1952: Les shows et les juges

 Les shows et les juges.

Tchesque Ph'lip en crai.

 

Moussieu l'Editeu,

 

Ch'est Vendredi matin, et y faut qu'jé m'dêpêche, car j'm'en vais au show des Trais Pâraisses, et l'heuthe s'avanche. Ch'est la faute à la Merrienne, tch'y m'a donné man dêjeuné ben pûs tard que d'couôtume. Ou l'a fait d'exprès, je l'sais ben, car oulle est tréjous d'même quand j'veur allé à un show d'bêtes.

 

Malheutheusement, j'n'ai rain à montré chutte fais. J'avais une g'niche tchi prométtait assez ben, mais ou n'a pas fait d'piéchot, et je n'gâgn'nais rain d'la trâné jusqu'à Saint-Pierre.

 

J'pense ben que che s'sa comme de couôtume à chu show. Ne v'là pûs d'chinquante ans qu'j'y vais et tréjous ch'est la même boutique. Les vrais juges sont le long des cordes, et l's'individus dans l'rang n'y connaissent rain, et éthaient fait ben mûs d'résté siez yeux. Nous entendra des r'mérques comme chonnechin.

 

“Je n'sais vraiement pas comment tch'y veinent à chouaisi ditet pour jugi des bêtes. N'en v'la yun, par exemplye, - je n'l'y donn'nais pas une biche à jugi. Toutes les fais tch'y va dans l'ring ch'est pour faithe des bêtises. Et l'autre ne connait pas une g'niche pliene d'une g'niche r'nouv'lée. Il est grand temps d'changi notre Comité.”

 

“R'garde, Nickless, vé-tu chais trais-là, d'l'autre bord du ring. Ch'est yeux tch'y s'en vont jugi les sweepstakes. Crai-tu tch'y dév'thaient être là à vais les classes jugi?”

 

“Nânin, damne!” Aut'fais quand les juges des sweepstakes et des championnats arrivaient, nous l's'enfreumaient dans un appartement et les laissait là avec un patchet d'cartes, une bouaite de dominos et tchiques bouteilles de litcheu. Quand nou tait prêt pour yeux, nous allait les chérchi, et nou tait seux tch'y n'avaient veu rain. Chonna ch'tait dans l'temps de John Le Ruez, le grand Fraînque Le Bro, le p'tit George Marett, et ben d'autres bouons juges sûs tch'y nou pouvait s'fié.”

 

“Vèthe, épis quand y donnaient la sweepstake à yunne tch'avait fait l'quatrième prix, y pouvaient tréjous explitchi que ch'tait les juges d'la classe tch'avaient fait la mêprinse. Et les v'là tous à ardgumenté en fumant lûs cigâres et l'vant lûs verres. Ch'tait ben pliaisant, mais ach'teu nos mêssieux tch'y jugent les sweepstakes, fument des cigarettes et prennent bouon soin de donné la sweep à un preumié prix. Ch'est d'même que l's'affaithes vont.”

 

Epis, Moussieu, y'en a tch'ont tréjous une extchûse quand lûs bêtes ne gâgnent pas. Yun ditha qu'les juges ont grand besoin d'une pathe de lunettes, un autre ditha qu'y'un des juges ne la jamais aimé d'pis tch'y fut battu à Saint-Martin. “Et pourtant,” y dit, “il éthait deu savé qu'la mènne tait la miyeuthe d'un biau but. Mais seux et cértain que si j'montre une bête, il est là pour l'abafoué.” Et un traizième voudra savé pourtchi qu'les juges d'agniet n'vont pas, comme aut'fais, pour les gros piechots.”

 

“Dans man temps,” y s'fait, “une g'niche pouvait avé l'dos à maintchi rompu, et la coue teurtre, mais s'oulle avait un gros piéchot nou pouvait être seux qu'ou veindrait dans les prix. Mais au jour d'agniet, nou n'sait pas ouèsque nous en est.”

 

Un critique r'mèrque que dans l'temps d'san pèthe la vaque qu'a fait l'championnat n'éthait pas seulement gâgni un prix d'pâraisse. “Te r'souveins-tu, Bram, d'la sienne que j'montrit en nonante-neuf, du Vier Golden Lady! Ch'tait-là une vaque, mais nou n'en vait pas d'même ach'teu.”

 

Enfin, Moussieu, nou dit souvent qu'les temps sont changis, mais, heutheusement, je n'peux pas vais qu'chonna s'applique ès shows. Y'a ocquo tout-plien d'bouonnes bêtes, tout-plien d'bouons juges, et tout-plien d'hospitalité. Et j'dis mé, que tandis que tout îtha ben aves les shows, notre p'tite île de Jêrri réstetha solide sûs ses fondâtions. Etes-vous de m'n'opinion?

 

Ph'lip.

1952