1953: L'ouvertuthe des Boutiques

 L'ouvertuthe des Boutiques

 

Hier matin, après dêjeuné, la Merrienne se mint dans la tête tch'il tait temps de qu'menchi à plianté. J'n'y t'nais pas pûs qu'chonna, car à m'n'âge, Moussieu, ch'est une djobbe que nou dév'thait pouvé laissi à des gens pûs dêgourdis.

 

Mais, enfin, pûstot qu'd'ardgumenté avec la bouonnefemme, j'décidit d'm'y mettre, et de qu'menchi avec le p'tit betchet en d'vant d'la muthaille dans l'gardin. Le temps tait bé, et d'l'autre but du gardin y'avait deux rouogegorges et un couplyé d'mêles à s'entre faithe la cârre. Quand j'arrivit, avec une câsse de patates, ma bêque, et une bouq'tée d'gouâino, ch'tait tout-à-fait pliaisant, - mais malheutheusement v'la tchi n'duthit pas longtemps, car, après deux ou trais rangs, j'attrapit un têrriblye ma dans l'dos, et j'eut à rentré dans la tchuîsine pour mé r'pôsé, malgré les r'montrances de la Merrienne, tch'y voulait m'atchûsé d'piercheuseté. Mais quand j'l'invitit à s'y mettre pour un change ou fut bein prêt de m'fliantchi sa chavétte à la tête.

 

N'y'avait qu'une chose à faithe; ch'tait de m'taithe et de t'nin bon. Ch'est chein que j'fit, et un mio à la fais, la Merrienne se trantchullîsit, et j'eumes le dîné, et pûs tard le tais, en r'pos.

 

Après chonna, quand j'avais aidgi, comme de couôtume, à lavé la vaisselle, ocquo j'tiomes assis aupi d'un p'tit feu, la Merrienne s'mint à pâslé d's'Etats.

 

“Que j's'y contente, Ph'lip,” ou qu'menchit, “qu'la Chambre ne voulit pas entret'nin chu Projet pour ouvri les boutiques au Dîmanche. Absolûment le Comité tch'introduîsit chonna n'sont pas bein dans la tête.”

 

“Ch'là s'pouôrrait,” j'l'y dit, “mais n'oublie pas tch'y n'ont pas abandonné l'idée. Pûs qu'probablye qu'nou r'vêrra l'Projet d'vant long, mais je n'crai pas que l's'Etats donn'nont lûs sanction.”

 

“Faut l'éspethé,” ou dit, “autrement n'y'éthait autchune limite à lûs folies. Chein qu'je n'peux pas comprendre chais l'objet d'un Projet tchi dév'thait être envié tout-d'suite au royaume des taupes. Quant à mé j'avons dêjà tait bein trop lien sûs chutte route-là. J'ai ouï, par exemplye, qu'au Dimanche au-sé, en ville, y'a pûs d'monde à chais fichus pictures que nou n'trouve dans l's'Eglîyes et les Chapelles. Pas êtonnant qu'nos jeunes gens prennent le mauvais qu'min. Jamais j'n'ai comprint pourtchi que l'Baillyi d'chu temps-là donnit sa pérmission.”

 

J'l'y dit que ch'tait à condition que nou n'montrethait que des pictures religieux. “Mais,” j'ajouotit, “v'la tchi n'duthit pas longtemps. Au jour d'agniet y'a pûs d'femmes poudrées et à maintchi nues que d'sermons. Che s'sait d'même avec les boutiques. A qu'menchi n'y'en éthait qu'yunne ichin et là, mais v'la tchi f'thait d'la jalousie tout-d'suite, et d'vant long tout s'sait ouert. Tu comprends, sans doute, que ch'est pour le bénéfice des vîsiteurs, et que ch'ne s'sait qu'pour l'êté.”

 

“Oh!” ou s'fit, “ch'est d'même. “Eh bein, quant à mé, j'aim'thais mûs vais touos les vîsiteurs, et surtout chais femmes en braies, au fond d'la mathe-au-Seigneur. Si chonna continue, man Ph'lip, le temps veindra que personne n'îtha au tchulte et qu'au lieu d'un jour de r'pos la s'maine, y'étha sept jours de travas. Et ch'est chonna qu'nos Etats appèlent du progrès! Hélas! ouèsque notre p'tit Jêrri s'en va?”

 

“Eh bein, Merrienne,” j'l'y dit, en allumant ma pipe, “vraiement je n'le sais pas, mais y'a une chose, bouonnefemme, tch'y n'peuvent pas nos hallé avec tout lûs progrès et touos lûs changements. Tch'y tâchent comme y veulent, y n'peuvent pas nos hallé, à des gens d'notre âge, nos memouaithes de Jêrri dans les jours que nou tait pûs libres, et d'un biau but pûs heutheux. Chonna nos appartcheint, et j'y tcheindrons jusqu'à la fin, malgré yeux et tout ch'qu'y pouôrront faithe.”

 

“Ch'est bein vrai, man Ph'lip,” ou dit, “ch'est bein vrai.”

 

Ph'lip.

1953