1954: Et les choses

 Et les choses.

Merrienne s'est r'faite.

 

Moussieu l'Editeu,

 

La s'maine passée j'avais dit à la Merrienne que j'm'en allais es shows, et que je n'l'y d'mand' dais pas sa pèrmission. Ou savès, Moussieu, qu'y'a des temps dans la vie qu'un homme mathié est forchi d'méttre san pid bas, et la Merrienne m'avait fait mârri en m'dîsant que je n'tais pas intélligent. Alors, sachant qu'ou tait prèsque seuze de faithe du brit si j'mentionais les shows, j'print l'bœu par ses cornes, comme nou dit, en angliais, et j'l'y dit, tout net et cârré, que j'n'en manq'thais pas yun, et qu'si chonna n'l'y pliaisait pon ou pouvait allé s'faithe quatorze.

 

Savous bein, Moussieu, qu'ou fut si surprinse qu'on s'en fut s'couochi sans dithe un mot, et que l'préchain matin ou n'savait pas tchi m'faithe. Pûs qu'chonna, ou n'a pas gronné quand j's'y r'venu un mio tard pour le tais, et mithaclye des mithacles, hier au sé, me d'mandit si j'avais veu d'bouonnes bêtes dans tchiques pâraisses. Au lieu de m'dithe de m'taithe le moment que j'mentionnais tchique biau viaud d'un an, ou tchique belle g'niche r'nouv'lée, ou m'encouothagit à l'y raconté toute l'histouaithe, et ou qu'menchi par demandé si l'show des Trais Pâraisses avait tait, comme d'amors, yun des miyeurs.

 

“Eh bein, oui assez, Merrienne,” j'l'y dit, “mais, pour mé, l's'affaithes vont mal quand Saint-Ou n'remporte pas l'championnat. Ch'tait Saint-Pièrre tch'il fit, et v'la tchi n'me fit pas pliaisi. J'n'ai rain conre les Saint-Piêrrais, et certainement j'n'ai rain contre le Sieur Le Ruez, tch'y montrit la vaque du jour, mais, après tout, y m'semblye que ch'n'est pas juste.”

 

“Nan,” ou dit, “ch'est vrai, mais enfin nou n'peut pas tréjous gâgni, et sans doute che s'sa une difféthente histouaithe l'année tchi veint. Ach'teu tchèsqu'y y'avait à Saint-Louothains?”

 

“Un raide bouon Show,” j'l'y dit. “Y'avait une raide clâsse de g'niches r'nouv'lées à Saint-Louothains et d'belles jeunes vaques à Saint-Jean. Le Sieur de Saint-Paër eut un grand jour, et sa vaque ne fut battue qu'une fais. Ch'tait pour le championnat du show, quand la vaque au Sieur Bathétte, tchi tait v'nue deuxième dans la clâsse en remportit. Ch'tait une affaithe de chouaix.”

 

“Ach'teu, à Saint-Martin ? J'ai tréjous oui qu'y'a tchiquechose d'éxtra là touos l's'ans. Le show tait-t'y à tan goût?”

“Oui djà!” j'l'y dit. “Sans prétendre que j'n'ai jamais veu miyeu, y'avait d'la qualité partout, et chein tchi m'fit pliaisi ch'tait d'vais les Juges donné l'championnat à une vieille vaque et tu sais Merrienne, quand une vaque arrive à l'âge de huit ans, et peut ocquo faithe un championnat, y faut dithe qu'ou n'est pas quédolle. Chette chin, au Sieur Dolbel des P'tits Canons, à la Trinité amende en vieillissant. Y'a des femmes de-même étout, mais y faut adméttre tch'y sont rares.”

 

“Et tchèsque tu veur dithe par chonna, Ph'lip?” ou d'mandit d'une vouaix sèque.

 

“Rain du tout, ma chièthe,” j'l'y dit, “ch'n'est qu'une bête d'idée tchi m'est v'nue dans la tête. Ne t'mârrie pas. Pour en fini, le Sieur Rondel eut une raide jour, car y s'en r'fut siez-l'y avec trais coupes tch'y peut gardé pour bouon. Ch'est une chose qu'nou n'avait jamais veu d'vant assez heutheusement, car ach'teu y faudra les rempliéchi, et d'nos jours nou n'accate pas d'patheilles coupes pour quatre sous.”

 

“Oh, n'te gène pas, man Ph'lip,” ou dit, “y'a ocquo tchiques richards à la Trin'té et à Saint-Martin, épis y'a tréjous tchiques marchands, ou même tchique Sénateur ou Député pour v'nin à l'aide des Sociêtés Agricoles. Y reste Saint-Brelade.”

 

“Eh bein,” j'l'y dit, “je n' peux pas dithe que je n'fut pas un mio d's'apointé à Saint-Brelade, car les vaques n'étaient pas, comme nous en a veu, mais y'a d's années d'même. Avec chonna, nou mantchait plusieurs des exhibiteurs d'aut'fais, et ch'tait r'gréttablye.”

 

“Enfin, ou dit, “j'pense bein qu'y'a bouonne éspethance d'un bouon show à Springfield pûs tard ?”

 

“Oh, damme vèthe,” j'l'y dit.“Sûs, chonna tu peux t'fié. Y'étha tchiquechose dans toutes les
 clâsses tchi vaudra la peine de vais.”

 

Ph'lip.

1954