1956: Rêunion mensuelle

 L'Assembliée d'Jèrriais

Rêunion mensuelle.

 

La rêunion mensuelle eut lieu Vendrédi au sé, lé 27 d'Avri, à 8 heures, dans la Salle Parouâissiale dé St. Jean. Ch'est la preunmié fais qué l'Assembliée a ieu l'honneur dé s'y présenter. I'y avait eune chentaine dé membres présents.

 

Tout au c'menchement d'la sérée, lé Sieur F. Trachy, qui rempliaichit lé Président, (lé Sieur Chs. Billot), offrit au nom dé l'Assembliée, ses r'mèrciements au Connêtablye, lé Sieur C. Le Vesconte, pour nos aver accordé l'usage dé la salle. I' dit comment qué ch'tait un privilège dé nos trouver dans sa pâraisse, et il offrit la beinv'nue étout à sa dame; coume au Sénateu Le Marinel et Mme Le Marinel, qui 'taient auve nous.

 

Nouvieaux Membres.

 

Les affaires dé la rêunion suivîtent, et quand vint l'moment pour la nomination dé nouvieaux membres, i' fallut aver d'la pâtienche, car en tout, i'y eut un total dé 40 noms proposés pour êlection. Ch'fut un r'cord pour l'Assembliée dans eune seule sérée.

 

Divertissements.

 

Lé Comité Dramatique s'fit responsablye pour lé programme qui suivit: La strade 'tait décorée d'flieurs et des p'tites tablyes avaient 'té pliaichies l'tou d'la salle, ouaiqu' n'ou s'assiévit bein à s'n aise, auve ses ammins.

 

Lé Sieur J. N. Richard (Président du Comité Dramatique), annoncyit les items, bein chouâisis et variés, et sa compagnie d'artistes s'en déshallîtent hardi bein Chansons, èrcitations, dialogues, pièches dé théâtre - tout fut présenté auve eune animation charactéristique dé vrais Jèrriais. I' méritîtent les appliaudissements qui r'chûtent. I' faut féliciter Mme AmeliaPerchard, car oulle avait composé la pus grande parties des pièches, eune tâche assez difficile.

 

Raffraîchissements.

 

A la fin du concert, la scène fut changie. Les dames dé St. Jean, souos la direction dé Mme Le Marinel, nos avaient préparé - auve eune générôsité supèrbe - un souper. Les tablyes fûtent remplyies dé toutes sortes dé bouannes choses, eune preuve véritablye qué les dames y avaient mins du temps. Ch'fut un magnifique geste à notre égard.

 

Ermèrciements.

 

A la fin d'la sérée lé Président ermèrcyit sincèrement les dames pour lus bouanté et lus dévôtion, et i' lus asseûrit d'la r'connaissance dé touos les membres présents.

 

I' r'mèrcyit étout lé Comité Dramatique et touos l's artistes qu'avaient contribué au succès d'la sérée.

 

Préchaine Rêunion.

 

I' fut annoncé qué la préchaine Rêunion Mensuelle érait lieu Vendrédi, lé 18 dé Mai, à 8 heures, dans la Salle d'Agritchulture, St. Hélyi. Les membres fûtent invités d'y v'ner en bouan nombre.

 

1956