1956: Merrienne est contente

 Merrienne est contente.

 

Moussieu l'Editeu,

 

J'n'ai jamais veu la Merrienne pûs contente que Jeudi au sé, quand nou vint l'y dithe que l's'Etats avaient décidé qu'à l'av'nin nou pouôrrai bâti le long d'la Route de Chinq Milles, et que l'Comité des Biautés Natuthélles avait résigni.

 

“Quant au bâtissage, ma Merrienne,” j'l'y dit, “je n'peux pas vais que chonna nos f'tha autchun bein. Et n'oublie pas que si l'Comité en a yeu assez, il en faudra un autre.”

 

“Et pourtchi chonna?” ou d'mandit.

 

“Parsque ch'est la louai,” j'l'y dit, “tchi faut tchi y'aie un Comité des Biautés Natuthélles. Ne t'mets pas dans la tête que j'avons fini avec chu comité-là, car tu t'trompe.”

 

“Oh!” ou s'fit, “ch'est d'même. Eh bein, y faut espethé que chutte fais y s'sa compôsé de bouons campagnards tch'y n'éthont rain à dithe quand un fermyi voudra bâti des cottes à couochons au pignon d'sa maison ou un poulaillyi dans une cârre du bél. Tchèsqu'y s'en va entreprendre la djobbe?”

 

“J'l'y dit que je n'tais pas seux, mais tchi m'sembliait que l'Sénateur Le Mérquand se trouv'thait forchi de s'méttre à la tête, car ch'tait l'y tch'avait opposé l'Comité, et remporté la victouaithe.” “Nou sétha bétôt,” j'ajouotit, “mais je n'crais pas qu'je m'trompe, car ch'tait-là la couôtume tréjous dans l'temps du Baillyi Vernon. Mais entre nous, Merrienne, je n'sais pas comment tchi s'en va s'prendre en formant san comité. Bein seux et cértain que si j'tais membre d's'Etats, et tch'y v'nait me d'mandé, j'l'y dithais bein vite d'allé s'couochi.”

 

“Et tu s'sais bein bête,” ou dit. “As-tu oublié, imbécile que tu'ès, que j'avons une lîsièthe de terre là-bas?”

 

“Ma fé!” j'l'y dit, “je n'y'avais pas pensé, mais ch'est vrai assez.”

 

“Bein seux qu'ch'est vrai,” ou dit. “Chu bétchet-là a tait dans la famille pour p't'être des chents ans. Il est vrai qu'je n'sais pas exactement ouèsqu'il est, mais nou pouôrrait vais par les viers contrats. J'ai tréjous comprint qu'y'en a dans les tchinze pérques, et j'me r'souveins d'avé ouï memée dithe une bordée que dans l'temps d'san grand'pèthe, y tait souvent envahi et couvert par la mé dans les grandes mathées. Chonna ch'tait d'vant que l'Ph'lip Gallichan bâti l'talus, sans doute.”

 

“Pûs qu'probablye,” j'l'y dit, “mais en autchun case, tchèsque ou nos vaut, chutte lîsièthe?”

 

La Merrienne capuchit sûs la tablye. “Mais achocre que tu'ès,” ou s'fit, “as-tu compliétement pérdu la tête? Il est vrai que jusque ach'teu chu mio là n'nos a valu rain, mais agniet ch'est une difféthente affaithe. Sus tchinze pérques d'têrre nou peut êrigi chinq de chais bungalows, et pour châque site nou pouôrra d'mandé au mains chent louis. Chonna paietha mûs qu'les patates, man Ph'lip, et j'pouôrrons même allé à Paris pour un tchinze jours.”

 

“Tu vais trop vite, ma vieille,” j'l'y dit. “A qu'menchi, y faudra trouvé chinq personnes bêtes assez pour péyi chu prix-là.”

 

“Bah!” ou s'fit, “ne t'gène pas. La Ville en est plienne de chais gens tch'ont pûs d'sous que d'bouon sens. J'les vêrrons en foules, mais j'éthons en être r'gardants. Autchun tch'y n'voudra pas péyi sûs l'coup nou l'enviêtha à s'prom'né. Et avec notre Jack Le Mérquand, président d'chu comité, j'éthons sans doute toutes les facilités, car il a tréjous tait bouon Saint-Ouennais. Y faudra qu'j'aille le vais tchique arlevée, pour que j'aiyons une tâsse de tais et un mio d'gâche en semblye.”

 

Et don, Moussieu, ne v'la ouèsque j'en sommes. Quant à mé je crais que j'avons lien à allé d'vant vais chais chinq chents louis dans la banque, et ch't'année j'm'en vais ocquo m'fié sûs mes patates pour êvité une vîsite du Sergent d'Justice. Entre-nous, Moussieu, tchèsqu'ous en criyiz?

 

Ph'lip.

1956