1954: L's'Etats

 L's'Etats.

Merrienne a tchiquechose à dithe

 

Moussieu l'Editeu,

 

La Merrienne, tch'y liét la gâzette régulièthement touos les siers, ne m'laisse jamais la vaie, tandis qu'y'a tchiquechose tchi l'intéressé. Et, avant-hier ch'tait l's'Etats. Mé, étendu sûs l'sofa, à maintchi endormi, j'attendais, bein seûx que bétôt oulle éthait tchiquechose à dithe.

 

Tout d'un coup la v'là tch'y qu'menche: “il m'semblye, Ph'lip, que n'y'a pas hardi d'amiêtchi dans l's'Etats chais jours. J'veins d'lièthe le rapport dé chein tchi s'pâssit Mardi matin et par chein qu'j'en vais, ch'est là vieille histouaithe. Par éxemplye ch'est cliait comme tout, que l'Sénateur Le Mérquand et l'Député Cyril Le Mérquand n's'entreaiment pas, et pourtant y nos est dit qu'un homme dait amé san vaisin comme l'y même.”

 

“Ch'est vrai assez, Merrienne,” j'l'y dit, “mais à qu'menchi, chais deux-là n'sont pas vaisins, et n'sont pas même couôusins, ch'est pourtchi chein qu'tu'as dit n'applique pas. Le vrai en est que l'Sénateur oppose le Député toutes les fais, et que l'Député en a yeu l'plien l'dos y'a longtemps. Au sujet d'l'Asséûthance Sociale y sont comme deux tchans tchi voudraient s'entre-battre et châtchun est comme un bœu tchi vait l'autre tchi l'y fianqué une rouoge couleu d'vant l'siers. Ch'est, sans doute, deux honnêtes hommes, mais y sont par natuthe, comme le g'va au Bram Dêspérques et l'bidét au Frainque Billot que nou n'pouvait jamais méttre au câgnon ensemblyes, car y s'entre fichaient des cod'pids toutes les fais qu'nou n'v'nait à la foyèthe.”

 

La Merrienne hauchit l's'êpaules. “Si ch'est d'même,” ou dit, “n'y'a rain à faithe. Mais, Ph'lip, peux-tu m'dithe tchèsque les Etats s'en vont faithe de chu projét au sujét d'la Baie d'Saint-Ou? J'ai veu qu'l'affaithe est r'minse pour le moment, mais, dans t'n'opinion tchèsque en s'sa la fin?”

 

“Damme, Merrienne,” j'l'y dit, “je n'sais pas, mais à ma veue chu projét-là est une vraie folie, et la miyeu chose que l's'Etats peuvent faithe ch'est d'l'envié au royaume des taupes. Chein tchi m'êtonne chais qu'la Chambre n'la pas fait y'a long-temps. J'n'ai jamais, dans toute ma vie entendu autchune chose de pûs riditichule.”

 

“Ni mé ni n'n'tout,” ou dit. “Nou dit qu'y'a un imbécile de né à châque minute, mais y m'semble que y'en a pûs en Jêrri au jour d'agniet. A qu'menchi, j'voudrais savé tchèsque-y fut résponsablye pour chutte folle idée-là au qu'mench'ment. Tu n'me dithas pas que ch'tait un Jèrriais!”

 

“Nan, Merrienne, bein seux,” j'l'y dit. “Ch'tait tchique angliais ou angliaise tch'y s'mint dans la tête que la Baie d'Saint-Ou tait un biauté natuthelle tchi dév'thait être prêservée comme oulle est. L'idée d'chais gens-là ch'est que l's'Etats dév'thaient accaté tout l'têrrain pour empêchi aut'chun de bâti là. Y'a même yeu une collécte. Mais n'y'a pas yeu assez d'sous promins, et ach'teu ch'est l's'Etats tch'y sont d'mandés d'méttre lûs main dans lûs pouchétte.”

 

“Et mes trais vrégies et quatre pérques que j'héthiti d'man pèthe dans l'mitan d'la Baie,” ou s'fit, “peuvent-y m'forchi d'les vendre. La têrre ne vaut rain, j'sais bein chonna, car ch'n'est qu'du sablion, mais j'l'y tcheins quand-même, car ch'n'est pas d'agniet qu'oulle appartcheint à la famillye. Et dans l'temps d'papa, y'avait tréjous deux ou trais biches là.”

 

“Si l's'Etats pâssent chu projét-là, Merrienne,” j'l'y dit, “tu éthas à vendre au prix qu'nou l'offritha. Mais, n'te gène pas, je s'y à-bein-près seux qu'y'a assez d'membres dans la Chambre pour dithe à chais gens-là d'allé lûs couochi.”

 

“Si j'crivais qu'y'avait authun dangi,” ou dit, “j'lév'thais la cliameur de Hâro. Mais j'ai ocquo une miyeuthe idée.

 

“Oh bon,” je m'fit, “et tchès-que ch'est?”

 

“J'enviêthais touos chais lunatiques-là à d'meuthé dans la Baie d'Saint-Ou tout l'hivé,” ou raiponnit, “et j'garantis que les siens tch'y s'saient ocquo en vie à la fin du mais d'Mars n'voudraient jamais en appréchi. J'y'ai tait, mé, dans chutte route-là quand y ventait, et j'sais bein chein qu'ch'est.”

 

“Et mé étout, ma vieille,” j'l'y dit, “et je n'y'ai jamais tait à pid, même en êté sans attrapé une raide suée d'fraid.”

 

Ph'lip

1954