1956: Reunion mensuelle

 L'Assembliée d'Jèrriais

Reunion mensuelle.

 

La rêunion mensuelle eut lieu Vendrédi au sé, lé 31 d'Août, 1956, dans la Salle d'Agritchulture, St. Hélyi, sous la présidence du Sieur Chs. Billot, et quand même qu'i' fit bein mauvais temps, i'y eut eune huiptantaine dé membres présents.

 

Dévant c'menchi l's affaires dé la rêunion, lé Président fît la beinv'nue au Révérend L. F. M. Helleur, M.A., (Recteur dé St. Louorains), et à Moussieu Jean Claude Vilquin (Professeur), dé Rouen. I' dit comment qué j'sommes fièrs d'aver ches deux mêssieux auve nous, comme membres, et comment qu'ch'est encourageant dé penser qué nos Recteurs s'intérêssent tellement dans l'travâs dé not' Assembliée.

 

Discours par le Révérend L. F. M. Helleur.

 

Lé Révérend L. F. M. Helleur nos fit un excellent discours sus un sujet hardi absorbant - “La pôsition du Jèrriais au temps d'ach'theu.” I' nos donnit des exemplyes pour montrer l'immense avantage en Jèrri dé connaître les deux langues - en préférence lé Jèrriais, mais sinon, eh bein, lé français. Ch'est si nécessaire dans la Cour, dans l'Eglyse, dans l'commerce, dans les boutiques, dans la campagne, et ainsi de suite. I' faut consèrver not' vier Jèrriais - iun d'nos pus anciens héritages, et j'dévrions en être aussi fièrs qué les Gaulouais en sont dé lus langue.

 

Lé Professeur Vilquin.

 

Monsieur Jean Claude Vilquin nos adressit tchiq' mots en Normand, auve tchiq' mots en Jèrriais - car, si n'ou comprend iun, n'ou comprend l'autre - et j'fûmes hardi contents dé l'entendre.

 

Dgialogues Impromptus.

 

Ensuite suivit des dgialogues impromptus, et les membres qu'y prîntent part fûtent hardi animés dans lus distchussions sus des sujets bein variés.

 

Ermèrciements.

 

A la fin d'la sérée, lé Président ermèrcyit premièrement Moussieu Helleur pour sa gentillesse en v'nant nos donner un si bouan discours, et ensuite, des r'mèrciements à toutes les pèrsonnes qu'avaient contribué au succès d'la sérée. Finalement, il annoncyit qué la Rêunion Générale Annuelle érait lieu Vendrédi, lé 28 dé Septembre.