1959: Le Chantgni et la charmante fille.

 Le Chantgni et la charmante fille.

 

Moussieu l'Editeu,

 

Je n'sais vraiement pas tchèsque la Merrienne avait quand ou s'mint dans la tête de vos êcrithe la s'maine pâssée, et je n'l'ai pas ocquo pardonnée pour avé suggéthé que j'avais attrapé un coup d'solé dans la bârre au Show d'la Ville. Il est vrai que j'trouvit deus-trais d'mes viers amins là, mais ch'n'est pas yun ou deux p'tits vêrres tchi s'en vont faithe le Ph'lip du Portinfé crôlé sûs ses gambes. Ch'est oublié pour ach'teu, Moussieu, mais attendez qu'ou veinne se pliaindre de tchique ma tchiquebord et j'l'y dêmontrethai qu'une femme tch'a un mio d'avis n'dév'thait pas s'fichi d'san bouonhomme quand y n'se trouve pas trop raide.

 

Hieu au sé, Moussieu, quand oulle eut fini d'lièthe la gâzétte, ou l'a fliantchit dans l'graie. J'la ramâssit et j'vit bein vite l'articlye tchi l'avait minse en colèthe et y faut dithe que quand j'l'eut liut à man tou, j'éthais 'tait content d'capuchi la Post sûs l'haut d'la tête avec ma chouque.

 

1959: La Bataille, et l'rât à Saint-Louothains

 La Bataille, et l'rât à Saint-Louothains.

Ph'lip s'en va ès Courses.

 

Moussieu l'Editeu,

 

Nânin, Moussieu, j'n'y fûmes pas, ni la Merrienne ni mé, à la Bataille de Flieurs. J'en avions pâslé, mais j'tiomes touos les deux d'la même opinion, que j'sommes trop viers pour de patheilles exercusions. Ch'tait bein bouon y'a trente ou quarante ans, mais ach'teu je sommes bein lien d'être aussi solides comme dans chais temps-là. Chéstentchi, la Merrienne ayant dit que d'nos jours la Bataille est pour les vîsiteurs, je m'y'accordit, et don j'restîmes siez nous, la bouonnefemme à gardiné, et mé à m'prom'né ichin et là dans l'vaisiné. Mais, Moussieu, ch'n'est pas comme aut'fais, car dans toute ma touônée j'n'eut pas une seule fais à bèthe, pas même un vêrre de cidre.

 

J'dév'thais vos dithe que la Merrienne n'approuve pas du tout de l'introduction de chais Suisses et Italiens dans la Bataille, étout ou dit que y'a hardi trop d'couôtage pour chein qu'chonna vaut. “Le Comité ont yeu toutes les chances,” ou s'fit, “si n'y'avait pas grand solé, y n'y'avait pas d'achies, comme le jour de d'vant. Y m'semble que l'Comité a fait un accord ôv la Providence, et pourtant y'a des gens d'sûs tch'y vont s'prom'né au Dimanche, et tch'y n'vont jamais à l'églyîse ou chapélle sinon pour un bâptême ou un entêrrement. Peux-tu m'explitchi chonna, Ph'lip?”

 

1951: “Je t'l'avais dit!”

 “Je t'l'avais dit!”

Ph'lip en dêtresse.

 

Moussieu l'Editeu,

 

Ch'est une triste histouaithe que j'ai à vos raconté chutte semaine.

 

Ou vos r'souveindrez qu'la s'maine passée, j'vos avais dit que comme de couôtume j'avais idée d'allé à touos les shows et qu'j'avions yeu deustraits mots, la Merrienne et mé sûs chu compte-là. Eh ben, après l'Vendredi au sé, l'affaithe tait fichue. Ecoutez que j'vos raconte.

 

Le Vendredi matin je m'prépathit pour m'en allé à Sainte-Mathie vais l'show des boeus des Trais Pâraisses. La Merrienne ne dit pas un mot en dêjeunant, et che n'fut que quand j'fut prêt, et que j'l'y dit à bétôt, qu'ou m'addréssit.

 

1957: Ph'lip et Merrienne

 Ph'lip et Merrienne

 

Au Portinfé,

Jeudi au sé.

 

Moussieu l'Editeu,

 

J'ai grand r'grét d'avé à vos dithe que j'sommes en brit, la Merrienne et mé, au sujét d'la Visite Royale.

 

Ch'tait hier au sé que l'affaithe qu'menchit. J'avions bu l'tais, et comme de couôtume j'avais aidgi à lavé la vaissélle, une djobbe que j'n'aime pas, quand assîse dans sa grand'tchaise, ou m'annoncit que j'éthais à allé en ville agniet.

 

“En ville …” je m'fit, “et pourtchi chonna?”

 

“Parsque,” ou dit, “avec le ma qu'j'ai dans ma gambe gauche je n'peux pas y'allé mé-même, et j'ai besoin de plusieurs choses pour la s'maine tchi veint.”

 

“Et tchèsqu'y sont chais plusieurs choses?” je d'mandit, “et pourtchi allé en ville? Y m'semblye que y'a ocquo tchiques boutiques à Saint-Ou.”

 

“P't'être bein, mais y n'peuvent pas m'faithe,” ou dit. “A qu'menchi, y faut qu'tu'aille siez Gruchy ou Vouaisin m'accaté deux pathes de cauches en souaie.”

 

1957: Merrienne est dêgoûtée

 Merrienne est dêgoûtée.

 

Moussieu l'Editeu,

 

J'ai 'tait bein amûsé chutte semaine par les r'mérques de la Merrienne au sujet d'chais jeunes filles tch'y sont en compétition pour l'honneur d'être la Miss Jersey le jour de la Bataille de Flieurs. La bouonnefemme n'en crait pas grand'chose de chais hardélles-là.

 

“Y dév'thaient avé grand honte,” ou s'fit hier au sé, ayant veu les portraits sûs la gâzette.

 

“Vraiement, Ph'lip, je n'comprends pas comment tch'ils ont l'toupé et l'audace de lûs expôsé en d'vant du publyic de la sorte. Epis r'garde les grimaches tch'y font, et les teurs. Dans man temps nou lûs éthait donné une bouonne pitchine et deux ou trais jours sûs du pain et d'l'iau.”

 

1957: Merrienne et san lavage

 Merrienne et san lavage

Ep[i]s l'Nouviau Président.

 

Moussieu l'Editeu,

 

La pouôre Merrienne est bétôt au m'séspé, car, le temps est si mucre, jour après jour, qu'ou n'peut pas faithe san lavage, et y'en a une pile ach'teu dans la lav'thie tchi rempliethait un hérnais-à-l'êclon. J'y'ai dit qu'oulle étha à avé d'l'aide, mais ou n'veur pas, car ou maintchein que l'travas ne s'sa pas bein fait s'ou n'le fait pas y-même, et p't'être qu'oulle a raison, car la dérnié fais qu'oulle emplîyit une vieille Bretonne, j'n'avais pas une quéminse tchi n'tait pas présque en télle, et quant ès cotillons à la bouonnefemme, ch'tait ocquo pièthe. Ou dit que si l'temps continue ou d'mand'da au Recteur, quand il étha fini d'prié pour la Famille Royale, d'ajouôté tchiques mots pour une semaine de temps sec.

 

Mais au sé, quand oulle est à se r'pôsé dans sa grand'tchaise, ou se r'met à pâslé d's'Etats et des drôles de choses tch'y font d'nos jours dans l'Assembliée. Hier, par exemplye, ou voulit savé pourtchi que l'Comité du Tourisme avaient donné lûs dêmission, et tchèsque le Sénateur Rumfitt avait fait pour avé tait mint à la porte.

 

1954: Ph'lip et Merrienne

 Ph'lip et Merrienne

 

Moussieu l'Editeu,

 

“ Eh bein, Ph'lip,” s'fit la Merrienne Mêcredi au sé, “ ne v'la l'biau temps à la fin. Trais biaux jours de suite, et pourtant j'en avais hardi tch'y disaient que j'éthions l'êté l'année tchi vient.”

 

“ Ma fé, Merrienne,” j'l'y dit, “ nou qu'menchait à l'craithe. Mais nous est content d'vais un mio d'solé chais jours, quand ch'ne s'sait qu'pour à cause des visiteurs, tch'y n'avaient pas veu hardi d'biau temps jusque ichin.”

 

“ Oh, les vîsiteurs,” ou dit. “ Quant à mé, je s'sais contente de savé qu'toute la dgaingue avaient fichi l'camp de ouesque y v'naient.”

 

1962: Merrienne et un Chantgnyi

 Merrienne et un Chantgnyi

Ph'lip et une députâtion

 

à Portinfé,

Saint Ou.

 

Moussieu l'Editeu,

 

“Une drôle d'histouaithe,” s'fit la Merrienne, quand oulle avait veu dans la “Post” l'aventuthe d'un Chantgnyi d'la Ville, tch'avait arrêté deux ou trais Français tch'avaient tâchi de s'êvader. “Quant à me, je n'les bliaume pas, car, sans doute, i' criyaient que ch'tait un êcappé d'l'Asile, n'ayant ocquo jamais veu un Chantgnyi à maintchi nu. Ch'n'est pas notre Chantgnyi Pirouet tchi voudrait expôser sa personne d'la sorte sûs la route publique.”

 

“Mais, Merrienne,” j'li dis, “nou n'peut pas atchûser chu Chantgnyi d'aver 'té a maintchi nu. Il avait des braies.”

 

“Et tchi sorte de braies?” ou d'mandit. “Je n'crais pas tchi li v'naient jusqu'au g'nou. Absolûment, un officyi d'police dév'thait s'respecter un mio pûs qu'chonna. Même té, Ph'lip, quand tu ès dans l'gardîn, tu mets des longues braies - autrement j't'éthais bein vite fait rentrer pour en mettre - et tu n'est pas dans la police, mais un simplye citoyen.”

 

1962: Merrienne et sa nouvelle doctrine

 Merrienne et sa nouvelle doctrine

La Reine d'la Batâlle

 

à Portinfé,

Saint Ou.

 

Moussieu l'Editeu,

 

J'vos ai dit bein des fais que la Merrienne est drôle, mais au moment oulle est pûs drôle que jamais, car ou m'dit qu'ou n'a pas d'ma autchun bord. J'ai d'la peine à l'craithe, Moussieu, mais ou m'certifie que ch'est vrai, et que j'n'ai pas d'ma dans l'dos du tout. Le fait est qu'oulle a 'té persuadée de joindre une sociêté tchi maintchint que tout l'ma et toutes les maladies sont înmaginaithes et que si nou n'crait pas qu'nou n'a ma, nou n'en a pas.

 

“Comme té, avec tan ma dans l'dos.” ou s'faisait hier au sé. “Tout ch'que tu as à faithe ch'est de l'oublier, et i' dispathaîtra sûs l'coup. Mets-té, d'main, à porter des bouq'tées d'ieau à man gardîn, et tu pouôrras continuer tout l'jour sans t'en aperchever.”

 

Eh bein, Moussieu, j'ai fait d'man mûs pour li plièthe, et à matîn, après déjeuné, quand j'éthais voulu m'assièthe dans ma grand'tchaise, allumer ma pipe, et ruminer sûs d's affaithes intérêssantes comme la Police, lé nombre d'imbéciles tchi y'a dans l's Etats, la charmante femme de yun d'nos vaisîns tchi m'fait des souôris en pâssant, et ditet, j'm'en si allé à la pompe, et j'ai tâchi de porter un couplye d'bouq'tées jusqu'au maufait gardîn. Mais, Moussieu, ch'est évident que j'n'ai pas assez êtudié la nouvelle réligion à ma bouonnefemme, car quand j'ai tâchi d'les l'ver, mes bras ont donné et j'ai yeu à dithe à ma femme que man ma dans l'dos n'est pas mûs, mais bein pièthe. Lé tchan a yeu si peux tch'i' s'est enfoui dans l'fond d'sa câsse, car ch'est bein seux tchi n'm'avait jamais ouï se faithe servit patheil language. J'm'en vais en pâsler au Ernest Lé Cornu quand je l'vêrrai, car il a yeu une longue expéthience des femmes, drôles ou autrement, êpis j'voudrais saver si li et les deux autres se sont comportés dans l'Ile de Man. Sans doute, i' n'voudra pas m'dithe toute la véthité.

 

1963: Du feu à Portinfé

 Du feu à Portinfé

Pourtchi qu'la Merrienne rit

 

à Portinfé,

Saint Ou.

 

Jeudi au sé.

 

Moussieu l'Editeu,

 

La preumié chose tchi faut que j'vos diche agniet, ch'est que j'avons 'té bein près, la Merrienne et mé, de nos trouver dans l'chimtièthe dépis que j'vos avais êcrit la s'maine pâssée. J'm'en vais vos explitchi.

 

Pour tchiques années à ch'teu' j'ai yeu l'habitude de fumer une pipée ou deux au liet, d'vant touôner d'bord pour m'endormi. La Merrienne n'en a jamais approuvé de ch't' habitude-là, et m'a dit pûs d'une fais d'me mêfier, car oulle avait peux que j'mettrais feu ès lîncheurs. Mais j'disais trejous que je n'tais pas si bête comme chonna, et j'continuais. Vèthe, mais, Moussieu, samedi au sé, causé sans doute par un êpart d'feu d'ma pipe, nos qu'minsoles, les lîncheurs, et, pièthe de tout, les deux mat'nas prîntent à feu, et j'fûmes bein près, en tâchant d'les dêteindre, d'être suffotchis par la fumée. À la fîn, viyant que n'y avait qu'une chose à faithe, j'ouvris les f'nêtres et fliantchis tout d'hors. Quant tout fut cliait, et que j'avions trouvé d'autres qu'minsoles, j'pus vaie l'ma que l'feu avait causé, mais, comme se faisait la bouonnefemme, ch'éthait peut être pièthe.

 

1947: The letter from Central Africa

 The letter from Central Africa

Merrienne is shocked

 

Moussieu l'Editeu,

 

J'ai deus-trais mots à vos dithe agniet au sujet d'chutte lettre-là tchi nos vint du mitan d'Afrique, et en qu'menchant y faut que j'vos diche que la Merrienne n'tait pas trop contente de vais man nom d'sûs, car oulle insiste, même ach'teu, qu'une femme ne dév'thait pas êcrithe à un homme mathié comme chonna.

 

Mais quand ou vit qu'à la fin d'la lettre la dame me d'mandait d'l'y faithe ben ses compliements, ou d'vint d'miyeuthe humeu', et s'mint à la liéthe. Oulle est ben êdutchie, la bouonnefemme, et à qu'menchi ou n'eut autchune diffitchulté, mais tout d'un coup la v'la tch'y s'met à faithe des grimaches.

 

“Tchêsque-y y'a?” j'l'y d'mande.

 

1948: Merrienne and her petticoats

 Merrienne and her petticoats

Ph'lip says: “Don't take them off yet”

 

Moussieu l'Editeu,

 

“Oh mais, my good, tchi biau temps, s'fit la Merrienne hier matin quand ou sortit dans l'bel pour lavé ses cannes à lait à la pompe. Ch'est comme au mais d'Juîn. Si chonna continue nou pouôrra s'dêfaithe de la maintchi d'ses habits.”

 

“V'la tchi veur dithe,” j'l'y dit, “que tu'as dans l'idée qu'yun d'chais jours y'étha deus-trais cotillions d'pûs dans les titheurs, et deus-trais d'mains sûs ta personne. Eh, ben bouonnefemme, va douoch'ment. Te r'souvains-tu de tan grand'onclye, Amice Le Boutillyi, et de chen tchi y'arrivit sûs ses vièrs jours.”

 

1963: Ph'lip et l's élections

 Ph'lip et l's élections

 

à Portinfé, Saint Ou.

Vendrédi au sé.

 

Moussieu l'Editeu,

 

Comme ou pourrez comprendre je m'trouve embarrassé à ces sé car j'voudrais pâsler des élections pour Sénateurs et pour Députés, mais quant ès Sénateurs i' faut admettre que j'n'en si pûs avanchi que je n'tais la s'maine pâssée. Ch'est ocquo une tchestchion de chînq candidats pour quatre vacances, et des gens que j'ai consulté, nul n'en sait pas pûs long qu'mé. Même la Merrienne, tchi prétend saver tout, est d'opinion que, comme chu bouon Saint Ouënnais, le fameux “J.J.”, n'prend pas, nou pouorrait aussi bein y mettre quatre troux-d'chours. Quand i' pouvait faithe des bêtises tchiquefais, mais au mains i' disait sa pensée et n'avait peux d'personne. Une demié-doûzaine comme li, ou dit, dans la Chambre, et nou vérrait bêtôt des changements.

 

Les chînq qu'ont décidé d'prendre s'en vont aver une chance de donner lûs opinions au publyic, car ils ont tous consenté à pathaître d'vant les électeurs, et d'lûs dithe tchèsqu'i' voudraient faithe dans l's Etats s'ils y trouvaient un siège. La Merrienne dit que nou-s-a veu chonna d'vant, mais qu'eune fais là ils oublient lûs promesses et vont avec l'restant. Quand i' sont à cherchi des vouaix i' promettent le ciel, la lune et l's êtelles, mais actuellement le firmament n'est pas châtchi.

 

1980: Des mémouaithes

 Des mémouaithes

 

Fort Lauderdale,

Florida, USA.

 

Lé 12 dé Janvyi, 1980.

 

Moussieu l'Rédacteu,

 

Vouos r'souv'nous d'la vielle dévinnale “A tchi qu' tu penses quand tu n'penses à rein?” Eh bein, né v'chîn la rêponse: “À t'rêpondre quand tu n'mé dis rein!” Mais quand un Jèrriais est exilé, Jèrri est tréjous dans ses pensées; ch'est en tchi nou n'peut janmais dithe tch'i' n'pense à rein!

 

Ch'est drôle comment qu' nouos pensées r'tchulent au point tchi d'veinnent des mémouaithes, et la veue innattendue d'un objet dans la rue ou dans la télévision vouos rappelle souvent dé tchiquechose dans l'temps pâssé. Par exempl'ye, la veue d'un homme à j'va dans iun d'nouos pars l'aut' jour mé ramémouaithis d'ma preunmié Dînmanche l'arlévée sus les monts d'L'Eta auve Papa quand j'tais mousse.

 

En c'mîn, pas bein liain du Pallion, j'avions rencontré Mess Hubèrt, dé “Little Farm” tchi nouos avait dit tch'i' d'vait y'aver tchique sorte d'fête à l'Hôtel dé L'Eta, car il avait veu un tas d'cârrosses arrêtées là.

 

1976: L'Assembliée d'Jèrriais

 L'Assembliée d'Jèrriais

 

Jeudi, lé 15 dé juillet, les membres du Conmité Dramatique 'taient à l'Aéroport à neuf heuthes et d'mie à rencontrer et faithe la beinv'nue ès tchînze danseurs dé L'Assembliée d'Guernesiais.

 

Auprès eune tâssée d'café i' fûtent siez les membres du conmité qui les acc'modaient pour la niet, et i' rencontrîtent tous à Nièrmont entre 12 heuthes et 12 heuthes 45 pour un pique-nique, qui fut un grand succès. La veue du Portelet, avec toute sa côte et la Tour Janvrîn, et la mé d'eune couleur dé bliu spéciale à Jèrri 'taient eune scêne qué les Dgèrnésiais et les membres du conmité né pouôrront janmais oublier.

 

Chutte pétite compangnie rencontrit les membres dé L'Assembliée près dé la Salle dé St. Pierre à 2 heuthes et d'mie et, montant dans les deux vouaituthes auvec les Dgèrnésiais et Jèrriais bein mêlangis ensembl'ye, i' fûtent pour eune mangnifique touônnée d'campagne, arrêtant à La Pot'tie pour faithe des acats et prendre eune tâssée d'thée, r'arrivant à St. Pierre à 6 heuthes.

 

1977: Voul'-ous l'êchange?

 Voul'-ous l'êchange?

 

Le Ménage ès Feuvres,

St. Ouën.

 

Lé preunmyi d'octobre, 1977.

 

Moussieu l'Rédacteu,

 

Ch'est vrai qu' nou n'sait d'en par iou qu' nou-s-en est en Jèrri ches jours. Né v'là-t-i' pon qu' la gâzette nouos annonce qué les femmes veulent êt' Juges! Les viy-ous sus l'Banc d'Justice, les femmes? Ch'n'est pon tch'i' manquent d'întelligence, Mon Doue, il' en ont à gogo. Et i' faut qu' j'èrgarde tch'est qué j'dis au sujet, car jé n'veurs pon êt' atchûsé d'en aver contre ieux. Au contraithe, jé l's tréjous admithées. J'm'èrsouveins qué quand j'tais janne homme un anmîn soulait m'dithe dé m'en mêfier, et i' mé r'citait tréjous un p'tit rînme qué, si ma mémouaithe né m'trompe pon, allait tchiquechose comme chennechîn:-

 

                   La femme est comme la catte,

                   Ou rit quand nou la fliatte,

                   Et s'frot'ta contre vous

                   En faîsant patte dé v'lous;

                   Mais quand l'affaithe né lî pliaît pon

                   Ou ronne bein, mais sus an aut' ton!

 

Mais r'vénant au sujet du Banc d'Justice. I' n'y a pon d'doute tchi'i' ya' des femmes tchi f'thaient d'fanmeuses Juges et tch'i' y'en a tch'en f'thaient d'faillies. Ch'est la même boutique auve les hommes. Mais y'a l'dangi que l's hommes Juges es'saient tentés d'lus battre pour vaie létché tchi s'assiéthait à côté d'la belle femme sus l'Banc d'Justice. Et pis, si Madanme Juge est femme mathiée, y'a l'dangi qué s'n homme d'veindrait jaloux d'vaie touos ches Mêssieux d'Justice là faithe des doux yeux à sa femme! Et y'a l'dangi qué Madanme Juge, tch'a acaté eune neuve robe pour l'assèrmentâtion, n's'en va pon êt' heutheuse d'aver à la muchi souos la rouoge robe tch'est l'sŷmbole dé Justice quand oulle est en Cour.

 

1966: La Soudardéthie

 La Soudardéthie

(Siète)

 Fort Lauderdale, Florida, U.S.A.

Lé 26 d'mar, 1966

 Comme ou'pouvez bein l'inmaginner, la bangniole n'eut pon lieu chutte matinnée-là. Pus d'la maintchi d's hommes dan la chambre où-est qu'j'avions mêlé l's habits, l'Fraînque et mé, lus mîndrent en rang tard et à la maintchi habilyis. Y'en avait iun tchi n'pouvait pon trouver ses braies, et il arrivit en drâses. Un aut' n'avait pon trouvé eune pathe dé bottes tchi 'tait d'la grandeu tch'i' fallait, et i' s'mînt en cauches dans l'rang. Un aut' vînt auve rein qu'eune botte, et un aut' arrivit atout eune câsaque tch'éthait 'té deux fais l'tou d'li, et les manches 'taient si longues qué nou n'li viyait pon d'mains. Un aut' vînt atout eune câsaque sus san bras tch'tait bein trop p'tite pour li, mais i' l'avait apportée pour prouver à l'offici qu'tchitchun d'aut' avait la sienne ! S'i' y'avaient pensé, il' éthaient peut mett' les bouans habits tch'il' avaient au concèrt la séthée dé d'vant, mais dans l'tîntamârre et la peux d'êt' tard à rêpondre à lus noms en rang, i'n'y pensîdrent pon, sustout comme i' n'avaient qu'tchiques munutes à lus habilyi, ayant, comme d'habitude, resté au liet jusqu'à la dreine munute !

 

1977: A bétôt!

 A bétôt!

 

Le Ménage ès Feuvres,

St. Ouën.

 

Lé 15 d'Octobre, 1977.

 

Moussieu l'Rédacteu,

 

J'm'en r'vais en Améthique, et jé s'sai là-bas par lé temps qué chuttre lettre pathaîtra dans la gâzette. Comme d'amors, j'sis oblyigi dé d'mander à un tas d'mes bouans anmîns dè m'pardonner pour n'aver pon ieu l'temps d'aller lus dithe “à la préchaine” dévant m'en aller. Ieune dé mes grandes fautes, et ch'est la même turlutte touos l's ans, est qué j'laîsse trop à faithe à la dreine minnute dévant m'embèrtchi en avion pour lé viage d'èrtou au Nouvieau Monde.

 

“Est-ous content d'vouos en aller?” les gens mé d'mandent. “Eh bein oui, sus un sens,” j'lus dis, “car, pour mé, ch'est la rêunion auve ma fanmil'ye. Sus l'aut' sens, j'èrgret d'aver à tchitter un tas d'mes bouans anmîns ichîn en Jèrri. Mais j'ai crouaîsi l'Atlantique tant d'fais qué j'sis dév'nu accouôteunmé au changement d'pâtuthe, et si j'en vai l'heuthe ou me r'vèrrez en Jèrri l'êté d'l'année tchi veint.”

 

En r'gardant l'feu dans la grande âtre d'la salle ches dreines séthées dans l'mênage, j'pense à toutes les mémouaithes dé man janne temps qué j'm'en vais emporter auve mé dans l'Nouvieau Monde. Tant pus qu' j'y pense, tant pus j'mé dis qué l'Jèrri qué j'tchitte à ch't heu n'est pon chu paîsibl'ye paradis sus tèrre que j'connaîssais dans mes p'tits jours!

 

1965: La Langue Jèrriaise

 La Langue Jèrriaise

 

Trenton, Michigan,

U.S.A.

 

Le 16 d'octobre, 1965.

 

Moussieu l'Rédacteu,

 

I' m'sembl'ye qué j'sis dans un aut' monde dépis qué j'sis r'vénu en Améthique! Ch'n'est pon qu'les gens pathaîssent fort difféthents, ouaithe qué jé n'vai pon tant d'bachouards atout des drôles d'habits et des longs qu'veux et des barbes d'bichot comme y'en a eune racachie en Jèrri, et ch'n'est pon qu'la nourrituthe est hardi difféthente ni n'tout sénon qué j'bail'lais tchiquechose pour eune bouanne bollée d'soupe dé caboche faite en Jèrri! J'avais d'la peine à penser tch'est qué ch'tait tchi m'pathaîssait drôle, et pis l'affaithe m'est v'nue à l'idée tout d'un coup : Ch'est qu'en Jèrri jé n'ouïyais qu'du Jèrriais à l'entou d'mé à L'Êta, et ichin jé n'ouäi qué d'l'Angliaichîn'nie d'Améthique!

 

V'la tch'i' m'fait reunminer, et i' m'veint à l'idée qué ch'n'est pon naturel pour un Jèrriais d'aver à pâler l'Angliais ou l'Français à longdieu d'jour. Quant à mé, j'ai bieau pâler l'Angliais ichîn, mais j'pense tréjous en Jèrriais! Oulle est si expressive, nouot' vielle langue! Tchi pliaîsi qué j'manqu'thais quand j'sis en Jèrri si jé n'pouvais pon pâler à des bouans vièrs gris-ventres comme Moussieu L'Brun d'La Caroline, Moussieu Fraînque Hâcou, l'bouanhomme Ph'lippe Gallienne, les Sieurs John Clifford Malzard, Edwin Vibert, Fraînque Hamon, Edmund Vibert, la tante Vîne (Elvina) Hamon et san frèthe, lé Député Fraînque Le Feuvre, etc.

 

1965: D'èrtou en Jèrri!

 D'èrtou en Jèrri!

 

Lé Ménage ès Feuvres,

St. Ouën.

 

Moussieu l'Rédacteu,

 

M'èrvéla en Jèrri! Ch'est tréjous eune jouaie d'y r'vénîn, et v'la tchi m'donne eune idée du pliaîsi qu'les vièrs naviguants d'vaient aver quand les navithes èrgangnaient Jèrri à la fîn d'un long viage. À m'suthe qué nou-s apprèche dé l'Île en mé, nou c'menche à r'garder pour les mèrs lé long d'la côte. J'mé r'souveins qu'en appréchant d'Jèrri en 1946, auprès aver 'té houors-pays pour dgiex-huit ans, j'èrgardais pour lé moulîn près d'l'églyise dé St. Ouën. J'viyais l'clioche d'l'églyise, mais pon d'moulîn en veue, et j'mé d'mandais tch'est tch'en 'tait dév'nu! Quand j'vîns à tèrre et qu'j'allis vaie mes vièrs accoints et marchi les rues dans la pâraisse natale, j'vis qué l'moulîn 'tait acouo-là mais qué l's aubes avaient dispathu!

 

À la longue nou s'accouôtunme ès changements. I' faut bein ches jours, car nou né r'connaît presque pon l'Jèrri di temps jadis. Lé temps passé, quand j'tchittais l'Améthique pour eune visite dé trais ou quat' mais en Jèrri, j'viyais pus d'changements en rentrant en Améthique qué j'n'avais veu dans vîngt ans en Jèrri. À ch't heu ch'est l'contraithe! Ouaithe tch'i' n'y a qu'treize mais qué j'tais houors-l'Île, i' m'sembl'ye qué les maiethons ont crû partout commes des champingnons. Dans La Route des Tchennevais, tch'avait 'té êlaizie dans l'entrétemps, j'trouvis tout un village nouvieaument bâti! Dgieu mèrci, nou peut acouo vaie tchiques grands clios tchultivés ou en hèrbe lé long d'La Grand' Route dé St. Jean, et ès Landes à St. Ouën. D'en par ichîn il' ont êcappé d'la folie d'bâti d'ssus, mais Lé C'mîn du Moulîn - du côté d'L'Êta - a pèrdu sa trantchillité d'campangne à ch't heu. Il est pliein d'neuves maiethons!