1959: Le Chantgni et la charmante fille.

 Le Chantgni et la charmante fille.

 

Moussieu l'Editeu,

 

Je n'sais vraiement pas tchèsque la Merrienne avait quand ou s'mint dans la tête de vos êcrithe la s'maine pâssée, et je n'l'ai pas ocquo pardonnée pour avé suggéthé que j'avais attrapé un coup d'solé dans la bârre au Show d'la Ville. Il est vrai que j'trouvit deus-trais d'mes viers amins là, mais ch'n'est pas yun ou deux p'tits vêrres tchi s'en vont faithe le Ph'lip du Portinfé crôlé sûs ses gambes. Ch'est oublié pour ach'teu, Moussieu, mais attendez qu'ou veinne se pliaindre de tchique ma tchiquebord et j'l'y dêmontrethai qu'une femme tch'a un mio d'avis n'dév'thait pas s'fichi d'san bouonhomme quand y n'se trouve pas trop raide.

 

Hieu au sé, Moussieu, quand oulle eut fini d'lièthe la gâzétte, ou l'a fliantchit dans l'graie. J'la ramâssit et j'vit bein vite l'articlye tchi l'avait minse en colèthe et y faut dithe que quand j'l'eut liut à man tou, j'éthais 'tait content d'capuchi la Post sûs l'haut d'la tête avec ma chouque.

 

1959: Ch'est Merrienne tch'y pasle

 Ch'est Merrienne tch'y pasle.

Ph'lip et san coup-d-solé.

 

Au Portinfé.

Jeudi au sé.

 

Moussieu l'Editeu,

 

Ch'est mé, Merrienne, tch'y vos êcris agniet, car le Ph'lip, tch'attrapit chein tch'il appèle un coup d'solé au Show d'l'lle, hier, n'est pas ocquo trop raide. Sûs un sens, je m'y'attendais quand y s'en fut l'matin avec san fils, le Bram, et d'même je n'fut pas hardi surprinse, quant y r'vintes les deux dans les quatre heuthes, que man bouonhomme n'tait pas en état de remonté les d'gres et de s'mettre au liet sans aide. Ou pouvez craithe, Moussieu, que j'eûmes une djóbbe, car le Ph'lip est lourd et y n'pouvait pas s'aidgi du tout. A-matin, j'y'ai porté une tâsse de tais, tch y n'methitait pas et j'y'ai d'mandé tchèsqu'il avait veu au Show.

 

“Eh bein, Merrienne,” il a dit, “je n'me r'souveins que des trais preumié clâsses et du championnat, ch'est-à-dithe que je n'pouvais pas enduthé pûs longtemps la têrriblye chaleu, et j'ai yeu à m'mettre à l'abri, mais par chein qu'j'en vit, les g'niches r'nouv'lées 'taient une clâsse bien ordinaithe, mais les jeunes vaques, éthaient raide bouonnes. J'n'avais pas veu miyeu pour des années. Y'en avait yunne au Bill Perchard, de Saint-Martin, que j'admithais hardi et ou méthitait bein l'championnat, tch'ou gâgnit pûs tard. Y y'avait une assez bouonne clâsse de vieilles vaques, mais pas comme au mais d'Mai. Apporte-mé ocquo une tâsse de tais, comme une bouonne femme, car ma tête me craque.”

 

1959: Merrienne et sa clioche

 Merrienne et sa clioche.

Ph'lip au péthi d'sa vie.

 

Au Portinfé,

Jeudi au sé.

 

Moussieu l'Editeu,

 

Ch'est avec grand pliaisi que j'peux vos dithe que j'vais bein mûs. Il est vrai que mes vieilles gambes n'ont pas ocquo grand forche et que j'marche, pour la preumié fais dans ma vie avec une chouque, et que j's'y ocquo maigre comme une hache, mais au mains j'peux allé ichin et là sans trop d'peine, et mûs qu'chonna j'ai r'quémenchi à mangi, et si chonna continue j'espèthe de r'vais bétôt un mio d'chai sûs mes viers os.

 

Mais, Moussieu, si tout va assez bein avec mé, je n'peux pas en dithe autant d'ma bouonnefemme. A peine ou m'vit sûs mes pids que la v'là au liet, dîsant qu'oulle ait seuze qu'oulle avait attrapé ma dang'reuse maladie en m'soignant, et qu'ou doutait si jamais ou r'déscendrait les d'grès sinon dans une bouaite. Hier au sé ou voulait même se métre à êcrithe l'inscription sûs san tombé, et quand j'l'y dit d'n'être pas si bête, r'fûsant d'l'y fourni pliume et papi, ou m'dit qu'ou viyait bein que j'voulais la vais dans l'chimtièthe pour que j'pouôrrais me r'mathié à tchique jeune hardélle.

 

1958: Merrienne approuve du Mâjeur

 Merrienne approuve du Mâjeur.

Ph'lip et ses Bricolis.

 

Moussieu l'Editeu,

 

L'autre sé, la Merrienne, ayant liut dans la Post les longs rapports de la séance des Etats, la mint sûs ses g'nors, et, ayant mouoillé un coin d'san mouochet avec le but d'sa langue, s'mint à frotté les vêrres d'ses lunéttes. “Y n'y'a pas à dithe, Ph'lip,” ou s'fit, “j'n'y vais pûs avec chais lunéttes ichin. Y faut que j'aille en Ville en accaté une neuve pathe.”

 

Ach'teu, Moussieu, comme ou l'savez sans doute, j'mêts des lunéttes étout pour lièthe et êcrithe et la pathe de tchi qu'je m'fais sérvi j'avais accaté siez Woolworth y'a chinq ou siez ans pour une pièce d'êtchu. J'peux ocquo m'en graie et j'n'ai jamais comprint pourtchi qu'la Merrienne fut bête asséz d'allé péyi bétôt chinq louis pour sa pathe tchi n'peut pûs l'y faithe ach'teu. A ma veue, chais opticiens et tout l'réstant sont une bande de voleurs.

 

1951: Les d'vis du Bouan'homme George

 Les d'vis du Bouan'homme George.

 

I' m'enn'yie à ses sé, et j''m'en vais êcrithe tchiques mots pour met' dans la Chronique en Jèrri, - tch'est si liain d'ichîn. N'l'y a pon si longtemps qué j'y'étais, en Jèrri. Ch'n'est qu'aniet Jeudi, et j'y étais Sam'di passé! Dînmanche et Lundi j'tais à St. Malo, - Mêcredi, j'tais à Paris, - a ces sé mé v'là dans un grand' hôtel à Marseille, eune belle grand' ville tchi s'étend entre ch't'Hôtel ichîn, tche'st sus la hauteu, - et la mé, - la Méditérannée.

 

Démain au sé, j'es'sai en mé, - en c'min pour la Terre Sainte, qué j'ai tant voulu vaie toute ma vie!

À ces sé, - comme j'vouos l'dîsais, - i' m'enn'yie. J'donnais autcheune chose pour ouï du Jèrriais, mème quand ch'né s'sait que d'ouï Mèrriene picangni l'pouor' Ph'lippe ! J'savais bein qué jé n'gangnais rein d'êprouver à faithe lé Ph'lippe viagi auve mé, car Mêrriene né l'éthait janmais laissi hors dé veue! Et j'don'nais autcheune chose pour vaie un Jèrriais et li bailli d'ma bec! Ch'es'sait en Jèrriais qu'nou pal'lait, sans doute, - la belle vielle langue dé not' pétit pays! A la pliaiche de m'met à êcrithe chen'chîn, j'ithions probabl'yément faithe un tou dans la ville en pâlant. Et bieau qu'nou vait un tas d'belles choses à Marseille, ch'est à bein prés seux qu'nou pal'lait d'Jèrri. Quand nou-s est Jèrriais n'l'y-a pon d'souain ouêque nou-s est, chutte p'tite île là vous r'veint tréjous dans l'idée et dans l'esprit.

 

1951: Une touonée

 Une touonée.

Ph'lip a grand peux.

 

Le Portinfé,

Jeudi au sé.

 

Moussieu l'Editeu,

 

Ch'est avec appréhension que j'vos ecris assêse, car, après qu'j'avais dit nânin chent fais, j'me s'y accordé de transporté la Merrienne demain dans châque pâraisse de l'île pour vais comment que l's'affaithes vont. J'n'ai pas bésoin d'vos dithe que chen qu'oulle à dans sa vieille tête ch'est chutte fameuse êléction pour Sénateur.

 

Je sommes pour allé, nos deux, à la salle pârouessiale ichin à Saint-Ou pour l'ouvértuthe, épis nos v'la hors à faithe le tout d'île dans man vier quêrre tchi n'a pas dêshallé de souos la tchérquethie d'pis la preemie Bataille de Flieurs après la libéthâtion.

 

Ch'tait la dérnièthe idée qu'j'éthais jamais yeu, et quand la Merrienne m'annoncit hier au sé qu'oulle avait décidé de faithe la touônée je m'mint à rithe.

 

1958: Merrienne est dans la bliâse

 Merrienne est dans la bliâse.

Et Ph'lip ne vaut pas fort mus.

 

Moussieu l'Editeu,

 

J'n'ai pas grand chance de lièthe la gâzette, chais jours, car le moment qu'oulle arrive, la Merrienne la gaffe, s'assied dans sa grand'tchaise, prend ses lunéttes, et s'y met. Hier au sé oulle en eut pour un bouon couplye d'heuthes sans dithe un seul mot. Mé, j'me mint à lavé la vaissélle pour pâssé l'temps, épis, ayant allumé ma pipe, je m'couochit tout man long sûs l'sofa pour me r'pôsé. J'tais à maintchi endormi quand, à la fin, ou mint bas l'papi en dîsant qu'ou n'avait jamais liut autchune chose si incomprenablye. Ou m'pâssit la gâzette, et m'dit d'lièthe le rapport des Etats au sujét d'la somme qu'est d'mandée pour l'airport, pour vais si j'pouvais comprendre la situation, “car,” ou s'fit, “ne v'là deux séthées que j'ai passé d's heuthes à lièthe des colonnes et des colonnes, et j'n'y vais qu'bliâse, et j'voudrais vais si tu'ès pûs savant qu'mé.”

 

J'en eut pour une bouonne dém'ieuthe épis, viyant qu'ou tait impâtiente, j'fit d'man mûs pour y'éxplitchi l'affaithe. “Y n'y'a rain d'décidé,” j'l'y dit, “car le Sénateur J. J. a insisté que l'rapport du Comité aille au Gréffe pour un tchinze jours, comme il avait l'drouait d'faithe.”

 

1958: Les femmes sus l'jury

 Les femmes sus l'jury.

Et la visite en Irlande.

 

Moussieu l'Editeu,

 

Hier au sé, la Merrienne voulit savé si j'approuvais d'avé des femme sûs l'jury ès Assises. “Je vais par la gâzette,” ou dit, “que y'en avait quatre chutte semaine. Ch'tait tchiquechose que nou n'avait jamais veu d'vant. Tchèsqu'tu'en craie, Ph'lip?”

 

“Eh bein, Merrienne,” j'l'y raiponnit, “je n'sais pas trop, mais chein tch'est seux et cértain ch'est qu'man grand'pèthe Isaac éthait juthé que ch'tait une folie.”

 

“Tan grand'pèthe Isaac est mort et entêrré d'pis longtemps,” ou dit, “et par chein qu' j'en ai ouï, ch'tait un vier fripon. Oublie-le et dis-mé franchement si tu voudrais m'vais membre d'un Jury.”

 

1952: Comme le temps va

 Comme le temps va.

Merrienne est Roupilleuse.

 

Hier au sé, ch'est-à-dithe Jeudi, yun des fils à notre Frainque entrit pour vais si j'pouvais l'y prêté une frouque pour dêfoui tchiques patates tch'avaient resté dans une foyèthe. En fourchant l'mousse avait rompu l'manche de la siène le matin, et son pèthe y'avais fait des rouaux.

 

“Je pense ben,” fit la Merrienne, sèquement, “qu'tu tais si prêsie de t'en allé au Bouolay ch't'arlevée que ta froque n'allait pas assez vite. Dans man temps un homme réspectait ses ôtils, mais ach'teu ch'est d'lûchi tout ch'que nou peut pour avé une extchuse pour allé perdre son temps gallopé ichin et là sûs une fichue moteur-bike. Si j'en avais l'pouvé, mé, j'mettrais tout chonna au feu.”

 

1957: Ph'lip et Merrienne

 Ph'lip et Merrienne

 

Au Portinfé,

Jeudi au sé.

 

Moussieu l'Editeu,

 

J'ai grand r'grét d'avé à vos dithe que j'sommes en brit, la Merrienne et mé, au sujét d'la Visite Royale.

 

Ch'tait hier au sé que l'affaithe qu'menchit. J'avions bu l'tais, et comme de couôtume j'avais aidgi à lavé la vaissélle, une djobbe que j'n'aime pas, quand assîse dans sa grand'tchaise, ou m'annoncit que j'éthais à allé en ville agniet.

 

“En ville …” je m'fit, “et pourtchi chonna?”

 

“Parsque,” ou dit, “avec le ma qu'j'ai dans ma gambe gauche je n'peux pas y'allé mé-même, et j'ai besoin de plusieurs choses pour la s'maine tchi veint.”

 

“Et tchèsqu'y sont chais plusieurs choses?” je d'mandit, “et pourtchi allé en ville? Y m'semblye que y'a ocquo tchiques boutiques à Saint-Ou.”

 

“P't'être bein, mais y n'peuvent pas m'faithe,” ou dit. “A qu'menchi, y faut qu'tu'aille siez Gruchy ou Vouaisin m'accaté deux pathes de cauches en souaie.”

 

1964: En c'mîn pour l'Australie! (2)

 En c'mîn pour l'Australie!

 

(Siète)

 

 

En fîn d'compte les visiteurs sont tous à tèrre. I' sont rangis sus la cauchie. Les passerelles sont r'tchulées du navithe par des cranes et mînses en pliaiche à tèrre. Lé Cap'taine donne des ordres et eune manièthe dé trompette dans la cheunm'née beûle comme un gros boeu affolé, et les mouôrins sont halés dé d'ssus les capestes. Deux ou trais r'morqueurs halent et poussent sus l'navithe et nouos v'là houors! Châque moment alouangne la distance entre nous et la cauchie, et l'nez du navithe pouainte au large un mio à la fais. Les gens à terre et à bord êprouvent acouo a lus entre-pâler, mais comme i' l'font touos en même temps et à tue-tête pèrsonne n'y comprend rein! Chatchun lève lé bras atout san mouochet en main, et l'mouochet sèrt dé sîngna et d'êssuie-lèrmes en même temps!

 

P'tit à p'tit nou pèrd la cauchie d'veue et, dans la distance, nou vait les gens d'ssus s'en aller. Les gens à bord c'menchent à cherchi pour lus mousses, pus ou mains oublyiés à cause du chagrîn d'aver à tchitter pathents et anmîns restés à tèrre. Les mousses né sont pon aîsis à trouver. I' sont à galvauder amont et avau les montées et à couôrre l's uns souotre l's autres dans l's allées comme des fos. Des mousses sont tréjous d'même à bord d'un baté à mains tch'i' s'saient malades quand la mé est rude. À la fîn, chatchun r'trouve les siens et tout l'monde s'amène dans sa cabine pour arrangi san butîn dans les titheurs et armouaithes, sachant tch'i' y'a quâsi un mais l'avant à sé d'vant l'arrivée en Australie. I' faudra avanchi l's holouoges un quart-d'heuthe à ces sé. Nou-s est supposés dé l'faithe à deux heuthes du matin, mais nou l'fait en s'couochant et v'là tchi r'veint au même.

 

1964: En c'mîn pour l'Australie! (1)

 En c'mîn pour l'Australie!

 

En Améthique.

 

Lé 12 dé juin, 1964.

 

Moussieu l'Rédacteu,

 

Comme i' prend pus d'trais s'maines dans un grand stînme tchi peut faithe eune mouoyenne dé vîngt-chinq noeuds par heuthe pour aller en Australie, et qu'nou-s a eune vie întérêssante à bord et un tas d'aventuthes en c'min, il est împossibl'ye d'en donner un bouan r'cit dans eune seule colonne dé la gâzette, ch'est-en-tchi ch't histouaithe s'en va êt' continnuée dé s'maine en s'maine pour tchique temps. J'espèthe qué vouos lecteurs s'en vont la trouver întérêssante assez pour en continnuer la lectuthe!

 

Ch'est l'vîngt d'novembre mil neu' chent souoxante-trais, et nouos v'la à bord du stînme. Il a tchaie hardi d'plyie et l'temps a 'té rude en Jèrri pour eune sémaine dé temps, mais l'solé lie aniet et l'temps pathaît bé. I' faut espéther qué v'la tchi s'en va continnuer. En pâlant d'Jèrri: J'tions là y'a un coupl'ye d'jours, dans chu p'tit pays tch'a donné tant d'naviguants avau l's années dans l'temps des navithes à vailes, et d'pis étout. Mais chu navithe-chîn est tout-a-fait eune aut' affaithe! San nom est l'même comme lé chein d'la capitale dé l'Australie, le Canberra. Il est iun des pus modèrnes navithes du monde. Il a au mains siez chents pids d'londgieu et ch'est un navithe dé quarante-chînq mille tonnieaux tchi porte deux mille passagièrs. Sa vitesse mouoyenne est dé vîngt-chînq noeuds, et i' peut aller pus vite au bésouain!

 

1981: Mémouaithes

 Mémouaithes

 

Trenton,

Michigan, U.S.A.

 

Lé 16 dé mai, 1981.

 

Moussieu l'Rédacteu,

 

Comme lé temps s'pâssé! J'ai d'la peine à craithe tch'i' y'a trente-chînq ans dépis qué j'tchittis à travailli ichîn en Améthique - ch'tait en mil neu chent quarante-six - pour aller r'vaie Jèrri auprès eune absence dé quâsi vîngt ans. J'tais prêt à l'faithe chînq ans d'vant, mais la deuxième grand' dgèrre, s'était dêcliathée justément dans l'temps qué j'voulais m'èrtither d'affaithes, et comme j'avais un poste assez împortant dans un chantchi dans l'temps, et qué j'tions en train d'bâti des navithes pour lé gouvèrnément, j'mé décidis d'rester en travas pour faithe man p'tit mio “pour la patrie” en temps d'bésoin.

 

1982: Aux armes, Jèrriais d'race

 Aux armes, Jèrriais d'race

 

Trenton,

Michigan, USA.

 

Lé 24 d'avri, 1982.

 

Moussieu l'Rédacteu,

 

Si nouot' langue Jèrriaise mouothit dans la gâzette du preunmyi d'avri, ouelle à èrsuscité dans la cheinne du huit d'avri, tchi veint d'arriver. Mais, sans droute, oulle est bein liain d'êt' morte quandi qu' j'avons des pèrsonnes comme lé Docteu Fraînque Le Maistre, lé Juge Lucas, le “Jersey Evening Post” et Madanme Eileen Le Sueux à combattre ses enn'mîns. Et i' n'faut pon oublier Moussieu Ph'lîppe Maugi de Veulle et L'Don Balleine et L'Assembliée d'Jèrriais.

 

J'dév'thais mentionner La Société Jersiaise étout, mais j'crains qu' ou n'est pon hardi întérêssie [...] nouot'  langue, ouaithe qué j'sai bein qué Moussieu l'Député Bailli Crill, san Président et bouân Jèrriais, es'sait bein content dé supporter autchun mouoyen qu' La Société pouôrrait entréprendre pour la garder en vie. Ch'tait întérêssant d'vaie tch'i' d'mandit à l'assembliée annuelle générale combein des membres présents pouôrraient convèrser en Jèrriais. Probabliément pus qué quat' ou chînq, mais ch'est à bein près seux tch'i' y'en avait pus quand-même si y'avait des vièrs membres présents.

 

1962: Une rencontre à Sainte Mathie

 Une rencontre à Sainte Mathie

Y'étha-t-i' une élection à Saint Piêrre?

 

à Portinfé,

Saint Ou.

 

Moussieu l'Editeu,

 

Av-ous jamais veu autchune chose pûs drôle que les femmes?

 

Prenez, par exemplye, ma Merrienne. Quand i' faisait fraid oulle avait des r'frédeuses, et ou s'pliaignait l'long des jours, et dé niet je n'pouvais pas dormi. Mais à ch'teu ch'est la chaleu qu'est la cause du mâ. J'couoche tout chu temps dans la chambre à côté, et don j'peux dormi, mais Moussieu, entre nous, ch'n'est pas vivre.

 

À la fin, lé Peter Crill a 'té appointé Avocat-Général, mais i' n'a pas ocquo 'té assermenté, et ch'est la même chose, quand nous-y pense, avec lé Baillyi. Sûs un sens il est l'Baillyi, mais sûs un autre i' n'est pas. Avec chonna, y'a une chose tch'est certaine, et ch'est tchi faudra une élection partout l'Ile pour un Sénateur. La gâzette nomme deux candidats, lé Sieur Dupré, marchand d'paison, tch'est président du Tourisme, et l'Député Venables, tch'a 'té dans l's Etats bein d's années et a fait de raide bouon travas. Nous craithait que la pliupart des électeurs le supportéthaient, mais nou n'peut pas oublier que l'Député Dupré est certain du support des hôteliers. Tout dépend de l'attitude des campagnards, et i' faut admettre que jusque ichîn lé Député Venables n'a pas fait grand progrès parmi yeux. Contre chonna, nou sait que la mâsse des électeurs d'la Campagne détestent lé Tourisme, et voudraient vaie chais visiteurs tch'encombent la Ville pour trais ou quatre mais de l'année au fond d'la mé. Mais ch'est une chose d'être un électeur et une autre de s'faithe servi d'sa vouaix à une élection. Pour mé et, drôlement assez, pour la Merrienne, l'homme que j'voulons ch'est l'Député Venables, mais si la Campagne ne déhalle pas i' n'peut pas réussi.

 

1977: Les changements sont en mode

 Les changements sont en mode

 

Le Ménage ès Feuvres,
 St. Ouen.
 Lé 24 dé septembre, 1977.

 

Moussieu l'Rédacteu,

 

M'èrvélà dé r'tou en Jèrri auprès eune pétite vacance pâssée en France. Comme dans touos les vièrs pays “modèrnes” nou vait des changements en France comme ichîn. Ch'est des “auto-routes” tch'i' faut à ch't heu pour prendre soin dé touos les motos qu'nou vait partout, et les Français sont à en bâti tout pliein. A Rennes, en Ille-et-Vilaine, ch'est des “gratte-ciels” qué nou vait en quantité l'long d'ches neuves auto-routes tchi vouos mènent lé tou d'la ville à la pliaiche d'aver à la travèrser pour continnuer c'mîn pour lé sud d'la France. I' y'a ieu tant d'progrès qué nou pouôrrait quâsi s'craithe en Améthique, sustout comme nou vait d's annonces dans un tas des stâtions d'pétrole comme “Esso” et “Gas Oil”. Y'a des Français tchi prononcent ch'là “Gâzoil” tout en iun!

 

En Brétangne, nou n'vait pus coëffes ni chabots. J'pense bein qu' nou-s-en vèrrait tch'îthait sus les fermes, mais l'progrès s'montre en Brétangne comme par ailleurs.

 

1973: Ottawa

 Ottawa

 

Ottawa, Ontario,

Cannada.

 

Lé 24 novembre, 1973.

 

Moussieu l'Rédacteu,

 

Ichîn, à Ottawa, j'ai d'la peine à craithe qué j'sis dans la mème ville dans tchi j'arrivînmes, man fréthe Fraînque et mé, y'a chînquante-quatre ans chu mais. J'm'èrsouveindrai tréjous du viage d'Angliétèrre à Halifax, dans La Nouvelle Êcosse, en Novembre, 1919, dans l'grand baté “Empress of France” dé la Compangnie Cannadgienne Pacifique. J'tions dans l'fond du baté - lé “steerage” comme il' appelaient la traîsième clâsse dans chu temps-là - et la mé 'tait si rude dans l'Atlantique qué jé n'feûnmes pon alloués sus l'pont duthant trais jours du pâssage tchi duthit eune sémaine, et la grand' partie des pâssagièrs 'taient malades comme des tchians.

 

1978: Vielles nouvelles

 Vielles nouvelles

 

Fort Lauderdale, Florida,

USA.

 

Lé 14 dé janvyi, 1978.

 

Moussieu l'Rédacteu,

 

Ch'n'est pon eune achie dé “Weekly Posts” tch'est v'nue chutte sémaine. Ch'est eune avèrse! Trais en même temps, les cheinnes du 28 d'octobre et du quatre et onze dé novembre, 1977.

 

La preunmié chose qué j'ai fait 'tait dé r'garder les noms dans la colonne des naîssances pour vaie si la race Jèrriaise continnue à en pèrdre. Dans la gâzette du 28 d'octobre, sus seize naîssances i' n'y'a qu' un seul vrai nom Jèrriais. Dans la cheinne du 4 dé novembre, sus neu naîssances y'en a trais tch'ont des vrais noms Jèrriais, et dans la cheinne du onze, sus quatorze i' y'en a quatre. Sus les 39 naîssances i' n'y'en a qu' huit tch'ont des vièrs noms Jèrriais; ch'est en tchi ou pouvez vouos înmaginner combein longtemps qu' Jèrri s'en va êt' Jèrriais!

 

1963: Merrienne et yun d'ses anchêtres

 Merrienne et yun d'ses anchêtres

Ph'lip et les grandes chaleurs

 

à Portinfe,

Saint Ou.

 

Jeudi au sé.

 

Moussieu l'Editeu,

 

J'crais hardi que ma lettre chutte sémaine s'en va vos desappointer, car i' n'sarrive, rein à Saint Ou chais jours, et le vrai est que tout est bein trop trantchille. Nou-s-avait ouï qu'un bouon citoyen et Principâ d'Pâraisse avait tchitté sa femme et sa fanmille et s'était êvade avec une drinette de djais-sept ans, mais i' pathait à ch'teu' que ch'n'est pas vrai. Ch'est dommage, sûs un sens, mais p't'être aussi bein sûs un autre.

 

La Merrienne, ayant entendu que j'allons aver ocquo un grand nombre dé visiteurs, a print des précautions pour s'asseuther que nos deux au mains, à Portinfé, éthont assez à mangi quand ou n'pouôrra pas aller en Ville, ch'est-à-dithe jusqu'à mié-septembre. Oulle a ordonné tout-plien de mangeaille, mais pour le béthe i' pathait que j'éthons à nos contenter avec d'la limonade, car si ch'est vrai chein qu'nou ly' dit, que l'êté tchi veint s'sa un êté de grandes chaleurs, ou n'crait pas que l'rhum, fraid ou caud, nos f'thait grand bein. Ou se r'souveint de chein qu'nou disait de yun d'ses anchêtres, tch'avait avalé tant d'rhum qu'un bouon jour, en satchant une allumette, i' print à feu, et tout ch'qui restit ch'tait yunne ou deux onches de chendres. Les docteurs de chais temps-là ditent tch'il avait crevé d'une combustion spontanée, mais j'ai d'la peine à craithe chonna. Si ch'tait la vraie raison, j'n'éthais pas à tchitté la pâraisse de Saint Ou pour trouver deus-trais vièrs riboteurs tch'éthaient deu être réduits en chendres y'a longtemps.

 

1973: D'èrtou d'France

 D'èrtou d'France

 

Le Ménage ès Feuvres,

St. Ouën.

 

Lé 25 d'août, 1973.

 

Moussieu l'Rédacteu,

 

M'èrvélà en Jèrri auprès aver pâssé trais s'maines en France. Quand j'mé r'trouve tout seu dans l'vièr ménage ch'est comme si j'avais 'té soudainement transporté dans un aut' monde. La trantchilité m'frappe! Ch'est sans doute viyant qué j'sis ès Landes. Si j'tais en ville ché s'sait aut' affaithe. Ch'n'est pon qu' nou n'peut en trouver en France, d'la trantchilité, mais en général lé peupl'ye Français est bein pus excitant en li-mème qué les Jèrriais, et i' m'sembl'yent tous pâler à tue-tête, mème siez ieux. Nou dithait tch'i' sont mârris, mais ch'n'est qu' lus manniéthe dé d'viser. Y'a, sans doute, l's exceptions - comme dans toutes choses. J'ai 'té eune tchînzaine siez un anmîn dans l'Midi tch'est docteu. Il 'tait man compangnon d'viage en Tèrre Sainte en 1951 et en Grèce, en Turtchie, et dans l's Îles Dodécanèses en 1952, et j'avons tréjous 'té grands anmîns d'pis. Siez-li, s'i' n'y avait pon d'téléphone nou pouorrait dithe qué tout est trantchil, mais l'fichu téléphone sonne tréjous. Ch'est ravissant qu' sa danme n'en affole pon. Il a à peine lé temps d'mangi. Y'a tréjous des malades à l'attendre siez-li. Il en visite dans la campangne deux fais par jour et il est souvent appelé dans la niet.