1957: Portraits en Ciné

 L'Assembliée d'Jèrriais

Rêunion Mensuelle.

 

La rêunion mensuelle eut lieu Vendrédi au sé, lé 31 dé Mai, à 8 heures, dans la Salle dé l'Eglyse dé la Ville (Church House). I' s'y trouvit eune huiptantaine dé membres et ammins, mais la saison d'patates en empêchit d'autres d'êt' présents. J'eûmes lé grand pliaisi d'aver auve nous Mme Ph. de Veulle, dé Londres.

 

Portraits en Ciné.

 

Après l's affaires dé l'Assembliée et l'êlection dé nouvieaux membres, lé Sieur G. W. Bertram nos divertit auve des portraits en Ciné.

 

Au c'menchement, i' nos montrit la côte dé Jèrri, en faisant l'tou' d'l'île en baté. Et pis, en Dgèrnésy et d'biaux portraits d'Hèrme, en couleur. Nou's trouvit ès Ecréhos, parmi les rotchièrs et l's ouaiseaux, et, pus tard, j'fûmes ès Minquièrs. Lé Président, qui s'y r'connaît parfaitement, nos donnit toutes les explyications nécessaires.

 

N'ou peut cèrtainement féliciter lé Sieur Bertram sus sa collection d'veues dé chès parages ichin - pas hardi connus par la majorité d'Jèrriais. Enfin, ch'est eune bouanne manière d'y v'yagi sans être malade!

 

Ensuite, j'eûmes lé pliaisi d'vaie des portraits en rares couleurs du pays des “Cotswolds,” en Angliéterre. Coins pittoresques, vielles crouaix, pliaiches du Marchi, et charmants villages! Tous en fûtent ravis, et lé Sieur Bertram erchut, auve les r'mèrciements du Président, dé longs appliaûdissements.

 

1957