1955: Merrienne va en Ville

 Merrienne va en Ville.

Et s'en r'pent.

 

Moussieu l'Editeu,

 

Tchi chaleu chais jours, man pèthe béni! De jour nou puthe de sueu, et de niet, malgré qu'la porte et les f'nêtres sont ouértes, nou n'peut pas dormi pour dithe.

 

Mais y faut que j'vos diche pour la Merrienne. Ou s'en fut en Ville Mêcredi matin pour accaté un neu chapé et une pathe de souliers, mais quand ou r'vint dans les chinq heuthes, ou n'en pouvait pûs. Ou s'êtrav'lit sûs l'sofa, sans dithe un mot, et j'n'aimais pas s'n'appathence du tout, car de couôtume ou n'est pas d'même.

 

J'me mint à faithe du tais, et après trais ou quatre bouonnes tâssées ou s'ravigottit, et la v'là à m'raconté ses expéthiences. Pûs d'une fais j'fut bein près d'bouffé d'rithe, mais, Moussieu, j'n'ôsais pas.

 

“A qu'menchi,” ou dit, “quand la bus est v'nue à-matin ou tait choc-bloc de chais maufaits vîsiteurs. J'éthais creu tchitchun se s'sait l'vé pour me donné san siége, mais, crais-tu s'tu veur, n'y'en eut pas yun tch'y bouogi, et dont j'fut forchie de me t'nin d'but tout l'long du qu'min. Es-tu surprint ach'teu que j'les dêtéste chais touristes tch'y veinnent en êté nos faithe tant d'minséthe.”

 

“Enfin,” ou continuit, “nos v'la en Ville, et j'cache tout drait pour la Rue d'Driéthe pour vais si j'pouvais trouvé chein tchi m'fallait. Mais, Ph'lip, jamais tu n'as veu une telle mâsse de monde dans chutte route-là. Y fallait bein marchi sûs les pavés, car y'avait une ligne de môteurs dans l'mitan du qu'min, et nou tait en dangi d'sa vie si nou tâchait d'crouaisi. J'êprouvit une fais, et j'fut insultée par un individu dans un car tch'y voulit savé pourtchi que j'voulais m'suicidé, et est-che que je n'pouvais pas trouvé une autre manièthe. Si j'le r'viyais par ichin, chu pendard-là, j'garantie tch'y ne r'veindrait pas à Saint-Ou pour une pôse.”

 

Ou m'dit étout, la bouonnefemme, que quant vint un temps, ayan tait boustchulé d'un bout et d'l'autre pour une bouonne dem'ieuthe, ou s'trouvait à la fin dans la boutique qu'ou chérchait, mais le prix des chapiaux tait âffreux, et n'y'en avait pas yun tch'l'y conv'nait et quant ès souliers, ayant veu une pathe qu'oulle aimait assez, ou fut bein près de tchais sans connaissance, quand nou l'y dit combain qu'oulle éthait à péyi.

 

“J'fichit man camp hors de chutte boutique,” ou continuit, “après avé dit au propriêtaithe tch'y n'tait qu'un voleux et tch'y dév'thait être en prîson, et m'trouvant bein faillyie, j'entrit dans une autre ouêsque y'avait un restaurant, et j'ordonnit une tâsse de café. Y n'tait pas tant pièthe et j'en qu'mandit une autre. Mais, quand j'vint à vais qu'j'en avais à vingt-huit sous pour deux p'tites tâsses de café, je m'dit tch'il tait temps d'abandonné l'affaithe, et j'm'en fut me r'pôsé siez ma couôsine Jane, aupi d'la Vieille Églyîse, ouêsque j'eut tchiquechose à mangi et trais bouonnes heuthes de convérsâtion tchi m'fîtes grand bein.”

 

Le restant d'l'histouaithe ch'tait qu'la Merrienne eut, pour la deuxième fais à s't'nin d'but dans la bus, et qu'pour agvé tout, un vîsiteur tch'y d'vait n'sé dans les trais chents livres, fut bein près d'y'êgliami gauche quand y pliantit sa grosse botte drait d'sûs.

 

Pas êtonnant qu'oulle tait lâssée, la bouonnefemme, et qu'oulle a juthé qu'la Ville ne la r'vêrra pas pour un mains d'siez mais. Quant au neu chapé et les niers souliers, ou dit que pour le temps ou s'peut s'graie avec chein qu'oulle a.

 

Ph'lip.  

 

Ocquo un p'tit mot. J'ai ouï à-matin, qu'à la Visite du Branchage à Saint-Louothains hier, y'eut chinquante amendes. Et mé, tch'avais tréjous creu qu'les Saint-Louothenchais taient des gens tch'y réspéctaient la louai.

 

 

1955