1956: Merrienne et san crabaco

 Merrienne et san crabaco.

Ph'lip est d's'appointé.

 

Au Portinfé,

Jeudi-au-sé.

 

Moussieu l'Editeu,

 

Chutte semaine j'ai yeu du troublye et un grand d's'appointment. Ecoutez que j'vos diche.

 

J'n'ai pas besoin d'vos dithe que j'avais toute intention d'allé à la Salle Parouaîsiale Mécredi au sé, car j'm'attendais qu'y éthait un mio d'feu satchi, et surtout j'voulais vais si m'n'amin, le Jack Syvret, d'Saint-Pierre s'sait là et éthait tchiquechose à dithe.

 

Mais malheur: Mardi, pour san soupé, la Merrienne avalit une bouonne maintchi d'un gros crabaco, tchi d'vait p'sé au mains sept à huit livres, avec une assiétée d'beurrées et je n'sais pas combain de tâsses de tais. Par conséquence, dans les trais heuthes la v'la en grande dêtrésse. Ou voulait à toute forche que j'îthais chérchi l'docteu, car ou 'tait seuze que s'y ne v'nait pas vite ou n'pâssait pas la niet.

 

Eh bein, Moussieu, je m'dis, fiche du docteu, et me v'la à-bas vérsé deux bouonnes tchuil'lées d'huile de castor dans un vêrre, épis une dôse d'Eno's, pour vais si chonna l'y f'thait du bein. J'eut une djobbe à la faithe avalé chonna, mais j'réussit quand-même, et dans une heuthe ou d'même la v'la pûs trantchille. J'pensais que ch'tait tout fini, mais nouffé, car Mêcredi ou réstit au liet tout l'jour, et quand vint l'sé oulle avait un mio d'fiévre, et j'n'eut pas l'tchoeu d'la laissi toute seule. Après tout, Moussieu, je n'voudrais pas la pérdre, ma pouôre bouonnefemme, car tchèsqu'y préparth'thait mes r'pas?

 

Comme chonna je n'put pas allé à la réunion, mais j'ai veu plusieurs de m's'amins d'pis, et j'ai une assez bouonne idée de chein tchi s'pâssit. Sûs chu point-là il est bein êvident que d'nos jours la Post, n'ayant autchune compétition, fait comme ou veur, mais si y'avait tait y'a tchiques années, quand l'Morning News arrivait d'bouonne heuthe touos les matins ch'éthait tait une difféthente affaithe, et j'éthions yeu un long rapport sûs la Post agniet.

 

Au sujét d'l'assembliée y faut qu'je sais un mio r'gardant, car j'en ai ouï d'pûs d'une sorte, et y faut s'mêfié de chein qu'nou ouait. Mais la s'maine tchi veint, quand j'en séthai pûs long, j'éspèthe de pouvé vos donné une idée de chein tchi s'pâsse à Saint-Ou chais jours. Pour des années la pâraisse a tait trantchille, et nou qu'menchait à pensé que la piûpart des gens 'taient endormis. Nou se rasouv'ne des bouons viers temps du Louothi et d'la Rose, et des bouons Jêrriais tch'y 'taient tréjous prêts à s'méttre en êléction et t'chi n'avaient pas peux de dêpensé tchiques sous pour accaté chein tchi tait à vendre.

 

Mais ach'teu y nos semblye à la Merrienne et mé qu'après tout Saint-Ou n'est pas mort. Sans doute y'a ocquo d'la maladie, mais y'a des signes étout qu'les malades qu'menchent à se r'faithe, et qu'yun d'chais biaux jours y r'mett'ront en route. Tant pûs vite tant mûs!

 

R'venant à l'assembliée nous entend que deux ou trais des r'présentants des vieilles familles fîtes preuve tch'y sont capablyes de faithe de bouons discours, et j'trouvons chonna bein encouothageant, car l'année tchi veint y'étha d's'êlections, et nou voudrait vais un mio d'rêmuage. Y'a une rumeur que l'Jack Syvret a idée de v'nin d'meuthé à la Ville-au-Bas, et j'éspethons, la bouonnefemme et mé, qu'ch'est vrai, car au mains y nos rêvill'yait et y'pouôrrait même prendre pour Député. Dans l's'Etats, bein seux tch'y n'accordethait pas souvent avec la mâjorité, mais chonna n'la jamais dêcouothagi, comme y savent à Saint-Pierre, et nou peut s'fié tch'y n'chang'gea pas. Deus-trais comme l'y dans la Chambre f'thaient grand bein.

 

Ph'lip.

1956