1956: Le Recteur et san Surveillant.

 Le Recteur et san Surveillant.

 

J'avions dit tchiques patholes, la Merrienne et mé, l'autre sé, quand ou hallit ses lunéttes et s'arrangit confortablyement dans sa tchaise, et me d'mandit tchèsque chonna voulait dithe à Saint-Piérre.

 

“J'ai liut l'rapport de chu meeting,” ou dit, “et j'n'y vait qu'bliase. Pourtchi don, que l'Récteur agit d'même? J'avais ouï pourtant, que ch'tait un charmant corps.”

 

“Et mé étout,” j'l'y dit, “mais si un Récteur et ses Surveillants n'peuvent pas s'accordé, y faut tchi y'aie tchique changement. Et ch'tait là l'cas à Saint-Piérre.”

 

“Mais,” ou dit, “quand l'nouviau Récteur arrivit, tout l'monde pathaissait satisfait, et n'y'a pas longtemps d'chonna. Tchèsqu'y s'est arrivé dans l'entretemps pour changi les choses et pour divîsé la pâraisse? La Post n'en dit rain.”

 

“La Post n'tait pas r'présentée à l'Assembliée,” j'l'y dit, “car, par chein, qu'j'en ouai, le Récteur, lûs avait d'mandé de ne v'nin pas. Sans doute y savait qu'y'éthait des choses de dites tchi n'y'éthaient pas pathu trop bein dans la gâzette. Et il avait raison, car j'ai veu yun d'mes amins tch'y 'tait là, et si tout tchi s'pâssit éthait tait rapporté dans la gâzette, y'éthait yeu un vrai scandale.”

 

“Mais, Ph'lip,” ou s'fit. “Tu n'me dis pas pourtchi que l'Récteur voulait s'dêfaithe de Winter Le Mérquand, tch'avait tait Surveillant pour vingt ans.”

 

“Eh bein, Merrienne,” j'l'y dit, “je n'sais pas tout, mais chein tch'est seux et cértain ch'est que tôt après qu'avait tait assermenté le Récteur, voulit être maître, et que l'Sieur Le Mérquand, tch'avait fait comme y voulait si longtemps, objéctit. Le Winter, comme san pèthe, est têtoigne, et quand il a tchique chose dans la tête, tu romp'thais l'manche d'un marté sans l'faithe changi d'idée. En un mot ch'est un bouon Jêrriais d'la vieille trempe, et p't'être que j'n'en avons pûs comme l'y dans l'Ile. Mais avec chonna, je crais qu's'il avait voulu donné un mio, il éthait peut s'accordé avec le Récteur. Après-tout, ch'est l'Récteur tch'y dait être maître de s'n'églyise.”

 

“Je n'comprends pas chonna du-tout,” ou dit, “Ichin à Saint-Ou, j'me r'souveins ocquo de Moussieu Clément, un bouon vier corps, épis étout de Moussieu Pépin, tch'y n'se mêlait jamais d'politique, mais tch'y tait bein aimé et réspecté. Le sien qu'j'avons ach'teu, eh bein, nou n's'en pliaint pas. Il est vrai que dans d'autres pâraisses le Récteur et ses pâraissiens n'accordaient pas trop bein, mais ichin j'avons tait tréjous assez trantchilles. Enfin, par chein qu'j'ai liut dans la gâzette, tout pâssit assez trantchillement, l'autre sé à Saint-Piérre.”

 

“Oh, tu crais,” j'l'y dit, “eh bein, bouonnefemme, tu'as tort, car après que l'George Le Rossigno avait prôposé un traisième candidat, l'assembliée s'dêroulit, et l'pouôre Récteur eut tchiquechose à enduthé. En un mot, y fut insulté, et après tch'il avait tchitté, y'eut une autre réunion en-d'hors, ouèsque y'en eut tch'y baîllites de lûs béque tch'éthaient fait bein mûs d'avé résté siez-yeux. Pour un temps, par chein qu'n'ou m'a dit, y'avait prèsque tchéstchon d'allé pour la police, car y'en avait tchitchuns là tch'avaient toute l'appathence de voulé qu'menchi à capuchi.”

 

“Eh bein, Ph'lip,” ou dit, “tout chonna ch'est honteux, mais y s'peux qu'avec de nouviaux Surveillants, le Récteur pouôrra ach'teu faithe sa djobbe à s'n'idée, et qu'y'étha d'la paix dans la pâraisse. Mais, entre nous, Ph'lip, tchèsque le George Le Rossigno tch'a tréjous tait un bouon Méthodiste, tait à faithe-là?”

 

“D'mande mé, et je n'te dithai pas,” j'l'y dit, “car je n'le comprends pas pûs qu'té. Mais quant à la paix et la trantchillité dans la pâraisse, après chein tchi s'est arrivé, j'n'en crais rain.”

 

Ph'lip.

1956