallé ses cauches, ou m'fliantchit une paffe, s'assit sûs l'plianchais, et m'fit sorti d'la chambre tandis qu'ou s'dêfaisait dé chein qu'oulle avait sûs l'co. Lé matin oulle avait grand ma à la tête, et presque tout l'jour ou s'était trouvée malade et restit au liet, mais quand vînt l'heuthe du tais ou sé ravigottit et descendit, s'trouvant bein mûs. Mais, j'crais, Moussieu, qu'ou s'sa longtemps d'vant vouler aller à une autre êlection à Saint Louothains!

 

1962: Merrienne et l's hommes

 Merrienne et l's hommes

Ph'lip et les voleurs

 

à Portinfé,

Saint Ou.

 

Moussieu l'Editeu,

 

J'avais espethé d'pouver vos dithe que tout allait bein siez-nous, mais malheutheusement ch'est l'contraithe. À qu'menchi, la Merrienne ne m'a pas pardonné pour aver perdu la clié d'la salle de bain, épis ou m'atchûse d'aver bu trop au “show” d'l'Ile à Springfield. Ch'n'est pas vrai, Moussieu. J'en avais p't'être yeu assez, mais pas trop, et chonna fait une grande difféthence. J'pouôrrais li dithe étout que si j'avais accepté toutes les învitâtions que je r'chus nou-s-éthait peut téléphoner pour l'ambulance pour me porter à l'Hôpita.

 

Ou veur dithe, Moussieu, que sans l'aide du vièr amîn tchi 'tait v'nu m'cherchi et tch'eut la bonté étout de v'nîn m'rapporter, je n'éthais pas peut dêshaller du moteur, et que j'n'éthais jamais peut ramonter les d'grès pour me r'pôser après un jour que j'avais trouvé bein fâtiguant. Je n'sis pas trop seux si chonna est la véthité, mais quand ou voudrait ajôuter que quand ou vînt s'couochi pus tard, ou trouvit que j'm'éthais mînt souos les lîncheurs sans aver prînt la peine de mé deshabillyi, ou même de haller mes bottes, eh bein, comme ou d'vez saver, Moussieu, les femmes ont une raide îmagînation.

 

1960: I' fait fraid au Portînfé

 I' fait fraid au Portînfé

Des verres cauds remplièchent le tais

 

Au Portinfé.

Jeudi au sé.

 

Lé 14 dé Janvyi, 1960.

 

Moussieu l'Editeu,

 

Grand doux, Moussieu, tchi temps! La Merrienne et mé, jé sommes friyeux par natuthe, et au moment j'avons touos les deux attrapé une raide suée d'fraid. De jour ch'est embêtant assez, mais de niet ch'est bein pièthe, car la bouonnefemme toûsse continuellement, et mé j'êternue pour li garder compagnie.

 

Mais, ch'n'est pas tout, car les poules à la Merrienne ont attrapé des maux-d'gorge, et l'vièr coq est affligi étout et n'chante pas. I' n'fait pas seulement la cârre à ses femmes, chein tchi prouve tch'il est bein malade, car ch'n'est pas là s'n habitude.

 

1977: La fîn couronne l'oeuvre

 La fîn couronne l'oeuvre

 

Le Ménage ès Feuvres,

St. Ouën.

 

Lé 25 dé juîn, 1977.

 

Moussieu l'Rédacteu,

 

J'vai dans la gâzette qué la populâtion d'l'Île en gângne touos les jours. Les nouvieaux v'nus veinnent d'arriver au Mangni d's Augrès. Ieune des gâzettes montrait l'portrait d'deux ordgilleuses méthes et lus êfants nouvieaux-nés. J'ai oublié à tchi tribu tchil' appartchiennent - la tribu “Gorille” pour ieune des deux, i' m'sembl'ye. N'împorte, j'ai 'te d's heuthes à reunminner et êprouver à m'èrsouv'nîn à tchi qué chutte m'nèe Gorille-là r'sembl'ye. J'ai veu eune pèrsonne dé tchiquebord tchi lî r'sembl'ye comme deux d'goûts dg'ieaux. Mais iou? Etait-je-t-i' en Améthique, dans l's Îndes ou en Afrique? Ch'est drôle comme nou peut pèrdre d's heuthes dans des temps à penser à tchiquechose dé mème sans pouver rêsoudre la tchestchion. Eune chose tch'est r'mèrquabl'ye: la mode a 'té ches dreines années pour les hommes d'aver l'vîsage barbu. Les nouvieaux v'nus ont l'corps barbu mais l'vîsage nu. V'la tchi s'en va-t-i' êtablyi eune nouvelle mode?

 

1960: Lé Jour dé l'An

 Lé Jour dé l'An

Merrienne et les bouons vièrs temps

 

à Portinfé,

Saint Ou.

 

Moussieu l'Editeu,

 

J'tiomes assis, la Merrienne et mé, aupi du feu, après un raide bouon tais. J'allumis ma pipe, et j'm'aperchus que la Merrienne pathaissait sérieuse, et j'mé mins à l'écouter.

 

“Nos v'là tout près du Jour dé l'An, Ph'lip,” ou qu'menchit. “Y'as-tu pensé?”

 

“Eh bein, oui, assez,” j'li dis, “ch'est à dithe pas hardi. Ch'est une occâsion tchi s'arrive tréjous à la saison, et nou y'est accouôtumé.”

 

“Ch'n'est pas chonna,” ou dit. “As-tu pensé ès grands changements que Jèrri a veu dêpis que j'tiomes mousses?”

 

“Ch'est d'même partout, Merrienne,” j'lis dis. “I' faut s'y attendre.”

 

1977: Bouan Mênage Duthe

Bouan Mênage Duthe

 

Mousieu l'Rédacteu,

 

Ouaithe tch'i' y'a un vièr diton tchi nouos dit tch'i' n'faut pon sauter la brecque dévant y v'nîn, y'a dêjà des membres d's Etats tchi veulent mett' lus pids dans les souliers au Sénateu Cyril Le Mèrquand, fanmeux gardgien d'nouos sou dans la Chambre Législative. Jé n'sis pon trop seux quantchi qu' la préchaine êlection pour Sénateu étha lieu, mais i' m'sembl'ye aver ouï tch'il a acouo un an, pus ou mains, à faithe. Et pourtchi s'èrtither à 75 ans s'i' s'trouve en bouanne santé? Un homme dé sa capacité tch'a m'né eune vie trantchil'ye et tch'est “sain dé corps et d'esprit”, comme dîsent les Ecrivains quand il' êcrivent vouot' testament, peut vivre aîsement jusqu'a chent ans, et j'espéthe lé vaie s'dêcliather candidat acouothe eune fais quand la préchaine êlection veindra sus l'tapis. Et si l's êlecteurs ont autcheune èrconnaissance pour ses mangnifiques sèrvices dans L's Etats avau l's années, i' vot'tont pour lî r'mett' pour eune aut'gestion.

 

1962: Ph'lip sauve la vie à la Merrienne

 Ph'lip sauve la vie à la Merrienne

S'n amîn prédit un hivé fraid

 

à Portinfé,

Saint Ou.

 

Moussieu l'Editeu,

 

Une bein drôle dé chose, tch'éthait peut être tragique, s'arrivit siez-nous lundi au sé, et ch'tait là Merrienne tch'en n'tait la cause. Ou' s'en fut dans la salle de bain après l'tais, et une démieuthe après, ou s'mînt à faithe des brais qu'ou-s-éthait peut entendre de l'autre but d'la pâraisse. J'm'en fus vais tchèsqu'oulle avait, et ch'tait simplyement qu'ou n'pouvait pas se dêshaller d'chu fichu bain, car toutes les fais qu'oulle êprouvait, ou glissait d'un bord et d'l'autre, et n'avait pas la forche de se l'ver. Tout éthait 'té bein s'ou n'avait pas 'té bête assez de mettre la porte à la clié, chein tchi m'empéchait de v'nîn à s'n aide. I' n'y avait qu'une chose à faithe, dans les circonstances, et j'm'en fûs bein vit dehors pour trouver man gros marté. Une demie-doûzaine de raides coups, et la Merrienne se trouvit en liberté, car, après tout, Moussieu, j'crus que ma femme valait pûs qu'une neuve porte à la salle de bain. Ou n'm'a pas ocquo r'mercié pour aver sauver sa vie, mais ou m'a promînt de ne rentrer pas dans la salle de bain dans m'laîssi la clié, et ch'est tchiquechose.

 

1962: Ph'lip va à Saint Martîn

 Ph'lip va à Saint Martîn

La Société Royale et les candidats

 

à Portinfé,

Saint Ou.

 

Moussieu l'Editeu,

 

J'espéthais pouver vos dithe que tout allait bein siez-nous, mais j'avais oublié que touos l's ans, à chutte saison, les femmes mathiées attrapent la maladie qu'les Angliais appèlent le “spring cleaning”, et pour une bouonne sémaine lûs hommes sont dans une minsèthe extrême. J'si v'nu à la conclûsion, Moussieu, que ch'n'est pas une sîmplye maladie, mais une fièvre tch'est sans dgéthîson. Écoutez que j'vos diche.

 

J'n'avais autchun soupçon de chein tchi m'attendait, et pourtant j'éthais deu saver mûs, car année après année dépis notre mathiage ch'a 'té la même fichue boutique, mais j'n'ai pas une bouonne mémouaithe pour pathelles affaithes. Avec chonna, Moussieu i' faut admettre que quand, en dêjeunant lundi matîn, la bouonnefemme m'annoncit la triste nouvelle qu'ou s'en allait qu'menchi à netti tout-d'suite, je r'chus un choc. J'éthais voulu saver pourtchi qu'ou n'pouvait pas laîssi la maison comme oulle 'tait. Mais j'éthais deu saver que ch'tait înutile, car dans l'couothant d'une démieuthe né v'là trais femmes tch'arrivent, yunne après l'autre, et j'fus forchi d'm'en aller d'hors. Tout ch'que y'avait d'meubles dans la tchûisine fut porté dans l'gardîn, et même la pouôre catte, tch'est, comme de couôtume, en famille, fut fliantchie d'hors. Quant à mé, j'fus digoter dans ma bordeuse, et j'me prom'nis ichîn et là pour une pôse, mais, quand j'tâchis d'rentrer les quatre femmes étaient assises à bèthe du tais, sinon yunne, tch'avait apporté une p'tite boutelle de gin. Pûs tard j'en pâslis à la Merrienne et ou m'explitchi que la pouôre femme souffrait hardi d'san tchoeu, et que l'docteu li avait dit que la seule chose tchi pouvait la sauver ch'tait du gin. Quand j'la r'vêrrai j'ai idée d'li d'mander l'nom de chu docteu-là, et d'li prier de m'dithe que pour un homme dans ma condition le tais est une vraie pouaison!

 

1969: Choses et autres...

 Choses et autres...

 

Lé Ménage ès Feuvres,

St. Ouën.

 

Lé 28 juin, 1969.

 

Moussieu l'Rédacteu,

 

Dans ieune des gâzettes dé chutte sémaine, j'viyais qué l'Juge dé la P'tite Cour avait jugi quarante-deux causes dans l'mème jour! Tchi jour dé travas! Quand j'tais Commis-Vicomte y'a chînquante-chînq ans, ché n'tait pon souvent tch'i' y'en avait pus qu'trais ou quatre. Lé pus du temps i' n'y en avait qu'ieune ou deux, et ch'tait rare tch'il éthait fallu siégi l'arlévée.

 

Ch'tait l'Juge John Vaudîn tchi présidait la Cour dans chu temps-là, et i' n'y avait pon fort dé motos par les c'mîns. Dé nouos jours ch'est âffreux d'vaie l'nombre d'gens présentés pour en aver cachi quandi tch'il 'taient êbédés par la bouaisson ou des drogues. En Améthique y'a des sîngnes partout tchi disent “S'ou b'vez, n'cachiz pon, et s'ou cachiz, né b'vez pon!” Eune bouanne idée, n'est-che pon? V'la tchi né f'thait pon d'ma d'aver eune chentaine dé ches sîngnes-là ichîn en Jèrri, où'est qué l'baithe est bouan marchi, les motos nombreux et l'monde prêssis! Et jé n'sai pon pourtchi tch'i' sont si prêssis quand i' sont à cachi lus motos en Jèrri. Les distances sont si p'tites tch'i' n'peuvent pon aller liain assez pour qué la vitesse faiche grand' difféthence à l'heuthe dé l'arrivée. J'ai r'mèrtchi qu'à trente milles à l'heuthe nou-s-est à la vaie d'tout l'monde et qué quand i' vouos passent i' vouos jettent un r'gard comme si nou-s-avait la minne meurtriyi, et pis nou les r'trouvent arrêtés à la préchaine rouoge veue ou au préchain dêtou tchi fait prendre tou à tou!

 

1964: De l'animâtion à la Trin'té

 Chette-chîn est la dreine articl'ye êcrite par Douard Lé Bro, et publiée raîque tchiques jour d'vant sa mort on 1964:

This is the last article written by Edward Le Brocq, and published only a few days before his death in 1964:

De l'animâtion à la Trin'té

 

à Portinfé,

Saint Ou.

 

Moussieu l'Editeu,

 

Quant au temps, i' n'faut pas nos pliaindre, car, après tout, j'n'sommes qu'au mais d'avri, et si, dans la s'maine passée, j'avons yeu d'la plyie et des vents fraids, j'avons yeu étout un mio d'solé. En Angliétèrre et en France le temps a 'té pièthe, et d'l'autre but du monde y'a yeu un terriblye trembliément d'têrre tch'a dêtruit des villes et tué des chents personnes. Nan, Moussieu, je n'd'vons pas nos pliaindre, mais au contraithe i' faut nos féliciter que la Providence nos a 'té bouonne.

 

1963: Ph'lip et l's élections

 Ph'lip et l's élections

 

à Portinfé, Saint Ou.

Vendrédi au sé.

 

Moussieu l'Editeu,

 

Comme ou pourrez comprendre je m'trouve embarrassé à ces sé car j'voudrais pâsler des élections pour Sénateurs et pour Députés, mais quant ès Sénateurs i' faut admettre que j'n'en si pûs avanchi que je n'tais la s'maine pâssée. Ch'est ocquo une tchestchion de chînq candidats pour quatre vacances, et des gens que j'ai consulté, nul n'en sait pas pûs long qu'mé. Même la Merrienne, tchi prétend saver tout, est d'opinion que, comme chu bouon Saint Ouënnais, le fameux “J.J.”, n'prend pas, nou pouorrait aussi bein y mettre quatre troux-d'chours. Quand i' pouvait faithe des bêtises tchiquefais, mais au mains i' disait sa pensée et n'avait peux d'personne. Une demié-doûzaine comme li, ou dit, dans la Chambre, et nou vérrait bêtôt des changements.

 

Les chînq qu'ont décidé d'prendre s'en vont aver une chance de donner lûs opinions au publyic, car ils ont tous consenté à pathaître d'vant les électeurs, et d'lûs dithe tchèsqu'i' voudraient faithe dans l's Etats s'ils y trouvaient un siège. La Merrienne dit que nou-s-a veu chonna d'vant, mais qu'eune fais là ils oublient lûs promesses et vont avec l'restant. Quand i' sont à cherchi des vouaix i' promettent le ciel, la lune et l's êtelles, mais actuellement le firmament n'est pas châtchi.