1954: Excursion en Sercq

 L'Assembliée d'Jèrriais.

Excursion en Sercq.

 

Les membres dé l'Assembliée sé rêunitent sus la cauchie à 8.15 heures, lé 23 d'Août en bouan temps pour s'embèrtchi sus l'baté lé “Brittany,” tchi fait l'trajet rédgulièrement. I'y en avait 57, et, viyant qué l'temps tait bé, i' 'taient touos dé bouanne humeur, attendant fête à passer eune belle journée ensemblye.

 

En arrivant en d'hors des rotchiers dé la baie dé Dixcart, les p'tits batchiaux sé rangîtent à côté et né v'la les pâssagiers qui s'prèssent à d'valer d'dans.

 

Dans tchiques minutes nou's arrivit sus la cauchie pour monter les d'grès du Havre du Creux.

Lé preunmyi à nos faire la beinv'nue fut lé Sieur H. G. Head - un charmant moussieu qui s'est hardi dêrangi en faisant touos l's arrangements pour not' visite. I' nos annoncyit qué la Dame dé Sèrcq - Madame Sibyl Hathaway - avait ieu à s'n aller en Angliéterre pour un mariage, et qué ché s'rait sa fille, Madame H. P. Bell, qui l'a rempliaich'rait.

 

Les vouaitures nos attendaient et sans pèrdre d'temps né v'là la procèssion qui s'met en route : les pus jeunes à pid, et l's autres montés à lus aise en vouaiture. Eune fais arrivés au haut du Mont, nou s'assiévit sus un fossé dans un clios à la Collinette qui nos avait 'té prêté par lé Sieur Jean de Carteret.

 

 

La Rêunion.

 

Ensuite suivit eune courte rêunion souos la présidence du Connêtablye S. G. Crill. J'eûmes lé pliaisi d'èrchever occouo ching nouvieaux membres. Des ammins dé l'Ile vintent pour nos adresser tchiq' mots dans lus langue Sèrtchaise. I' y avait lé Député Sénéchal Eugène Baker, lé Greffier de Sèrcq, Hilary Carré ; et le Vingtenier Philip Perrée. I' nos fîtent touos la beinv'nue.

 

Lé R'pas.

 

A douze heures, n'ou s'rendit à la Salle Centrale dé l'Ile, ouaiqu'un fanmeux Lunch avait té préparé par lé Sieur Jean Hamon et sa dame. Après l'air frais sus l'baté ch'est qui nos membres avaient faim, et i' s'rigalîtent auvé touos les bouans pliâts. A la fin du r'pas, lé Président proposit la santé dé Sa Majesté la Reine Elizabeth, not' Duchesse. Lé Sieur Chs Billot nos fît eune addresse, et pus tard, j'écoutûmes auvé grand pliaisi lé Greffier d'Sèrcq - lé Sieur Hilary Carré, nos pâsler en sèrtchais. Ensuite, lé Greffier, lé Vingtnyi et lé Sieur Head fûtent êlus membres d'Honneur dé not' Assembliée.

 

En r'mèrciant la compagnie, ches trais messieux-la nos dîtent qué ch'tait un vrai plaisi d'nos vaie en Sèrcq, et dé n'oublier pas qué les Sèrtchais ont eune grande affection pour lus ammins Jèrriais.

 

Lé Président présentit des cigarettes au Sieur Head, au nom des membres en lé r'mèrciant pour lus aver rendu un si grand sèrvice. I' r'chu étout eune bouaite dé mèrvelles dé la part dé Mme. Kathleen Le Maistre, qui s'y r'connaît à les faire. Moussieu Head, tout à fait surprins ermèrcyit les membres et dit qué ch'tait un pliaisi pour l'i dé s'trouver parmi nous.

 

A La Seigneurie.

 

Après lé r'pas, les gens allîtent sé prom'ner à La Coupée et au Havre Gosselin, dévant s'ertrouver à l'entrée du Manyi. Ch'fut un grand honneur pour les membres dé l'Assembliée d'être erchus par Madame Bell - fille de la Dame dé Sèrcq - et par Moussieu H. P. Bell, Connêtablye dé Sèrcq.

 

Madame Bell nos fît un charmant discours, nos montrant l'ancienne partie du Manyi - les vielles murâlles, la Chapelle, lé Colombier, et l'vier p'its, et dans l'appartement à gauche, la vielle âtre de 1765. Touos nos membres en fûtent ravis et ch'tait eune belle scène dé les vaie s'prom'ner dans les magnifiques gardins, remplyis d'flieurs dé toutes couleurs.

 

Lé président en r'mèrciant Madame Bell pour sa gentillesse en nos r'chévant si gracieusement, l'i d'mandit d'accepter eune bouaite dé chocolats comme un p'tit signe dé l'appréciation dé touos les membres.

 

Lé R'tour.

 

 

A 4.30 heures, n'ou s'ertrouvit à la cauchie pour faire la travèrsée dans les p'tits batchiaux jusqu'au “Brittany,” en d'hors. Touos les membres avaient r'gret dé s'en r'aller si tôt. Ch'tait la seule pliainte qué n'ou's entendit. Après un bouan viage, j'nos r'trouvîmes sus la cauchie en Jèrri à 7.15 heures, et en s'disant “A la préchaine,” toute la compagnie fut d'un avis - ch'tait qué j'avions passé eune magnifique journée.

 

1954