1955: Une sethée au Portinfé.

 Une sethée au Portinfé.

 

Moussieu l'Editeu,

 

Ou pouvez craithe que quand je r'vint du grand Show d'la Ville, Jeudi au sé, la Merrienne, sans m'donné l'temps d'm'assièthe sûs l'sofa, pour r'posé mes pouôres vieilles gambes, voulit savé plusieurs choses; par exemplye tchèsque avait gâgnit les championnats, si les Juges avaient fait pûs d'bêtises que d'couôtume, et, pour agvé tout, pourtchi que j'tais si rouoge de fache.

 

J'l'y dit pour des championnats qu'dans les boeux, un grand balloque d'anima, tchi dait b'sé bétôt un tonné avait battu tout l'restant. “N'y'a pas d'doute tch'y l'méthitait,” j'ajouotit “mais la drôle de chose est qu'au Show d'la Trin'té et Saint-Martin, y n'put pas seulement faithe rêsérve, et l'championnat fut donné à un boeu d'un an.”

 

“Y n'faut pas allé à un show d'bêtes pour vais du bouonsens dans l'mitan du ring,” ou dit, “mais ach'teu pour les clâsses, tchèsqu'y tait la miyeuthe?”

 

“A man goût,” j'l'y dit, “ch'tait les g'niches de deux ans. Je n'crais pas qu'j'ai veu une miyeu clâsses pour bein d's'années. Y' avait les g'niches r'nouv'llées, étout, épis les viaux d'un an. Mais à prendre yun dans l'autre, n'y'avait pas une fâillyie clâsse, sinon p't'être chein tch'ils apéllent le Senior Progeny, ouèsque n'y'avait qu'trais groupes, hors de bétôt une djaizaine d'entrées. J'fut hardi d's'appointé, car généralement ch'est yunne des miyeu clâsses du jour.”

 

“Et Saint-Ou,” ou d'mandit, “tchesqu'oulle a fait?”

 

“Le Sieur Le Mottée avait deux raides bouonnes bêtes,” j'l'y dit, “mais l'boeu à Harold Le Bro, tch'avait fait l'championnat du Ouest, n'pathaissait pas bein et n'a fait rain. Y n'avait autchune vie, et n'pouvait pas l'faithe agniet, mais sans doute nou le r'vêrra pûs tard, car ch'est un anima d'clâsse.”

 

“Bon,” ou s'fit, “ach'teu, changeant d'sujét. “Y pathait qu' y'a trais candidats pour Juré-Justicier. Tchèsque tu'en pense?”

 

“Chein qu'j'en pense,” j'l'y dit, “ch'est qu'chutte fais, y'étha une mâjorité pour un bouon Jêrriais. J'n'ai pas l'honneu d'connaître chu Brigadgi tch'y s'est mint sûs les rangs, mais j'ai l'idée que l'Collége Electoral qu'menche à en avé plein l'dos d'chais officiers r'tithés, et qu'à l'av'nin y pouôrront résté siez-yeu à plianté des caboches ou méttre des poules à couë.”

 

“Il est bétôt temps,” ou s'fit, “mais ach'teu, des deux autres, tchèsque y veindra?”

 

“J'te dithait la s'maine tchi veint,” j'l'y raiponnit. "Châtchun a un bouon nom Jêrriais, et ch'est au Collége Electoral à décidé. Ch'n'est pas pour dithe que j'n'ai pas fait man chouaix mais j' garde chonna à mé-même.”

 

La Merrienne suggéthit qu'un homme mathié ne d'vait pas avé d'sécrets d'sa femme.

 

“Nan,” j'l'y dit, “pour la seule raison qu'une femme est téllement constituée qu'ou n'a jamais peut, n'peut pas, et n'pouôrra jamais gardé un sécret. N'te mârrie pas, Merrienne, car tu sais qu'ch'est la véthité.”

 

“Si j'me mârriasais toutes les fais qu'tu dis d'pathéilles bêtises, man Ph'lip,” ou s'fit “j'te garantis qu'tu trouv'thais la vie bein duthe, mais pâslant d'autre chose, astu ouï que l'Comité du Housing ont décidé d'résigni après chein tchi s'arrivit dans l'Etats l'autre jour?”

 

“J'en ai ouï de toutes les sortes,” j'l'y dit, “mais rain d'cértain. Si ch'avait tait mé, j'éthais résigni sûs l'coup, mais l'Sieur Gaudin n'tait pas de ch't'idée-là au moment et y s'peut tch'il a décidé d'continué et d'êprouvé ocquo une fais a produithe tchique plian tchi pliaitha à l'opposition. Y pouôrrait réussi, mais j'en doute, car y'en a deustrais dans la Chambre tch'y sont seux d'opposé san Comité, n'importe chein tch'y proposent.”

 

“Si ch'est d'même,” ou dit, “pourtchi pas lûs donné une chance de faithe mûs yeux-mêmes? Y pathaisent craithe tch'y savent tout, ah bein tch'ils êprouvent.”

 

“Même opinion,” ma vieille, j'l'y dit.

 

Ph'lip

1955