1953: eune Bouanne Séthée Jèrriaise

 L'Assembliée d'Jèrriais

Rêunion mensuelle - et eune Bouanne Séthée Jèrriaise.

 

La rêunion mensuelle eut lieu à sept heuthes et d'mie Vendrédi au sé, lé 27 dé Fevri 1953, dans la Salle Parouaîssiale dé St. Louothains, souos la présidence du Juge Hedley Le Riche Edwards.

 

Nouvieaux membres.

 

Les nouvieaux membres êlus à chutte rêunion sont:- Mmes Florence Vibert, Phyllis Renault et Dorothy Turner. Me. John Barette Le Quesne et sa danme, Mme Lilian May Le Quesne, Me. Edward John Priaulx et sa danme, Mme Florence May Priaulx, Me. Raymond John Bichard et sa danme, Mme Edna Bichard. “La Société pour l'Etude des Parlers Normands” dé Normandie, fut êlue comme Membre d'Honneu.

 

La Prêchaine Rêunion.

 

Lé Président Edwards annoncit qu'la rêunion mensuelle du mais d'Mar étha lieu à 8 heuthes Vendrédi au sé, lé 27 dé Mar 1953, dans la Salle d'Agritchultuthe à St. Hélyi, et qu'l-y étha des tchestchions comme à la rêunion d'Mar l'année passée. Les tchestchions dev'thaient êt' apportées par êcrit autant qu'possibl'ye, mais nou f'tha d'san mus pour les rêpondre toutes, tch'i' s'saient par êcrit ou autrement.

 

Séthée Jèrriaise.

 

La rêunion fut ajournée à 8 heuthes, et la Salle fut dêcliathée ouvèrte à tout l'monde pour lé concèrt. Nou peut dithe qué l'Comité Dramatique méthite d'êt' félicité, - lé concèrt fut un grand succés. Ouaithe qué les gens 'taient hardi embarrassés à plianter, i' vîntent en bouan nombre, et la Salle 'tait quâsi plieinne.

 

L'y-eut des r'citations par Mlle Marguerite Le Couteur et Mme Amelia Perchard, et des dgialogues par Mlle Emma Syvret et Mme Elaine A'Court, Mlles Marguerite Binet et Marguerite Le Couteur, et Mmes Alice Blampied et Eileen Le Sueur. Et pis des chansons par Mlle Marguerite Binet, Mêssieux Winter Du Tot et Guy Le Sueur, et l'Ségrétaithe. Touos ches artistes sont bein connus ès Séthées Jèrriaises, et nou viyait bein par l's applaudissements qué l'monde né sont pon enn'yés d'les ouï.

 

Lé Sieur Philip Le Ruez, qué nou n'avait pon ieu l'pliaisi d'vaie sus la strade pour tchique temps, r'citit sa fanmeuse: “Chasse à la Souothis!” Nou n'se lâsse janmais dé l'ouï r'citer, et s'n intèrprétation d's aventuthes dé chutte pouorre pétite souothis 'tait si bouanne qué s'i' l'y avait ieu des cats par les c'mîns i' n'lî-éthaient pon donné eune munute d'erpos!

 

Lé Sieur Ernest F. Vibert nouos donnit eune fanmeuse èrcitation étout, et i' nouos montrit tch'il a couo eune raide bouanne mémouaithe!

 

La Compangnie d'St Martîn présentit sa scène dé thêatre dé l'Eisteddfod. Oulle est bein rîsibl'ye, et nouos ramémouaithe les bouans vièrs temps ès êlections. Lé Sieur De La Mare, a eune fichue bouanne idée tch'est qu'i' faut pour en gangni ieune, dé ces êlection-là. Ergardez à vous, St. Martinnais, si janmais i' s'met dans la tête dé prendre pour Connêtabl'ye!

 

Pour finni l'concèrt, “Lé Procès,” composé par not' vièr anmîn “Jock” Luce l'y-a bein d's années, fut présenté par des membres des pâraisses du Ouest, auve l'assistance dé Mme Amelia Perchard. L'y-avait longtemps qu'nou n'l'avait pon veu, l'fanmeux “Procès”, mais l'audience pathut l'apprécier tant qu'ch'est seux tch'il est aussîn populaithe comme janmais!

 

Donation au “Flood Relief Fund”.

 

Duthant l'intèrvalle, eune collection en argent fut faite pour lé bénéfice des pèrsonnes appauvries et chassées houors dé lus siez-sé par les inondations en Angliétèrre. Les gens donnîtent dé bouan tchoeu, et eune somme dé £12 - 1 - 6 a 'té présentée par le Trésôryi Bertram à l' “Evening Post” pour envier en Angliétèrre.

 

R'mèrcyiments au Connêtabl'ye.

 

A la fin d'la séthée, lé Président Edwards ermèrcyit lé Connêtabl'ye Baudains pour nouos aver gracieusement permîns l'usage grâtis d'la Salle Parouaîssiale (viyant que ch'tait pour donner la collection au “Flood Relief Fund”), lé Comité Dramatique pour aver si bein arrangi la séthée, et l's artistes pour aver ouffèrt lus sèrvices dé si bouan tchoeu.