1955: Merrienne et nos Jurés.

 Merrienne et nos Jurés.

 

Ch'est avec grand pliaisi que j'vos annonce que les patates dans ma bordeuse ont amendé chent pour chent dépis chutte achie Jeudi pâssé. Y sont houéttées ach'teu, et avec un mio d'solé y dév'thaient qu'menchi à couvri dans p'tit d'temps. La Merrienne est bein contente, car n'y'a rain qu'oulle aime mûs qu'une bouone castrollée d'nouvelles patates, avec d'la sauce de beurre et un mio d'gras lard. Mé, si j'ôsais avalé chonna j'attrap'thais bein seux une indigéstion, mais la bouonnefemme dit tréjous que chein qu'vous aime ne peut pas vos faithe du ma.

 

Mais ach'teu, la v'la bein lien d'être contente après avé veu dans la gâzette que y'a ocquo une êléction pour Juré-Justicier, et hier au sé j'en eûmes pour une bouonne dém'ieuthe à distchuté l'affaithe.

 

“Ch'est prèsque touos les mais,” ou qu'menchit, “que y'a une vacance pour Juge. L'autre jour ch'tait l'Sieur Benest, de la banque, tch'y jamais dans toute sa vie avait tait même un Offyci d'Connêtablye ou membre d'un Comité des Qu'mins. Sans doute y sais conté des sous, et n'y'a pas autchune doute que quand il a fallu dithe à un minséthablye fermyi que la banque n'avait pas un sous à y'êpleigni y l'a fait avec toute la politesse du monde. Mais le v'la ach'teu un magistra tch'est supposé d'connaître les louaix, et y m'semblye tch'il étha bein souvent à s'fié sûs l'avis de Moussieu l'Baillyi.”

 

“N'te gène pas d'chonna, Merrienne,” j'l'y dit, “car y l'font tous. Aut'fais ch'tait difféthent, et dans l'temps d'Gervaise Le Gros, Moussieu Lemprièthe et bein d'autres, la Baillyi n'avait pas à explitchi la louai. Ach'teu autchune personne peut siégi sans savé tchèsque est la difféthence entre la louai sûs l'Partage d'Héthitages et la Cliâmeur de Hâro. [Ch'est sûs l'Bailli qu'toute la] responsabilité tchait, et j's'y bein seux que tchiquefais il veint à s'en lâssé. Je n'sais pas si l'Sieur Le Tchène, tch'y s'porte candidat chutte fais, pouorra y'aidgé hardi.”

 

“Ch'est une tchéstchon,” ou dit, “mais ch'n'est pas là la chose. Nou vais ach'teu que y'eut une grande bêtise de faite quand y changîtes la système. Aut'fais quand y'avait une êléction pour Juge les gens 'taient hardi intérrêsis, mais d'nos jours personne ne s'en gêne, et souos les circonstances n'y'a qu'une chose à faithe.”

 

“Et tchèsque ch'est?” j'l'y d'mandit.

 

“Ch'est de r'méttre les Jurés dans l's'Etats, ou dit, “et d'envié chais Députés d'la Ville tu sais bein iou, et chu Collège Eléctoral étout. Tchi nos r'donnent le drouait d'voté dans l's'êléctions, comme j'avions tréjous fait dans les viers temps et j'vêrrons bétôt d'bouons campagnards sûs les rangs, et pas tant d'chais Colonels et Mâjeurs et je n'sais pon tchi assis dans la Cour avec lûs rouoges robes faisant la mine de comprendre chein tchi s'pâsse.”

 

“Ch'est une idée,” j'l'y dit, “et j'en approuve hardi. Etout je s'sais en faveur de gardé jusqu'à autchun âge un Juge de la qualité de bein des pièches que nous a veu souos l'vier arrangement.”

 

“Vèthe, bein seux,” ou dit. “R'garde, par exemplye, le Juge Le Masuthi, tch'y rempliéche le Baillyi si souvent. Nou m'dit tch'y faut tch'y rêsigne dans un mais ou deux, parsqu'il a atteint l'âge de séptante-chinq. Ch'est riditchule chonna, car je l'vit en ville l'autre jour et y marchait ocquo comme un homme de quarante ans, mais par chutte bête de louai-là il est forchi d'abandonné.”

 

“Et pourtant, nou sait bein que l'Baillyi voudrait bein l'gardé,” j'l'y dit, “mais y n'peut pas l'faithe. Et ch'n'est pas fini, Merrienne, car y'en a yun ou deux autres tch'éthont à fiche lûs camp bein vite. L's'Etats n'savaient pas tchèsqu'y faisaient quand y changîtes le système après la dguêrre.”

 

“Ch'n'tait pas la seule bêtise tch'y fîtes,” dit la bouonnefemme. “Pense à nos pouôres Récteurs!”

 

Ph'lip.

1955