1952: L'Assembliée d'Jèrriais

 L'Assembliée d'Jèrriais.

 

La quatrième assembliée mensuelle eut lieu vendredi lé 25 d'avri dans la Salle d'Agritchultuthe à St. Hélyi souos la présidence du Sénateu Hedley Le Riche Edwards. Y'avait eune bouonne souaixantaine dé membres présents. Lé rapport dé l'assembliée du mais d'mar fut liu par la Ségrétaithe Assistante et, suivant la proposition dé Moussieu F. J. Hacquoil s'gondée par Maît' Frank Trachy, lé rapport fut approuvé et adopté à l'unanimité. Eune lettre êcrite par lé Président à Maît' Frank R. Le Brun, membre au Gambia, et la rêponse fûtent liues à la rêunion. Eune lettre d'èrmèrcyîments à Moussieu A. G. Harrison, Editeu Gérant dé l' “Evening Post”, pouor s'n offre génétheuse d'aîdgi autant tch'i' pouorra à l'Assembliée au sujet d'not' langue et sa charmante rêponse fûtent liues ès membres. Lé Trésôryi étant absent d'l'Ile n'y'avait pon d'comptes à passer.

 

Les membres fûtent învités à prendre part dans eune pétite compétition prépathée par Maît' Fraînque Le Maistre et d'mandés d'trouver l'êtchivalent en Jèrriais. Si nou juge par l'enthousiasme apporté à chu sujet-là, ch'tait bein êvident qu'les membres 'taient hardi întérêssis et s'mîndrent en travas d'bouon tchoeu, et ch'tait vrainment un pliaîsi à vaie. Quand vînt l'moment dé corrigi lus êfforts plusieurs membres tchestchionnîtent l'întèrprétation et donnîtent des singnifications supplémentaithes.

 

Lé janne Françouais Amy L'Maistre et san fréthe Douard fûtent dé grande utilité à la Ségrétaithe Assistante et il est à d'sither qué j'ayons pus d'jannes gens comme membres car la consèrvation dé not' langue dépend en réalité sus ieux.

 

La préchaine chose était les discours impromptu. Le Député Slade fut l'preunmyi à nouos donner s'n opinion sus cèrtain sujet et, s'lon li, l's hommes sont tout à fait capabl'ye dé faithe lé p'tit travas d'lus femmes, mais à s'n idée les femmes, lus trouv'thaient bein vite en diffitchulté s'i' fallait accomplyi la tâche pus difficile et bein seux pus împortante dé l'homme.

 

Mdlle. K. Le Boutillier né nouos donnit pas l'împression qu'ou faîsait sèrvi un carillon mais 'tait tout d'même d'avis qué ch'est un înstrument bein utile sustout quand faut happer l'baté. Maît' George de Gruchy Noël tch'aime hardi à exprinmer s'n opinion eut l'opporteunité dé l'faithe sus la tchestchion des femmes à porter les braies. Mde. M. Trachy heutheuesement est en faveur dé prêsèrver la vie fanmiliale et pense comme la majorité des gens d'bouon sens qu'les jannes filles en d'ssous d'vîngt ans sont bein mus auve les pathents.

 

Moussieu Francis J. Hacquoil nouos pâlit sus la mode et il aime bein mus les cheinnes dé y'a chent ans car les faichons 'taient hardi pus distîngies. Maît' Fraînque Trachy étout aimait mus les danmes auve dé longues robes tchi brîngeaient les routes et les crinnolinnes tch'offraient un abri pouor les galants modestes. Moussieu F. V. L'Feuvre nouos pâlit bein sîncéthement sus “la destinée,” et nouos donnit d'ses expéthiences pèrsonnelles.

 

Eune liste d'ouaîsieaux fut apportée par Mdes. A. Perchard, K. Le Maistre, M. Trachy, L. A. Benest, Mdlles. K. Le Boutillier et E. Syvret, Mêssieurs G. W. Bertram, S. Alexandre et sustout deux raides bouonnes listes dé nouos pus jannes contribuants F. A. et E. A. Le Maistre. Les membres fûtent învités d'apporter des listes dé ditons Jèrriais concèrnant l'temps pouor la préchaine assembliée lé drein vendrédi du mai d'mai.

 

Les mêssieurs et danmes tchi suivent fûtent êlus comme nouvieaux membres à l'unanimité: Messrs. R. T. Cabot, J. T. Amy, R. de Gruchy, F. J. Dorey, Moussieu et Mde. W. P. Le Marquand, Mdes. M. Le Gresley, A. Poignand, Elsie Balleine, Olive Crill, E. Partridge et Mdlles. H. B. Le Maistre, Amy Labey, Lucille Picot, E. Le Seelleur, Marie Hacquoil et Emily Blampied.

 

Ach't'heu lé Comité c'menche à penser tch'i' faudra bein vite chèrchi eune pus grand' salle pouor assiéthe lé monde!

 

 1952