1956: La visite à Paris

 La visite à Paris.

 

Moussieu l'Editeu,

 

Quand j'eûmes bu notre tais, hier au sé, la Merrienne se mint, comme de couôtume à lièthe la gâzette. Bétôt la v'la tch'y la mét bas, et j'vis tout d'suite qu'oulle avait veu tchiquechose qu'ou n'comprenait pas.

 

“Tchèsqu'y y'a, ma vieille, tch'y t'gène,” j'l'y d'mandit, méttant bas ma pipe et m'prépathant pour une raiponse tchi pouôrrait m'embêté un mio.

 

“Chein tchi y'a,” ou dit, “ch'est que j'veins d'lièthe que Moussieu l'Baillyi et l'Sénateur Krichefski sont à Paris, aux frais d'l'Ile, sans doute, pour r'présenté l'Comité d'Agritchultuthe, et tch'ils ont même tait r'chus par le résident d'la République française?”

 

“Mais bein seux qu'ch'est vrai,” j'l'y dit. “Tu dév'thais savé que tout ch'que tu liet dans la Post est la véthité.”

 

“Ne m'conte pas de tan gniolin,” ou s'fit, “mais puisque ch'est véthitablye, peux-tu m'dithe ouesqu'ils ont férmé, chais deus mêssieux-là, pour pouvé distchuté l'agritchultuthe avec la Président d'la République française.”

 

“Ma fé, Merrienne,” j'l'y dit, “tu m'pôse une drôle de tchéstchon là, mais à qu'menchi nous admet que l'Baillyi est tréjous intérêssi dans tout tchi concérne Jêrri, et n'oublie pas étout que l'Sénateur est président d'notre Comité d'Agritchultuthe. Ch'est dêjà tchiquechose.”

 

“Sans doute ch'est tchiquechose,” ou s'accordit, “mais chein que j'voudrais savé ch'est si autchun des deux a jamais montré une g'niche r'nouv'lée ou une vieille vaque au show, ou a seu comment houétté un bétchet d'navets.”

 

“J'en doute hardi, Merrienne,” j'l'y dit, “mais dans les circonstances chonna n'est pas nécéssaithe. Par exemplye, je s'sais hardi surprint tch'y nos dithont quand y r'veindront si l'Show du mais d'Mai en ville était aussi bouon comme de couôtume, ou si la s'menche s'sa à bouon marchi au mais d'Novembre. Sans doute y lûs a d'mandé si tout va d'charme siez yeux et si tchique jour y pouôrrait v'nin en Jêrri et s'faithe seux d'une tâsse de tais et une mérveille au Portinfé, mais autrement j'm'îmagine tch'ils ont distchuté la haute politique.”

 

“Et tchèsque tu veur dithe par chonna,” ou d'mandit.

 

“Eh bein,” j'l'y dit, “il étha entendu sans doute que l'rât à Saint-Brelade et à Sainte-Mathie a baissi et voudra savé tchèsqu'y dév'thait faithe pour réduithe la taxâtion en France.”

 

“La vraie raiponse,” ou dit, “ch'est qu'en Jêrri, les gens savent comment s'prendre et qu'en France y n'le savent pas. Bein seux s'il a autchune idée d'la manièthe que l's'Etats gaspillent les sous du public il étha yeu tchiquechose à dithe là-d'sûs. Quant à mé, une fais qu'nous avait seu ichin que l'Président d'la France avait envie d'vais deux r'présentants, j'éthais envié l'Sénateur Jack Le Mérquand et notre Député, l'Majeur de Gruchy.”

 

“Ah! damme!”, j'l'y dit, “le Président en éthait yeu pour ses sous, car entre chais deux-là y n'éthait pas yeu une chance de dithe une pathole” -

 

“P't'être bein,” ou dit, “mais au mains il éthait entendu deux bouons Jêrriais tch'y n'ont jamais peux de dithe chein tch'y pensent. Enfin, faut laissi l'affaithe pour ach'teu. Sans doute y'étha un rapport pour les Etats.”

 

“Ch'est pûs qu'possiblye,” j'l'y dit, “mais pâslant d'autre chose. Nou m'a offert d'la s'menche a un êtchu la bouaite, bouaite étout. Crais-tu que j'dév'thais faithe marchi.”

 

“Ne t'en va pas être si bête,” ou dit. “A qu'menchi, à chu prix-là ch'est presque seux qu'les câsses sont pouôrries et qu'ch'est d'fâillie s'menche. Arrête jusqu'à pûs tard, quand nou pouôrra vais si la maladie a fait du ma ou non, car j'ai dans l'idée qu'y'en en étha pûs qu'nou n'crait.”

 

Et, Moussieu, j'ai print s'n'avis pour une fais.

 

Ph'lip.

1956