1964: En c'mîn pour l'Australie! (5)

 En c'mîn pour l'Australie!

(Siète)

 

Lé Rouai Neptune arrivit en procêssion atout deux tambours et deux-s'trais înstruments d'musique en tête. Il 'tait couronné, et avait eune longue barbe et eune robe tchi d'valait d'la cheintuthe a ses pids. Iun d'ses aîgues 'tait habilyi quâsi comme li, et l'aut' 'tait eune belle janne hardelle habilyie d'même étout. La barbe du Rouai, et les robes dé touos les trais, 'taient faites atout du filîn êtoupé. Deux sèrviteurs du Rouai, quâsi nus, auve le corps peint dé toutes les couleurs, et des drôles dé chapieaux 'taient les Serjents d'Justice, et ch'tait à ieux d'exétchuter ses ordres. Dans la bangnerêsse y'avait deux hommes assis, l'ieau jusqu'à souos l's epaules. Et pis y'avait l'Greffyi drôlement habilyi étout, maté auprès du Rouai.

 

À travers d'un haut-parleur, la Cour fut dêcliathée ouverte par lé Rouai, et l'Greffyi liut la preunmiéthe atchusation: Qué l'nommé tel-et-tel avait néglyigi d'faithe obéissance à la majesté du Rouai en crouaîsant La Lîngne! Lé Rouai fit pathaître l'îndividu d'vant li et l'condamnit a aver sa barbe râsée et ses g'veux copés à ras, et san corps blianchi atout d'la caux et env'yé à la mé! L's officiers dé la Cour couvrîdent l'atchusé atout d'la blianche pâte tch'il' avaient à la bouqu'tée à côté d'ieux, et pis i' l'mîndrent sus la tabl'ye et li râsîdrent la fache et la tête atout l'grand razeux d'bouais, et l'fliantchîdrent dans la bangnerêsse où-est tch'i' fut lav'tchinné par les deux hommes dédans. Finnalement i' fut êtravelé sus l'pont, ou-est qu'-y'avait un coupl'ye d'matelots à l'attendre atout des sèrviettes pour lé stchi et l'laissi s'habilyi.

 

Lé Bacaillot continnuit pour eune volée. Des mousses dé quatorze à tchînze ou seize ans s'étaient ouffèrts pour êt' les atchusés, et les grand' pèrsonnes 'taient spectateurs. I' pathaît qué dans les batchieaux d'cartchaison, les matelots tchi crouaîsent l'Equateur pour la preunmié fais sont les cheins tch'ont à aver Bacaillot. Dans un navithe comme lé nôtre, ché s'sait impossibl'ye dé l'donner à deux mille passagièrs, ch'est-en-tchi l'Bôsouin d'mande à eune douzaine des pus grand' mousses d'êt' les victînmes, et sans doute i' né d'mandent pus mus. Lé Greffyi avait arrangi un tas d'atchusations à l'avanche, et lé Rouai donnait eune difféthente punition à tous. Iun fut condamné à aver l's ouothelles copées viyant tch'i' n'avait pon oui les ordonnances du Rouai, un autre à aver les gambes copées viyant tch'i' n'avait pon marchi vite assez à faithe compathence, etc. Dans touos les cas, la scie fut faite sèrvi, et du rouoge litchide fut êcliatchi sus les membres ou parties du corps supposément copés, pour faithe la minne que ch'tait du sang. I' fûdrent tous râsés atout l'grand razeux et finîdrent par êt' lavés dans la bangnerêsse et fliantchis sûs l'pont. Comme lé temps 'tait caud, et la tempéthatuthe dé la mé dans l's envithons d'La Lingne est tréjous dans les huiptante dégrés ou pus, pèrsonne n'était en dangi d'attraper fraid.

 

Nouos v'chîn au neuf dé dézembre, et j'sommes acouo dans la Mé Îndienne, en c'mîn pour Fremantle en Australie Occidentale. J'avons joui d'un bieau temps, d'bieau solé et d'eune belle mé. Y'en a tchi trouvent lé temps long, d'aut' vont à la bibl'yiothèque empreunter des livres et liêsant à londgieu d'jour. Un tas s'amusent à jouer ès dominnos ou ès cartes. Y'en a tréjous un grand nombre dans l's aubèrges du navithe. I' n'pathaissent janmais pouver baithe a lus sé! Ch'est bein seux qu'ch'est eune bouanne source d'êrvénu pour la compangnie Peninsular & Orient à tchi l'Canberra appartcheint!

 

George d'La Forge