1956: Merrienne et ses pathens

 Merrienne et ses pathens

Ph'lip est incrédule.

 

Moussieu l'Editeu,

 

J'eut bein d'la peine à pérsuadé la Merrienne de m'laissi allé au grand show d'bêtes Mêcredi, car ou criyait que je s'sais bein mûs otchupé a houétté mes navets et man p'tit bétchet d'raves. Comme ou savez, Moussieu, le temps a tait si mouoillyi qu'nou n'a pas peut y touchi, mais n'y'a pas d'mauvais temps pour la sérclye, et y faut admettre que y'a des chmillyes bétôt trais pids d'haut dans mes clios, sans pâslé des chérdrons et bein d'autres choses tch'ont tait minses sûs la têrre pour faithe d'la minsèthe au pouôre fermyi. Enfin, quand j'y'eut promint que j'm'y mett'rais tout-d'suite après l'show, ou consentit, et l'préchain matin me v'la hors -

 

Quand je r'vint ou voulit savé, bein seux tchèsqu'y s'était pâssé et tchèsque j'avais veu. Les Juges avaient-y fait lûs d'vé comme des hommes, ou avaient-y, comme de couôtume, fait des bêtises?

 

“Mais, tu dais savé, Merrienne,” j'l'y dit, “que n'y'a jamais yeu un Juge tch'a pliut ès pérdants, et j'pense bein que ch'tait d'même agniet. Ch'tait un bouon show, à l'prendre tout travers, mais dans les g'niches r'nouv'lés et les g'niches de deux ans je n'crais pas que dans tchiques instances les Juges y viyaient trop cliait, et y s'arrivit pûs d'une drôle de chose dans les boeux. Par exemplye, le boeu d'un an à Clifford Pallot qu'les Juges ne voulaient pas vais au mais d'Mai gâgnit sa classe chu coup, et pûs qu'chonna, fit l'championnat du Show.”

 

“Tu n'veur pas dithe,” ou d'mandit, “qu'y battit le boeu à Frainque Avri.”

 

“Si-fait,” j'l'y dit. “Ch'tait entre chais deux-là, et y faut adméttre que ch'tait deux belles bêtes, en raide condition. Les Juges ne pouvaient pas décidé, et ch'tait l'réferee qu'eut à faithe le chouaix.”

 

“Et tchèsque tu'éthais fait, té?” ou d'mandit.

 

“Je n'm'en vais pas t'dithe,” j'l'y raiponnit, “car tu îthais l'rapporté partout la pâraisse, et je n'veur pas faithe de mauvais amins.”

 

“Tétoigne que tu'ès,” ou fit. “Enfin, je n's'y pas mârrie que Clifford gagnit. J'n'ai rain à dithe contre le Frainque Avri tch'est un raide bouon garçon, mais sûs un sens j's'y un mio pathente ès Pallots.”

 

“Oh, bon,” je m'fit, “et comment chonna? J'qu'menche à craithe que quand tu t'y mets, tu peux trouvé des pathens partout.”

 

“J'm'en vais l'éxplitchi,” ou dit. “Mémée fut bein près d'mathié un Pallot, mais ou l'abandonnit, car y snotchait, et ou considéthait chonna une sale habitude. Tu peux vais ach'teu que sinon pour une p'tite chose, tu'éthais peut être un Pallot.”

 

“J'm'êbouffit d'rithe." "Ma chièthe Merrienne,” j'l'y dit, “à chu compte-là je s'y pathent à au mains une doûzeaine des famillyes ichin à Saint-Ou, car quand j'tais jeune je changeais d'amouotheuse toutes les siez s'maines. Accordant à tan raisonement, tu éthais peut être une Vibert, une Vautchi, une Le Feuvre, une Le Boutillyi et une Le Bro, sans conté l'réstant.”

 

La Merrienne souôrit. “Je l'savais bein,” ou dit, “quand tu me d'mandit, et ch'tait pour chonna que je n'fûmes engagis qu'un mais.”

 

“Vèthe,” j'l'y dit, “et tu te r'souveins des rumeurs tchi couôthaient dans l'vaisiné.”

 

La bouonnefemme rougit. “Tâs d'sales langues,” ou s'fit, “notre p'tit John vint au but d'onze mais, et tu l'sais bein.”

 

“Vèthe, ma vieille,” j'l'y dit, “mais r'venant au Show: ch'tait la vaque au Sieur Brée tchi remportit tout comme oulle avait fait au mais d'Mai. Y n'y'avait rain à l'y touchi, et je n'comprends pas chonna. Avec toutes les bêtes que y'a dans l'Ile, nou craithait tchi s'en trouv'thait pûs d'raides bouonnes.”

 

“Y s'en trouv'tha au mais d'Octobre,” ou dit. “Ne t'gène pas, man Ph'lip, la race n'a pas dêpéthi.”

 

Ph'lip.

1956