1956: Les shows

 Les shows.

 

Moussieu l'Editeu,

 

Hier au sé la Merrienne voulit savé tchèsque j'avais veu ès shows. J'trouvit chonna bein drôle, car tchiques jours devant, ou m'avait dit de taithe ma béque quand j'éthais voulu l'y pâslé du boeu au Frainque Avri, tch'avait fait l'championnat des Trais Pâraisses.

 

“Nou n'pâsle pas d'boeus au Dîmanche,” ou m'dit sévèthement, “et quand-même je n's'y pas intérêssie dans les shows, comme j't'l'ai dit des chents fais. Liet-mê yun des sérmons de John Wesley, et oublie les boeus et tout l'réstant pour une fais.”

 

Et don, Moussieu, j'm'y mint, mais si la bouonnefemme n'avait autchun intéthêt dans les shows, mé j'en avais ocquo mains dans l'sérmon de John Wesley, que j'liut du qu'mench'ment jusqu'à la fin, quand j'apérchut qu'la Merrienne s'était endormie dans sa tchaise, une chose tchi n't'ai pas surprenante.

 

Ou comprendrez ach'teu, Moussieu, que la Merrienne me surprint hier au sé quand ou souôl'vit la tchéstchon des shows, mais mé, j'tais bein content d'l'y dithe pûs ou mains tchèsque j'avais veu à Springfield, à Saint Louothains et à Saint-Martin.

 

Q'menchant pas les boeus j'l'y dit que je n'criyais pas qu'j'en avais veu yun à battre le sien au Frainque, mais tchi s'trouv'thait en raide bouonne compagnie à Springfield et que pour le championnat j'avais ouï que l'immense boeu au bouonhomme Gotel, tchi pèse bétôt un tonné, s'sait là contre l'y. “Eh,” j'ajouotit, “y'en a yun à St. Martin tchi n'est pas tchan, sans pâslé de chein que j'vit à Saint-Louothains et Saint-Jean.”

 

“Ach'teu,” ou dit, “as-tu veu tchiquechose d'éxtra dans les g'niches r'nouvlées, et les vaques?”

 

“En Ville,” j'l'y dit, “y avait les deux vaques à la veuve Mouothans, mais j'ai dans l'idée qu'y' [...] Louothains, j'vit une raide belle g'niche r'nouv'lée et étout une raide belle vaque. Chettechin fut battue dans la classe, mais à ma veue ch'tait une grande mêprinse. Ou fit l'championnat, mais la g'niche r'nouv'lée n'en n'tait pas d'lien. Y'avait d'raides bouonnes bêtes à chu show-là.”

 

“Et y'avait étout un imbécile tch'y n'savait pas quand il en avait yeu assez,” ou s'fit, “mais enfin j't'ai veu bein pièthe, et quand vint l'temps de s'couochi j'n'eut pas à t'aidgi à hallé tes brais. Ach'teu, pour en fini, y'avait sans doute de bouons béstiaux à Saint-Martin car nou vait tréjous tchiquechose de spécial là. Bein seux, yun des Richardsons gâgnit l'championnat, comme de couôtume.”

 

“Nouffé, Merrienne,” j'l'y dit, “les Richardsons n'avaient prèsque rain, ni les Billots, ni l'Sieur de Gruchy, de Surville, mais à Saint-Martin si yun manque y'en a tréjous un autre à l'rempliéchi. Chutte fais ch'tait l'Clifford Pallot tch'y remportit l's'honneurs.”

 

“Ah!” ou s'fit, “man couôsin. J'en s'y bein contente, car ch'est un nice corps.”

 

“Y m'semblye,” j'l'y dit, “que tu'as des couôsins et des couôsines dans toutes les cârre de l'Ile, mais quant au Clifford il avait les deux pûs belles vaques sûs l'terrain, et san boeu d'un an fut bein près d'gâgni l'championnat. Quant à mé, y fut gâgni par le sien tchi l'méthitait, le boeu de deux ans à m'n'amin le Clifford Renouf du Gros Rocher. J'pense bein qu'ch'est ocquo yun de tes couôsins ch't'y-là.”

 

“Je crais qu'vèthe,” ou dit, “du bord de sa grand'mèthe, tch'y tait pathent à man grand-pèthe. Mais, dis-mé, est-che un biau boeu?”

 

“Oui damme,” j'l'y dit, “ch'est un biau boeu, épis en raide condition, mais il éthait peut craitre un mio pûs. Avec chonna, il en faudra un bouon pour le battre.”

 

“Nou vêrra à Springfield,” ou dit, “car j'îthai ôv té, comme l'année passée, et si les juges ne font pas à man gout j'n'éthait pas d'peux d'lûs dithe tch'ils éthaient fait mûs d'résté siez-yeu à s'mé des pais d'Mai.”

 

Ph'lip.

1956