1953: La decision d's'Etats

 La decision d's'Etats.

 

Quand je r'vint d'la ville Mardi-au-sé, j'trouvit la Merrienne bein lassée. Ou qu'menchit par me dithe qu'on n'en pouvait pûs.

 

“Presque tout l'jour,” oulle ajoûotit, “j'ai tait sûs mes pids à lavé, nétti et éscrobbé chais fichus ormers. La prechaine fais qu'tu m'en apporte, Ph'lip, tu peux t'fié que che s'sa té qu'étha la djobbe, car quant à mé j'en ai plien l'dos et mes vieilles gambes sont à maintchi paralisées.”

 

“Vèthe, mais, Merrienne,” j'l'y dit, “tu m'avais promint un fricot d'ormers pour man tais et des crêpes étout. Tu n'veux pas m'dithe que chonna n'est pas prêt?”

 

“Nan,” ou raiponnit, “et tu peux r'mércié la Providence que tu'as une bouonne femme. Allons, assieds-té, et quand j'éthons mangi l's'ormers, je f'thai des crêpes. Une fais finis, tu m'dithas tchesqu'ils ont fait dans l's'Etats.”

 

Une heuthe après, plien d'ormers et d'crêpes, j'm'assis dans ma grand'tchaise, et j'allumit ma pipe. La Merrienne se mint à rabilyie l'siège d'une pathe de brais tch'en avait grand besoin. Bétôt. “Eh bein, dis-nous,” ou s'fit, “Nos garçons s'en-vont-y faithe lûs service ichin ou en Angliéterre?”

 

“Nos garçons,” j'l'y dit, “ne f'thont lûs service ni ichin, ni en Angliéterre, car l's'Etats ont décidé tch'y n'en f'thont pas dutout. Si y'en a tch'y veulent n'y'étha rain pour l's empêchi d'allé d'l'autre bord, mais tu peux t'fié qu'la grande mâjorité ne bouogé'geont pas un pouce. A ma veue ch'est r'grétt'ablye.”

 

“Mais, j'pensais,” ou dit, qu'y'avais tchéstchon d'ram'né notre vieille Milice. “Estche-que notre Député n'avait pas chonna dans l'idée, et l'Jack Le Mérquand éthout?”

 

“Oui, sans doute,” j'l'y dit, “mais quand l'Mâgeur de Gruchy eu a pâslé, la Chambre n'a pas voulu l'êcouté. Et il a pâslé bein pourtant.”

 

“Je ne comprends pas,” ou dit, “J'admets que j'tais tout-à-fait contre l'idée du Comité d'la D'fense, mais j'avais tréjous creu qu'nou r'vêrrait la Compagnie d'Saint-Ou, comme aut'fais à drîllyi et tithe au bianc, avec lûs sergents et lûs carpôthaux. Absolûment, Jêrri dév'thait faithe tchiquechose, autrement, Ph'lip, iun d'chais jours, l'Angliétêrre pouôrrait s'mettre dans la tête de nos informé, tout net et carré qu'ou peut s'pâssé d'nos patates et d'nos béstiaux. Dans les circonstances j'n'éthions pas grand'chose à dithe.”

 

“Tu'as raison, Merrienne,” j'l'y dit. “Après tout, en Angliétêrre, tout garçon de djais-huits ans est forchi d'faithe san sérvice, et ch'n'est pas juste qu'ichin n'y'étha rain ditet. Nou dév'thait faithe tchique petite chose, au mains, pour prouvé à l'Angliétêrre que je n'sommes pas si ingrats comme tout chonna. Mais ach'teu que l'Président du Comité a décidé d'résigni, nou n'peut pas vais trop cliaithement tchi m'suthes que l'nouviau lot peuvent prendre. Seux et certain que je n'voudrais pas lûs djobbe.”

 

“Damme! ni mé ni'n'tout,” ou dit, “ch'est une sale tappe que nous a donné au Sénateur Collas et ses collègues. Mais y'a une autre chose. Le Comité des Biautés Natuthelles a tait fichi à la porte étout. Y m'semblye que nos Etats qu'menchent à faithe une habitude mé, de s'dêfaithe de lûs Comités. Nou n'viyait pas tant d'chonna dans les viers temps.”

 

“Nan,” j'l'y dit, “mais chonna ch'tait parsque y'avait tréjous trais Jurés-Justiciers sûs chaque Comité, et les membres d'Campagne ne avaient grands peux, et ni ôsaient pas l's'oppôsé. N'oublie pas étout qu'y'avait trais Recteurs tch'y supportaient prèsque tréjous les Jurés. Pour mettre l'affaithe en un mot, dans chais temps-là, les Comités faisaient comme y voulaient, mais ach'teu y faut tch'y faichent comme nou lûs dit, ou bein nou les flianque dehors. Comme j'avons dit bein des fais, ma Merrienne, les temps sont changis.”

 

“Sûs touos les sens,” ou s'accordit, “mais quant ès Etats je n'sais si ch'est pour le mûs.”

 

Ph'lip.

1953