1955: La résignation du comité

 La résignation du comité.

Merrienne pose des Tchestchons.

 

Moussieu l'Editeu,

 

Quand j'm l'vit Jeudi matin j'vit que l'vent avait abattu trais d'mes viers pommiers. J'rentrit pour le dithe à la Merrienne.

 

“Ch'est dommage pour le Mûsé d'Boeu,” ou dit, “car y n'en reste pas hardi en Jêrri. Quant au p'tit Rom'thi, y'en étha ocquo assez pour faithe un mio d'nier-beûrre, mais je r'grétte que l'Nier Binet est bas, car ch'est une bouonne pomme pour du pâté. Enfin, y faut craithe que ch'est tout pour le mûs, car tu pouôrras t'mettre à scié du bouais. Y m'faudra des fagots et des chouques ch't'hivé, et n'y'a pas miyeu pour brûlé que l'bouais d'pommyi. Tu n'as pas grand'chose à faithe chais jours et tu f'thas mûs de qu'menchi d'main, si l'temps est assez bé.”

 

Et don, Moussieu, j'm'y mint hier matin avec man sérpé, et j'fit une bouonne doûzaine de fagots dans ma matinée, mais quand, après dîné je d'mandit à la bouonnefemme de v'nin hallé sûs l'couôné j'vit bein, au bout d'un quart-d'heure qu'ou n'en pouvait pû, et j'le renvyit à sa tchuîsine. La couôné, pour vos dithe, n'avait pas tant aduchi pour tchiques années et y fallait d'la forche pour le faithe fonctionné.

 

Quand vint l'sé je m'trouvais bein lâssé, et j'éthais voulu résté trantchillye dans ma grand'chaise aupi du feu, mais la Merrienne n'était pas de ch't'idée-là. La v'là tch'y veur savé pourtchi que l'Comité d'la Santé Publique avait résigni Lundi arlevée. Ou trouvait chonna bein drôle. “Après tout,” ou s'fit, “il est vrai que l'Comité avaient fait une bêtise, mais si toutes les fais qu'un Comité d's'Etats fait patheille chose, ils abandonnaient l'affaithe, y n'en restethai pas hardi dans p'tit d'temps. Nou n'lûs avait pas d'mandé d'résigni, et j's'sy bein seuze que si l'Cyril Le Mérquand avait accépté la situâtion et n'avait dit rain, l's'Etats n'éthaient pas mint san comité à porte.”

 

“Sans doute tu'as raison, ma vieille,” j'l'y dit, “mais l'Cyril n'est pas un Mérquand pour rain, ch'est-à-dithe il est aussi têtoigne comme s'il avait tait né à la Ville-au-Bas ou ès Landes. A ma veue y n'y'éthait pas yeu tout chu troublye si l'Président du Comité, le Frainque Le Tchèsne avait tait là, comme il éthait deu y'être. Dans s'n'absence ch'tait l'Cyril tch'avait la résponsabilité de d'fendre l'action du Comité, et franchement y n'tait pas l'homme pour la djobbe, car y n'a autchun tacte, et comme diplomat il est au bas d'la clâsse. Quand y s'vit battu, il éthait deu accépté la situâtion, mais, malheutheusement y s'mârrit et don ach'teu j'avons un nouviau comité, avec le Député Farley à la tête. Y faut tch'il aie du couothage, chu gâs-là, car sans autchune doute il a entreprint une sale djobbe.”

 

“Je l'craithais,” ou dit, “mais ach'teu, Ph'lip, quantchi qu'nous ichin à Saint-Ou j'allons vais nos êgouts mints en ordre, viyant que touos l's'ans j'péyons notre share des frais?”

 

“Ah, Merrienne,” j'l'y dit, “tu me d'mande une tchéstchon-la que je n'peux pas raipondre, mais tu peut t'faithe seuze que ch'ne s'sa pas dans notre temps, et probablyement pas dans l'temps d'nos fils et nos fillyes. Par chein qu'nou peut en vais, je s'sons tous dans l'chim-tièthe longtemps d'vant que chutte maudite entreprinse aie veu sa fin. Mais y faudra tréjous péyi quand-même.”

 

La Merrienne fit une grimache. “Si ch'est d'même,” ou dit, “'n'y'a rain à faithe, mais pâslant d'aut'chose, Ph'lip, quantchi qu'notre Député s'en va être êlu sûs tchique comité?”

 

“Une autre tchéstchon que je n'peux pas raipondre,” j'l'y dit, “car quand y fut propôsé pour une vacance Lundi le Baillyi décidit tch'y tait temps qu'les membres s'en îthaient siez-yeux pour bèthe une tâsse de tais avec lûs femmes, et n'y'eut rain d'fait.”

 

“Ch'est honteux,” ou s'fit.

 

“Vèthe,” j'm'accordit, “mais tchi faithe?”

 

Ph'lip.

1955