1931: V'là Noué arrivé oquo une feis

V'là Noué arrivé oquo une feis, et selon la vieille couôtume nous en fait une saison de rêjouissance et les gens s'entre souhaitent toute la prospéthité et touos les bonheurs pôssiblyes, tant à Noué comme duthant l'année qu'est à v'nin. Un châtchun fait d'san mus pour pathaître aussi heutheux et aussi content qu'pôssiblye, mais les siens qu'ont atteint un certain âge ne sont pas si rêjouis comme tout chenna.

 

V'là tch'est tout bain quand nous est mousse et qu'nou vait tout couleur de rose, nous attend Noué avec impatienche et la séthée de d'vant nou va s'couochi dans un êtat de surexcitation en pensant à toutes les belles jouettes et les magnifiques présents que l'Père Noel s'en allait mettre dans la cauche que nous avait pendu au pid du lièt.

 

Quand l'extâse du matin s'était pus ou mains apaisie, sa préchaine anxiêté était d'saver à tchille heuthe que nou s'en allait dîner et s'mettre à dévorer le biau picot que nous avait veu memmée mettre dans l'fou duthant la matinée et qui c'menchait dêjà à rêpandre de si magnifiques odeurs par toute la maison.

 

1951: Un Bouon Nouë

 Un Bouon Nouë.

Le souhait de Ph'lip et Merrienne

 

Moussieu l'Editeu,

 

J'pensais qu'la Merrienne avait fini avec les Etats, mais nouffé, pas tout-à-fait, car avant-hier au sé, ayant liut la gâzette, ou m'dit comme chonna: par chen qu'j'en vait, Ph'lip, y'a des membres dans l's'Etats tch'y n's'entre aiment pas comme y dév'thaient.

 

“Ma pouore fille,” j'l'y dit, “ch'est rain d'nouvé, car nou l'a tréjous veu. Des mêssieurs tch'y s'mêlent dans la politique savent ben qu'une fais dans la Chambre y trouv'thont p't'être pûs d'enn'mins que d'amins. Mais tchèsqu'y t'fait dithe chonna?”

 

“Pûs d'une chose,” ou raipondit. “A qu'menchi, y'en a deux tch'y taient en dispute le preumié jour pour un rain-du-tout. Yun voulait s'assièthe dans la tchaise tch'il avait chouaisi, et l'autre, ayant fait l'même chouaix, et r'fûsant d'bouogi, les v'la à ardgumenté comme deux mousses tch'y méthitent une bouonne pitchine.”

 

1958: L'Assembliée d'Jèrriais

 L'Assembliée d'Jèrriais

 

La dreine rêunion pour ch't année eut lieu Vendredi l' 12 dé Décembre dans la Salle Parouaîssiale dé St. Brelade. Lé temps n'tait pon bein encouothageant, mais à bein près 120 membres lus y rêunitent quand même. Et ch'est seux qu'i' fûdrent tous contents d'y être v'nus, car ch'fut eune raide bouanne séthée d'Noué. La salle 'tait bien caoffée et décorée auve un bouaix et toutes sortes dé décorations d'Noué. Les danmes du Conmité Dramatique avaient bein travailli l'arlévée!

 

1958: Les poules et les carpilleuses

 Les poules et les carpilleuses.

Ph'lip va voté.

 

Au Portinfé,

Jeudi au sé.

 

Moussieu l'Editeu,

 

A qu'menché, j'ai une assez drôle d'histouaithe à vos raconté entouôre mes bricolis. Ou vos r'souveindrés que les carpilleuses ayant attatchi man bétchet, j'avais péniblyement ramâssé une demié-bouq'tée d'chais sales bêtes et que j'les avais donné ès poules, tchi l's'avaient avalées à béc-de-corps.

 

Ach'teu, Moussieu, j'avais raconté chonna à la Merrienne et j'l'avais invitée d'allé à san tou dans l'bétchet avec un bouq'tché pour vais combain qu'ou pouôrrait en ramâssé s'ou s'y méttait d'bouonne-heuthe le préchain matin et travâillait d'bouon tchoeu.

 

Y s'adonnit, qu'j'eu à sorti après avé dêjeuné, et quand je r'vint dans l'bel au but d'une heuthe ou d'même, j'apérchut tout-d'suite que la porte du poulaillyi était ouvérte et qu'toutes les poules 'taient à-banon. J'm'en fut sûs l'coup dans la tchuîsine pour annoncé la triste nouvélle à la Merrienne, mais à ma grande surprinse, Moussieu, ou s'mint à rithe, me laissant absolûment stupéfait.

 

1958: Ph'lip fait Merrienne mârri

 Ph'lip fait Merrienne mârri.

Mais après tout va bein.

 

Moussieu l'Editeu,

 

Lundi matin je r'chut une léttre de ma banque me dîsant que l'gérant voulait m'vais aussi vite que possiblye. J'la montrit à la Merrienne, et ou m'dit que je f'thais mûs de prendre la bus le préchain matin, et d'allé à la banque pour savé tchèsqu'y voulais. “De tchi tu'as peux?” ou d'mandit. “Y n'te tuôthant pas, man pouôre Ph'lip. Veur-tu que j'y'aille, mé, à ta pliéche?”

 

Moussieu, j'fut bein près de dithe oui, mais j'vint à pensé tout-d'suite que la Merrienne pouôrrait s'mârri une fais à la banque et après avé entendu chein qu'le gérant avait à dithe, et si chonna s'arrivait ou tait capablye d'en dithe bein trop long et d'agravé la situâtion, ch'est pourtchi j'l'y dit que j'tait mé et pas l'yi qu'la banque voulait vais, et donc Mardi matin j'm'en fut, et ma fé, je n'men r'dêshallit pas mal. Tout ch'que j'ai à faithe d'ichin à Nouë ch'est de n'dépensé pas deux sous quand yun pouôrrait faithe, et de m'fié sûs mes brécolis, tchi s'en veinnent à tic-de-corps pour mettre tchiques hérpins dans ma pouchétte bétôt.

 

1952: Un Bouon Nouë

 Un Bouon Nouë.

Ph'lip Pâsle à l'Editeu.

 

Moussieu l'Editeu,

 

Pour qu'menchi, la Merrienne et mé, j'vos souhaitons de tout notre tchoeu, un bouon Nouë.

 

Comme ou l'savez, Moussieu, je sommes des gens d'la vieille mode, la bouonnefemme et mé. Je n'sommes pas comme y'en a hardi, au jour d'agniet, tch'y disent tch'y s'sont bein contents quand Nouë s'sa pâssé. Et pûstot qu'd'allé passé l'jour de Nouë a un hotel, comme y'en a tant tch'y font d'nos jours je crai vraiement que j'aim'thaiement mûs nos cope l'co.

 

Heutheusement, n'y'a autchun dangi d'chonna, car entre nos garçons et filles, il est simplyement tchéstchon de décidé tchèsque étha l'plaisi d'vais le vier couplye à lûs tablye le jour de Nouë.

 

1952: Merrienne a fraid

 Merrienne a fraid.

Mais Ph'lip la Récauffe.

 

Moussieu l'Editeu,

 

Touos l's'ans, quand veint l'mais d'Novembre, la Merrienne qu'menche à s'pliaindre du temps. Hier au sé, accroupie aupi du feu, ch'tait la même histouaithe. Oulle avait fraid ès pids et des frissons dans l'dos, et ou sait seuze que dans tchiques jours oulle éthait des r'frédeuses ès ouothélles et sûs ses ortets. “Pourchi don tchi faut tchi faiche si fraid?” ou dit. “J'cache le long des jours pour tâchi d'm'êcauffé, mais n'y'a pas moyen. Mets ocquo un couplye d'choutchéts sûs l'feu Ph'lip.”

 

J'obêit, épis, assis confortablyement dans ma grand tchaise ma pipe allumée et la catte sus mes g'nors, j'me mint à considithé tchèque j'poûorrais dithe à la bouonnefemme pour la ravigoté un mio. Quand vint un temps y m'vint à l'idée d'rapp'le à sa memouaithe l'année d'la grande fraid. “Y'a bein d's années d'chonna, Merrienne,” j'l'y dit, “mais j'me r'souveins ocquo que dans les siez s'maines de forte g'lée, tu n'te plaignais pas autant comme tu fais ach'teu quand l'temps touone un mio fraid. Quand v'nait l'sé, et qu'j'éthais voulu resté aupi d'man feu, tu voulais à toute forche t'n'allé jusqu'à la Mathe au Seigneur tâchi de t'rompre l'co sûs la glace.”

 

1957: Des r'frédeuses au Portinfé

 Des r'frédeuses au Portinfé.

 

Moussieu l'Editeu,

 

Siez nous l's'affaithes ne vont pas trop bein, car à qu'menchi le temps fraid à tréjous yeu l'êffet d'méttre la Merrienne d'une humeur de tchan, épis mé, mes vieilles gambes me font si ma que j'ai d'la peine à marchi, et don me v'là assis aupi du feu le long des jours quand j'dév'thais être dehors.

 

Il est vrai, Moussieu, que s'y forchi de traithe les vaques deux fais par jours et d'lûs donné d'la mangeaille, mais quant à mes deux vrégies d'navets tchi dév'thaient être à l'abri, y peuvent résté ouèsqu'y sont pour le moment, et s'y gélent et pouôrissent pûs tard, eh bein tant pièthe.

 

La Merrienne a des r'frédeuses sûs touos ses ortets et ses deux ouotheilles, sans pâslé du but du néz, et avant-hier ou fut bête asséz de s'méttre à faithe des mérveilles sans s'être asseûthée que la mé d'vallait. Oh, grand doux, tchi pité!

 

1953: Ph'lip est incredule

 Ph'lip est incredule.

Mais Merrienne sait mus.

 

Moussieu l'Editeu,

 

Avant-hier au sé, la Merrienne, méttant bas sa couôtuthe pour un instant, me d'mandit si j'avais pensé que dans une djaizaine de jour sou d'même, j'éthais à plianté mes shâllottes. “Ch'est tréjous l'pûs court jour de l'année qu'nou fait chonna,” oulle ajouôtit, et y n'faut pas oublié.”

 

“Chonna, Merrienne,” j'l'y dit, “ch'est du gniolin du temps pâssé. Tchi difféthence qu'une semaine ou deux peuvent faithe à chutte saison morte? A un mio d'bouon sens ma vieille?”

 

“Ch'n'est pas du gniolin dutout,” ou dit. “N'y'a qu'un jour dans l'année pour les plianté si sont pour faithe bein, et y faut les laissi en terre jusqu'au vingt-quatre de Juin. Y'a tchiques années tu tais tchinze jours en r'tard, et l'ver se mint d'dans, et j'perdîmes presque tout. Y n'faut pas craithe que n'y'avait pas bouonne raison pour chais vieilles couotumes. Les vieilles gens savaient bein des choses que l'monde d'ach'teu ont oublié, mais mémée m'avait apprint qu'nou n'pouvait pas s'fichi d'la natuthe.”

 

1955: Dîmanche au Portinfé

 Dîmanche au Portinfé.

Et chein tchi s'passe en Ville.

 

Moussieu l'Editeu,

 

“Eh bein, Ph'lip,” s'fit la Merrienne avant-hier-au sé, “ne v'là Nouë, à la fin. Grand doux, comme le temps s'pâsse!”

 

“Vèthe, ma vieille,” j'l'y dit, “mais nou n'peut pas empêchi chonna. Ch'est la vie. Et y n'faut pas s'faithe minséthablye parsque nous appréche la fin.”

 

1955: Les choses au Portinfé.

 Les choses au Portinfé.

 

Moussieu l'Editeu,

 

Mé et la Merrienne j'avons liut les rapports dans la Post de chein tchi s'est pâssé dans l's'Etats chutte semaine, et pour dithe vrai, Moussieu, j'n'y viyons qu'bliâse. Tout ch'que j'pouvons vais ch'est qu'y'a pûs d'dêpenses que jamais et que dans deux ou trais ans Jêrri s'sa souos l'fou. La Merrienne, tch'y n'est jamais encouothante, prédit qu'l'année tchi veint y'étha d'nouvelles taxes et que, comme de couôtume, les pouôres férmiers en paiethont la pûs grande partie.

 

Je n's'y pas tout-à-fait de ch't' opinion-là, car j'avons un raide bouon président du Comité d'Agritchultuthe, et absolûment y'a assez d'campagnards dans l's'Etats pour êvité un patheil catastrophe. Avec chonna, quand j'pense ès êgouts, à l'êducation, es Travaux Publyiques, à chein qu'les cauchies s'en vont nos couôté, et à bein d'autres choses, je s'y convaintchu que l'temps apprèche quand l's'Etats n'pouôrront pas péyi vingt ch'lins au louis avec le rév'nu actuel. Une mauvaise saison d'patates et je s'sons dans la soupe.

 

2011: Lettre Jèrriaise

 Lettre Jerriaise Lundi 28 de Novembre 2011.

 

Acquo une fais ch'ést auve grand plaisir que me r'vela Clifford Laisney a vos presenter mes pensées aniet lundi l'28 de Novembre 2011.

 

Ne v'la deja un mais qu'javons erterdgi l's houolouges, les heûthes de lumiere d'jour sont limitées, et dans trais s'm'naimes j'aûthons arrivé au pus court jour de l'année. Couomme
tchi qu'el l'temps s'passe. Dans parichin, j'avons rejoui d'un autonme doux et calme, pas
d'grands tempêtes, mais une écarcite plyie, resûltant en deficit d'ieau dans les reservoirs
necessitant l'engagement de la station tchi convertie ieau d'mé a ieau fraiche.

 

1960: L'Assembliée d'Jèrriais

 L'Assembliée d'Jèrriais

Rêunion mensuelle

 

 

La dreine rêunion pour ch't année eut lieu sam'di, l'17 dé décembre, dans la Salle Parouaîssiale dé St. Brélade, et au mains 110 membres lus y rêunitent. Ch'fut eune raide bouanne séthée et la salle, qu'avait 'té décorée, pathaisait divèrsément bein.

 

L's affaithes pour la séthée fudrent courtes et auprès qué l'rapport du mais d'novembre fut liu et accepté et chînq nouvieaux membres d'êlus, la ségrétaithe liut des salutations dé deux membres hors pays. Lé Président annoncit l'restant d'la séthée dans les mains du Conmité Dramatique.

 

Divèrtissement

 

L'Sieur B. Amy, l'président d'chu souos-conmité 'chin, prînt chèrge, et Moussieu Ph. Ahier, B. ès S., avait arrangi plusieurs competitions qui 'taient bein amusantes. I' y eut dé raide bouannes gammes étout et quand vînt un temps les plus vièrs 'taient tout aussi animés commes les jannes! Tous pathaisaient lus y pliaithe hardi. Duthant la séthée i' y eut eune ercitation par la ségrétaithe et eune belle chanson bein chantée par Ruth Amy.

 

1972: Bouan Noué!

 Bouan Noué!

 

San Antonio, Texas, U.S.A.

 

Lé 23 d'dézembre, 1972.

 

N'èrvéla l'bieau jour tch'appréche: Lé jour dé naîssance dé Nouotre Seigneur Jésû-Christ, un jour qué j'dévons tous êt' èrconnaîssants d'pouver célébrer dans l'églyise et siez nous. La jouaie dait êt' êcliatante dans l'ciel quand, à toutes les Mêsses Solonnelles dé Miniet, les vouaix des fidèles sus la tèrre sé joignent ès vouaix des Anges et Archanges à l'entou du Trône en chantant les belles patholes du Gloria qu' ou pouvez vaie dans l'supèrbe sèrvice dé la Sainte Cène dans la Litourgie: “Saint, Saint Seigneur Dieu des Armées, les cieux et la terre sont remplis de Ta gloire, Ô Dieu Très-Haut, parce que Tu as donné Jésus Christ, Ton Fils Unique lequel, dans un temps pareil à celui-ci, naquit pour nous !”

 

Ch'est vraînment en vieillissant qu' nou-s-apprécie la jouaie et l'bonheu d'eune jannèche tch'a dispathu à m'suthe qué châque Noué a fait s'n appathance. Dans chutte jannèche-là nou criyait fiabliément à l'existance dé Papa Noué. Comme mousses, j'n'avions pon les bieaux jouets qué l's êfants ont à ch't heu, et Noué 'tait l'grand jour tch'i' y'avait p't êt' eune chance d'en trouver iun ou deux dans la cauche qué nou pendait souos l'ais du fouoyi pour êt' seux tch'i' la vîsse en d'scendant par la cheunm'née. Les jouets 'taient quand-mème pûtôt eune affaithe d'espéthance que d'réalité dans la campagne, liain d'la ville, et nou s'contentait d'l'orange ou deux, des codrettes et des nouaix qué nou trouvait dans la cauche.

 

1969: Sèrvice dé Noué

 L'Assembliée d'Jèrriais

Sèrvice dé Noué

 

 

San'mdi, l'20 dé décembre, un sèrvice dé neu léçons et d'cantiques dé Noué eut lieu dans l'Églyise dé St. Jean et dans les 140 membres lus y rêunitent.

 

L'Sieur E. B. de Gruchy fit la beinv'nue à tous et annoncit l'preunmyi cantique, “Dans les cieux et sur la terre”, et auprès fit la priéthe et l'sèrvice continuit sans arrêt.

 

1966: Eune fanmeuse pétite âne (2)

 Eune fanmeuse pétite âne

(Siéte)

 

San Antonio, Texas,

U.S.A.

 

Lé 17 dé dézembre, 1966.

 

Lé pouorre mousse s'engroutit à plieuther et v'la tch'éthait fait chose à autcheune pèrsonne dé vaie san chagrîn. Comme un bouan garçon, i' n'voulait pon d'sobeï à san p'pèe, mais il 'tait înconsolabl'ye, et i' plieuthait dans san liet auprès tch'i' fut couochi. Ses lèrmes mouoillaient s'n ouothilyi - ch'tait comme s'il avait l'tchoeu rompu, et il 'tait tard quand i' s'endormit.

 

Quand san p'pèe lî criyit d'bouan matîn i' sé l'vit l'tchoeu bein gros, et i' n'put pon mangi san dêjeuner. Quand il allit ramâsser sa p'tite âne dans l'êtabl'ye ou' s'en vint à sa rencontre et lî frottit l'musé contre sa joue comme d'amors. I' s'engroutit et mînt ses p'tits bras l'tou d'san co, et san p'pèe avait tout ch'tch'i' pouvait faithe à s'empêchi d'lèrmer li-mème! Enfin, i' fallait bein aller, et âne et garçon lus mîndrent en c'mîn pour la ville.

 

1977: Lé service dé Noué

 L'Assembliée d'Jèrriais

 Lé service dé Noué

 

 

Sanm'di, lé 10 d'dézembre, 1977, lé sèrvice dé neu leçons et cantiques dé Noué eut lieu dans la Chappelle Méthodiste d'Ebênhézer à huit heuthes lé sé.

 

Lé Sieur W. G. Perchard fit la beinv'nue, annoncit l'preunmyi cantique et fit la priéthe, et “Notre Père” fut chanté. Lé préchain cantique 'tait “Seigneur Jésus” et auprès, lé Président, lé Sieur J. N. Richard, liut la preunmié leçon et lé sèrvice continnuit sans arrêt. Huit membres du tchoeur chantîtent ensembl'ye et lé Sieur John Picot chantit “Aujourd'hui l'Églyise en fête”. La Dlle. Ruth Amy chantit “Le Fis d'Marie” et lé tchoeur “Il est né le Roi du Monde”. Les membres suivants liûtent les autres leçons - les Dlles. C. de Gruchy et Audrey Le Feuvre, Mesdanmes Hilda Syvret et J. Vautier, les Sieurs E. B. de Gruchy, S. J. Le Breton, K. W. Syvret et J. D. Richardson, Connêtabl'ye d'la Trinn'té.

 

1975: Noué

 Noué

 

Fort Lauderdale, Florida,

U.S.A.

 

Lé 13 dé dézembre, 1975.

 

Moussieu l'Rédacteu,

 

Quand nou-s-est janne et qu' nou-s-attend fête dé vaie Noué v'nîn, lé temps s'pâsse tellement à la lente tch'i' vouos sembl'ye tch'i' n'arrivetha janmais, mais quand nou d'veint vièrs les jours dé Noué semblient vouos tchaie sus l'co d'vant qu' nou-s-a quâsi ieu la chance dé sé r'mett' sus ses pids d'driéthe dépis l'chein d'l'année pâssée.

 

Dans ma jannèche, Papa Noué 'tait un vrai pèrsonnage tchi v'nait nouos apporter des présents la Sèrvelle dé Noué. I' d'valait par la cheunm'née et m'ttait les présents dans la cauche qué nou-s-avait pendue à l'ais du foyi. I' v'nait du Pôle Nord dans un traîné hale par des Chèrs du Nord, et nou n'sé d'mandait pon comment dgiâtre qué l'traîné, tch'était sans doute un traîné fait pour ûsage sus la né et la gliaiche dépis qu' Papa Noué v'nait du Pôle Nord, pouvait gabather sus tèrre sans rouelles. Ou comment tch'i' pouvait navidgi par sus les liefs à pingnons, à trémies ou à mansardes, et s'y stâtionner quandi qu' Papa Noué d'valîsse dans la cheunm'née atout ses présents dans sa pouque. Dans l's idées înmaginnatives d's êfants, des mystéthes dé mème n'existaient pon, et comme nouos l'dit l'dévis sus l's armueûthies d'la fanmil'ye Messervy, “Au valeureux coeur, rien impossible!”, rein n'est împossibl'ye dans l's idées d'la jannèche!

 

1976: Changement d'pâtuthe...

 Changement d'pâtuthe...

 

San Antonio, Texas,

U.S.A.

 

Lé 24 dé janvyi, 1976.

 

Moussieu l'Rédacteu,

 

M'èrvélà dans l'Êtat dé Texas, tch'était l'pus grand des Êtats-Unis dévant l'addition d'Alaska et dé Hawaii à l'union tchi forme chînquante êtats à ch't heu. Y'a eune sémaine j'tais en Floride. Un vol dé trais heuthes et d'mie en avion par dessus l's êtats dé Florida, Georgia, Alabama, Mississippi et Louisiana m'am'nit à San Antonio, ayant pâssé eune heuthe à Dallas en c'mîn où'est tch'i' fallait changi d'avion. J'ai fait l'mème trajet bein des fais en moto, eune affaithe dé tchînze chents milles, dans trais jours, en cachant d'jour seulement.

 

Lé viage en avion, assis confortabliément dans eune sorte d'grand' tchaise auve rein à faithe sénon liéthe, mangi et dormillonner, vouos donne lé temps d'penser si nou n'veurt pon liéthe, et à tchi penser? Dans man cas ch'est bein aîsi - j'pense à Jèrri et la vielle dévinnâle mé veint à l'idée : À tchi qu'tu penses quand tu n'penses au rein? La rêponse, comme ou l'savez, est “À t'rêpondre quand tu n'dithas rein!” Sans doute, mes pensées n'taient pon entouorre “rein” - j'mé disais qué j'm'en allais trouver un tas d'lettres et d'cartes d'Noué d'Jèrri à m'attendre en arrivant à domicile siez ma fille. Tel en fut l'cas, et j'èrmèrcis touos l's anmîns tchi m'ont env'yé des cartes, et v'la tchi m'fait chose dé penser tch'i' n'en ont pon r'chu d'mé.

 

1979: En Améthique

 En Améthique

 

Fort Lauderdale,

Florida,

USA.

 

Lé 29 dé dézembre, 1979.

 

Moussieu l'Rédacteu,

 

À ch't heu qué l'festîn d'Noué est pâssé, nou peut r'prendre sén haleine et r'quémenchi à vivre trantchilement d'un jour à l'autre. Ichîn, en Améthique, ch'est l'dgiâbl'ye à confêsser d'êprouver à boutitchi les dreins jours dévant Noué même. Nou dithait qu' tout l'monde a laîssi l'acat d'présents pour mett' souos l'arbre d'Noué à la dreine minnute. Et si les grand' pèrsonnes ont enm'né les mousses auve ieux à boutitchi ch'est un vraie sodôme dans l's allées du “supèrmarchi”. Les mousses veulent paûtchi l's objets sus l's ais qu' les pathents n'ont autcheune idée d'acater. Souvent l'mousse vait tchiquechose tchi lî fait envie, et i' l'met dans l'pangni à sa m'mèe. Ou n's'en appèrche pon dans l'temps, et quand veint l'temps d'payi à la sortie et qu' ou l'vait, ou s'décide généralement d'payi pour et n'en dithe rein dé peux qu' les gens n'la ouaie êt' rêponnue âprément par lé mousse s'oulle êprouve à lé r'prînmander. Les mousses sont honteusement gâtés ichîn, et i' n'y'a pon telle chose comme la disciplinne tch'est si nécessaithe pour former l'caractéthe des jannes.