1956: L'Assembliée d'Jèrriais

 L'Assembliée d'Jèrriais

Rêunion Mensuelle.

 

La rêunion mensuelle eut lieu Vendrédi au sé, lé 18 dé Mai, dans la Salle d'Agritchulture, St. Hélyi, souos la présidence du Sieur Chs. Billot. I'y avait pus d'eune chentaine dé membres présents.

 

Lé Sieur Geo. F. Le Feuvre.

 

Dévant c'menchi l's affaires dé la rêunion, lé Président offrit la beinv'nue au Sieur Geo. F. Le Feuvre, ervénu dé l'Amérique après eune absence dé trais ans. Ch'fut eune jouaie pour touos les membres d'ervaie lé Sieur Le Feuvre - membre enthousiaste dé l'Assembliée et l'preunmyi Sécrétaire.

 

Lé Sieur Le Feuvre, en r'mèrçiant l'Président, dit comment qu'i' 'tait content dé s'ertrouver parmi ses viers ammins Jèrriais. Il avait ermètchi avec pliaisi, comment qué l'Assembliée avait grandi dépis 1951. En entendant les nouvelles dé la maladie du Juge F. V. Le Feuvre (Membre d'Honneur), lé Président dit comment qué l'Assembliée en avait dêpiet et qué touos les membres voulaient l'i envyier lus bouans voeux.

 

Nouvieaux Membres.

 

Les nouvieaux membres êlus sont:- Lé Sieur A. W. Falle, lé Sieur Julius Labey, lé Sieur J. P. Le Masurier, (Senr.); Mlle Adelina Helen du Tot et Mme Isobel Le Maistre.

 

Divertissements.

 

Comme divertissement, lé Sieur W. H. de la Mare; G. Le Mière; Frs. Hacquoil et Mme Eileen Le Sueur racontîtent des p'tites expériences amusantes dans lus vie.

 

Discours par Mlle F. Hacquoil

 

Ensuite, Mlle Florence Hacquoil nos fit un discours édifiant et hardi intérêssant sus son viage, l'année pâssée, lé long des côtes de la Méditerranée. J'fûmes transportés, par ses r'cits, dans des lieux ravissants, auve les vives couleurs des paysans, des flieurs, et des batchaux sus eune mé qu'est tréjous bleue. Ch'fut grâce à la bouanté dé Mme Parlett, qui vint auve son Ciné, nos montrer ses portraits, qué l'audience eut lé privilège dé viagi en imagination dans des parages si ravissants.

 

Ermèrciements.

 

A la fin d'la sérée, lé Président offrit ses ermèrciements ès deux dames - Mme Parlett et Mlle Hacquoil - qu'avaient prins tant d'peine pour nos intérêssi, et nos divèrti, auve dé si magnifiques portraits.

 

Comme i'n'y a pon d'Rêunion au mais d'Juin, lé Président annoncyit qué l'Assembliée espère aller en Guernésey et en Hèrm, au mais d'Juilet. L'annonce suivra pus tard.

 

1956