1955: L'Assembliée d'Jerriais

 L'Assembliée d'Jerriais

 

La rêunion mensuelle eut lieu, Samedi au sé, lé 10 dé Décembre, à 7.30 heures, dans la Salle Parouaissiale dé St. Pierre, souos la présidence du Sieur Chs. Billot. I'y avait passant septante membres dé présents, quand la rêunion c'menchit. La Sécrétaire-Assistante, dans l'absence dé la Sécrétaire, liut lé rapport, tchi fut approuvé, et après la correspondance, n'ou pâssit à l'êlection dé nouvieaux membres, et les suivants fûtent êlus à l'unanimité.

 

Nouvieaux Membres.

 

Lé Sieur C. Egré; Lé Sieur W. J. Robert et Mme Robert; Lé Sieur Oscar Le Brun et Mme Le Brun; Lé Sieur W. F. Egré et Mme Egré; Lé Sieur Percy Le Masurier et Mme Beryl Le Masurier.

 

Préchaine rêunion

 

Lé Président annoncyit qué la préchaine rêunion érait lieu lé 27 dé Janvyi. Ché s'rait lé dîner annuel, et il érait lieu à l'Hôtel dé la Belle Etoile. Lé Comité Social sé f'ra responsablye pour les arrangements. Les détails suivront pus tard.

 

Divertissements.

 

Les affaires finies, lé Président d'mandit qué les jeux d'cartes c'menchent aussi vite qué pôssiblye. Comme d'amors, lé Sieur J. W. Lé Breton avait tout prêt, et la gamme c'menchit.

 

I'y avait vingt-chinq tablyes, et tout l'monde 'taient dé bouanne humeur. I' faisait caud dans la Salle, et n'ou 'tait bein à s'n aise. La sérée parut s'pâsser divèrsément vite, et, eune fais la gamme finie, les mêssieux pèrdants à chaque tablye, payîtent pour les bêtises, en étant oblygis d'aidgi à servi lé souper! Les raffraîchissements 'taient raide bouans, et i' faut offri des félicitations au Comité Sociel, et à la dame qui fît l'café. I' fut hardi apprécié par tout l'monde.

 

Auprès l'souper Mme C. P. Billot présentit les prix ès gangnants, et l'Président èrmércyit lé Connêtablye pour l'usage dé la Salle; les Surveillants, pour aver prêté lus tablyes, cartes, etc., et Mme W. P. Le Marquand, pour aver fait dé si bouan café.

 

Touos les membres 'taient d'idée qué ch'tait ieune des pus bouannes sérées d'cartes qué l'Assembliée avait ieu et la rêunion fut ajournée dé viers onze heures.

 

1955