1957: Qué ch'est préféthablye dé craître, des Patates Angliaiches à la pliaiche dé Royales

 L'Assembliée d'Jèrriais

Rapport dé la Rêunion du mais d'Novembre.

 

La rêunion mensuelle eut lieu Vendrédi, lé 22 d'Novembre, dans la Salle Pârouaissîale dé St. Louothains. Y'avait à bein près 150 membres et amis présents. I' n'y avait pon hardi d'affaithes pour chutte séthée'chin, et auprès qu'les minnutes fûtent lius et quatre nouvieaux membres êlus, le Président annoncit qué si nécessaithe les proposants des nouvieaux membres es'saient responsablyes pour la preumié souscription, pour l'amour d'aidgi au trésôryi à faithe ses r'chus.

 

Lé débat.

 

J'avions l'Sieur Trachy dans la tchaise pour lé dêbat. D'vant faithe la beinv'nue ès quatre qui s'n'allaient nos d'viser, lé Sieur Trachy fit d's'apologies pour lé Sénateu Le Marquand qui n'avait pas veu san c'min cliai pour v'nîn à ce sé, et qui fallait être bein r'merciant au Sieur George Baudains qui prennait par à la dreine minute.

 

Le sujet du dêbat 'tait... “Qué ch'est préféthablye dé craître, des Patates Angliaiches à la pliaiche dé Royales.” Lé Sieur W. F. Sarre nos pâlit en faveur, et i' nos dit qué y'avait 44 personnes t'chavaient dé faithe lus chouaix entre des Royales et des “Ulster Premier,” et qué l'pus grand nombre favorissaient les angliaiches, et ch'est pourtchi n'y'avait pas d'dangi qué ches'chîn f'thaient tort au marchi d'Jerri. Lé Sieur Sarre criyait qué les fermiers dévthaient pouver craître la sorte dé patates qui voulaient.

 

Comme opposeux du sujet j'avions not' président, lé Sieur C. P. Billot, I' nos racontit comment qu'avaû l's années la Royale avait 'té crue avec grand succès, et qu'ou récoltait bein, quand ou 'tait bein ramassée. I' liut des buts dé d'dans des lettres qu'il avait èrchu des marchands angliais qui dîthes combein bouonne qué la Royale était.

 

Lé Sieur Baudainsé tout 'tait en faveur des angliaiches, et i' nos dit qué la Royale n'était pas classée comme tout-à-fait heuthive ach'teu, et qu'i' cryait qué la patate avait perdu sa forche par aver 'té crue pus d'60 ans dans l'même terrain. La Royale 'tait bein langtemps à sé r'buter auprès qu'oulle avait 'té g'lée, et l'haînu 'tait hardi à cranndre.

 

Lé Sieur Percy Le Masurier souôtînt la Royale et dit qué y'en avait bein des sortes et qué si les fermièrs craissaient la sorte qui s'adonnait avec lus terres il' éthaient dé raides bouonnes récoltes. I' dit qué y' avait des fripons parmi les marchands angliais, qué y'en avait d'ieux qui mèrtchaient les patates mal, et qu' chenn'chîn pouvait nos faithe tort. I' tait hardi en faveur d'aver un “Potato Marketing Board.” I' finit san discours avec détermination... “Vive la Royale.”

 

Y'eut deux ou trais membres qui palîyant, mais i'n'ieu pas fort dé tchestions. Lé Sieur Trachy fit un résumé du dêbat et d'mandit ès membres dé voter, et y'eut eune grande majorité en faveur des Royales.

 

Dialogue.

 

Mesdames Alice Blampied et Eileen Le Sueur nos amusîtent hardi auve un dialogue entouor les înspecteurs sus les fermes; nou-s'ithait un but d'vant en trouver deux pour èrciter comme ches deux dames 'chin!

 

Ermèrciements.

 

Lé Sieur J.N. Richard sé l'vit et proposit un vote dé r'mèrciements à touos les siens qu'avez prîns part et au Connêtablye pour nos aver prêter la Salle.

 

1957