1959: Le Portinfé n'est pas content

 Le Portinfé n'est pas content.

Merrienne a un r'miède.

Au Portinfé,

Jeudi-au-sé.

 

Moussieu l'Editeu,

 

La Merrienne a yeu tout-plien à lièthe dans la gâzétte hier et agniet, et mé étout, mais pour dithe vrai, Moussieu, j'n'en sommes pas un mio pûs savants et j'avons arrivé à la conclûsion que d'nos jours et comme les affaires vont au moment, l'assemblyiée d's'Etats n'a pas l'tchoeu de r'fûsé autchune demande, et comme chonna tout l'monde dév'thaient être satisfaits.

 

Mais, assez drôlement, j'n'y sommes pas, la bouonnefemme et mé, car j'n'aimons pas à vais les sous du publyic gaspillis, comme a 'tait la règlye chutte s'maine. Chein que j'dîsons nous, ch'est que si y'a une mâsse de sous dans l'coffrefort, ch'est bête de les dêpensé comme nou les vait dêpensés d'nos jours, au lieu d'en méttre une partie à côté comme prôvision contre les mauvais jours, tchi pouorraient v'nin en autchun temps. Tchèsqu'y nos a dit, par exemplye que l'année tchi veint y n'pouorrait pas nos v'nin tchique maladie contagieuse tchi viéd'dait nos hôtels et nos boarding-houses dans l'couothant de tchiques jours? J'n'avons pas r'oublié que n'y pas longtemps, qu'une Duchésse tch'y 'tait pour pâssé une longue vacance ichin avec ses êfants, dit à-bétôt à Jêrri et s'en r'fut bein vite parsque y'avait yeu yunne ou deux causes de la sorte... Enfin, moussieu, y faut éspethé que chonna ne s'arriv'tha pas et que Jêrri continuetha à prospethé.

 

Ach'teu, la Merrienne est bein intérêssie dans chein tch'a 'tait dit dans l's'Etats au sujét du Collège Victoria et ou voudrait avé votre avis, car la Jane, notre grande, y'avait dit y'a tchique temps qu'oulle avait idée d'envié san chinquième mousse, le p'tit John, là. Y pathait que le p'tit balloque est mauvais comme le djâble et presque hors de contrôl et ou criyait qu'au Collège y s'sait forchi d'obéï à ses maîtres et apprendrait un mio de discipline.

 

Quant ou m'dit chonna, j'me mint à rithe, car le John a dêjà parmi ses camathades deux p'tits scélérats tch'y vont à chu Collège là, épis quand-même, il est iniothant comme tout. Mais, entre nous, Moussieu, ch'est bein sérieux chein que l'Sénateur Krichéfski et d'autres ont dit, car Jêrri a tréjous 'tait ordgueilleux d'san Collège. Ch'est ach'teu au Député John Le Merquand de prendre les m'suthes nécéssaithes pour rémédié les d'fauts, car après tout ch'est l'y tch'est l'Président du Comité d'Educâtion, et y n'peut pas êvité sa share de la bliaume et d'la résponsabilité.

 

Epis moussieu, la Merrienne veur savé tchèsqu'a 'tait fait sans l'affaithe d'la missis Godel et ses vaques. Nous avait comprint que l'Sénateur Le Boutillyi s'n'allait pôsé tchiques tchéstchons au Député Baal et sûs un sens y l'fit, et l'Comité d'Agritchultuthe s'en est dêshallé jusque ichin, mais nou n'voudrait pas craithe que ch'est fini.  Quand j'vêrrai le Clifford Le Vêsconte, j'l'y d'mand'dait tchèsque est la position, car j'comprends que, comme bein d'autres, il est hardi intérrêssi.

 

Y n'faut pas oublié le Comité des Biautés Natuthélles et la pérmission tch'ils ont donné pour un grand bâtisse sûs l'Av'nue Victoria. J'avons liut, la Merrienne et mé, l'explicâtion donnée par le Président (un angliais, mais je n'savons pas pourtchi!) et je n'viyons qu'bliâse. Mais chein tchi nos est cliait ch'est que d'pûs en pûs y'a une tendance d'la part du comité de pérmettre des bâtisses ouèsqu'y n'dév'thait pas y'en avé, et malheutheusement l's'Etats n's'en gènent pas comme y dév'thaient.

 

Sûs chu point-là, ma bouonnefemme me dit qu'ou voudrait vais notre Député, le Mâjeur de Gruchy, avé pûs d'pouvé. “Si ch'tait l'y tch'y dirigeait l's'affaithes,” ou dit, quand j'avions pâslé et distchuté pour une pôse, “nou vêrrait tchiquechose de bein difféthent.”

 

“Sans doute,” j'm'accordit. “A qu'menchi nou n'vêrrait pas d'vîsiteurs et l's'Hôteliers annonc'thaient des réunions d'créanciers.”

 

“Tant mûs!” ou s'fit.

 

“Et bein vite les angliais domiciliés ichin s'en r'îthaient seiz-yeux.”

 

“Tant mûs!”

 

“Et, dans p'tit d'temps nou vêrrait la vieille milice r'êtablyie, et la Campagnie d'Saint-Ou, le Mâjeur à la tête, à gallopé dans la Baie et à faithe des manoevres complitchies parmi l'geon et les ronches sûs les hauteurs de la Grève-de-Lécq.”

 

“V'la tchi lûs f'thait du bein,” ou dit.

 

Et moussieu, j'en finîmes là, mais j'ne s'sais pas surprint d'vais la Merrienne, yun d'chais jours, gaffé san parapluie et méttre san bonnet pour allé consulté l'Mâjeur. Oulle en est bein capablye.

 

Ph'lip.

1959