1956: Ph'lip et la vente

 Ph'lip et la vente.

 

Ma bouonnefemme a accaté un wireless, et j'sy à maintchi fo. Mais j'vos en dithai pûs long la s'maine tchi veint, car agniet j'voudrais vos pâslé d'la vente de bestiaux à Springfield Mardi pâssé.

 

La Merrienne me laissit y'allé, car oulle tait tchuthieuse, et si ses vieilles gambes avaient permint, sans autchune doute ou s'sait v'nue avec mé. Mais j'tais à peine r'venu dans l'mitan d'l'arlevée que j'eut à m'assièthe pour l'y dithe chein tchi s'était pâssé.

 

“Est-che un succès chutte fais?” ou me d'mandit sans m'donné une chance d'allumé ma pipe.

 

“Eh bein, Merrienne,” j'l'y dit, “A prendre yun dans l'autre, je n'crais pas que l's'affaithes ont tait tout-à-fait comme nous avait espéthé. A qu'menchi, n'y'avait pas hardi d'ach'teurs d'Angliétêrre, et les pûs hauts prix ont tait péyis par le Sieur Pérredès et notre amin Jack Rondé.”

 

“Oh, bon,” ou s'fit, “mais j'trouve chonna bein drôle. Absolûment ch'n'tait pas là l'idée d'chais vendues.”

 

“P't'être que nan,” j'l'y dit, “mais la vendue est libre et autchune personne peut accaté, et tu peux t'fié qu'Eugène Pérredès et Jack Rondé savent chein tch'y font.”

 

“Sans doute,” ou dit, “mais tout fut-y vendu?”

 

“Grand doux, nânin,” j'l'y dit, “car si y'avait d'tchi bouon, y'avait étout d'tchi faillyi. Pour dithe vrai, Merrienne, y'avait des brecilles là tch'éthaient pathu bein mûs ès abattoirs.”

 

“Mais comment qu'chonna s'fait?” ou demandit. “J'avais tréjous comprint que toutes les bêtes avaient tait éxaminées par un p'tit comité pour asseuthé tchi taient bouonnes assez.”

 

“Et mé étout,” j'l'y dit, “mais y m'semblye que chutte fais les Mêssieurs n'y viyaient pas trop cliait dans plusieurs instances, et s'y veulent faithe mûs à l'av'nin y faudra tch'ils accates de nouvélles lunéttes. Chais Angliais n'sont pas d's'imbéciles, après tout. Etout y'a chonnechin, que dans plusieurs cas le prix d'rêserve 'tait trop haut. Ch'est s'fichi du monde de d'mandé patheils prix. Y'avait par exemplye, une vaque tchi montit pûs haut qu'j'en éthais donné, mais ou s'en r'fut à l'êtablye. Etout, l'Jack A'Court n'voulit pas vendre san boeu pour chent-septante louis, car nou m'dis après tch'il en voulait trais chents. Ch'est un raide bel anima, sans autchun doute, mais quand-même trais chents louis est hardi d'sous comme les affaithes vont agniet.”

 

“Ne t'gêne pas,” ou s'fit. “Y s'n'îtha yun d'chais jours, chu boeu-là, et ch'ne s'sa pas ès abattoirs. Nou gâgne tchiquefais par n'être pas trop prêssi.”

 

“Vèthe,” j'l'y dit, “et après tout ch'n'est pas d'nos affaithes. Mais y'a ocquo tchiquechose, Merrienne. J'pâslit à plusieurs férmiers après la vendue, et y 'taient tous d'accord que y'a trop d'dêpenses si nous veur mettre une bête dans la vendue.”

 

“Et tchi sorte d'dêpenses?” ou d'mandit.

 

“Eh bein,” j'l'y dit, “à qu'menchi y'a tant à péyi pour joindre l'Association, et tant à péyi pour entré une bête. Avec chonna y'a la commission si la bête est vendue, et je n'sais pon tchi autre. Y n'faut pas craithe par exemplye, que si ta vaque ou ta g'niche est vendue pour séptante louis, ch'est là la somme que tu r'chév'thas.”

 

“Le bouonhomme Charles Pérchard soulait chérgi chinq du chent,” ou dit, “et faisait bein d'sus.”

 

“Ch'tait difféthent dans san temps,” j'l'y dit, “et il éthait yeu d'la peine à vivre à chinq du chent agniet. Mais y faut adméttre que l'couotage à hauchi un mio trop quand-même. Nou comprend qu'a chais vendues y'a des frais, mais y faudra tchi d'vallent si sont pour continué,”

 

“Sûs chu point-là,” ou d'mandit, “tchèsque tu'en pense? Est-che fini ou y'étha-t'y ocquo une vendue au mais d'Avri?”

 

“Nous vêrra quand l'temps veindra,” j'l'y dit. “Fais-nous une tâsse de tais.”

 

Ph'lip.

1956