1956: Lé labouôrage d'ach't'heu contre lé labouôrage du temps pâssé

 L'Assembliée d'Jèrriais

Rêunion mensuelle.

 

La rêunion mensuelle - qu'avait 'té èrminse à cause du temps - eut lieu, enfin, Vendrédi au sé, le 9 dé Mars, dans la Salle Parouaîssiale dé St. Ouen, minse à not' disposition par la bouanté du Connêtablye, Moussieu F. Le Boutillier, qui r'chut des r'mèrciements au tout c'menchement d'la sérée, dé la part du Sieur Chs. Billot (Président). I'y avait 150 personnes dé présents.

 

Felicitations.

 

Lé Sieur Frank Le Maistre fut félicité, par raison dé s'n appointement pour faire des r'chèrches importantes dans not' langue Jèrriaise, et, au nom dé tous les membres, lé Sieur Chs. Billot l'i offrit lus bouans voeux pour lé succès dé touos ses travaux.

 

Nouvieaux membres.

 

Les nouvieaux membres êlus, sont:- Lé Sieur Ph. de Caux et Mme de Caux; Lé Sénateur H. W. Maillard et Mme Maillard; Lé Sieur Albert Rouillé et Mme Gladys Rouillé; Lé Sieur F. T. Avrill et Mme Doris Avrill; Lé Sieur A. P. Ahier; Mme S. Badier; Lé Sieur Arthur Quérée et Mme Mabel Quérée; Lé Sieur Arthur Cronshaw; Mme Ching; Lé Sieur W. J. Pirouet; Mme Kennedy; Lé Sieur Edgar Benest; Chent'nyi J. J. Le Cornu et Mme Le Cornu; Lé Sieur Keith Le Brun; Chent'nyi Edward Vautier; Lé Sieur George Baudains; Mme Gertrude R. Le Quesne et Mlle P. Robert.

 

Les affaires finies, lé Sieur G. W. Bertram montrit, auve son Ciné, les portraits prins en Normandie, quand tchiq' membres dé l'Assembliée y fûtent, l'année pâssée. L'audience trouvit les veues hardi intérêssantes, et montrit s'n appréciation par des appliaûdissements.

 

Lé Dêbat.

 

Ensuite suivit lé dêbat. Lé sujet chouaisi fut: “Lé labouôrage d'ach't'heu contre lé labouôrage du temps pâssé.”

 

Lé Sénateur J. J. Le Marquand et l'Chent'nyi T. G. Billot souôt'naient qué l'fèrmage d'àch'theu vaut hardi mus du point d'veue d'l'homme, des animaux et d'la tèrre. L'êffet du changement modèrne fait, qué ch'est mains pénibl'ye qu'aut'fais sus touos les sens, et la scienche a produit eune agritchulture supérieure et pus êcliairie. Lé Sénateu Le Marquand érait peu pâler pour longtemps, tant qu'il avait d'bouans points à supporter lé fèrmage dé nos jours.

 

Lé Sénateu F. J. Dorey et l'Sieur J. N. Richard t'naient d'laut' bord et dîtent comme tchi qu'les r'coltes 'taient l'doubl'ye aut'fais dé ch' qu'i' sont à'cht'heu, à cause du manque dé garder les compôts; dé la vitesse du travâs auve toute chutte fichue machin'nie à la pliaiche des j'vaux; des pouaîsons mînses dans la tèrre, et d'la pièrcheûsité des gens. Tch'est don qu'les vièrs diraient s'il allaient r'véner et viyaient un îndividu, tout seu, jutchi sus un tracteur à touônner un clios? I' dîtent étout qué les siens qui gardent occouo les compôts au jour d'anniet sont d'bein miyeu fèrmièrs qué l's'autres qui n'ont pon grand' graisse pour lus tèrres, et qui portent eune partie d'lus sous siez les marchands.

 

J'eut d'fanmeux discours, du sérieux et d'la rîselée, et pis cèrtains dé d'dans l'audience les l'vîtent et donnîtent lus opinions étout - Mme T. G. Billot en faveur du temps modèrnes, et Mme J. Le Sueur et les Sieurs C. P. Billot, H. Maillard, et W. Le Brun pour lé temps pâssé. L'affaire fut mînse ès vouaix et l'fèrmage du temps pâssé en remportit. Lé Sénateur Le Marquand eut la dèrnié parole quand il annoncit qué tout ch'qu'il avait dit 'tait d'tchi înventé, car il 'tait cèrtainement pour lé labouôrage du temps pâssé li-même!

 

Les gens en fûtent hardi amusés.

 

Comme divertissement i'y eut eune chanson en costume par le Sieur Edgar Benest et Mme Violet Holmes - “Ma Cigarette”, par Elie.

 

Raffraîchissements.

 

Ensuite i'y eut des raffraîchissement pour tout l'monde, auve du café, grâce à la générôsité dé Mme J. A'Court et Mme F. Le Boutillier et toutes les aut' dames dé St. Ouen, qui nos servîtent libéralement dé bouannes gâches, et mèrvelles et autres.

 

A la fin d'la Rêunion, le Sieur Chs. Billot offrit des r'mèrciements à touos l's ammins qu'avaient prins part, sus un sens ou l'aûtre, en contribuant au succès d'eune si fanmeuse sérée.

 

1956