1955: Pus d'une sorte

 Pus d'une sorte.

 

J'avons abandonné, la Merrienne et mé, l'idée d'avé une vendue, et j'm'en vais vos dithe pourtchi.

 

Parmi mes p'tits-fils, et y'en a une dgaingue, se trouve le p'tit Ph'lip, un mousse de djais ans, tch'y veint nos vais par bordée quand y crait qu'y'a tchiquechose à mangi et que p't'être y étha moyen d's'en r'allé avec tchiques coppeurs dans sa pouchétte pour du chocolat. La Merrienne dit qu'chu mousse-là est une doleuse du vier choutchet, car quand y peut avé tchiquechose pour rain il est tréjous là. “Y f'tha san qu'min ch't'îla,” oulle ajouôte, “car y tcheint d'san grand-pèthe.”

 

Ach'teu, Moussieu, le v'là tch'arrive en temps pour le tais, Mêcredi arlevée, et bein seux y n'avait pas l'intention de fichi san camp avec le ventre viède. Et jamais ou n'pouvez craithe, Moussieu, tchèsque un garçon de djais ans peut avalé quand y s'y met. Ch'est absolûment incriyablye!

 

Mais, quand j'criyais tch'y s'n'allait nos laissi en r'pos, le v'là tch'y veur savé si ch'est vrai qu'j'allons avé une vendue. J'l'y dit oui, mais que j'n'avions pas ocquo fixé la date.

 

“Tant mûs,” s'fit l'mousse, “car ch'est une bête d'idée que tu'as yeu là, papa. A qu'menchi chein qu'tu'as à vendre ne vaut pas quatre sous, sinon la s'menche, mais y'a pûs qu'chonna. Avous considéthé, vos deux, tchèsque ou vos s'n'alléz faithe quand tout s'sa hors? Avous idée fini siez les P'tites Soeurs ou à l'hôpita, ou tchi?”

 

J'me l'vit et j'happit man bâton. “A la porte!” j'l'y dit, “p'tit insolent. Est-che de même qu'un mousse de djais ans pâsle à san grand-pèthe et sa grand-mèthe? Dehors, ou j'te happe par la pé du co et t' flianque dans l'bel.”

 

Mais, quand y fut hors, Moussieu, j'vit bein que chein tch'il avait dit, avait fait la Merrienne réfliéchi, et pour dithe vrai j'avais qu'menchi à pensé que p't'être le fichu mousse avait raison. Bein bon d'avé une vendue, mais après tchi?

 

J'en avons pâslé d'pis, Moussieu, et comme j'vos l'ai dit en qu'menchant j'avons décidé contre la vendue. Après tout je sommes ocquo bein d'être souos l'fou, et j'pouvons ocquo travaillyi assez pour gardé notre p'tite férme en allant, avec un mio d'aide. Le prospect pour la saison l'année tchi veint est encouothageant, car y pathait qu'en Angliétêrre n'y'étha pas d'patates pour dithe quand veindra l'mais d'Mai, épis nou m'a dit qu'au r'nouvé étout y'étha pûs de d'mande pour les bêtes.

 

“Ch'est vrai assez,” s'fait la Merrienne; “ch'n'est pas l'moment d'abandonné. En autchun cas nou n'peut pas avé une vendue sans hardi d'couôtage, et je f'thons mûs d'gardé les sous tchi nos restent pour le temps. Ach'teu, Ph'lip, je vais que l's'Etats sont pour siégi Lundi. As-tu autchune idée tchèsqu'y s'en vont faithe?”

 

“Pas pûs qu'té, ma pouore fille,” j'l'y dit, “mais nou n'craithais pas tch'y pouôrraient siégi tout l'jour sans faithe au mains tchique petite chose. Y'a une liste de sujets longue comme le bras, mais chonna n'dit rain.”

 

“Est-che vrai chein qu'nou m'dit hier,” ou d'mandit, “tch'y s'en vont mettre notre Député sûs tchique comité. Il est bétôt temps, absolûment!”

 

“Tu'as raison, Merrienne,” j'l'y dit, “ch'est une disgrace que Saint-Ou, la miyeu pâraisse de l'ile d'un biau but, n'est pas r'présenté par san Député sûs un seul comité. Y semblye tch'ils font d'exprès.”

 

“Nou vêrra,” ou s'fit. “Ach'teu est'che vrai tch'ils ont trouvé l'homme pour Avocat-Général?”

 

“Oui,” j'l'y dit, “ou au mains y'a un applitchant tch'est justement l'homme pour la djobbe, et j'comprends qu'nous apprendra des nouvelles au pûs tôt. Ch'est l'Avocat L'Mâsuthi, un bouon Jêrriais, bein capablye, et un charmant corps.”

 

La Merrienne se l'vit et s'en fut à l'armouaithe. “Faut bèthe un lérmin à sa santé,” ou dit.

 

Ph'lip.

1955