1956: Les candidats et lus dépenses.

 Les candidats et lus dépenses.

 

Moussieu l'Editeu,

 

Ch'est Jeudi au sé, et j'ai toute éspethance d'allé au show d'main car la fraid a molli et la bouonnefemme est de miyeuthe humeur. D'main au matin j'm'en vais travaillyi bein du et j'l'y prométtrai et r'venin d'bouonne heuthe pour l'y dithe tchèsqu'a fait les prix. Ou m'a dêjà dit qu'oulle espéthe que l'Jack A'Court et l'Frainque Avri remportethont les championnats pour l'honneu d'Saint-Ou, mais quant à mé ch'est accordant si un bouon chouaix d'Juges a tait fait. Le bouonhomme John Le Ruez, tch'y n'est pûs, m'dit une bordée que l'chouaix des Juges 'tait bétôt aussi important comme les bêtes tchi s'trouvaient dans l'ring mais sans doute il éxagethait.

 

Ach'teu, pâslant d'autre chose, tchèsqu'ou penséz d'chutte mésuthe que l'Député d'Saint Cliément, le jeune Peter Crill, a présenté au sujet des frais tchi peuvent être encouothus en temps d'êléction par des candidats pour un siége dans l's'Etats? Est-che que j'n'avons pas asséz de louaix ach'teu, et pourtchi, après tout, qu'un homme ne peut pas dêpensé ses sous à sa volonté? Dans les viers temps, ichin à Saint-Ou, un candidat tch'y n'éthait pas tait prêt à mettre sa main jusqu'au fond d'sa pouchétte éthait peut allé s'couochi et v'là tchi y'éthait servi bein. Et les sous dêpensés en bein d's'occasions faisaient du bein à hardi d'pouôres balloques tch'avaient bein d'la peine à gâgni lûs vie.

 

Quand, ayant liut des détails dans la gâzette, j'en pâslit à la Merrienne, ou voulut tout-d'suite savé la raison d'une patheille mésuthe; et tchèsque avait mint dans la tête du Député Crill de faithe une patheille bêtise. “Ch'n'est pas san pèthe, tch'éthait fait chonna,” ou s'fit, “ah, damme nan, car si jamais y'a yeu un bouon Jêrriais, ch'est l'y.”

 

“Vèthe,” j'l'y dit, “et ch'est grand dommage que chutte générâtion-là s'en va. Mais, quant à san fils y n'faut pas oublié tch'y présentit l'projet, pas en san propre nom, mais au nom du Comité d'Législâtion.”

 

“Mais,” ou dit, “chu comité avait-y yeu un mandat d'la Chambre?”

 

“Pas que j'sache,” j'l'y dit, “mais chonna n'est pas tréjous nécéssaithe, et pûs qu'probablye, le comité n'avait rain à faithe et voulait prouvé tch'y tait ocquo parmi les rangs des vivants.”

 

“Y m'semblye, mé,” ou dit, “tch'y s'saient aussi bein, ou même mûs, dans l'Royaume des Taupes ou dans les fonds pérdus, mais ach'teu, Ph'lip, éxplique-mé combain qu'un candidat pouôrra dêpensé.”

 

“Ah,” j'l'y dit, “ch'est accordant. Si ch'est une êlection pour Sénateur y s'sa pérmint de dêpensé tant, mais un candidat pour Connêtablye ou Député étha à être pûs r'gardant; ch'est-à-dithe y n'pouôrra pas dêpensé tant.”

 

“Ah,” ou s'fit, “et pourtchi chonna? Est-che qu'un Connêtablye et un Député n'valent pas un Sénateur? Par chein qu'j'en ai veu, mé, y peuvent valé tchiquefais mûs. Mais dis-mé Ph'lip, si chutte louai-là tait établyie, comment qu'nou pouôrrait savé combain qu'un candidat avait dêpensé? Et s'il avait dêpensé pûs qu'san montant, tchèsque nou l'y f'thait?”

 

“Il éthait à souméttre par êcrit au Gréfficier Judiciaire, touos les détails de ses dêpensés, avec les r'chus et tout l'restant. Mais si y'avait tchique mêprinse dans les chiffres, ou des r'chus tchi mantchaient, y pouôrrait dithe tch'y s'était trompé, mais que ch'n'tait pas d'sa faute, car y n'avait jamais yeu bouonne mémouaithe, épis dans l'temps sa belle-mèthe tait v'nue pour une vîsite et que n'y'avait pas yeu une minute de paix dans la maison. Comme chonna, y s'en cliérgithait. Avec chonna j'peux vais à-bein-près djais-sept maniéthes d'êvadé la louai. Le fait est, Merrienne, que jamais chutte louai-là pouôrrait être minse en forche, et que n'y'étha qu'une chose à faithe quand l'Projét d'veindra d'vant l's'Etats.”

 

Ph'lip.

1956