1924: Une semaine ou deux d'vant Noué

 Une semaine ou deux d'vant Noué, j'adonni à être un jour à la campagne siez un jeune fermi de mes amins.

 

Je n'm'en vaie pas vos dithe san nom, car si j'faisais ditet, jamais sa femme et li ne n'pardon'naient.

 

Mais i'faut que j'vos raconte chein qui s'passi chu jour-là, et la dispute qu'i'y eu alentou d'un lard que l'homme êtait en traîn d'saler.

 

Sus un sens j'aithais aimé bain mus n'être pas mêlé dans lus difféthents, mais ou viyiz j'avais ouï pâler qu'ils avaient tué le jour de d'vant et je pensi que si je m'trouvais là comme par accident i' y aithait p't-être un chance d'en rapporter un p'tit gobin à la maison.

 

1931: Ch'n'est pas souvent que j'avons l'honneur de vaie notre amin Laiesse Ernon

 Ch'n'est pas souvent que j'avons l'honneur de vaie notre amin Laiesse Ernon dans not'e bureau.

 

Ch'est un homme qu'a hardi d'travas à faithe siez-li et i'vaint en ville à de bain rares occasions. La “bus” du J.M.T. passe au but d'sa cache et Râchelle, sa femme, en prend avantage pour venin faithe ses commissions touos les Samedis, laissant s'n homme à la maison à souogni des bêtes et survillyi tout san travas.

 

Mais l'aut'e jour, Laiesse li-même vint nos payi une visite.

 

Dès qu'il entri je nos aperchûmes bain que tchiquechose l'avait contrarié. Il 'tait bain pus sérieux qu'd'habitude, chein qu'i' fit le Chef li d'mander si y avait tchiquechose qui n'allait pas bain.

 

“Oh!” qu'i' dit, “tout va bain avec mé, sus un sens, mais je sis v'nu vos dithe que quand j'vivrais oquo chinquante ans, jamais j'ne r'servithai sus un Jury!”

 

1959: La bordee d'nièr beurre

 L'Assembliée d'Jèrriais

La bordee d'nièr beurre

 

Pour la preunmié fais dépis qu'L'Assembliée a 'tait fondée, lé Conmité Exétchutif, sous la présidence du Sieur H. M. Gibaut, ont arrangi eune Séthée d'Nièr Beurre.

 

Mais ch'n'est pon seul'ment d'la séthée qu'faut penser! ch'ait l's arrangements et immenses prépathatifs, qu'i'y avait à faithe dévant. Preunmiéth'ment, fallait trouver les pommes, lé cidre, etc., et, bein important, eune pliaiche grande assez et conv'nablye pour acc'moder lé grand nombre de membres qui 'taient touos si prêts à aidgi à faithe lé travas, et auprès de jouaindre dans l'révillon et amusement. Ch'fut eune grande entréprinse, mais auprès qu'les preunmiéthes diffitchultées fûdrent surmontées, l'affaithe marchi comme sus roulette!

 

Comme ch'n'allait être eune occasion unique dans l's annales de L'Assembliée, i' fut décidé dé prendre un “film” pour l'aver comme un r'cord pour lé temps à v'nin. Les preunmièrs portraits fûdrent prins à la tchil'lie d'pommes à la fin d'octobre, siez l'Chentn'yi Henry Le Feuvre; auprès i'y n eut d'autres de prins quand l'cidre fut fait siez l'Sieur Le Cornu, à St. Louothains étout.

 

1959: Le tourisme, les ormérs et l'Eisteddfod

 Le tourisme, les ormérs et l'Eisteddfod.

 

Moussieu l'Editeu,

 

Le temps par ichin est bé et caud dans l'jour, mais dans la niét y fait grand' fraid. Ou trouv'thez drôle que dans les circonstances la Merrienne n'se pliaint pas, mais oulle est rêjouie parsque dans san gardin les tiulipes s'en veinnent, et, comme ou dit, de niét si deux pérsonnes dans l'même liét n'peuvent pas s'gardé cauds ch'est manque d'êprouvé, et, Moussieu, sûs chu point-là, oulle a raison.

 

Oulle est bein intérêssie chais jours dans chein qu'la gâzette rapport entouôre le Tourisme. Dans s'n'idée les gens à la tête n'savent pas trop bein tchèsqu'y font. Par éxemplye, ou n'approuve pas du tout d'chutte visite en Italie, car ou dit qu'les Italiens n'ont pas valu quatre sous dépis l'temps du fameux César, et qui si l'Comité du Tourisme avait voulu donné une coupe couôtant pûs d'souësante louis, et envié un tchétchiot décoré tchiquebord, ils éthaient deu chouâsi tchique piéche en Anglietèrre.

 

1951: Les d'vis du Bouan'homme George

 Les d'vis du Bouan'homme George.

 

“Ioù qu't'en vas ?” j'dis à Simon Lé Sbithé l'aut' jour comme i' passait par siez nous.

 “Eh bein,” i' m'dit : “J'm'en vais jusqué siez l'Connêtabl'ye vaie s'i' connaît un machon tchi pouorrait v'nîn m'bâti des cottes à couochons !”

 “Man pouor' garçon,” j'lî dis : “Jé n'crai pon qu'l'y-'en à d'nos jours, dé machons ! Si j'tais a ta pliaiche, j'bâtithais des cottes en bouais. Tu trouv'thas ocouo tchiques tchèrpentchièrs par les c'mîns !”

1958: Ph'lip et Merrienne

 Ph'lip et Merrienne

 

Moussieu l'Editeu,

 

La Merrienne avait 'tait longtemps à lièthe la gâzette. Quand, au but d'une heuthe, ou d'même, ou la mint bas, j'm'apérchut tout-d'suite qu'oulle avait liut tchiquechose qu'ou n'avait pas trop bein comprint.

 

“J'veins d'lièthe la léttre de man couôsin, le Ken Richardson,” ou qu'menchit, “et j'voudrais savé tchèsqu'il a dans l'idée. Des léttres, des réunions et je n'sais pon tchi. Dis-mé, si tu peux, tchèsqu'y veur? Mais j'pense bein que tu n'est pas pus savant qu'mé.”

 

“Si fait, ma vieille,” j'l'y dit, “car je comprends l'idée tch'il a dans sa tête. Y voudrait qu'les férmiers éthaient un mio d'aide des Etats d'l'Ile.”

 

“Continue,” ou s'fit.

 

1958: Ph'lip fait Merrienne mârri

 Ph'lip fait Merrienne mârri.

Mais après tout va bein.

 

Moussieu l'Editeu,

 

Lundi matin je r'chut une léttre de ma banque me dîsant que l'gérant voulait m'vais aussi vite que possiblye. J'la montrit à la Merrienne, et ou m'dit que je f'thais mûs de prendre la bus le préchain matin, et d'allé à la banque pour savé tchèsqu'y voulais. “De tchi tu'as peux?” ou d'mandit. “Y n'te tuôthant pas, man pouôre Ph'lip. Veur-tu que j'y'aille, mé, à ta pliéche?”

 

Moussieu, j'fut bein près de dithe oui, mais j'vint à pensé tout-d'suite que la Merrienne pouôrrait s'mârri une fais à la banque et après avé entendu chein qu'le gérant avait à dithe, et si chonna s'arrivait ou tait capablye d'en dithe bein trop long et d'agravé la situâtion, ch'est pourtchi j'l'y dit que j'tait mé et pas l'yi qu'la banque voulait vais, et donc Mardi matin j'm'en fut, et ma fé, je n'men r'dêshallit pas mal. Tout ch'que j'ai à faithe d'ichin à Nouë ch'est de n'dépensé pas deux sous quand yun pouôrrait faithe, et de m'fié sûs mes brécolis, tchi s'en veinnent à tic-de-corps pour mettre tchiques hérpins dans ma pouchétte bétôt.

 

1952: Le fermyi et les visiteurs

 Le fermyi et les visiteurs

Merrienne d'mande une tchestchon.

 

Mêcredi, la Merrienne s'en fut en ville pour accaté une pathe de cauches, et étout pour tâchi de trouvé tchique amin tch'y pouôrrait y'êpêigni une livre de tais, ou même deux. Car, pour dithe la véthité, Moussieu, tant pûs qu'le temps va, tant pûs d'tais qu'ou bé, et oulle est souvent à court. J'ai biau l'y dithe qu'à l'âge qu'oulle a tout chu tais n'l'y vaut rain, et not' docteu s'est lâssé d'la m'nichi d'la maladie qu'ou risque, ou reste têtoigne, et ch'est des tâsses de tais d'la premié chose le matin jusqu'à l'moment quand ou décide tch'il est temps d'allé s'couochi.

 

Ach'teu, quand ou r'vint l'sé, il est vrai qu'ou rapportit un quart de livre de tais, mais étout ou rapportit une humeur de tchan.

 

“Jamais dans toute ma vie,” ou s'fit, “ai'je tait si boustchulée comme tch't'arlevée dans la Rue d'Drièthe. Si j'êprouvais l'mitant d'la route, y'avait une rangie d'môteurs tchi m'faisaient m'dêcarré ben vite, et sûs l'pavé j'attrapais des coups d'coude dans les côtes et des co-d'pids sûs la g'ville du pid, sans paslé d'insultes en angliais pour ne bouogi pas pûs vite. J't'asseuthe, man Ph'lip, que nou n'me r'vêrra pas en ville jusqu'à chen qu'touos chais fichus vîsiteurs s'saient hors. Ch'est abominablye, et, après tout, tchèsqu'y nos valent?”

 

1952: Ph'lip va a un dîné

 Ph'lip va a un dîné.

Et paie pour.

 

Moussieu l'Editeu,

 

J'ai une histouaithe à vos raconté. L'autre sé, ayant tait invité par un amin, tch'eut la bonté d'péyi pour man titchet, j'fut à un dîné. Je r'vint un mio tard dans un môteur, et la Merrienne, dans sa qu'minsole d'scendit pour m'aidgi à ramonté les d'grès. Ach'teu, n'allez pas craithe, Moussieu, que ch'tait chen qu'j'avais bu tch'avait empêchait mes gambes de fonctionné comme de couôtume, car, comme ou l'savez, j's'y un homme tempéthant. Sans doute ch'tait la sauce tchi fut servie ôv le paisson, car oulle avait un drôle de gout.

 

Je n'dormit pas trop bein, et quand vint l'matin j'avais grand ma à la tête. Je n'voulais pas me l'vé, et même quand la Merrienne m'apportit une tâsse de tais, j'eut bein d'la peine à m'dêshallé de souos les lincheurs. Ma pouôre tete battant comme si y'avait tchitchun à capuchi d'sûs avec un marté. Oh, j'vos asseuthe, Moussieu, que j'souffrais.

 

1957: Le centenaire des Trais Paraisses

 Le centenaire des Trais Paraisses.

Ph'lip est en dêtresse.

 

Moussieu l'Editeu,

 

Quand je r'vint du Show au Mêcredi au sé, et que j'dis à la Merrienne que j'avais veu la pûs belle vaque tch'avait 'tait montrée dans la s'maine, et qu'oulle appartenait à Gerald Richardson, ou s'fit. “Ah, j'en s'y bein contente, car ch'est ocquo yun d'mes couôsins, du bord de san péthe, mais avec chonna, Ph'lip, y'a ocquo l'Show des Trais Pâraisses, et n'ou m'a dit que y'a au mains trente jeunes vacques à Saint-Ou. Tchèsqu'y t'a dit que n'y'étha pas tchiquechose de miyeu dans chu lot-là. Après tout, Saint-Martin est une bouonne pâraisse, mais Saint-Ou n'est pas tchan.”

 

“Ne t'y fie pas, ma vieille,” j'l'y dit, “car y faudra tchiquechose d'éxtra pour gâgni l'championnat, et jé doute hardi que j'trouv'thons chonna ichin. Mais j'ai ouï étout que l'Sieur Brée, d'Grouville, à idée de r'montré sa vaque qu'à dêjà fait l'championnat trais ou quatre fais, et jamais n'ou n'sait. Mais y'a une chose tchi faut que j'te diche, Merrienne, ch'est qu'à touos les shows jusque ichin, y'a yeu un raide bouon r'pas. Vèthe, damme j'ai bein mangi.”

 

1957: Des r'frédeuses au Portinfé

 Des r'frédeuses au Portinfé.

 

Moussieu l'Editeu,

 

Siez nous l's'affaithes ne vont pas trop bein, car à qu'menchi le temps fraid à tréjous yeu l'êffet d'méttre la Merrienne d'une humeur de tchan, épis mé, mes vieilles gambes me font si ma que j'ai d'la peine à marchi, et don me v'là assis aupi du feu le long des jours quand j'dév'thais être dehors.

 

Il est vrai, Moussieu, que s'y forchi de traithe les vaques deux fais par jours et d'lûs donné d'la mangeaille, mais quant à mes deux vrégies d'navets tchi dév'thaient être à l'abri, y peuvent résté ouèsqu'y sont pour le moment, et s'y gélent et pouôrissent pûs tard, eh bein tant pièthe.

 

La Merrienne a des r'frédeuses sûs touos ses ortets et ses deux ouotheilles, sans pâslé du but du néz, et avant-hier ou fut bête asséz de s'méttre à faithe des mérveilles sans s'être asseûthée que la mé d'vallait. Oh, grand doux, tchi pité!

 

1957: Un mio d'gâche au Portinfé

 Un mio d'gâche au Portinfé.

Et un problème à la Trin'té.

 

Moussieu l'Editeu,

 

'Les patates ayant r'print du prix un mio chutte semaine', la Merrienne me dit hier au sé que y'éthait p't'être une chance d'un mio de g'lée sûs notre pain pour tchique temps, et même p't'être un gobin d'gâche par bordée. Chein tchi la gène, ch'est qu'les carpélleuses sont dans les grouaisilliers, et les gradilliers, et comme ou s'fait. “Quand à la g'lée, si chais sales bêtes-là continuent lûs d'gats, y faudra en accaté, Ph'lip, et tu n'en vêrras pas sûs la tablye touos les jours.”

 

“Donne-mé du gras lard et des patates,” j'l'y dit “et tu peux gardé ta g'lée et même ta gâche. Et pour bein que y'aie moyen d'faithe yunne ou deux bârriques de cidre pûs tard, je n'enhenn'nait pas. Le rom'thi a bein flieuthi, et y dév'thait y'avé asséz d'pommes.”

 

“Quant à mé, tant mains, tant mûs,” ou dit. “Donne-mé du tais, chonna vaut bein mûs.”

 

1953: La decision d's'Etats

 La decision d's'Etats.

 

Quand je r'vint d'la ville Mardi-au-sé, j'trouvit la Merrienne bein lassée. Ou qu'menchit par me dithe qu'on n'en pouvait pûs.

 

“Presque tout l'jour,” oulle ajoûotit, “j'ai tait sûs mes pids à lavé, nétti et éscrobbé chais fichus ormers. La prechaine fais qu'tu m'en apporte, Ph'lip, tu peux t'fié que che s'sa té qu'étha la djobbe, car quant à mé j'en ai plien l'dos et mes vieilles gambes sont à maintchi paralisées.”

 

“Vèthe, mais, Merrienne,” j'l'y dit, “tu m'avais promint un fricot d'ormers pour man tais et des crêpes étout. Tu n'veux pas m'dithe que chonna n'est pas prêt?”

 

1956: Dîner Annuel

 L'Assembliée d'Jèrriais

Dîner Annuel.

 

Pour lé 4ième dîner dé l'Assembliée d'Jèrriais, les membres sé trouvîtent à l'Hotel dé la Belle Etoile, St. Jean, Vendrédi au sé, lé 27 janvyi. Lé temps n'tait pon propice, car i'y avait eune vilaine biâse, épaisse comme des ridgeaux, ché qui fît qué n'ou 'tait content d'arriver, enfin, en veûe d'la Belle Etoile, car, pour en dire la vérité, i n'y en avait pas ieune dé vîsiblye dans tout l'firmament!

 

Tchi bouanheur dé s'trouver dans un hôtel si confortablye, si bein écliairé et bein cauffé. Tchi pliaisi d's assière à des tablyes joliment dêcorées en rouoge et blianc, auve des flieurs étout, et des rangies d'chandelles tout l'long des tablyes!

 

1953: Des visiteurs à la Ville Bagot

 Des visiteurs à la Ville Bagot.

La Pouore Lîsabé.

 

Moussieu l'Editeu,

 

Hier arlevée, la Merrienne, fut vais sa couôsine, la Lîsabé, tch'y d'meuthe à la Ville Bagot, et souffre hardi du lumbago en hivé, et ou r'vint avec une histouaithe tchi m'fit prèsque crevé d'rithe. Ecoutez que j'vos raconte.

 

“Ah, la pouôre fille,” ou qu'menchit, une fais qu'oulle avait hallé san bonnet et mint l'ticlye sûs l'feu. “Jamais tu n'craithais la vie qu'ou mène chais jours.”

 

“J'avais ouï,” ou continuit, “qu'oulle avait print deux couplyes pour un tchinze-jours, et j'avais pensé à mé-même, qu'oulle tait bein bête, à s'n'âge, de s'embêté d'chais vîsiteurs. Après tout, ch'n'est pas comme si oulle avait besoin d'sous.”

 

1956: Merrienne et san crabaco

 Merrienne et san crabaco.

Ph'lip est d's'appointé.

 

Au Portinfé,

Jeudi-au-sé.

 

Moussieu l'Editeu,

 

Chutte semaine j'ai yeu du troublye et un grand d's'appointment. Ecoutez que j'vos diche.

 

J'n'ai pas besoin d'vos dithe que j'avais toute intention d'allé à la Salle Parouaîsiale Mécredi au sé, car j'm'attendais qu'y éthait un mio d'feu satchi, et surtout j'voulais vais si m'n'amin, le Jack Syvret, d'Saint-Pierre s'sait là et éthait tchiquechose à dithe.

 

Mais malheur: Mardi, pour san soupé, la Merrienne avalit une bouonne maintchi d'un gros crabaco, tchi d'vait p'sé au mains sept à huit livres, avec une assiétée d'beurrées et je n'sais pas combain de tâsses de tais. Par conséquence, dans les trais heuthes la v'la en grande dêtrésse. Ou voulait à toute forche que j'îthais chérchi l'docteu, car ou 'tait seuze que s'y ne v'nait pas vite ou n'pâssait pas la niet.

 

1953: Ph'lip est incredule

 Ph'lip est incredule.

Mais Merrienne sait mus.

 

Moussieu l'Editeu,

 

Avant-hier au sé, la Merrienne, méttant bas sa couôtuthe pour un instant, me d'mandit si j'avais pensé que dans une djaizaine de jour sou d'même, j'éthais à plianté mes shâllottes. “Ch'est tréjous l'pûs court jour de l'année qu'nou fait chonna,” oulle ajouôtit, et y n'faut pas oublié.”

 

“Chonna, Merrienne,” j'l'y dit, “ch'est du gniolin du temps pâssé. Tchi difféthence qu'une semaine ou deux peuvent faithe à chutte saison morte? A un mio d'bouon sens ma vieille?”

 

“Ch'n'est pas du gniolin dutout,” ou dit. “N'y'a qu'un jour dans l'année pour les plianté si sont pour faithe bein, et y faut les laissi en terre jusqu'au vingt-quatre de Juin. Y'a tchiques années tu tais tchinze jours en r'tard, et l'ver se mint d'dans, et j'perdîmes presque tout. Y n'faut pas craithe que n'y'avait pas bouonne raison pour chais vieilles couotumes. Les vieilles gens savaient bein des choses que l'monde d'ach'teu ont oublié, mais mémée m'avait apprint qu'nou n'pouvait pas s'fichi d'la natuthe.”

 

1956: Un prix fixe

 Un prix fixe.

Ph'lip et Merrienne ne sont pas d'accord.

 

Moussieu l'Editeu,

 

J'm'en vais vos raconté agniet la conversâtion que j'eûmes, la Merrienne et mé, hier au sé au sujét d'chais réunions d'férmiers et marchands pour tâchi de fixé l'prix des patates d'ichin jusqu'au r'nouvé.

 

Ch'tait la Merrienne tch'y qu'menchi, comme de couôtume, par me pôsé des tchéstions. A qu'menchi ou voulit savé si j'criyais que l'projét réussithai, “car”, ou dit, “j'ai bein d'la peine à craithe que nos férmiers, pour la preumié fais dans lûs vie, réstethont d'accord pour pûs d'un couplye de s'maines, si autant. Tu les connais aussi bein comme mé, et tu dais savé qu'au jour d'agniet, comme dans l'pâssé ch'est châtchun pour sé.”

 

1953: Un raide bouan dîner

 L'Assembliée d'Jèrriais.

Un raide bouan dîner.

 

Lé preumié dîner d'l'Assembliée eut lieu Jeudi au sé, lé 22 d'Janvyi, 1953, à l'Hôtel dé St. Jean. I' fut un si grand succés qué v'la tch'encouothage l'Assembliée dans l'espéthance qué ch'es'sa eune occasion annuelle dans l'temps à v'nîn.

 

Dévant s'assiéthe à tabl'ye, les jannes Dlles Marguerite Le Couteur et Marguerite Binet présentîtent un touffet d'flieurs à Mme Edwards, (la danme du Président), à Mme Marie Le Couteur, (danme du Président du Comité Social, tch'était responsabl'ye pour l's arrangements du dîner), à Mlle Florence M. Hacquoil, (pour san bouan travas comme Ségrétaithe-Assistante duthant la preunmièthe année d'existence dé l'Assembliée), et à Mlle Lucille Picot (Ségrétaithe-Assistante actuelle).

 

Comme i' n'l'y-avait qu'du run pour assiéthe nonante pèrsonnes confortabl'yément, rein qu'chu nombre-là d'billets avait 'té vendu, mais i' vint eune demie-douzaine dé membres tchi n'avaient pon acaté d'billets à l'avanche, et pus-à-co qué d'les renv'yer siez ieux auvé lé fliâtchet, un coupl'ye dé p'tites tabl'yes fûtent arrangies, et en fîn d'compte nonante-sept pèrsonnes lus assiévîtent à mangi.

 

1953: La position est sérieuse

 La position est sérieuse.

A tch'y la faute? d'mande Merrienne.

 

Moussieu l'Editeu,

 

En pâslant, hier au sé, la Merrienne, ayant mentionné le nouviau Gouverneux et espéthé tch'y s'sait aussi bouon comme le moussieu qu'j'avons pérdu derniethement; ayant étout dêcliathe qu'oulle tait bein contente que chais fichus vîsiteurs, comme ou l's'appéle, nos avaient laissis trantchilles, touchit sûs l'sujet des tomates, du grand bézaar à la Trin'té, et du dernié scandal ichin à Saint-Ou, arrêtit une minute pour prendre haleine, et j'éthais voulu l'y pâslé du show à Springfield la s'maine tchi veint, mais ou n'voulit pas en ouï un mot.

 

“Ne v'la bétôt tchinze jours,” ou dit, “que tu n'pâsle de rain d'autre que d'jeunes vaques et de g'niches r'nouv'lées. J'en ai plien l'dos, mé, de tout chu gniolin-là, et je n'veur pas en entendre une autre pathole d'vant l'mais d'Mai prechain. Nou veint à s'en engnié.”

 

“Comme tu voudras,” j'l'y dit. “Es-tu par chance pûs intérêssie dans les couochons?”