1952: Un jour de naissance

 Un jour de naissance.

Chen qu'Merrienne voudrait vais.

 

Moussieu l'Editeu,

 

Lundi ch'tait l'jour de naissance à la Merrienne. Y n'faut pas me d'mandé tch'il âge qu'oulle a, car ch'est une chose que nou n'mentionne pas. J'ai r'mértchi, entre nous, Moussieu, que pour à-ben-près djais ans, la bouonnefemme, accordant à san caltchul, n'a pas veilli d'un seul jour.

 

Quant à mé, chonna n'me gène pas du tout, et quand man jour de naissance arrive, et qu'nou veint m'félicité, j'lûs dis, tout net et cârré que je n's'y pas si jeune comme aut'fais, mais que j's'y bein lien d'être fichu.

 

Mais la Merrienne, avec toutes ses bouonnes qualités, a ses p'tits d'fauts, et ou n'aime pas qu'ses vaisins, en la félicitant, aient dans l'idée qu'ou n'peut pas ocquo faithe chen qu'ou faisait y'a quarante ans. Les femmes sont si drôles!

 

Ach'teu, Lundi matin, la preumié chose, j'l'y souhaitit many happy returns of the day, comme nou dit en angliais, épis je d'sendit pour l'y faithe une tâsse de tais. En qu'menchant l'jour bein, nous a tréjous bouonne éspéthance tchi finitha d'même, et dans l'couothant d'ma longue vie, Moussieu, j'ai r'mértchi que n'y'a rain tchi met une femme de si bouonne humeur comme une tâsse de tais au liet. Et j'donne en avis à tout jeune homme tch'est en s'mathiant de prendre avis à mes mots.

 

Y fut dit, une bordée, tchi n'fallait jamais allé s'couochi après avé yeu du brit avec sa femme, et avec le tchoeu ocquo plien de mârisson, mais mé j'maintcheins que ch'n'est pas d'même. Ch'n'est pas l'sé tchi conte dans d'pathéilles affaithes, mais l'matin, et la vraie manièthe d'asseûthé un jour trantchille ch'est d'sauté hors du liet d'bouonne heuthe, et d'apporté une tâsse de tais à la bouonnefemme. Et surtout y n'faut pas oublié tchiques lopins d'chucre, car le chucre à l'êffet d'adouochi l'tchoeu.

 

Quand vint Lundi au sé la famille se réunit siez nous, avec tchiques vaisins, comme de couôtume, et l'grand parleux fut bétôt remplyi. En honneu d'l'occâsion, la Merrienne avait dêshallé deux bouteilles de vin, et y'avait étout d'la limonade pour les avers. Oulle avait fait des gâches et des mérveilles (oulle est r'nommée pour ses merveilles) et un grand pâté d'pommes. J'y'avais dit qu'ou s'dêrangeait trop, mais, ma fé! quand tout fut fini y n'réstait pas une goute dans les bouteilles, pas une mielle de gâche ou mérveilles, et quant au pâté, chen tchi réstait sûs l'pliat n'éthait pas satisfait une môque.

 

Ch'tait notre grand, le John, tch'y propôsit la santé du jour. Avec l'y il avait am'né sa femme et lûs raccashie d'mousses, et l's'autres en avait fait autant. Pas êtonnant qu'la mangeaille dispathu si vite. Il est raide travailleux, notre John, mais y n'a jamais yeu l'don d'la pathole. La Merrienne a tréjous dit tch'il éthait fait un bouon Député, car y n'éthait jamais fatidgi la Chambre avec de long discours, mais éthait tréjous tait là pour dithe 'contre' et ou considèthe que ch'est là chin qu'nou dév'thait s'attendre d'un bouon Député d'campagne.

 

Y fit d'san mûs en proposant la santé, mais il avait une vêrrée d'vin à la main, et y s'contentit d'souhaité une longue vie et tout succès à sa mèthe. Chen tch'il avait dans l'idée, sans doute, ch'tait qu's'il avalait san vêrre sans pèrdre d'temps, il éthait une chance d'en gaffé un autre lérmin.

 

Après l's'applaudissements, la Merrienne, tch'y tait vîsiblyement touchie, dit mércie bein des fais, épis ou continuit.

 

“Je n'sais pas combein d'jours tchi m'restent à vivre, bouonnes gens, mais y'a des choses que j'voudrais vais d'vant m'n'allé. A qu'menchi j'voudrais vais notre p'tit Jêrri un mio pûs comme y tait dans man jeune temps. J'voudrais vais un mio pûs d'amiêtchi parmi les gens, et surtout parmi des vaisins. J'voudrais vais les membres d's'Etats tch'y tait pour la louai d'Asseûthance Sociale forbannis pour vingt ans. J'voudrais vais man Ph'lip prendre le championnat au show des Trais Pâraisses. J'voudrais vais la résurrection d'notre vieille Milice, et yun d'mes p'tits-fils Corpotha dans la Compagnie d'Saint-Ou. J'voudrais vais tchiques bouonnes saisons d'patates, en sorte que nou pouôrrait rencontré un marchand sans même l'y dithe bonjour, et un bantchi sans avé à l'y hallé san chapé. Oh, grand doux! combain qu'y'a d'choses que j'voudrais vais!”

 

Mais à chu moment-là j'nos fîmes tous à crié “hourrâ!” et la Merrienne l'vit san vêrre et but à la santé d'la compagnie.

 

Ph'lip.

1952