Sonnet 58 d'Shakespeare

Sonnet 58

Si ch'est par tchique dgieu qué jé t'sis souômîns,
qu'i' n'pèrmette pon dé c'mander tes pliaîsièrs
ou d'té d'mander d'saver tout tan dêmnîn.
Ch'est qu'j'sis t'n escliave, et en toute chose jé t'sèrs:
qué j'suffâque d'êt' quémandé chîn' et là
sans libèrté dé t'vaie châque fais qu'tu vais;
qué j'garde ma pâcienche, enfachi du r'tas,
sans t'atchûther dé m'faithe ni frangues ni pliaies.
Tu'es libre coumme l'air et, coumme lé vent, si fort
qué tu fais chein qu'tu veurs coumme tu'es haitchi,
en griyant du bein, en griyant du tort,
épis en t'extchûthant tan mauvaîtchi.
J'sis pouor attendre, ouaithe qué j'attenge l'enfé,
sans bliaûmer t'n affit - qu'i' sait laid ou bé.

Sonnet 74 d'Shakespeare

Sonnet 74

Mais sai heutheux quand j's'sai d'un co blioutchi
et emm'né à janmais sans drouait d'èrtou;
ch'est dans ches lîngnes qué j'ai pliaichi ma vie,
tchi restétha dans ta mémouaithe tréjous.
Quand tu'èrliêthas chennechîn, ch'est qu'tu m'liêthas:
man pus s'gret scrit tch'est voué à té et saint.
La tèrre étha raîque la tèrre, ch'est san r'tas;
m'n esprit est à té - auve li, tout man bein.
Ch'est raîque la lyie d'la vie qu'tu'éthas pèrdu,
eune bouochie pouor les vèrs, sèrvie en suaithe
à chiques êffilotchies et dêcouôsues,
tchi n'vaut pon vivre acouo dans ta mémouaithe.
Ch'est qu'chenna vaut chein qu'chenna peut garder:
v'là tch'est chennechîn - et chennechîn reste auve té.

Sonnet 105 d'Shakespeare

Sonnet 105

Qu'nou n'mênomme pon m'n amour raîque ma manie
ni n'diche qué m'n aimé est eune êmânue;
d'pis qu'ch'est à li qu'mes louanges sont adréchies,
j'y c'menche tréjous, j'm'en d'mente, et j'continnue.
M'n amour est doux aniet, et s'sa doux d'main,
tréjous louoya, et mangnifique à vaie.
Mes vèrsets don d'la louoyauté sont plieins -
remplyis raîque du chein dé tchi qué j'sis d'hait.
Bé, doux, et vrai - né v'là tout chein qu'j'êcris;
bé, doux, et vrai - dé même ou en d'aut' mots,
et j'sis au d'sans en tâchant d'les changi:
trais thèmes en iun - un trait tchi fait trais cos.
Bé, doux, et vrai - qu'nou trouve à lus tout seu,
mais j'vai chutte sainte Trinn'té dans m'n amouotheux.

Sonnet 117 dé Shakespeare

Sonnet 117

Atchûthe-mé coumme chennechîn: qu'j'ai néglyigi
dé t'èrpayi tes grandes oblyigâtions;
oublié dé t'sommer pouor t'n amour si chi
ouaithe qué j'fûsse amathé à tan paîsson;
qu'j'ai vaîthinné siez d's esprits înnouothants,
et fliaûné d'man temps au run d'êt' siez té;
et, toutes mes vailes déhors à touos les vents,
qu'j'ai 'té hors bardgîngni l'travèrs d'la mé.
Di l'enditement don d'chein qu'j'ai fait d'travèrs,
et, à l'amas d'mes fautes, châque preuve ajouôte.
Né m'bliouque pon à portée dé ta pathe dg'ièrs:
ouaithe qué tu m'bliaûme, né m'mithe pon dans ta jouôte.
Né v'chîn ma d'fense: j'ai tréjous fait d'man mus
d'prouver t'n amour louoya et pliein d'vèrtu.

Sonnet 41 dé Shakespeare

Sonnet 41

Tu fais du mêché d'mousse en libèrté
quand j'sis liain d'té, fitchi dans tchique aut' pièche.
La tentâtion veint tréjous souotré té
par cause dé ta bieauté et d'ta jannèche.
Tu'es brave, ch'est en tchi tu'es pouor êt' gângni;
tu'es bé, ch'est en tchi nou té f'tha la carre.
Quand eune femme affliâtre, y'a-t-i' d'femme un fis
tchi la lâqu'thait d'vant d'aver prîns sa part?
Ah mais, tu pouôrras r'nonchi mes parties,
faithe fouah dé ta jannèche et ta bieauté
tchi t'mènent dé travèrs à la foutot'tie
où'est qu'tu oubliêthas ches deux véthités:
ou t'tente atout sa bieauté d'tchi qu'tu'es d'hait;
tu m'trompe atout ta bieauté sans fèrre-pliaie.

Sonnet 60 dé Shakespeare

Sonnet 60

Coumme les louêmes aboulent, lus lanchent sus l'galot,
nos minnutes lus amouochèlent pouor mînniet,
veinnent paque-à-coue lus affliotchi à fliot,
trique-pâssant, tic tac, vèrs not' grande mathée.
La jannèche, à flieur d'l'ochéan lithant,
s'êcaloppe en montant; un co jutchie,
r'est dêtrônée par d's êclyipses en bêclian,
et l'temps passecrit lé présent qu'i' t'baillit.
Lé temps dêpique la jouaie d'nos jannes minnutes
et sa tchéthue ladgie touônne nos belles jaues.
La bieauté d'la natuthe, véthe, i' l'embliûte
et tout chein tch'a grandi tchait souos sa faux.
Tout coumme à l'av'nîn mes vèrsets s'sont grands
assez pouor té louangi en d'pit du temps.

Sonnet 131 dé Shakespeare

Sonnet 131

Tu'es aussi tyrannique sus tan jutcheux
qu'ches braves picangnérêsses pouôrries d'ordgi.
Ch'est en tchi tu sai bein qu'pouor man pouôrre tchoeu
tu'es la pus couôtageuse d'la bijout'tie.
Y'en a tchi t'vaient, dévrai, tchi dithent d'amors
qu'ta fache n'a pon d'chu pouvé tch'enchorchèle.
J'n'ôse nément aviser qu'ches'-là ont tort,
ouaithe qu'à mé-même jé juthe qué tu'es bein belle.
Pouor m'asseûther qu'ch'est vrai, jé l'juthe acouo
mille fais, viyant en té mille chorchéthons
tchi veinnent en têmouongni, à m'tchaie sus l'co.
N'y'a rein pouor mé pus blianc qu'tan nièrmiton.
Tu n'es pon néthe, nan-dgia: tu'es eune niêthole
tchi n'nié pon par ta pé mais ta pathole.

Sonnet 49 d'Shakespeare

Sonnet 49

Entréchîn qu'tu m'sgorne - s'tu t'en vas m'sgorner -
et faiche laie minne en viyant ma laiduthe,
quand tchi qu'tén amour étha cartchulé
san drein compte, ladgi sa dreine m'suthe;
entréchîn qu'tu m'pâsse en m'dêconnaîssant
sans m'èrgarder d'tan yi ensolilyi,
quand tchi qu'l'amour, chutte mathée en r'tchiyant,
étha dêlachi l'rotchi d'mén affit;
entréchîn chu temps-là, jé m'fique ichîn,
en pliaidgant acouo combein p'tit qué j'vaux,
et, atout ma main à mé, j'sis attînt
si trop longtemps j't'ai r'tînt - v'là tout man d'faut.
Tu m'fais ferre-pliaie en r'nonchant man pouôrre corps;
té faithe m'aimer s'sait dé t'aimer à tort.

Sonnet 51 dé Shakespeare

Sonnet 51

M'n amour extchûth'tha man bidet pièrcheux
tchi m'emporte bein douochement quand j'tchitte siez té.
Pouortchi m'prêssi d'aller à pèrte d'ta veue?
Ch'est pouor èrv'nîn qué j'dévthais galoper.
Mais tchille extchûthe qu'i' trouv'tha, man hîngnot,
tchi sembl'ye s'landrer en allant ventre à tèrre?
J'ai à l'cachi, ouaithe qué j'scodde en scouâlot,
sîlyant lé ciel sans janmais r'mèrtchi dg'ièrre.
Lé pus parfait amour a grée man d'si:
n'y'a pon dé j'va tchi pâsse lé d'si tchi vole.
J'y vol'lai sus man d'si êtchèrfroutchi -
m'n amour tout coumme extchûth'tha ma quédole:
depis qu'i' s'êlouongnit d'té à la naque,
j'èrcouôrrai siez té, en dithant qu'i' s'paque.

Sonnet 18 d'Shakespeare

Sonnet 18

J'dithais qu'un jour d'Êté lit dans ta fache,
mais tu'es pus balanchi et bein pus bé.
V'là les flieurs du mais d'Mai qu'les vents égdachent,
coumme nou s'en va trilyi l'contrat d'l'Êté.
Parfais l'èrgard du solé nos embliûte
et souvent sén yi êcliaithant veint couèrt,
et châque bieauté d'un bieau but, véthe, dêroute
mais qu'la mathée d'Natuthe la couothe à tèrre.
Mais t'n Êté êtèrnel n'étha pon d'tchête:
ta bieauté reste tréjous à l'embelli.
La Mort n'en craqu'tha pon qu'tu'es souos la bliête,
quandi qu'tu pouss'sas dans ma poésie.
Lé monde vivthont et vèrront, entrétant
qué t'n or lithe ichîn d'dans en nièr et blianc.

• Acouo eune vèrsion Jèrriaise: Es-tu, ma belle, coumme eune journée d'Êté!

Sonnet 78 d'Shakespeare

Sonnet 78

Ouaithe qué j't'aie êmoûtchi pouor m'înspither,
et r'chu t'n înspithâtion dans chein qu'j'êcris,
ch'est auve d'aut's langues étout qu'tu veins pâler
et t'êtrueûler sus un scrit êtrangi.
Tan r'gard a fait des muets à chanter haut,
et ma b'sante huthe à fliotter jusqu'ès cieux,
a êcrit ès nouages auve des plieunmes d'ouaîsieaux,
et fait l'pus haut jutchi deux fais grâcieux.
Mais chein qu'tu'amende lé mus, ch'est ma poésie
tch'est dêcrannetée horte l'esprit qué tu'înspithe.
Les vèrsets d'aut's plieunmes sont raîque appouaintchis;
tu'apprends à chu boucranneux d'bein êcrithe.
Sai tout chein qué j'sai: dans tchique avolée
ma cranne viède s'sa remplyie pouor tan musée.

Où'est qu'la bourde chuche, j'chuche étout - Where the bee sucks, there suck I

D' "La Tempête" dé William Shakespeare (vèrsion Jèrriaise 2016):

Où'est qu'la bourde chuche, j'chuche étout:
couochi dans du jaune coucou;
J'm'y couoche quand lé cahouain crie.
j'vole sus l'dos d'eune caûque-souothis
souotré l'Êté bein heutheux.
Bein heutheux, bein heutheux j'vivthai achteu
souos la branque flieuthie d'un bouais bein ombreux.

Sonnet 90 dé Shakespeare

Sonnet 90

Si tu'as eune hie contre mé, ai-la achteu;
achteu qu'lé monde est d'hait dé m'contrathier,
dé m'envyer en malforteune, en dêcreu,
mais quand j's'sai hors du ji, n'veins pon m'taper.
N'veins d'aut', un co qu'man tchoeu a seu ch't aigrîn,
t'èrjouaindre à l'assaut d'un enn'mîn dêchu,
n'tâsse pon eune dêtchèrque sus lé d'luge à v'nîn,
à seule fîn d'èrbattre lé chein qu'tu'as battu.
S'tu veurs m'lâtchi, assa, né m'tchitte pon l'drein
auprès ches vengeances tchi tchaient ieune par ieune;
mais tape lé preunmyi, qu'man rabat sait pliein
au c'menchement du piéthe dé ma malforteune.
Et tout chein tch'est du ma, tch'achteu m'fait ma,
compathé d'auve té, né s'sa d'aut' du r'ta.

Sonnet 95 d'Shakespeare

Sonnet 95 d'Shakespeare

Tu radouochis et embellis la honte,
chutte carpéleuse dans la rose dé senteu
tchi gruge la bieauté d'ta r'nommée tchi monte:
tes mêfaits sont muchis souos ta douocheu.
Chutte langue tchi raconte l'histouaithe dé ta vie,
t'êcliandre atout des contes d'tan rêvillon,
né t'nièrchit pon, mais pus à co t'blianchit:
ch'est qu'nou n'crait rein d'mauvais entouor tan nom.
Oh tchi caûminne qué tu'as pouor y caûtchi,
tan corps tch'atchil'ye des vices dé toute manniéthe!
Lé vouaile d'la bieauté tout r'graie dêtatchi
à l'avant, sans vaie la nièrcheu driéthe.
Mais mêfie-té, man tchoeu, s'lon ch't apèrton:
lé pus dû couté, mal cout'lé, veint tron.

Sonnet 115 dé Shakespeare

Sonnet 115

Chein qu'j'ai êcrit d'vant est raîque des menneties;
véthe, quand j'di qu'jé n'pouvais pon t'aimer mus,
ch'est en tchi jé n'comprannais pon pouortchi
qu'man radgîn veindrait à brûler pus dû.
Mais l'Temps mèrtcheux, dé tchi l'million d'trébus
lus sîl'yent ès sèrments, changent les actes des rouais,
taqu'tent lé pus bé, êtourdissent l'entends-tu,
dêroutent la têtouongnise hors dé sa vaie...
Mais las, pouortchi don, d'peux d'la m'niche du Temps,
que jé n'dithais pon, "J't'aime lé mus achteu!" -
un âne en têtouongnise et ânionnant,
pouor loûser chein qu'j'ai, lâtchi chein qu'j'ai ieu?
Né v'chîn l'adgèvement: l'Amour est un p'tchiot;
faut laîssi craît' chein tch'êcaloppe acouo.

Vèrsion Jèrriaise dé Geraint Jennings

Sonnet 120 d'Shakespeare

Sonnet 120

Dépis qu'tu m'trisonnis, achteu j'sis mus
et à r'tou, d'chutte peine tchi m'avait pitchi,
j'ai deu m'baîssi souos chein tchi m'martèle dû,
même si mes muscl'yes 'taient forgis en acyi.
Car si tu fus êcouochi par m'n aigrîn,
coumme tan cro m'grînmit, tu'as 'té en enfé,
et, sus man trône, jé n'sgornais pon un brîn
d'souôb'ser combein laid qu'tu m'as vilanné.
Not' niétchie d'hèrtchîn reste dans mén esprit
pouor ramembrer nouos deux tréjous en deu
par nos entr'-onguenner san tchoeu meûthi
atout chutte néthe mînséthe dé tchi qu'nou meut.
La rente qué tu m'dai, j'en r'chévthai l'rembours;
m'n amour pouor tan r'gret, man r'gret pouor t'n amour.

William Shakespeare
Vèrsion Jèrriaise dé Geraint Jennings

Sonnet 110 d'Shakespeare

Sonnet 110

Hélas, j'ai galvaûdé, véthe, chîn' et là:
ch'est-i' qu'au veu d'tout l'monde j'ai bein joué l'fo!
Vendant man trésor pouor un prix d'foustras,
et contré mes dreins anmîns faîthant dro.
Ch'est bein vrai qu'j'ai dgîngni la véthité
en bêclian, mais ches clyîns - j'juthe par les cieux -
ches ilyies attriotchîtent un aut' hardé
et rajannîtent man tchoeu pouor té, man tchoeu.
Né v'là tout ag'vé, sénon chein tch'enduthe.
Ainchîn j'n'affil'lai d'aut' mén appétit
atout des nouvieautés; chenna j'té juthe,
man vièr anmîn, man dgieu d'amour, m'n affit.
Fai-mé l'beinv'nu dans tes bras - j'veurs qu'tu l'faiche:
man Paradis veint mus quand tu m'embraiche.

William Shakespeare
Vèrsion Jèrriaise dé Geraint Jennings

Sonnet 36 d'Shakespeare

Sonnet 36 d'Shakespeare

Nous deux, j'dai dithe, j'dévthêmes nos d'saccouplier,
ouaithe qué nos amours mathiés saient eunis;
ainchîn ches taques atout tchi qu'j'sis taqu'té,
sans t'n aîgue, à man tout seu j'dai suffâtchi.
Dans nos deux amours y'a raîque un respé;
tout coumme y'a l'dêpiet d'nos deux vies sparties
tchi, ouaithe qu'i' n'change pon dans ch't amour s'n êffet,
nos hale en cache-muche la jouaie d'nos parties.
Jé n'pouôrrai d'aut' t'èrvaie en sociêté;
m'n êtat pitchiabl'ye, véthe, té piqu'thait au vi.
Tu n'pouôrras nitout en publyi m'fêter,
sans ristchi qu'ta r'nommée en sait tatchie.
Mais n'fai pon chenna - j't'aime dé chutte faichon:
tu'es bein aimé et don j'dithais qu'tu'es bouôn.

William Shakespeare
Vèrsion Jèrriaise dé Geraint Jennings
13/5/2016

Sonnet 110 d'Shakespeare

Sonnet 110 d'Shakespeare

Hélas, j'ai galvaûdé, véthe, chîn' et là:
ch'est-i' qu'au veu d'tout l'monde j'ai bein joué l'fo!
Vendant man trésor pouor un prix d'foustras,
et contré mes dreins anmîns faîthant dro.
Ch'est bein vrai qu'j'ai dgîngni la véthité
en bêclian, mais ches clyîns - j'juthe par les cieux -
ches ilyies attriotchîtent un aut' hardé
et rajannîtent man tchoeu pouor té, man tchoeu.
Né v'là tout ag'vé, sénon chein tch'enduthe.
Ainchîn j'n'affil'lai d'aut' mén appétit
atout des nouvieautés; chenna j'té juthe,
man vièr anmîn, man dgieu d'amour, m'n affit.
Fai-mé l'beinv'nu dans tes bras - j'veurs qu'tu l'faiche:
man Paradis veint mus quand tu m'embraiche.

Sonnet 69 d'Shakespeare

Sonnet 69

Quand l'yi du monde t'èrgarde, tu l'êgalue,
et nou n'înmaginne rein pouor t'amender.
Les langues des âmes laminnent toutes chu même tru:
l'anmîn auve l'ennemîn - laminneurs d'ité.
Ainchîn tan d'houors est louangi un amas,
mais ches mêmes langues, dêclientchies à t'louangi,
lus r'touônnent du mauvais bord pouor en faithe fouah,
et vaient acouo pus avant qu'un co dg'yi.
Et pouor la bieauté dé t'n esprit, i' mithent
et la m'suthent à bidgesse sélon t's affits,
épis i' r'bourpent et r'nonchent qué nou t'admithe:
tan touffet d'flieurs est êtouffé d'ortchies.
Tén esprit înfecte tan d'houors mangnifique;
ch'est qu'souos tes jaues flieuthies, tes ortchies piquent.