1953: Un raide bouan dîner

 L'Assembliée d'Jèrriais.

Un raide bouan dîner.

 

Lé preumié dîner d'l'Assembliée eut lieu Jeudi au sé, lé 22 d'Janvyi, 1953, à l'Hôtel dé St. Jean. I' fut un si grand succés qué v'la tch'encouothage l'Assembliée dans l'espéthance qué ch'es'sa eune occasion annuelle dans l'temps à v'nîn.

 

Dévant s'assiéthe à tabl'ye, les jannes Dlles Marguerite Le Couteur et Marguerite Binet présentîtent un touffet d'flieurs à Mme Edwards, (la danme du Président), à Mme Marie Le Couteur, (danme du Président du Comité Social, tch'était responsabl'ye pour l's arrangements du dîner), à Mlle Florence M. Hacquoil, (pour san bouan travas comme Ségrétaithe-Assistante duthant la preunmièthe année d'existence dé l'Assembliée), et à Mlle Lucille Picot (Ségrétaithe-Assistante actuelle).

 

Comme i' n'l'y-avait qu'du run pour assiéthe nonante pèrsonnes confortabl'yément, rein qu'chu nombre-là d'billets avait 'té vendu, mais i' vint eune demie-douzaine dé membres tchi n'avaient pon acaté d'billets à l'avanche, et pus-à-co qué d'les renv'yer siez ieux auvé lé fliâtchet, un coupl'ye dé p'tites tabl'yes fûtent arrangies, et en fîn d'compte nonante-sept pèrsonnes lus assiévîtent à mangi.

 

Lé Comité Social avait fait l's arrangements pour lé dîner, et les félicitations d'Assembliée sont deues au Sieur John Wesley Le Breton, Ségrétaithe du Comité, pour l'excellence du ménu et du décor dé l'appartainement et des tabl'yes en rouoge et blianc, les couleurs dé Jèrri, - et au propriêtaithe dé l'Hôtel dé St. Jean pour lé bouan dîner et la maniéthe tch'i' fut sèrvi.

 

Lé Président Hedley Le Riche Edwards nommit lé Sieur Le Breton comme Maître dé Cérémonies, et la priéthe dévant et à la fîn du r'pas fut prononcée par lé Sieur George De Gruchy Noël. Dans l'couothant d'la séthée lé Président Edwards proposit la santé d'Sa Majesté la Reine, not' Duchêsse, et Mme Eileen Le Sueur jouit l'Antienne Nationale sus l'piano. Et pis Me. Frank Trachy, Président du Comité Social, proposit la santé d'Assembliée, et le Président Edwards rêponnit au nom des membres.

 

Rêunion Mensuelle.

 

Quand l'café fut sèrvi, la rêunion mensuelle eut lieu, et l'rapport dé la rêunion mensuelle dé Décembre, 1952, fut approuvé.

 

Nouvieaux Membres.

 

Les nouvieaux membres êlus à chutte rêunion sont: Le Connétabl'ye T. G. Le Marinel dé St. Jean et sa danme, Mme Florence Le Marinel, Me. John Hammond Renouf, Me. P. C. Le Marquand et sa danme, Mme Edith Le Marquand, et Me. John Le Sueur.

 

Poësie par P. W. Luce.

 

Lé Ségrétaithe annoncit tch'il avait r'chu eune poësie composée spécialement pour ch't'occasion par lé Sieur P. W. Luce, dé Vancouver, tchi soulait êcrithe lé Jèrriais souos l' nom-pliume dé “Ph'lippe d'la Golarde”. Lé Sieur Luce est Ségrétaithe dé la Sociêté des Iles de la Manche à Vancouver, en Canada, et bieau a 'té eune chînquantaine d'années houors Jèrri i' n'a pon oubliyé san Jèrriais. La plieiche tch'il a composée vaut la peine d'èrcorder et d'publiyer dans not' Bulletin pus tard. Ou' fut liue ès membres par le Ségrétaithe et appliaudie par touos les membres.

 

Le preunmié Bulletîn.

 

Lé Trésôryi Bertram annoncit qué l'preunmié Bulletîn d'quart-d'an est împrinmé, et il en avait apporté eune pacotille pour vendre ès membres présents. I' donnit un rêsunmé des travaux d'pr'pathation du Bulletîn par lé Comité d'Rédaction, et avèrtit les membres qué ch'tait à lus avantage dé l's acater ach't'heu' car ch'est seux tch'i' s'sont d'grand'valeu pus tard.

 

Les pommièrs et paithièrs dé Jèrri.

 

Lé Président annoncit qué rein qu'trais ou quatre listes dé Pommièrs et Paithièrs dé Jèrri avaient 'té r'chues d'en par ichîn, et i' d'mandit ès membres d'en apporter acouo à la préchaine rêunion.