1981: Lé pâssage du temps

 Lé pâssage du temps

 

Fort Lauderdale,

Florida, USA.

 

Moussieu l'Rédacteu,

 

Dans la gâzette du quatre dé dézembre, 1980, lé bieau portrait d'la brigantinne Eye of the Wind mé ramémouaithit la brigantinne Dawn tchi transportit man p'pèe, ma m'mèe et mes fréthes Sydney George et John Giffard à La Côte dé Gaspé dans l'mais d'avri, 1901.

 

Sus un sens, nou peut dithe qué j'tions à nouos entr'èrgarder, man fréthe Sydney et mé, sans nouos entre vaie, à m'suthe qué l'Dawn pâssait par La Baie d'St Ouën en c'mîn pour La Côte. J'tais à lé r'garder par la f'nêtre dé ma chambre à La Forge, et Sydney m'a souvent dit tch'il' à r'garder les hauteurs de l'Êta et des Landes dans ma direction en même temps, et tch'i' gardit la côte dé Jèrri en veue jusqu'à la niet. Et la preunmié chose tch'i' fît en sé l'vant à bord du navithe lé lendemain matîn fut dé r'garder pour Jèrri. Mais i' fut surprîns d'vaie qué l'Île avait dispathu et qu'la seule chose en veue 'tait des montangnes dé mé l'tou du navithe!

 

1971: Des nouvelles dé Jèrri!

 Des nouvelles dé Jèrri!

 

San Antonio, Texas,

U.S.A.

 

Lé 13 dé févri, 1971.

 

Moussieu l'Rédacteu,

 

Jé n'sai pon tch'est tch'i' y'a d'mal auve les sèrvices des postes. Ch'est seux tch'i' y'en a, car j'veins d'èrchéver trais “Jersey Weekly Posts” quâsi en mème temps - la cheine du 17 dézembre preunmièthement - et pis les cheinnes du 10 et du 24 dézembre en mème temps! I' m'sembl'ye aver ouï pâler d'eune grève des travailleurs dé la poste en Angliétèrre, mais j'n'en ai veu rein dans les gâzettes ichîn en Améthique, et ch'est p't êt' là la raison pour lé r'térgément des livraisons - prîncipalement les livraisons dé deuxième classe.

 

Comme j'l'ai mentionné d'vant, ch'est tréjous grand' fête pour mé d'èrchéver des gâzettes dé Jèrri et d'pouver vaie tch'est tch'i' s'y passe quand j'n'y sis pon! J'tais intérêssi d'liéthe, dans les discours des Membres d's Êtats à l'occâsion des distchusions au sujet d' L'Apèrchu pour ch't année, que l'Sénateu Krichefski annoncit des dépens inattendus dans l'couothant d'la preunmiéthe année d' l'administrâtion des Postes. Jèrri a la chance que l'affaithe n'est pon piéthe qu'ou n'l'est. En Améthique, la renchiéthe sus tout, prîncipalement deue ès grèves irresponsabl'yes des travailleurs dans touos les mêtchièrs, est si considéthabl'ye tch'i' faut s'attendre qué l's apèrchus s'en vont quâsi r'doublier d'vant qu'un bâtisse, construction ou entréprînse tchelconque es'saient finnis. L'affaithe est dév'nue si mal qué l'Président Nixon a propôsé un projet d'louai au Congrès pour aboli les grèves en faveur d'arbitrâtion, mais j'liêsais dans la gâzette l'aut' sé qué v'la tchi n'avait autcheune chance dé passer, car les Démocrates - tch'ont la mâjorité dans les deux Chambres du Congrès - ont peux d'offenser les grosses têtes des sŷndicats travaillistes et d'pèrdre lus vouaix dans la préchaine êlection.

 

1979: Abus d'privilège

 Abus d'privilège

 

Trenton,

Michigan, USA.

 

Lé preunmyi d'dézembre, 1979.

 

Moussieu l'Rédacteu,

 

J'veins d'erchéver la gâzette dé Jèrri du 18 d'octobre et j'vai un bieau portrait dé m'n anmîn Moussieu l'Député Jean Amy L'Maistre et sa danme dédans. I' sont montrés auve d'aut' pèrsonnes en conféthence au sujet dé dessinner un tîmbre pour Noué. V'là tchi m'fait penser qué j'dév'thais lus d'mander, à ches distîndgis mêssieux et danmes, pourtchi qué l'porteux d'lettres veint d'm'apporter la gâzette du 18 d'octobre quand j'n'ai pon 'couo r'chu les cheinnes du quatre et du onze dé chu mais-là. I' m'dithaient, sans doute, qué ch'n'est pon d'lus faute viyant tch'i' l's avaient postées aussitôt publyiyées.  Et j'comprends bein ch'la. I' faut craithe qué l'troubl'ye est entre les grand' postes dé Londres et d'Améthique.

 

Et nou n'peut pon s'vanter du sèrvice des Postes ichîn et au Cannada. Y'a tchique temps, un livre tchi fut mîns à la Poste dé Gaspé, à La Côte, dans l'mais d'novembre, mé fut d'livré à San Antonio, Texas, dans l'mais d'févri en r'vénant. À ch't heu, des lettres tchi soulaient v'nîn d'un êtat dans l'autre dans trais ou quat' jours prannent eune sémaine.

 

1977: La couleu d'Jerri

 La couleu d'Jerri

 

Trenton, Michigan,

USA.

 

Lé 14 dé mai, 1977.

 

Moussieu l'Rédacteu,

 

J'vai, dans la gâzette dé Jèrri du 31 dé mar, tch'i' y'a tchestchion d'eune nouvelle couleu pour Jèrri ch't' année d'Jubilé d'nouot' Duc, Sa Majesté la Reine d'Angliétèrre. Eh bein, y'a longtemps qu' j'en sis d'avis, mé. M'n i'dée est qu' la couleu d'Jèrri dév'thait montrer les trais léopards Jèrriais-Nouormands. À ch't êgard, j'ai pensé tch'il est à propos dé r'produithe ma lettre du 13 dé dézembre, 1969, publiyée dans la “Jersey Weekly Post” du 8 de janvyi, 1970. La v'chin:-

 

“Quand j'tais à montrer les nouvieaux timbres d'Jèrri a un anmîn ichîn en Améthique l'aut' jour, il en 'tait tout à fait êprins. I' n'pouvait pon en r'vénîn qu' eune île si p'tite comme la nouotre pouvait affaûrder à produithe dé tchi si bé. Et il 'tait êmèrvilyi, étout, qu' la Reine pèrmettait à l'Île d'aver ses propres timbres. En r'gardant l'chein d'chîn ch'lîns, tchi montre lé portrait d'la Chambre d's Êtats, il appèrchut la couleu tch'est pendue en d'ssus d'la tchaise à Moussieu l'Bailli, et, en admithant les trais léopards en or dessus, i' m'dît: “Tchi belle couleu tch'il ont, les Jèrriais! Ch'est seux qu' nou la vait au haut d'touos les mâts dans l'Île!”

 

1972: En Floride

 En Floride

 

Fort Lauderdale, Florida, U.S.A.

Lé 4 dé mar, 1972.

 

Moussieu l'Rédacteu,

 

M'èrvéla dans les chaleurs, où'est qué l'sablion est blianc comme la né et qu' là grève est si longue qu'oulle est à pèrte d'veue et qu'la mé est quâsi tchiede. Lé grand dêpiet est qu'la ville est gâtée par trop d'motos par les c'mîns. Lé nombre grandit à grands pas touos l's ans, et i' n'y a pus d'pliaîsi à en cachi iun sé-mème. Les boulevards et grand' rues en sont si encombrés tchi'i' sont, nou peut dithe, patte à coue (“bumper to bumper” en Angliais), et si nou-s-est prêssis pour aller d'tchiquebord nou va pus vite en prannant les rues d'drièthe. Mais ch'est l'mème tripot dans les grand' villes partout en Améthique ches jours, p't êt' un mio piéthe ichîn car touos les cheins des êtats du nord tchi peuvent y'affaurder veulent vénîn y pâsser au mains un mais pour raccourchi l'hiver siez ieux où'est tch'i' y'a d'la né et d'la glace à la pliaiche dé la chaleu du solé.

 

J'veins d'aver l'pliaîsi d'èrchéver la gâzette dé Jèrri du 7 dé janvyi dé ch't année. Ch'es vrai qu'les nouvelles sont quâsi deux mais en r'tard, mais i' n'en sont pon mains les bienv'nues. Ieune des choses tchi m'a fait pliaîsi est d'vaie qu' les St. Ouënnais ont r'nouvelè l'ancienne couôteunme dé sonner la clioche dé l'églyise parouaîssiale lé Jour dé Noué. J'ai connu l'son d'chutte clioche-là dès mes p'tites jours, et ch'tait un son bein solonnel pour mé car j'la ouïyais sonner au pas d'entèrrement chaque fais qu' un membre d'nouot' fanmile allait à sa dreine démeuthe dans l'chînm'chiéthe. Chu son-là, et la lectuthe du tchînzième chapitre dé la preunmiéthe êpitre dé St. Paul ès Corîntchiens par Moussieu Pépin, tchi la liêsait tréjous monté dans La Tchaîthe, m'împressionnait hardi. Moussieu Pépin avait eune bouanne vouaix, et l'sérvice 'tait en Français dans chu temps-là.

 

1968: Ch'est la fîn tchi couronne l'oeuvre

 Entouor les Jèrriais et l'Jèrriais l'tou du monde:

About Jersey people and Jèrriais around the world:

Ch'est la fîn tchi couronne l'oeuvre

San Antonio, Texas,

U.S.A.

Lé 24 févri, 1968.

Moussieu l'Rédacteu,

Auve un Jèrri tch'est si anglyicisé comme il est à ch't heu, j'mé sis tchiquefais d'mandé si pèrsonne prennent la peine dé liéthe ches lettres-ichîn en Jèrriais. J'sai bein, sans doute, qué des vièrs anmîns l'tou des Landes et d'L'Êta à St. Ouën les liêsent, entr'autres, Madanme George J'valyi (née Mary Ann Vibert), tch'a nénante-tch'ieune ans, et l'Sieur Stanley Alexandre, des Chîn-Vèrges, et Madanme Edmund Vibert dé Trodez, car i' m'ont fait l'complyîment d'm'en pâler quand j'tais en Jèrri l'êté passé.

Chein tchi m'fait pliaîsi, et tchi m'a mème êtonné un mio, est qu'des gens bein liain d'Jèrri les liêsent, et tch'il' ont prîns la peine dé faithe lé complyîment. d'm'êcrithe à mé l'dithe. Et ch'est en mème temps r'mèrquabl'ye qué y'a des Jèrriais la londgieu (ou est-che la "rondeu?") du monde à part, tchi trouvent du pliaîsi à vaie lus langue natale en êcrituthe! J'eus eune lettre l'aut' jour dé Madanme Lilian Le Grand (née Bisson), dé Victoria, en Colombie Britannique, mé dîsant qu'un Professeur Alexander (es'sait-i' d'scendant d's Alexandres dé Jèrri?), tch'a 'té en Jèrri et tchi vîsite souvent L'Espangne, la France et Londres, est întérêssi dans mes lettres et tch'i' voulait les montrer au Professeur du Français à L'Univèrsité dé Victoria.

En envyant eune carte dé souhaits pouor la Nouvelle Année

En envyant eune carte dé souhaits pouor la Nouvelle Année

V’chîn eune pétite carte pouor lé jour dé l’An -
J’aime mus en envyer achteu qu’à Noué,
Car dans chu temps là, lé Postmainne, pouôrre médgian,
En a, pour seux, bein trop à porter;
Mes cartes, pourtant, né pèsent presqué rein,
Mais quand jé vai, à Noué, chein qu’il a sus san dos,
Jé pense tréjous au dèrnié brîn d’êtrain
Tchi rompit lé chein du tristre chanmeau!...

Jean Picot
1914

Séyiz les beinv'nus siez Jersey Post

Séyiz les beinv'nus siez @jsypost #jerriais pic.twitter.com/AgdjP3CQpy

— L'Office du Jèrriais (@le_jerriais) January 30, 2017

La Poste dé Jèrri - Jersey Post

Bouan Noué d'la Poste dé Jèrri - félicitâtions et r'mèrcîments pouor la tîmbréthie - congrats and thanks for postmark to @jsypost #jerriais pic.twitter.com/15L1RdGQ6n

— L'Office du Jèrriais (@le_jerriais) December 7, 2016

Even receiving bills, blurbs and bumf feels better with a Bouan Noué from @jsypost! #jerriais pic.twitter.com/laFPD1q7wD

— Geraint Jennings (@GeraintJennings) December 9, 2016

National Poetry Day

Thanks to @jsypost and everyone at Bel Royal School who took part in our #Jèrriais #NationalPoetryDay event today! pic.twitter.com/sD27904uJQ

— L'Office du Jèrriais (@le_jerriais) October 6, 2016

Poste dé Jèrri - Jersey Post

You can view Jersey Post's front page of their website in Jèrriais now.

Ottawa

Eune lettre du Bouanhomme George dé 1975:

Ottawa

Ottawa, Ontario,
Cannada.
Lé preunmyi d'novembre, 1975.

Moussieu l'Rédacteu,

J'sis acouo à Ottawa, au Cannada, où'est qu'j'êcrivis ma lettre du 25 d'octobre. Mais criy'-ous qué j'pus vouos l'env'yer? Nannîn, y'a ieune des ches fichues grèves (d's empliyés d'la Poste) tchi sont dévnues "l'ordre du jour" par les sŷndicats d'travailleurs dé nouot' temps et tch'înc'modent lé publyi, tch'en a pliein des braies, d'toutes ches grèves. Ch'est en tchi i faut qu'j'arrête jusqu'à ma r'tou ès Êtats-Unis pour mett' ches lettres à la poste pour Jèrri.

Eune aut' chose qué la grève des empliyés d'la Poste m'a empêchi d'faithe est d'prépather et poster mes cartes d'Noué pour Jèrri et l'êtrangi généralement. A ch't' êpoque touos l's ans jé l's env'yaient d'ichîn, et il' arrivaient à destinnation en bouan temps pour Noué, mais pon mouoyen ch't année, à cause dé la grève, d'acater un tîmbre sans pâler d'eune chentaine tch'i' m'fallait pour mes cartes pour l'êtrangi. enfîn, v'la tchi n'veurt pon dithe qué jé n'pens'sai pon à touos m's anmîns à Noué. À la pliaiche des cartes j'm'en vais mettre eune annonce dans l'"Evening Post" et j'espéthe qué m's anmîns la vèrront!

L'Ottawa d'au jour d'aniet n'est pon l'Ottawa qué j'trouvîs en arrivant d'dans en novembre d'mil neu chent dgiex-neuf man fréthe Fraînque et mé. Ch'tait à Halifax, en Nouvelle Ecosse, qué j'avions mîns l'pid à tèrre auprès un rude pâssage à bord du grand navithe Empress of France de la Compangnie Cannadgienne Pacifique.

Patchets - Parcels

Further to a previous post, here's a picture of some recently received deliveries at L'Office du Jèrriais - all safely arrived with the Jèrriais form of the address (although not via the PO Box - the parcels were somewhat on the large side for the bosc à la poste).

Eune journée d'travas - A day's work

Aniet j'avons grée des cartes auve d's annimaux dans d's êcoles pouor not' êchange auve lé Pays Gallo; j'avons travailli sus l'brouoillon des Nouvelles Chroniques du Don Balleine; j'avons fait du travas pouor la Fête Nouormande; j'avons distchuté des plians; j'avons rêponnu à un co d'téléphone d'la France; j'avons travailli sus des textes pouor la Poste dé Jèrri; et j'avons fait dé tchi pouor d's enr'gistréments.... et né v'chîn un hérisson!

Cartes dé Noué - Christmas cards

J'avons env'yé des cartes dé Noué (auve les souhaits en Jèrriais, bein seu) et j'avons r'chu des cartes étout. J'admithons les cartes dé Noué du Tourisme dé Jèrri grées pouor la Fête dé Noué, auve les designs faits sèrvi sus les affiches et banniéthes.

We've sent out our Christmas cards (with the greeting in Jèrriais, naturally) and we've received some cards too. We've been admiring Jersey Tourism's cards produced with the Fête dé Noué designs as seen on this year's posters and banners.

A collection of old Christmas cards in Jèrriais can be found here: Les Cartes dé Noué.

A correspondent writes...

A correspondent writes: "...is there no translation for the expression "PO Box" you can use in your address?"

Indeed, we use Jèrriais addresses as a matter of course. We list our Department's PO Box number in English as a reasonable compromise for ease of communication. But we could always use:
Boête Postale
or
Bosc à la Poste
(B.P.)

So, feel free to Jèrrify "PO Box" if you're writing to us!

More postal vocab here.