1955: Rêunion Mensuelle

 L'Assembliée d'Jèrriais

 

Rêunion Mensuelle.

 

 

Les membres dé l'Assembliée eûtent l'honneur dé s'rêuni' Vendrédi lé 29 Juilet, au Manyi d'Rozel, pour la rêunion mensuelle, grâce à la pérmission dé Madame Bolitho, qui nos r'chut d'eune manière cordiale et charmante - charactéristique d'eune famillye si r'nommée dans l'histouaire dé notre Ile. J'fûmes bein favorisés, lé temps parfait pour eune belle sérée d'été. En faîsant l'tou des gardins ch'tait eune scène ravissante dé touos les bords, auve les viviers paisiblyes bordés d'flieurs dé toutes couleurs, et les noblyes grands bouais alentou.

 

La Chapelle du Manyi.

 

En arrivant en d'hors dé la Chapelle, Madame Bolitho nos invitit dé nos arrêter sus la terrasse pour aver not' Rêunion. Les gens lus assiévîtent sus l'herbe et i' y avait eune nonantaine dé membres présents. Au tout c'mmenchement, lé Connêtablye S. G. Crill (Président) dit comment qué j'étions heûreux dé nos trouver dans un locale si magnifique, et i' r'mèrcyit Madame Bolitho pour sa gentilesse en nos r'chevant sus ses terres.

 

Nouvieaux Membres.

 

Les nouvieaux membres êlus sont:-

 

L'Avocat Peter Crill, l'Avocat R. H. Le Masurier, lé Député E. G. Pipon, Mlle L. M. Deslandes, lé Sieur F. Le Cuirot et Mme Le Cuirot, lé Sieur J. P. Le Garignon, lé Sieur J. P. L'Amy et Mme L'Amy, lé Sieur Clarence Rondel, lé Sieur Edward de Gruchy et sa soeur Constance de Gruchy, Monsieur Jean Marie Godefroi, Mlle Gladys Bastin, lé Sieur A. J. Pepprell et Mme Pepprell, Mme S. Furzer et lé Sieur T. W. Attenborough.

 

Discours par.

Mons Ph. Ahier, B. ès Sc.

 

Mons. Ph. Ahier nos donnit un discours au sujet d'l'histouaire du Manyi d'Rozel dépis l'année 1367, quand i' y avait dêjà eune famillye Lemprière qu'y d'meurait. I' nos donnit des détails hardi intérêssants quant aux Colombiers, dont le vier type est assez rare. En pâslant d'la Chapelle, i' nos dit qué ch'en est ieune des toutes anciennes; ou fut construite dans l'onzième siècle, et restaurée en 1844.  Au présent moment la Chapelle est en parfait ordre et un usage par les famillyes du Manyi. N'ou's trouve là, eune trantchillité et eune simplyicité véritablye.

 

Raffraîchissements.

 

A 9 heures la compagnie s'mint en route pour Rozel, ouaiqu' un p'tit souper avait 'té arrangi par lé Sieur J. W. Le Breton, (Sec. du Comité Social), et hardi bein sèrvi par lé propriétaire dé Apple Cottage. La maintchi du monde 'taient par dédans et l's autres assis ès p'tites tablyes déhors.

 

A 10 heuthes, n'ou r'partit pour siez-sé, après eune sérée hardi plaisante, et bein profitablye étout.

 

1955