1959: Changement d'temps au Portinfé

 Changement d'temps au Portinfé.

Et l'Rât à Saint-Jean.

 

Au Portinfé.

Jeudi au sé.

 

Moussieu l'Editeu,

 

Comme man bouonhomme de pèthe soulait dithe, les femmes sont incomprenablyes. Il avait bouonne raison pour chutte opinion-là, le pouôre homme, car la vieille l'y faisait bein d'la minsèthe. Il est vrai qu'ou pleuthit dans l'chim'tièthe quand y s'en fut, mais j'ai tréjous creu que ch'tait pûs d'jouaie que d'aut'chose.

 

Ach'teu, Moussieu, comme j'vos l'ai dit pûs d'une fais, la Merrienne peut être drôle étout par bordée. La s'maine pâssée, par exemplye, ou s'plaignait d'la chaleu le long des jours, et dans la niet ou m'rêvillyait trais ou quatre fais pour me dithe qu'oulle avait trop caud (et j'vos asseuthe, Moussieu, que j'n'en n'tais pas la cause). Mais chais jours ch'est une autre histouaithe. Ch'n'est pas la chaleu tchi la gène, mais la mouoillûtuthe. Dans la maison tout est mucre et dans l'gardin y n'y'a qu'des multitudes de limaches, des battalions d'colimachons et des mâsses de taupes.

 

Hier matin ou s'en fut vais s'ou n'pouvait pas trouvé tchique manièthe d'amendé les choses, mais quand ou rentrit ou 'tait trempée, et ses chabots 'taient pliens d'iau. J'l'y dit qu'oulle éthait deu savé mûs et que ch'tait d'sa faute, une r'mérque, Moussieu, tch'empliéthit la situation à un tel dégré que j'men fut d'hors, mais j'n'avais pas travérsé la maintchi du bel quand je m'drotchit, et fut bein près de m'êtravlé tout man long dans une mathe.

 

Dans les circonstances, Moussieu, ou comprenez que j'fit ûsage d'un mio d'langage que j'n'avais pas apprint à l'Ecole du Dimanche, et, malheutheusement la Merrienne m'entendit. Quand j'rentrit ou qu'menchit.

 

1951: Ph'lip au m'sespé

 Ph'lip au m'sespé.

Merrienne tâche de l'rasseûthé.

 

Moussieu l'Editeu,

 

La Merrienne et mé j'avions dêshallé d'vant l'tais pour un brin d'air mais une raide achie d'grille nos avait fait rentré au pûs vite. Une minute de pûs et j'éthions tait trempés jusqu'à la pé.

 

Dans la séthée j'm'étais mint à pensé et quand vint un temps j'dis à la bouonnefemme comme chonna: “As-tu jamais rêfliéchi Merrienne que l'férmyi mène une drôle de vie et que l'férmage est un drôle de mêtchi?”

 

“Ch'n'est pas d'agniet qu'je l'sais,” ou raiponnit. “Pûs d'une fais je m's'y dite que si ch'tait pour r'quémenchi j'gardethais boutique ou tchiquechose de la sorte. Et ocquo je n'sais pas. Quand nous a la férmethie dans l'sang nou n'a pas d'chouaix pour dithe la véthité. Mais tchèsqu'y t'fait m'pôsé chutte tchéstchon-là assêsé?”

 

1951: Merrienne et l'temps

 Merrienne et l'temps.

“Faut Laissi Tout.”

 

Moussieu l'Editeu,

 

“Grand doux d'la vie,” s'fit la Merrienne, en rentrant l'autre arlevée toute trempée, “tchi temps, tchi temps! Man pouore Ph'lip, quandchi qu'j'allons avé bé?”

 

“Quand la Providence voudra nos en envié,” j'l'y dit, “et pas d'vant. Ch'est inutile de s'pliaindre; y faut prendre chen tchi vos veint, et ch'est aussi ben, car si nou pouvait gouverné l'temps, y'en éthait pûs d'mârris que d'contents et tout l'monde s'sait en brit.”

 

“Oh, je n'sais pas,” ou dit. “A ma veue che s'sait ben pliaisant d'pouvé ordonné un biau jour quand nou voudrait. Y m'semblye que tu n'as pas grand avis quand tu pâsle de même.”

 

1952: Merrienne a fraid

 Merrienne a fraid.

Mais Ph'lip la Récauffe.

 

Moussieu l'Editeu,

 

Touos l's'ans, quand veint l'mais d'Novembre, la Merrienne qu'menche à s'pliaindre du temps. Hier au sé, accroupie aupi du feu, ch'tait la même histouaithe. Oulle avait fraid ès pids et des frissons dans l'dos, et ou sait seuze que dans tchiques jours oulle éthait des r'frédeuses ès ouothélles et sûs ses ortets. “Pourchi don tchi faut tchi faiche si fraid?” ou dit. “J'cache le long des jours pour tâchi d'm'êcauffé, mais n'y'a pas moyen. Mets ocquo un couplye d'choutchéts sûs l'feu Ph'lip.”

 

J'obêit, épis, assis confortablyement dans ma grand tchaise ma pipe allumée et la catte sus mes g'nors, j'me mint à considithé tchèque j'poûorrais dithe à la bouonnefemme pour la ravigoté un mio. Quand vint un temps y m'vint à l'idée d'rapp'le à sa memouaithe l'année d'la grande fraid. “Y'a bein d's années d'chonna, Merrienne,” j'l'y dit, “mais j'me r'souveins ocquo que dans les siez s'maines de forte g'lée, tu n'te plaignais pas autant comme tu fais ach'teu quand l'temps touone un mio fraid. Quand v'nait l'sé, et qu'j'éthais voulu resté aupi d'man feu, tu voulais à toute forche t'n'allé jusqu'à la Mathe au Seigneur tâchi de t'rompre l'co sûs la glace.”

 

1957: Merrienne a l's'esprits bas

 Merrienne a l's'esprits bas.

Et Ph'lip en souffre.

 

Moussieu l'Editeu,

 

“Tchi temps, tchi temps, man pouôre Ph'lip,” la Merrienne s'êcriyit. “Quandchi qu'nou vêrra un mio d'bé? Ch'est achie sûs achie de nuit et jour, et des vents continuels tchi n'ont qu'd'abattre la maison. Des mathes d'eau partout et la têrre si mouoillie qu'nou n'peut pas y touchi. Ch'est assez pour vos faithe pérdre la tête.”

 

J'tiomes à dêjeuné, Moussieu, et dehors il en tchiyait à vérse. J'avais dêshallé une dém'ieuthe devant pour soigni les bêtes, et j'avais veu les poules accroupies dans la seule cârre du poulaillyi ouèsque l'iau n'lûs tchiyait pas sûs l'co. J'pensit à mé-même que la Merrienne n'avait pas grande éspethance de ramâssé hardi d'oeux souos chais conditions-là.

 

1957: Des r'frédeuses au Portinfé

 Des r'frédeuses au Portinfé.

 

Moussieu l'Editeu,

 

Siez nous l's'affaithes ne vont pas trop bein, car à qu'menchi le temps fraid à tréjous yeu l'êffet d'méttre la Merrienne d'une humeur de tchan, épis mé, mes vieilles gambes me font si ma que j'ai d'la peine à marchi, et don me v'là assis aupi du feu le long des jours quand j'dév'thais être dehors.

 

Il est vrai, Moussieu, que s'y forchi de traithe les vaques deux fais par jours et d'lûs donné d'la mangeaille, mais quant à mes deux vrégies d'navets tchi dév'thaient être à l'abri, y peuvent résté ouèsqu'y sont pour le moment, et s'y gélent et pouôrissent pûs tard, eh bein tant pièthe.

 

La Merrienne a des r'frédeuses sûs touos ses ortets et ses deux ouotheilles, sans pâslé du but du néz, et avant-hier ou fut bête asséz de s'méttre à faithe des mérveilles sans s'être asseûthée que la mé d'vallait. Oh, grand doux, tchi pité!

 

1957: Merrienne et san lavage

 Merrienne et san lavage

Ep[i]s l'Nouviau Président.

 

Moussieu l'Editeu,

 

La pouôre Merrienne est bétôt au m'séspé, car, le temps est si mucre, jour après jour, qu'ou n'peut pas faithe san lavage, et y'en a une pile ach'teu dans la lav'thie tchi rempliethait un hérnais-à-l'êclon. J'y'ai dit qu'oulle étha à avé d'l'aide, mais ou n'veur pas, car ou maintchein que l'travas ne s'sa pas bein fait s'ou n'le fait pas y-même, et p't'être qu'oulle a raison, car la dérnié fais qu'oulle emplîyit une vieille Bretonne, j'n'avais pas une quéminse tchi n'tait pas présque en télle, et quant ès cotillons à la bouonnefemme, ch'tait ocquo pièthe. Ou dit que si l'temps continue ou d'mand'da au Recteur, quand il étha fini d'prié pour la Famille Royale, d'ajouôté tchiques mots pour une semaine de temps sec.

 

Mais au sé, quand oulle est à se r'pôsé dans sa grand'tchaise, ou se r'met à pâslé d's'Etats et des drôles de choses tch'y font d'nos jours dans l'Assembliée. Hier, par exemplye, ou voulit savé pourtchi que l'Comité du Tourisme avaient donné lûs dêmission, et tchèsque le Sénateur Rumfitt avait fait pour avé tait mint à la porte.

 

1956: Merrienne n'aime pas les shows

 Merrienne n'aime pas les shows.

Et surtout les boeux.

 

Moussieu l'Editeu,

 

Je n'sommes pas d'trop bouonne humeur chais jours, la Merrienne et mé, et par conséquent n'y'a ni paix ni trantchillité dans la maison. Sans autchune doute ch'est les vents d'Est, mais étout j'ai tréjous r'mertchi que quand veint l'temps des shows d'bêtes je s'y mârri d'n'avé rain à montré pour gâgni yunne ou deux d'chais belles coupes tchi s'en vont ichin et là dans la pâraisse année par année. J'comprends que chutte fais y'en a une nouvélle pour la miyeu vaque briédée par l'exhibiteur, mais la seule que j'pouôrrais montré ch'est la Pride of Portinfer tch'a djais-neuf ans et qu'a l'piéchot si dêspendu qu'les trans touchent prèsque à têrre.

 

1956: Le Budget et l'Député Cyril

 Le Budget et l'Député Cyril

Ph'lip et sa bordeuse.

 

Moussieu l'Editeu,

 

J'pense bein que ch'n'est près que pas la peine de vos dithe qu'mes patates dans la bordeuse ont tait salement fricashies par l'obgelée. Quand j'dêshallit l'autre matin, tout tait bianc et j'vit bein que ch'tait une affaithe fichue pour le moment.

 

“Je t'l'avais dit,” s'fit la Merrienne, quand j'rentrit pour dêjeuné. “Tu'éthais deu attendre ocquo une bouonne semaine d'vant plianté, mais nânin, tu savais mûs, et ach'teu ouèsque tu'en ès?”

 

Les femmes sont d'même, Moussieu, et chein tch'y dév'thaient avé par bordée che s'sait une raide paffe pour lûs apprendre à taithe lûs béque. Mais la seule fais, et y'a bein d's'années, que j'en fliantchit yunne à la Merrienne j'attrapit un coup d'cast'role sûs l'haut d'ma tête tchi m'n'encouathuit pas une répétition. Ch'n'est pas la peine, après tout, d'avé du brit avec une femme tch'y tappe si du comme la Merrienne.

 

1956: Merrienne a deux raisons

 Merrienne a deux raisons.

Ph'lip est d'accord.

 

Moussieu l'Editeu,

 

D'pîs la fin d'la s'maine pâssée la Merrienne avait tait roupillieuse comme tout, et j'n'ôsais prèsque l'y dithe un mot, car toutes les fais que j'êprouvais ou m'dîsait de taithe ma béque et de n'l'embête pas. Mais, ma fé, hier au sé, ayant liut la gâzette, ou la mint bas, et me d'mandit comme chonna. “Peux-tu m'dithe, Ph'lip, pourtchi que d'nos jours les gens n'peuvent pas s'accordé?”

 

“Damne,” j'l'y dit, “tu m'pôse une tchéstchon là, mais faut dithe que ch'est l'temps.”

 

“N'sais pas si achocre,” ou dit. “Nous admét que l'temps est bein êprouvant, et je l'sais bein, car je n'peux pas dêshallé d'hors pour soigni la volaille sans avé les pids trempés, et hier arlevée j'faillit de tchulbuté tout man long dans une mathe d'iau. Mais pour chein tchi s'arrive nou n'peut pas tréjous bliaumé l'temps. E'r'garde, par éxemplye, les louagiers des Etats tch'y sont en brit et nou n'peut pas savé pourtchi.”

 

1956: Ph'lip est piethe que jamais

 Ph'lip est piethe que jamais.

Tchiques mots sus l'Election.

 

Moussieu l'Editeu,

 

J'vos avait dit la s'maine passée que j'avais attrapé ma dans l'dos parsque la Merrienne m'avait forchi de transporté ma pliante de l'êtablye à sous la tchérquethie, sa raison étant qu'les patates 'taient trop gérmées. La djobbe me print prèsque deux jours et j'pensais que ch'tait fini, mais malheutheusement nouffé.

 

Dîmanche au sé la bouonnefemme r'mértchit que l'temps avait touône fraid, et quand vint Lundi ou s'abriyit et s'en fut vais si la s'menche enhannait. En r'venant ou n'dit pas grandchose, mais dans l'mitan d'la niet, ou m'donnit un raide coup d'coude dans l'dos tchi m'revillyit tout-d'suite.

 

1955: La résignation du comité

 La résignation du comité.

Merrienne pose des Tchestchons.

 

Moussieu l'Editeu,

 

Quand j'm l'vit Jeudi matin j'vit que l'vent avait abattu trais d'mes viers pommiers. J'rentrit pour le dithe à la Merrienne.

 

“Ch'est dommage pour le Mûsé d'Boeu,” ou dit, “car y n'en reste pas hardi en Jêrri. Quant au p'tit Rom'thi, y'en étha ocquo assez pour faithe un mio d'nier-beûrre, mais je r'grétte que l'Nier Binet est bas, car ch'est une bouonne pomme pour du pâté. Enfin, y faut craithe que ch'est tout pour le mûs, car tu pouôrras t'mettre à scié du bouais. Y m'faudra des fagots et des chouques ch't'hivé, et n'y'a pas miyeu pour brûlé que l'bouais d'pommyi. Tu n'as pas grand'chose à faithe chais jours et tu f'thas mûs de qu'menchi d'main, si l'temps est assez bé.”

 

1955: La vie au Portinfé

 La vie au Portinfé.

 

Moussieu l'Editeu,

 

La vie est bein duthe ichin, chais jours, car la Merrienne et san gardin m'fichent la bile. Y'a tchinze jours, comme j'vos l'avais dit, ch'tait les limaches tch'envaissaient l'gardin, et ch'te mé tch'avais à me l'vé dans les p'tites heuthes et m'n'allé avec ma vieille lanterne, ramâssé les chentaines de limaches tchi'taient en train de dêtruithe les lédgumes et les flieurs, mais ach'teu que l'temps est sec, je s'y forchi par la bouonnefemme de méttre un couplye d'heuthes touos les siers à arrôsé avec des boutchéts qu'j'ai emplyi à la pompe dans l'bél.

 

J'ai biau l'y dithe que n'y'a prèsque pûs d'iau dans l'pûs, et qu'man vier dos qu'menche à cratchi ichin et là; ou n'en tcheint autchun compte. Tout ch'qu'ou m'dit ch'est d'me dêpêchi, et surtout d'n'oublié pas ses gérémiennes d'hivé. Moussieu, comme j'vos l'ai dit, la vie est duthe, et j'donn'nais tchiquechose pour une bombe tchi f'thait volé l'gardin et tout ch'qui contient jusqu'à la Rocco.

 

1955: Ph'lip va ès courses.

 Ph'lip va ès courses.

 

Moussieu l'Editeu,

 

Tout va bein siez nous et j'éspèthe que chonna s'en va continué, mais je n'm'y fit pas trop car, si jamais y'a yeu une githouétte dans la noblyi pâraisse de Saint-Ou ch'est ma bouonnefemme.

 

Pour vos dithe, au qu'mench'ment d'la s'maine y m'vint une envie d'allé ès courses Jeudi, ch'est-à-dithe hier, mais je n'savais pas comment m'prendre pour pérsuadé la Merrienne qu'après tout l'travas que j'avais fait dans san gardin j'mithitais un p'tit holiday. Epis, Mardi matin, quand j'tais en train d'mettre les vaques dehors, y m'vint une supérbe idée, et après l'tais, viyant qu'ou tait tout-à-fait trantchille et compôsée, je m'décidit de mettre man plian à l'êpreuve.

 

“Merrienne,” j'l'y dit comme chonna, “sais-tu qu'j'ai caltchulé le nombre de limaches que j'ramâssit l'autre semaine dans tan gardin, et l'nombre de boug'tées d'iau que j'y'ai porté dérnièthemen.”

 

1979: Mémouaithes du temps jadis

 Mémouaithes du temps jadis

 

Trenton,

Michigan,

U.S.A.

 

Lé 27 d'octobre, 1979.

 

Moussieu l'Rédacteu,

 

Comme j'vouos l'disais la s'maine pâssée, les fielles dé bouais tchaient partout dans chu vaîthinné ches jours et l'temps c'menche à nouos annoncer l'arlévée d'l'hivé. Ch'est drôle qué v'la tchi m'donne des pensées d'Jèrri, car la scène ichîn est tout-à-faite difféthente à la cheinne dé l'arrivée d'l'hivé en Jèrri. Ichîn, ch'est dans un air quâsi silencieux qu' nou vait les fielles tchaie, et la fraid est pus secque. I' m'sembl'ye qué l'vent est pus violent en Jèrri et l'air pus à la plyie. Ch'est p't'-êt' viyant qu' man vièr Ménage est sus l'haut des Landes et pus à l'înjuthe du temps. Ichîn, j'sis pûtôt à l'abri d'grands bâtisses et d'rues plieines dé maîsons bâties côte-à-côte.

 

Beintôt, probabliément l'préchain mais, la né s'en va faithe sén appathence et tout s'en va êt' blianc. Les bouais (un tas éthont pèrdu les fielles) f'thont un mangnifique spectacl'ye tchi m'fait tréjous penser ès portraits d'hivé qu' nou vait sus les cartes d'Noué. Et la né m'rappelle les hivièrs pâssés au Cannada, dévant m'en v'nîn d'meuther en Améthique, quand la fraid 'tait si extrême qué j'eus l's ouothelles g'lées dans eune tempéthatuthe dé quarante dégrés en d'ssous d'zéro Fahrenheit. Pourtant, chutte fraid-là et l'hivé n'étaient pon aussi pénibl'yes comme un hivé dans l'camp d'batâle en Flandre à la dgêrre dé 1914-18, où'est qu' vent, plyie, pité, “obus” et balles d'arme et d'can[on] pathaîssaient s'associer à faithe la vie minsèthabl'ye.

 

2011: Lettre Jèrriaise

 Lettre Jerriaise Lundi 28 de Novembre 2011.

 

Acquo une fais ch'ést auve grand plaisir que me r'vela Clifford Laisney a vos presenter mes pensées aniet lundi l'28 de Novembre 2011.

 

Ne v'la deja un mais qu'javons erterdgi l's houolouges, les heûthes de lumiere d'jour sont limitées, et dans trais s'm'naimes j'aûthons arrivé au pus court jour de l'année. Couomme
tchi qu'el l'temps s'passe. Dans parichin, j'avons rejoui d'un autonme doux et calme, pas
d'grands tempêtes, mais une écarcite plyie, resûltant en deficit d'ieau dans les reservoirs
necessitant l'engagement de la station tchi convertie ieau d'mé a ieau fraiche.

 

1963: Un jour d'Êté

 Un jour d'Êté

Ph'lip va ès courses

 

à Portinfé,

Saint Ou.

 

Moussieu l'Editeu,

 

Oh mais, tchi bieau jour agniet! Vraiement, le preumié jour de l'êté! Si j'avais yeu même vîngt ans d'mains, j'éthais 'té d'hors à jour et j'n'éthais pas rentré sinon pour mes r'pas, quand j'n'éthais pas peut y vaie. Tchi malheur, Moussieu, d'être si faillyi de n'pouver pas seulement sorti d'la maison du temps tchi fait! Dehors les ouaisieaux chantent à lûs câsser la gorge et toute la natuthe se rêjouie. I' n'y a que le pouôre vièr Ph'lip tch'est, comme nou pouôrrait dithe, en prison. La Merrienne, tch'est ocquo solide sûs ses gambes, a pâssé san temps dans l'gardîn, et j'l'ai entendue plusieurs fais se sérvi de langage, en d'mandant à la Providence de dêtruithe les taupes, que j'si seux que nou n'trouv'thait pas dans autchun dictionnaithe respectablye. I' pathaît que l'bieau solé a fait les sales bêtes deshaller en mâsse. Comme ou s'fait, “ch'n'est pas seulement les pèthes et les mèthes, mais un fliantchet d'mousses, sans compter les couôsins et tout l'restant d'êtchu!”

 

Dans ma bordeuse les patates s'enviennent à ch'teu', et nou pouôrrait les houetter mais, quant à mé, j'n'en ai pas la forche, et la Merrienne, têtoigne qu'oulle est, r'fûse absolûment de s'y mettre.

 

1963: Les grandes mathées

 Les grandes mathées

- Et le budget

 

à Portinfé,

Saint Ou.

 

Jeudi au sé.

 

Moussieu l'Editeu,

 

La Merrienne est d'mauvaise humeur à ces sé et sûs un sens ch'n'est pas êtonnant. À matin le temps était superbe, mais au moment ch'est bein difféthent. Nou n'peut pas dithe d'un jour à l'autre si nou pouôrra s'mettre à plianter des patates tch'éthaient deu être souos la têrre y'a siez s'maines. Nou pâsle tchiquefais de drôles de saisons, mais j'en avons yunne ch't' année, sans autchune doute.

 

Mais dans ma bordeuse les patates merquent le rang, et si l'temps permet, dans une semaine ou deux l'pouôrrai les houetter. À bein des bords, dans la nèthe têrre, les patates s'en veinnent à grands pas, mais dans d'autres districts i' n'ont pas germé comme de couôtume. I' n'y a pas d'prêsse pour les tomates en saison, mais j'ai ouï qu'à pûs d'un bord les pliantes ont g'lé au l'vage, et il a fallu s'mer pour une deuxième fais. Décidêment, Moussieu, la vie d'un tchultivateur de nos jours en Jèrri a ses mauvais moments.

 

La grande mathée est v'nue, et a pâssé, sans faithe grand tort autchun bord, mais j'me r'souveins de plûsieurs occâsions quand les grandes mathées, poussées par des forts vents d'ouest ou sud-ouest, ne pâssaient pas si trantchillement. J'ai veu, dans man temps, trais pids d'ieau sûs la Route des Milles, et j'ai ouï pûs d'une fais qu'en Ville et l's envithons y'avait des routes tchi 'taient compliètement impâssablyes. Les vielles gens de par ichin ont une tradition étout que dans une têrriblye tempête tout l'Vau d'la Mathe fut envahi, et qu'les gens allaient à la pêque au bas du Mont Mattyi et l'Mont Rossignô, mais ch'est p't'être une exaggerâtion.

 

1973: Ottawa

 Ottawa

 

Ottawa, Ontario,

Cannada.

 

Lé 24 novembre, 1973.

 

Moussieu l'Rédacteu,

 

Ichîn, à Ottawa, j'ai d'la peine à craithe qué j'sis dans la mème ville dans tchi j'arrivînmes, man fréthe Fraînque et mé, y'a chînquante-quatre ans chu mais. J'm'èrsouveindrai tréjous du viage d'Angliétèrre à Halifax, dans La Nouvelle Êcosse, en Novembre, 1919, dans l'grand baté “Empress of France” dé la Compangnie Cannadgienne Pacifique. J'tions dans l'fond du baté - lé “steerage” comme il' appelaient la traîsième clâsse dans chu temps-là - et la mé 'tait si rude dans l'Atlantique qué jé n'feûnmes pon alloués sus l'pont duthant trais jours du pâssage tchi duthit eune sémaine, et la grand' partie des pâssagièrs 'taient malades comme des tchians.

 

1960: I' fait fraid au Portînfé

 I' fait fraid au Portînfé

Des verres cauds remplièchent le tais

 

Au Portinfé.

Jeudi au sé.

 

Lé 14 dé Janvyi, 1960.

 

Moussieu l'Editeu,

 

Grand doux, Moussieu, tchi temps! La Merrienne et mé, jé sommes friyeux par natuthe, et au moment j'avons touos les deux attrapé une raide suée d'fraid. De jour ch'est embêtant assez, mais de niet ch'est bein pièthe, car la bouonnefemme toûsse continuellement, et mé j'êternue pour li garder compagnie.

 

Mais, ch'n'est pas tout, car les poules à la Merrienne ont attrapé des maux-d'gorge, et l'vièr coq est affligi étout et n'chante pas. I' n'fait pas seulement la cârre à ses femmes, chein tchi prouve tch'il est bein malade, car ch'n'est pas là s'n habitude.